Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Oshike hatu lihongo mOmbiibeli?

 ETUKULWA 3

Kalunga okwa shita ovanhu nelalakano lashike?

Kalunga okwa shita ovanhu nelalakano lashike?

1. Kalunga okwa shita ovanhu nelalakano lashike?

KALUNGA okwa hala ovanhu va hafele onghalamwenyo. Okwa li a shita omulumenhu nomukainhu wotete, Adam naEva, va kale moshikunino shiwa. Okwa li a hala va dale ounona, va ninge edu alishe oparadisa nova file oshisho oinamwenyo. — Genesis 1:28; 2:8, 9, 15; tala omafatululo oitya pexulilo lembo, oshitwa 6.

2. (a) Otu shi shii ngahelipi kutya Kalunga ota ka wanifa po osho a lalakanena? (b) Mbela ovanhu va tya ngahelipi Kalunga a hala va kale kombada yedu, nokwa hala va kale ko oule wefimbo li fike peni?

2 Mbela oto diladila kutya ope na ngoo efimbo olo hatu ka kala meduparadisa? Jehova okwa ti: “Ame nde shi tota, Ame ohandi shi wanifa yo.” (Jesaja 46:9-11; 55:11) Osha yela kutya Jehova ota ka wanifa po osho a udaneka, nokape na osho tashi ka ya moshipala elalakano laye. Okwa ti kutya edu “ine li shita li kale ombuwa,” ndele okwe li shita nelalakano. (Jesaja 45:18) Okwa hala kombada yedu alishe ku kale ovanhu. Mbela ovanhu va tya ngahelipi Kalunga a hala va kale kombada yedu, nokwa hala va kale ko oule wefimbo li fike peni? Ombiibeli otai ti: ‘Ovayuki [ile, ovo hava dulika], otava ka fyuulula oshilongo, ndee tava kala mo alushe.’ — Epsalme 37:29; Ehololo 21:3, 4.

3. Molwaashi ovanhu ohava yahama nohava fi, epulo lilipi tashi dulika u lipule?

3 Kunena, ovanhu ohava yahama nohava fi. Moilongo ihapu ovanhu ohava lwifafana nokudipaafana. Ashike osho hasho Kalunga a li a lalakanena. Mbela oshike sha ningwa po, nomolwashike? Ombiibeli oyo aike tai dulu oku shi yelifa.

 OMUTONDI WAKALUNGA

4, 5. (a) Olyelye a li a popya naEva moshikunino shaEden okupitila meyoka? (b) Ongahelipi omunhu oo a li omunashili ta dulu okuninga ombudi?

4 Ombiibeli oya ti kutya Kalunga oku na omutondi oo ha “ifanwa ondiaboli naSatana.” Satana okwa li a popya naEva moshikunino shaEden okupitila meyoka. (Ehololo 12:9; Genesis 3:1) Okwa li a ningifa eyoka li kale la fa olo tali popi. — Tala omafatululo oitya pexulilo lembo, oshitwa 7.

5 Mbela Kalunga okwa shita Satana Ondiaboli? Ahowe. Umwe womovaengeli ovo va li meulu eshi Kalunga ta longekidile Adam naEva edu okwa li e lininga Ondiaboli. (Job 38:4, 7) Osho otashi shiiva ngahelipi? Ongahelipi omunhu oo a li omunashili ta dulu okuninga ombudi? Nonande ka li a dalwa ombudi, oha hovele okukala a hala oinima oyo ihe fi yaye. Oha kala ta diladila kombinga yoinima oyo, noha kala e na omahalo a xwama. Opo nee ngeenge okwa mono omhito, oha vake po oinima oyo. Kungaho okwe lininga ye mwene ombudi. — Lesha Jakob 1:13-15; tala omafatululo oitya pexulilo lembo, oshitwa 8.

6. Osha enda ngahelipi opo omweengeli umwe a ninge omutondi waKalunga?

6 Omweengeli oo naye okwa li a kulika omahalo mai. Konima eshi Jehova a shita Adam naEva, okwe va lombwela va dale ounona nova ‘yadife edu.’ (Genesis 1:27, 28) Otashi dulika omweengeli oo a li te lifufya ta ti: ‘Ovanhu aveshe ovo otava dulu okulongela nge ponhele yokulongela Jehova.’ Eshi a kala te lipula luhapu shi na sha naasho, osha kulika ehalo laye lokukala a hala okulongelwa. Onghee, okwa lombwela Eva oipupulu nokwe mu pukifa. (Lesha Genesis 3:1-5.) Mokuninga ngaho, okwe lininga Satana Ondiaboli, omutondi waKalunga.

7. (a) Omolwashike Adam naEva va fya? (b) Omolwashike hatu kulupa nohatu fi?

7 Adam naEva inava dulika kuKalunga eshi va lya oiimati.  (Genesis 2:17; 3:6) Kungaho, ova nyona kuJehova, nomokweendela ko kwefimbo ova ka fya, ngaashi naanaa Jehova a li e va lombwela. (Genesis 3:17-19) Ovana vaAdam naEva navo ova ninga ovalunde, nomolwaasho hava fi. (Lesha Ovaroma 5:12.) Natu tale koshihopaenenwa osho tashi ke tu kwafela tu ude ko kutya omolwashike ovana vaAdam naEva ve li ovalunde. Diladila nee ngeno to teleke omboloto moshipana sha ndonyoka. Omboloto nayo otai ka kala i na edidiliko olo. Adam okwa ninga omulunde omolwokuhadulika kuKalunga. Molwaashi fye oludalo laAdam, atusheni ovalunde, ile tu tye otwa ndonyoka pafaneko. Ohatu kulupa yo nohatu fi molwaashi atushe otu li ovalunde. — Ovaroma 3:23; tala omafatululo oitya pexulilo lembo, oshitwa 9.

8, 9. (a) Oshike osho Satana a li a hala Adam naEva va itavele? (b) Omolwashike Jehova ina hanauna po Adam naEva nosho yo Satana meendelelo?

8 Satana okwa li a tokola okuhadulika kuJehova eshi a heka Adam naEva va nyone. Okwa li a hala Adam naEva va itavele kutya Jehova omunaipupulu nomupangeli mwii oo ine va halela ouwa. Kungaho, Satana okwa li a hala kutya ovanhu inava pumbwa okulombwelwa kuKalunga osho ve na okuninga. Okwa li yo ta ti kutya Adam naEva otava dulu okutokola kuvo vene osho shi li mondjila naasho sha puka. Mbela Jehova okwa li ta ka ninga po shike? Okwa li ta dulu okuhanauna po Adam naEva nosho yo Satana, nokungaho kapa li vali ngeno tapa ka kala ovanhu ihava dulika. Ndele mbela ngeno osho osha ulika ngoo kutya Satana omunaipupulu? Hasho nandenande.

9 Jehova ina hanauna po Adam naEva nosho yo Satana meendelelo omolwokuhadulika kwavo. Ponhele yaasho, okwa efa ovanhu ve lipangele vo vene oule wefimbo. Osho osha li tashi ka yandja oumbangi wa yela kutya Satana omunaipupulu nonokutya Jehova okwa halela ovanhu ouwa. Ohatu ke lihonga shihapu shi na sha naasho mEtukulwa 11.  Ndele ongahelipi shi na sha netokolo olo Adam naEva va ninga? Mbela ova li va ninga etokolo li li mondjila eshi va itavela Satana ndele tava kala inava dulika kuKalunga? Oinima aishe oyo Adam naEva va li ve na ova li ve i pewa kuJehova. Okwa li e va shita va wanenena, e va pa onhele iwa yokukala noilonga ihafifa. Ndele Satana ine va ningila sha shiwa nande. Mbela ngeno opo wa li, ngeno oshike wa ninga po?

10. Ehoololo la fimana lilipi atusheni tu na okuninga?

 10 Nafye kunena otu na okuninga omatokolo, nokukalamwenyo kwetu okwe likolelela komatokolo oo hatu ningi. Ohatu dulu okuhoolola okudulika kuJehova e li Omupangeli wetu nokuulika kutya Satana omunaipupulu. Ile ohatu dulu okuhoolola Satana a kale omupangeli wetu. (Epsalme 73:28; lesha Omayeletumbulo 27:11.) Kunena, ovanhu ashike vanini hava dulika kuKalunga mounyuni aushe. Osha yela kutya Kalunga haye omupangeli wounyuni ou. Ndele ngeenge haye ta pangele ounyuni ou, mbela olyelye omupangeli wao?

OLYELYE TA PANGELE OUNYUNI?

Ngeno omauhamba aeshe kaa li mepangelo laSatana, mbela ngeno okwa dula ngoo oku a udanekela Jesus?

11, 12. (a) Eshi Satana a li ta udanekele Jesus omauhamba otashi yandje oumbangi ulipi? (b) Omishangwa dilipi tadi koleke kutya Satana oye omupangeli wounyuni ou?

11 Jesus okwa li e shii kutya olyelye ta pangele ounyuni. Pomhito imwe, Satana okwa li “te mu ulikile omauhamba aeshe omounyuni nefimano lao.” Ndele ta udanekele Jesus ta ti: “Aishe ei ohandi i ku pe, ngenge to twile nge eengolo ndee to linyongamene nge.” (Mateus 4:8, 9; Lukas 4:5, 6) Lipula kutya: ‘Mbela ngeno omauhamba aeshe oo kaa li mepangelo laSatana, ngeno okwa dula ngoo oku a udanekela Jesus?’ Hasho nandenande, osha yela kutya omapangelo aeshe oku li koshi yewiliko laSatana.

12 Otashi dulika u lipule kutya: ‘Ongahelipi Satana ta dulu okukala omupangeli wounyuni ngeenge Jehova Kalunga omunaenghono adishe oye a shita oinima aishe?’ (Ehololo 4:11) Nonande Jehova oye a shita oinima aishe, Jesus okwa ti kutya Satana oye “omupangeli wounyuni ou.” (Johannes 12:31; 14:30; 16:11) Omuyapostoli Paulus okwa ti kutya Satana oye ‘kalunga kefimbo lounyuni ou.’ (2 Ovakorinto 4:3, 4) Omuyapostoli Johannes naye okwa ti: ‘Ounyuni aushe ou li mepangelo lomunawii.’ — 1 Johannes 5:19.

 OUNYUNI WASATANA OTAU KA HANAUNWA PO NGAHELIPI?

13. Omolwashike twa pumbwa ounyuni mupe?

13 Ounyuni ou otau ende tau naipala neenghono. Omu yadi oita, oulingilingi, oihelele nelongifo leenghono. Ovanhu itava dulu okuxulifa po omaupyakadi aeshe oo, kashi na nee mbudi kutya otava kendabala shi fike peni. Ndele mafiku Kalunga ota ka xulifa po ounyuni ou woukolokoshi poita yaye yaHarmagedon, ndele te u pingene po nounyuni mupe wouyuki. — Ehololo 16:14-16; tala omafatululo oitya pexulilo lembo, oshitwa 10.

14. Kalunga okwa hoolola lyelye a ninge Ohamba yOuhamba waye? Ombiibeli oya xunganeka shike kombinga yaJesus?

14 Jehova okwa hoolola Jesus Kristus a ninge Ohamba yOuhamba ile yepangelo laYe lomeulu. Omido omayovi da pita, Ombiibeli oya xunganeka kutya Jesus ota ka pangela e li “Ohamba yombili,” nepangelo laye otali ka kala fiyo alushe. (Jesaja 9:5, 6) Jesus okwa honga ovashikuli vaye va ilikane shi na sha nepangelo olo eshi a ti: “Ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:10) Ohatu ke lihonga mEtukulwa 8 nghee Ouhamba waKalunga tau ka pingena po omapangelo oo e li mounyuni kunena. (Lesha Daniel 2:44.) Konima yaasho, Ouhamba oo otau ka ninga edu alishe oparadisa. — Tala omafatululo oitya pexulilo lembo, oshitwa 11.

OUNYUNI MUPE OU LI POPEPI

15. ‘Edu lipe’ otali ulike kushike?

15 Ombiibeli oya xunganeka ya ti: “Fye hatu teelele eulu lipe nedu lipe omo tamu ka kala ouyuki.” (2 Petrus 3:13; Jesaja 65:17) Omafimbo amwe ngeenge Ombiibeli tai popi ‘edu,’ otai popi kombinga yovanhu ovo ve li kombada yedu. (Deuteronomion 32:1) Onghee hano, ‘edu lipe’ louyuki otali ulike kovanhu aveshe ovo hava dulika kuKalunga nokwe va nangeka noupuna.

16. Kalunga ota ka yandja oshali yashike kwaavo tava ka kala mounyuni mupe, noshike tu na okuninga opo tu ke i mone?

 16 Jesus okwa udaneka kutya ovo tava ka kala mounyuni mupe waKalunga otava ka pewa “omwenyo waalushe.” (Markus 10:30) Oshike tu na okuninga opo tu ka mone oshali ya tya ngaho? Opo u mone enyamukulo, lesha Johannes 3:16; 17:3. Onghalamwenyo otai ka kala ya tya ngahelipi meduparadisa? Natu ka taleni osho Ombiibeli tai ti.

17, 18. Otu shi shii ngahelipi kutya kombada yedu alishe otaku ka kala ombili, nonokutya ohatu ka kala twa amenwa?

17 Oukolokoshi, oita, ominyonena nelongifo leenghono otai ka xulifwa po. Ovakolokoshi itava ka kala po vali. (Epsalme 37:10, 11) Kalunga ota ka “xulifa po oita fiyo okeengaba dedu.” (Epsalme 46:10; Jesaja 2:4) Kombada yedu otaku ka kala ovanhu ovo ve hole Kalunga noha va dulika kuye. Otaku ka kala yo ombili fiyo alushe. — Epsalme 72:7.

18 Ovapiya vaJehova otava ka kala ve udite kutya ova amenwa. Pefimbo lOmbiibeli, Kalunga okwa li ha amene Ovaisrael ngeenge va li tava dulika kuye. (Leviticus 25:18, 19) Nafye itatu ka kala tu na oumbada washa mOparadisa. Ohatu ka kala alushe tu udite twa amenwa. — Lesha Jesaja 32:18; Mika 4:4.

19. Omolwashike hatu dulu okukala noushili kutya mounyuni mupe waKalunga otamu ka kala oikulya ya wana?

19 Otaku ka kala oikulya ya wana. Ombiibeli oya ti: “Moshilongo namu kale oshishipo shoilya, yo i mene fiyo keexulo deemhunda.” (Epsalme 72:16) “Ohatu ka punikwa” kuJehova “Kalunga ketu,” ‘nedu otali ka menifa oimeno yalo.’ — Epsalme 67:7.

20. Otu shi shii ngahelipi kutya edu otali ka ninga oparadisa?

20 Edu alishe otali ka ninga oparadisa. Ovanhu otava ka kala ve na omaumbo mawa nosho yo oikunino. (Lesha Jesaja 65:21-24; Ehololo 11:18.) Ounyuni aushe otau ka  ninga onhele iwa ngaashi ashike oshikunino shaEden sha li. Jehova ota ka kala he tu pe keshe osho twa pumbwa. Ombiibeli oya popya shi na sha naye ya ti: “Oto kamutulula eke loye ndee to palula oinamwenyo aishe kohokwe yoye.” — Epsalme 145:16.

21. Otu shi shii ngahelipi kutya ota pa ka kala ombili pokati kovanhu noinamwenyo?

21 Ota pa ka kala ombili pokati kovanhu noinamwenyo. Oinamwenyo itai ka monifa vali ovanhu oshiponga. Ounona itava ka ningilwa owii washa koinamwenyo, nokuli naayo ya nyika oshiponga kunena. — Lesha Jesaja 11:6-9; 65:25.

22. Jesus ota ka ningila shike ovo tava vele?

22 Ovanhu itava ka vela vali. Jesus okwa li a velula ovanhu vahapu eshi a li kombada yedu. (Mateus 9:35; Markus 1:40-42; Johannes 5:5-9) E li Ohamba yOuhamba waKalunga, Jesus ota ka velula keshe umwe. Kape na nande oumwe ta ka tya: “Aame oshingone.” — Jesaja 33:24; 35:5, 6.

23. Kalunga ota ka ninga po shike shi na sha naavo va fya?

23 Oonakufya otava ka nyumuka. Kalunga okwa udaneka kutya ota ka nyumuna ovanhu omamiliyona. Ombiibeli oya ti kutya “otaku ka kala enyumuko lovayuki nolovalunde.” — Lesha Johannes 5:28, 29; Oilonga 24:15.

24. Ou udite ngahelipi shi na sha noku ka kala mOparadisa?

24 Atusheni otu na okuninga ehoololo. Ohatu dulu okuhoolola okulihonga kombinga yaJehova noku mu longela, ile okuhoolola okuninga osho twa hala. Ngeenge otwa hoolola okulongela Jehova, ohatu ka kala nonakwiiwa ihafifa neenghono. Eshi omulumenhu umwe a li a pula Jesus e mu dimbulukwe ngeenge a nyumuka, Jesus okwa li e mu udanekela a ti: ‘Oto ka kala pamwe naame mOparadisa.’ (Lukas 23:43) Metukulwa tali landula ohatu ke lihonga shihapu kombinga yaJesus nonokutya ongahelipi ta ka wanifa po omaudaneko aKalunga.