Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Oshike hatu lihongo mOmbiibeli?

 ETUKULWA 15

Onghedi ya yuka yokulongela kalunga

Onghedi ya yuka yokulongela kalunga

1. Olyelye ta dulu oku tu lombwela nghee tu na okulongela Kalunga?

OMALONGELOKALUNGA mahapu ohaa ti kutya otaa hongo oshili kombinga yaKalunga. Ashike osho itashi shiiva molwaashi ohaa hongo oinima ya yoolokafana kombinga yaKalunga, nonghedi omo e na okulongelwa. Ongahelipi hatu dulu okushiiva onghedi ya yuka yokulongela Kalunga? Kalunga oye ashike ta dulu oku tu lombwela nghee tu na oku mu longela.

2. Ongahelipi to dulu okulihonga nghee u na okulongela Kalunga?

2 Jehova okwe tu pa Ombiibeli opo tu lihonge onghedi oyo i li mondjila yoku mu longela. Jehova oku na ko nasha naave note ke ku kwafela u mone ouwa mehongo laye okupitila mokukonakona Ombiibeli. — Jesaja 48:17.

3. Kalunga okwa hala tu ninge shike?

3 Ovanhu vamwe ohava ti kutya Kalunga okwa hokwa omalongelokalunga aeshe, ashike osho hasho Jesus a honga. Jesus okwa ti: “Hakeshe ou ta ti kuame: Omwene, Omwene! ta i mouhamba womeulu, ndelenee oye tuu ou ha longo ehalo laTate womeulu.” Nomolwaasho osha fimanenena opo tu lihonge kutya ehalo laKalunga olilipi noku li longa. Osho osha kwata moiti molwaashi Jesus okwa ti kutya ovo ihava dulika kuKalunga “ovakolokoshi.” — Mateus 7:21-23.

4. Jesus okwa popya shike kombinga yokulonga ehalo laKalunga?

4 Jesus okwe tu londwela kutya ngeenge otwa hala okulonga ehalo laKalunga, ohatu ka shakeneka omashongo. Okwa ti: “Indeni mu pite moshivelo sha finana. Osheshi oshivelo oshinene, nondjila oya mbwalangadja ei tai twala  mekano, ndele ava tava i mo ovahapu; ndele oshivelo oshinini nondjila oya finana ei tai twala momwenyo, novanini vongaho ovo tave i mono.” (Mateus 7:13, 14) Ondjila ya finana, ile onghedi ya yuka yokulongela Kalunga, otai twala komwenyo waalushe, ofimbo ondjila ya mbwalangadja, ile onghedi ya puka yokulongela Kalunga, otai twala mefyo. Ashike Jehova ina hala nande oumwe a kane. Okwa pa keshe umwe omhito e lihonge kombinga yaYe. — 2 Petrus 3:9.

ONGHEDI YA YUKA YOKULONGELA KALUNGA

5. Ongahelipi to dulu okudidilika mo ovo hava longele Kalunga monghedi ya yuka?

5 Jesus okwa ti ohatu dulu okudidilika mo ovo hava longele Kalunga monghedi ya yuka. Ohatu ka ninga ashike ngaho ngeenge otwa konakona osho va itavela nosho yo oilonga yavo. Jesus okwa ti: “Otamu va koneke koiimati yavo.” Okwa weda ko vali a ti: “Omuti keshe muwa ohau ima oiimati iwa.” (Mateus 7:16, 17) Osho inashi hala kutya ovo hava longele Kalunga ihava ningi omapuko. Ashike ohava kendabala okulonga osho sha yuka. Natu ka tale kwaasho tashi dulu oku tu kwafela opo tu didilike mo ovo hava longele Kalunga monghedi oyo a hokwa.

6, 7. Omolwashike elongelokalunga lashili la kanghamena kOmbiibeli? Oshihopaenenwa shaJesus otashi tu hongo shike?

6 Ehongo lavo ola kanghamena kOmbiibeli. Ombiibeli oya ti: “Omishangwa adishe da yandjwa keenghono dOmhepo yaKalunga odi shii kulonga nokukumaida nokupukulula nokutekula mouyuki, omunhu womuKalunga opo a kale a wana nokwa wanenena oshilonga keshe shiwa.” (2 Timoteus 3:16, 17) Omuyapostoli Paulus okwa li a shangela Ovakriste a ti: “Osheshi ondjovo yaKalunga mwe i uda kufye, mwe i tambula hangaashi ondjovo yovanhu, ndelenee ongaashi i li shili ondjovo yaKalunga.” (1 Ovatessaloniki 2:13) Elongelokalunga lashili ola kanghamena  ashike kEendjovo daKalunga, Ombiibeli. Inali kanghamena nande komadiladilo opanhu, komifyuululwakalo ile koinima imwe vali i lili.

7 Oinima aishe oyo Jesus a li a honga oya kanghamena kEendjovo daKalunga. (Lesha Johannes 17:17.) Okwa li ha tofa alushe mOmishangwa. (Mateus 4:4, 7, 10) Ovapiya vaKalunga vashili ohava shikula oshihopaenenwa shaJesus mokukala alushe tava hongo omahongo a kanghamena kOmbiibeli.

8. Jesus okwe tu honga shike shi na sha nokulongela Jehova?

8 Ohava longele Jehova aeke. Epsalme 83:19 ola ti: ‘Ove ou to ifanwa Omwene, [“Jehova,” ovelishe 18 mo-NW] ove auke u li po Omukombadambada medu alishe.’ Jesus okwa li a hala ovanhu va shiive kutya Kalunga kashili oye olyelye, nokwa li yo e va honga edina laKalunga. (Lesha Johannes 17:6.) Jesus okwa popya yo a ti: “Omwene Kalunga koye u noku mu twila eengolo, noye aeke u na oku mu kalela,” ile oku mu longela. (Mateus 4:10) Onghee hano, ovapiya vaKalunga ohava shikula oshihopaenenwa shaJesus. Ohava longele ashike Jehova aeke, hava longifa edina laye, nohava hongo yo ovanhu vakwao edina laKalunga naasho te ke tu ningila monakwiiwa.

9, 10. Ohatu ulike ngahelipi kutya otu holafane?

9 Ovalongelikalunga vashili ove holafane. Jesus okwa li a honga ovahongwa vaye va kale ve holafane. (Lesha Johannes 13:35.) Kashi na nee mbudi kutya ohatu kala peni, otwa dja meputuko lilipi ile otu li eehepele ile oipuna, ohole yetu yokuholafana otai ke tu hanganifa. (Ovakolossi 3:14) Nomolwaasho ihatu i koita noihatu dipaa ovanhu vakwetu. Ombiibeli otai ti: “Opo tuu opo tapa shiivika ovana vaKalunga novana vaSatana. Keshe tuu ou iha longo ouyuki, oye ke fi womuKalunga, naau e he hole omumwaxe.” Oya weda ko ya ti: “Fye otu nokuholafana, tu ha fe Kain, ou a dja  momunawii nokwa dipaa ondenge yaye.” — 1 Johannes 3:10-12; 4:20, 21.

10 Ohatu longifa efimbo letu, eenghono detu nosho yo oiniwe yetu opo tu kwafele ovanhu vakwetu nokutwaafana omukumo. (Ovaheberi 10:24, 25) Ohatu ‘ningile aveshe ouwa.’ — Ovagalati 6:10.

11. Omolwashike taku tiwa kutya ohatu ka xupifwa ashike okupitila muJesus?

11 Ova itavela kutya otava ka xupifwa ashike okupitila muJesus. Ombiibeli otai ti: “Exupifo la kala muye, osheshi kaku nedina limwe lilili koshi yeulu, la yandjelwa ovanhu omo tu nokuxupifilwa mo.” (Oilonga 4:12) MEtukulwa eti-5 lembo eli, otwe lihonga kutya Jehova okwa tuma Jesus opo a yandje omwenyo waye u li ekulilo lovanhu ovaduliki. (Mateus 20:28) Jehova okwa hoolola Jesus oye a ka pangele e li Ohamba kombada yedu. Nomolwaasho Ombiibeli otai tu lombwele kutya otu na okukala hatu dulika kuJesus ngeenge otwa hala tu ka kale nomwenyo fiyo alushe. — Lesha Johannes 3:36.

12. Omolwashike ihatu kufa ombinga moinima yopapolotika?

12 Ihava kufa ombinga moinima yopapolotika. Jesus ka li a kufa ombinga moinima yopapolotika. Eshi a li ta pangulwa, okwa li a lombwela omupangeli Omuroma Pilatus a ti: “Ouhamba wange kau fi womounyuni ou.” (Lesha Johannes 18:36.) Ngaashi Jesus, nafye otu li ovadiinini kepangelo laKalunga lomeulu, kashi na nee mbudi kutya otu li peni, itatu ka kufa ombinga moinima yopapolotika. Ndele nande ongaho, Ombiibeli oye tu lombwela tu ‘dulike kovapangeli,’ sha hala kutya, komapangelo. (Ovaroma 13:1) Ohatu dulika keemhango domoilongo omo tu li. Ashike ngeenge omhango yavo otai kondjifafana nomhango yaKalunga, ohatu ka hopaenena ovayapostoli ovo va ti: “Okudulika kuKalunga ku dule okudulika kovanhu.” — Oilonga 5:29; Markus 12:17.

13. Ohatu udifa shike kombinga yOuhamba waKalunga?

 13 Ova itavela kutya Ouhamba waKalunga oo ashike tau ka xulifa po omaupyakadi oo e li mounyuni. Jesus okwa ti: ‘Evangeli louhamba’ otali udifilwa ounyuni aushe. (Lesha Mateus 24:14.) Kape na nande epangelo lopanhu tali dulu okuninga osho Ouhamba waKalunga tau ke tu ningila. (Epsalme 146:3) Jesus okwe tu honga tu ilikane kombinga yOuhamba waKalunga eshi a ti: “Ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:10) Ombiibeli otai tu lombwele kutya Ouhamba waKalunga otau ka hanauna po omapangelo aeshe opanhu “ndelenee owo vene tau ka kala fiyo alushe.” — Daniel 2:44.

14. Oolyelye wa didilika kutya ohava longele Kalunga monghedi ya yuka?

14 Konima eshi wa konakona oitwa oyo, lipula kutya: ‘Mbela oolyelye omahongo avo a kanghamena kOmbiibeli? Oolyelye hava hongo ovanhu kombinga yedina laKalunga? Oolyelye ve holafane tashi di komutima nova itavela kutya Kalunga okwa tuma Jesus e tu xupife? Oolyelye ihava kufa ombinga moinima yopapolotika? Oolyelye hava udifa kutya Ouhamba waKalunga oo ashike tau ka xulifa po omaupyakadi etu? Eendombwedi daJehova ashike. — Jesaja 43:10-12.

MBELA OTO KA NINGA PO SHIKE?

15. Otu na okuninga shike ngeenge otwa hala Kalunga a kale a hokwa onghedi omo hatu mu longele?

15 Inashi wana ashike okukala wa itavela kutya Kalunga oko e li. Eendemoni nado oda itavela kutya Kalunga oko e li, ashike ihadi dulika kuye. (Jakob 2:19) Ngeenge otwa hala Kalunga a kale a hokwa onghedi omo hatu mu longele, katu na ashike okukala twa itavela kutya oko e li, ndele otu na yo okukala hatu dulika kuYe.

16. Omolwashike tu na okudja mo momalongelokalunga oipupulu?

 16 Otu na okudja mo momalongelokalunga oipupulu opo Kalunga a tambule ko onghedi omo hatu mu longele. Omuprofeti Jesaja okwa ti: “Djeni mo mokati kavo, lifeteni.” (Jesaja 52:11; 2 Ovakorinto 6:17) Nomolwaasho otwa pumbwa okweefa po oshinima keshe sha pambafana nomalongelokalunga oipupulu.

17, 18. “Babilon shinene” oshike, nomolwashike sha endelela okudja mo muBabilon shinene?

17 Omalongelokalunga oipupulu oelipi? Elongelokalunga keshe olo itali hongo ovanhu va longele Kalunga monghedi oyo i li metwokumwe nEendjovo daye. Ombiibeli otai ti kutya omalongelokalunga aeshe oipupulu oo “Babilon shinene.” (Ehololo 17:5) Omolwashike mbela? Omolwaashi omahongo mahapu oipupulu opalongelokalunga okwa tameka moshilando Babilon konima yEyelu laNoa. Omahongo oo oipupulu okwa tandavela kombada yedu alishe. Pashihopaenenwa, ovanhu ovo va li muBabilon okwa li hava longele oikalunga yomaludi atatu. Nokunena omalongelokalunga mahapu ohaa hongo ovanhu kutya Kalunga Omukwatatu, ashike Ombiibeli otai hongo kutya oku na ashike Kalunga umwe aeke kashili, Jehova, nosho yo kutya Jesus Kristus Omona waye. (Johannes 17:3) Ovanhu ovo va li hava kala muBabilon ova li yo va itavela kutya konima ngeenge omunhu a fi, ope na sha osho hashi xupu po shi na omwenyo nohashi dulu okuhepekwa moheli. Osho kashi fi shoshili nandenande. — Tala omafatululo oitya pexulilo lembo, oshitwa 14, 17 nosho yo 18.

18 Kalunga okwa xunganeka kutya mafiku omalongelokalunga aeshe oipupulu otaa ka xulifwa po. (Ehololo 18:8) Mbela ou udite ko kutya omolwashike sha endelela okufiya po elongelokalunga loipupulu? Jehova Kalunga okwa hala u ninge ngaho fimbo ina katuka onghatu. — Ehololo 18:4.

Oto ka kala oshitukulwa shoukwaneumbo womounyuni aushe ngeenge owa kala to longele Jehova pamwe noshiwana shaye

19. Ongahelipi Jehova te ke ku fila oshisho ngeenge owa tokola oku mu longela?

 19 Ngeenge owa tokola okufiya po elongelokalunga loipupulu ndele to hoolola okulongela Jehova, vamwe vomookaume koye ile ovapambele voye itava ka uda ko etokolo loye, notashi dulika va kendabale oku ku efifa po okulongela Jehova. Ashike kala u shii kutya Jehova ite ke ku efa. Oto ka kala oshilyo shoukwaneumbo wa hangana, oo u holafane shili noto ka kala yo u na eteelelo loku ka kala nomwenyo mounyuni mupe waKalunga. (Markus 10:28-30) Otashi dulika nokuli nookaume koye vamwe ile ovapambele voye ovo va li ve li omhinge netokolo loye lokulongela Jehova, va ka tokole okukonakona Ombiibeli.

20. Omolwashike sha fimana okulongela Kalunga monghedi ya yuka?

20 Monakwiiwa i li popepi, Kalunga ota ka xulifa po oukolokoshi aushe, nOuhamba waye otau ka pangela kombada yedu. (2 Petrus 3:9, 13) Olo itali ka kala tuu efimbo litunhula! Ovanhu aveshe otava ka longela Jehova monghedi oyo a hokwa. Onghee hano, osha fimana u katuke eenghatu paife u longele Kalunga monghedi ya yuka..

Lihonga shihapu

Omolwashike hatu ifanwa Eendombwedi daJehova?

Tala omatomheno atatu kutya omolwashike twa tambula ko edina olo.