Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshike hatu lihongo mOmbiibeli?

 ETUKULWA 17

Eilikano oli li oufembanghenda munene

Eilikano oli li oufembanghenda munene

‘Omushiti weulu nedu’ okwa hala okupwilikina komailikano etu. — Epsalme 115:15

1, 2. Omolwashike eilikano li li oshali ye likalekelwa, nomolwashike twa pumbwa okushiiva osho Ombiibeli tai hongo kombinga yeilikano?

MOKUYELEKANIFA edu neepulaneta dikwao mewangadjo, edu olinini neenghono. Ngeenge Jehova ta tale ovanhu aveshe ovo ve li kombada yedu, otava monika va fa eta lomeva li li mevela. (Epsalme 115:15; Jesaja 40:15) Nonande ovanhu ovanini neenghono mokuyelekanifa noinima ikwao meshito alishe, Epsalme 145:18, 19, ola ti: “Omwene oku li popepi naaveshe, have mu ifana, aveshe ava have mu ifana moshili. Ava, have mu tila, ote va wanifile eshi va hala, nonghuwo yavo ohe i udu, ndee te va xupifa.” Osho kashi fi tuu oufembanghenda munene! Jehova, Omushiti omunaenghono adishe, okwa hala tu ehene popepi naye, nokwa hala yo okupwilikina komailikano etu. Onghee hano, eilikano oli li oufembanghenda noshali ye likalekelwa oyo twa pewa kuJehova.

2 Jehova ota ka pwilikina ashike komailikano etu ngeenge ohatu popi naye monghedi oyo a hokwa. Ongahelipi hatu dulu okwiilikana monghedi oyo a hokwa? Natu ka taleni kutya Ombiibeli otai ti shike kombinga yeilikano.

OMOLWASHIKE TU NA OKWIILIKANA KUJEHOVA?

3. Omolwashike tu na okwiilikana kuJehova?

3 Jehova okwa hala tu ilikane kuye, ile tu popye naye. Osho otu shi shii ngahelipi? Alikana lesha Ovafilippi 4:6, 7, nokudiladila kombinga yeshivo olo lopahole. Omupangeli weshito alishe oku ku hole neenghono nokwa hala u mu lombwele kombinga yomaupyakadi oye nanghee u udite.

4. Ongahelipi okwiilikana kuJehova pandjikilile taku pameke oukaume woye naye?

 4 Eilikano ohali tu kwafele tu kale tu na ekwatafano lopofingo naJehova. Ngeenge ookaume ova kala hava lombwelafana omadiladilo nomaliudo avo nosho yo osho tave lipula nasho, oukaume wavo otau ka kala wa pama. Osho osha faafana nokwiilikana kuJehova. Jehova okwe tu lombwela omadiladilo nomaliudo aye okupitila mOmbiibeli, nokwe tu lombwela osho ta ka ninga monakwiiwa. Naave oto dulu yo oku mu lombwela omaliudo oye omoule mokukala ho popi naye pandjikilile. Ngeenge owa ningi ngaho, oukaume woye naJehova otau ka kala wa pama. — Jakob 4:8.

OSHIKE TU NA OKUNINGA OPO KALUNGA A PWILIKINE KOMAILIKANO ETU?

5. Otu shi shii ngahelipi kutya Jehova iha pwilikine komailikano aeshe?

5 Mbela Jehova oha pwilikine komailikano aeshe? Ahowe. Jehova okwa li a lombwela Ovaisrael pefimbo laJesaja a ti: “Nonande mu indile omaindilo mahapu, itandi [a] udu: osheshi omake eni oku yadi ohonde.” (Jesaja 1:15) Osho  otashi ulike kutya opo Jehova a pwilikine komailikano etu, otu na okuhenuka okuninga oinima oyo e tonde.

6. Omolwashike eitavelo la fimanenena? Ongahelipi to dulu okuulika kutya ou na eitavelo?

6 Ngeenge otwa hala Jehova a pwilikine komailikano etu, otu na okukala tu na eitavelo muye. (Markus 11:24) Omuyapostoli Paulus okwa ti: “Kape na ou ta dulu okuwapalela Kalunga, ngenge kape neitavelo, osheshi ou ta ehene kuKalunga e nokwiitavela nokutya, oko e li, naava tave mu kongo, ote va pe ondjabi.” (Ovaheberi 11:6) Inashi wana ashike okupopya kutya otu na eitavelo, ndele otu na yo oku li ulika mokukala hatu dulika kuJehova efiku keshe. — Lesha Jakob 2:26.

7. (a) Omolwashike tu na okukala nefimaneko nelininipiko ngeenge hatu ilikana? (b) Ongahelipi hatu dulu okuulika kutya ohatu ilikana tashi di komutima?

7 Otu na okukala ovalininipiki notu na efimaneko ngeenge hatu ilikana kuJehova. Omolwashike mbela? Natu tye nee ngeno otwa mona omhito yokupopya nohamba ile nomupresidende, nopehe na omalimbililo, ohatu ka popya monghedi yefimaneko. Jehova oKalunga Omunaenghono adishe, onghee hano, mbela ngeenge hatu popi naye katu na oku shi ninga nelininipiko nonefimaneko lomoule? (Genesis 17:1; Epsalme 138:6) Otu na yo okukala hatu ilikana hatu popi tashi di komutima, ndele hakweendulula ashike oinima ya faafana. — Mateus 6:7, 8.

8. Ngeenge hatu ilikana kombinga yoshinima shonhumba, oshike vali twa pumbwa okuninga?

8 Ngeenge hatu ilikana kombinga yoshinima shonhumba, otu na okukala metwokumwe neilikano letu. Pashihopaenenwa, ngeenge ohatu ilikana kuJehova kombinga yeemhumbwe detu dakeshe efiku, inatu pumbwa okukala ovananyalo twa teelela ashike Jehova e tu pe keshe shimwe, nonande ohatu dulu okulilongela fye vene. Otu na okukala hatu longo noudiinini nokutambula ko oshilonga keshe  osho hatu dulu okulonga. (Mateus 6:11; 2 Ovatessaloniki 3:10) Ile ngeenge otwa ilikana kuJehova e tu kwafele tu efe po okulonga oshinima shonhumba shii, otu na okuhenuka keshe osho tashi dulu oku tu yeleka tu ninge epuko olo natango. (Ovakolossi 3:5) Paife natu ka konakoneni omapulo oo haa pulwa luhapu kombinga yeilikano.

OMAPULO OO HAA PULWA KOMBINGA YEILIKANO

9. Otu na okwiilikana kulyelye? Johannes 14:6, ote tu hongo shike kombinga yeilikano?

9 Otu na okwiilikana kulyelye? Jesus okwa honga ovashikuli vaye va ilikane ‘kuTate yetu ou e li meulu.’ (Mateus 6:9) Okwa weda ko yo a ti: “Aame ondjila noshili nomwenyo; kape na ou te uya kuTate, ngenge hamuame ta pitile.” (Johannes 14:6) Onghee hano, otu na okwiilikana kuJehova oye aeke okupitila muJesus. Okwiilikana okupitila muJesus osha hala okutya ngahelipi? Opo Jehova a pwilikine komailikano etu, otu na okukala twa fimaneka ondodo oyo Jehova a pa Jesus. Ngaashi twe lihonga metetekelo, Jesus okwe uyile kombada yedu e tu xupife moulunde nefyo. (Johannes 3:16; Ovaroma 5:12) Jehova okwa nangeka po Jesus e li Omupristeri Omukulunhu nOmutokoli. — Johannes 5:22; Ovaheberi 6:20.

Oto dulu okwiilikana efimbo keshe

10. Mbela otu na okukala monghedi yonhumba ye likalekelwa ngeenge hatu ilikana? Shi yelifa.

10 Mbela otu na okukala monghedi yonhumba ye likalekelwa ngeenge hatu ilikana? Ahowe, Jehova ina teelela tu twe eengolo, tu kale omutumba ile tu kale twa fikama ngeenge hatu ilikana. Ombiibeli otai hongo kutya ohatu dulu okupopya naJehova tu li monghedi keshe yefimaneko. (Nehemia 8:6; Daniel 6:10; Markus 11:25) Eshi sha fimanenena kuJehova ngeenge hatu ilikana hanghedi omo tu li, ndele okukala nomitima da yuka. Ohatu dulu okwiilikana mokule ile momutima keshe apa tu li nopefimbo keshe kutya nee omutenya ile oufiku. Otu na elineekelo kutya  Jehova ota ka uda omailikano etu nokuli nonande kape na oo a uda osho twa popya. — Nehemia 2:1-6.

11. Oinima imwe ilipi hatu dulu okwiilikana kombinga yayo?

11 Oshike tu na okwiilikana kombinga yasho? Ohatu dulu okwiilikana kombinga yoshinima keshe shi li metwokumwe nehalo laJehova. Ombiibeli oya ti: “Ngenge hatu mu indile sha pahalo laye, ote tu udu.” (1 Johannes 5:14) Mbela ohatu dulu okwiilikana kombinga yoinima yopaumwene? Heeno. Okwiilikana kuJehova okwa faafana nokupopya nakaume kopofingo. Ohatu dulu okulombwela Jehova keshe osho tu na momadiladilo nomomitima detu. (Epsalme 62:9) Ohatu dulu okwiilikana e tu pe omhepo yaye iyapuki i tu kwafele tu longe osho sha yuka. (Lukas 11:13) Ohatu dulu yo okupula Jehova e tu pe ounongo opo tu ninge omatokolo e li pandunge, noku tu pe eenghono tu dule okulididimikila omaudjuu. (Jakob 1:5) Otu na okwiilikana Jehova e tu dimine po omatimba etu. (Ovaefeso 1:3, 7) Otu na yo okukala hatu kwatele mo vakwetu momailikano etu, ngaashi oilyo youkwaneumbo wetu, ovamwatate nosho yo ovamwameme meongalo. — Oilonga 12:5; Ovakolossi 4:12.

12. Oshike tu na okukala twa pitifa komesho momailikano etu?

12 Oshike tu na okukala twa pitifa komesho momailikano etu? Otu na okukala twa pitifa komesho Jehova nosho yo ehalo laye. Otu na oku mu pandula tashi di komutima omolwoinima aishe oyo e tu ningila. (1 Omafimbo 29:10-13) Otu shii kutya otu na okuninga ngaho molwaashi eshi Jesus a li kombada yedu okwa li a honga ovashikuli vaye nghee ve na okwiilikana. (Lesha Mateus 6:9-13.) Okwa ti kutya tete otu na okwiilikana opo edina laKalunga li yapulwe. Opo nee okwa weda ko kutya otu na okwiilikana Ouhamba waKalunga u uye nehalo laYe li longwe kombada yedu. Okwa ti kutya ngeenge otwa tumbula tete oinima oyo ya fimanenena eshi hatu ilikana, opo nee ohatu  dulu okutumbula nawa eemhumbwe detu. Ngeenge otwa pitifa komesho Jehova nehalo laye momailikano etu, ohatu ulike kutya oshike sha fimanenena kufye.

13. Omailikano etu oku na okukwata oule wefimbo li fike peni?

13 Omailikano etu oku na okukwata oule wefimbo li fike peni? Ombiibeli inai popya sha kombinga yaasho. Osha yela kutya omailikano etu otaa dulu okukala maxupi ile male she likolelela konghalo. Pashihopaenenwa, otashi dulika tu ilikane eilikano lixupi ofimbo inatu lya,  ashike ohatu dulu okwiilikana eilikano lile ngeenge hatu lombwele Jehova kombinga yomaupyakadi etu ile hatu mu pandula. (1 Samuel 1:12, 15) Inatu hala okwiilikana omailikano male opo ngeno tu fuule vakwetu, ngaashi ovanhu vamwe vopefimbo laJesus va li va ninga. (Lukas 20:46, 47) Jehova ka li a fuulwa komailikano a tya ngaho. Onghee hano, osho sha fimana kuJehova oshosho kutya otu na okwiilikana tashi di komutima.

14. Otu na okwiilikana lungapi, naasho otashi tu hongo shike kombinga yaJehova?

14 Otu na okwiilikana lungapi? Jehova okwe tu lombwela tu popye naye efimbo keshe. Ombiibeli oya ti kutya otu na okukala hatu “indile,” hatu ‘diinine mokwiilikana’ nosho yo ‘okwiilikana tuhe na edimbuko.’ (Mateus 26:41; Ovaroma 12:12; 1 Ovatessaloniki 5:17) Jehova okwe lilongekida alushe oku tu pwilikina. Ohatu dulu oku mu pandula  efiku keshe omolwohole yaye naashi ha yandje. Ohatu dulu yo oku mu pula e tu wilike, e tu pameke noku tu hekeleke. Ngeenge otwa lenga shili oufembanghenda wokwiilikana kuJehova, ohatu ka longifa omhito keshe tu popye naye.

15. Omolwashike tu na okutya “amen” pexulilo leilikano?

15 Omolwashike tu na okutya “amen” pexulilo leilikano? Oshitya “amen” otashi ti “osho,” ile “nashi kale ngaho.” Okutya “amen” ohatu ulike kutya osho twa popya meilikano oshoshili, sha hala kutya, otwa popya tashi di komutima. (Epsalme 41:14) Ombiibeli otai tu hongo kutya oshiwa yo okutya “amen” mokule ile momutima ngeenge umwe a ilikana opo tu ulike kutya ohatu tu kumwe naasho a popya. — 1 Omafimbo 16:36; 1 Ovakorinto 14:16.

NGHEE KALUNGA HA NYAMUKULA OMAILIKANO ETU

16. Jehova oha nyamukula ngoo shili omailikano etu? Shi yelifa.

16 Jehova oha nyamukula ngoo shili omailikano etu? Heeno. Ombiibeli oya ti kutya ye “Omuudi womailikano.” (Epsalme 65:3) Jehova oha pwilikine noha nyamukula omailikano taa di komutima ovanhu omamiliyona, nohe shi ningi meenghedi dihapu da yoolokafana.

17. Ongahelipi Jehova ha longifa ovaengeli novapiya vaye vokombada yedu opo a nyamukule omailikano etu?

17 Jehova oha longifa ovaengeli nosho yo ovapiya vaye vokombada yedu opo a nyamukule omailikano etu. (Ovaheberi 1:13, 14) Ope na oihopaenenwa ihapu yovanhu ovo va ilikana va kwafelwe va ude ko Ombiibeli, ndele konima ashike eshi va mana okwiilikana ova li va talelwa po kEendombwedi daJehova. Ombiibeli otai ulike kutya ovaengeli navo otava kufa ombinga ‘mokuudifa evangeli’ kombada yedu alishe. (Lesha Ehololo 14:6.) Shikwao vali, vahapu vomufye otwa ilikana kuJehova e tu kwafele moupyakadi ile eshi twa li tu na omhumbwe yonhumba, ashike otwa mona ekwafo olo twa li twa pumbwa okupitila momumwatate ile  momumwameme wonhumba. — Omayeletumbulo 12:25; Jakob 2:16.

Jehova ota dulu okunyamukula omailikano etu okupitila mOvakriste vakwetu

18. Jehova oha longifa ngahelipi omhepo yaye iyapuki nosho yo Ombiibeli opo a nyamukule omailikano etu?

18 Jehova oha longifa yo omhepo iyapuki opo a nyamukule omailikano etu. Oha longifa omhepo yaye iyapuki opo e tu wilike noku tu pameka eshi hatu ungaunga nomaupyakadi. (2 Ovakorinto 4:7) Oha longifa yo Ombiibeli opo a nyamukule omailikano etu noku tu kwafele tu ninge omatokolo e li pandunge. Ngeenge hatu lesha Ombiibeli, ohatu mono mo omishangwa odo tadi tu kwafele. Jehova ota dulu yo okulinyengifa umwe a popye oshitwa shonhumba pokwoongala osho she tu kuma ile omukulunhuongalo umwe meongalo e tu pe omayele okudja mOmbiibeli. — Ovagalati 6:1.

19. Omolwashike tashi dulika tu mone Jehova a fa ina nyamukula omailikano etu?

19 Omafimbo amwe otashi dulika tu lipule kutya, ‘Omolwashike Jehova ina nyamukula natango omailikano ange?’ Dimbuluka kutya Jehova oku shii kutya onaini nongahelipi e na okunyamukula omailikano etu. Oku shii osho twa pumbwa. Otashi dulika twa pumbwa okutwikila okwiilikana opo tu ulike kutya osho hatu ilikana otwe shi pumbwa ngoo shili nokuulika kutya otu na shili eitavelo muye. (Lukas 11:5-10) Omafimbo amwe Jehova oha nyamukula omailikano etu monghedi oyo tashi dulika inatu teelela. Pashihopaenenwa, otashi dulika tu ilikane kombinga yonghalo yonhumba idjuu. Jehova otashi dulika ashike e tu pe eenghono tu i lididimikile ponhele yoku i kufa po. — Lesha Jesaja 40:29.

20. Omolwashike tu na okwiilikana kuJehova lwoikando ihapu?

20 Okwiilikana kuJehova kaku fi tuu oufembanghenda wa denga mbada! Ohatu dulu okukala noushili kutya ota ka pwilikina komailikano etu. (Epsalme 145:18) Ngeenge otwa kala hatu ilikana luhapu kuJehova tashi di komutima, oukaume wetu naye otau ka kala wa kola.