Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oshike hatu lihongo mOmbiibeli?

 ETUKULWA 12

Ongahelipi to dulu okuninga kaume kaKalunga?

Ongahelipi to dulu okuninga kaume kaKalunga?

1, 2. Oolyelye va li ookaume kaJehova?

OLYELYE mbela wa hala a kale kaume koye? Nopehe na omalimbililo, omunhu oo u hole nohamu udafana nawa naye. Oku na yo okukala e na eenghedi nomaukwatya oo u hole.

2 Jehova okwa hoolola ovanhu vamwe va ninge ookaume kaye. Pashihopaenenwa, Abraham okwa li kaume kaJehova. (Jesaja 41:8; Jakob 2:23) Jehova okwa li yo e hole David. Okwa popya kutya David okwa li ‘omulumenhu e mu hokwa komutima waYe.’ (Oilonga 13:22) Jehova okwa li yo a tala ko omuprofeti Daniel “muwa unene.” — Daniel 9:23.

3. Omolwashike Abraham, David naDaniel va li ookaume kaJehova?

3 Osha enda ngahelipi opo Abraham, David naDaniel va ninge ookaume kaJehova? Jehova okwa li a lombwela Abraham a ti: “Ove wa uda ondaka yange.” (Genesis 22:18) Oha pange oukaume naavo hava dulika kuye nelininipiko. Nokuli nongudu yovanhu otai dulu okuninga ookaume kaye. Okwa li a lombwela Ovaisrael a ti: “Dulikeni kondaka yange, opo nee handi ka kala Kalunga keni, ndele nye otamu ka ninga ovanhu vange.” (Jeremia 7:23) Sha faafana, naave owa pumbwa okudulika kuJehova ngeenge owa hala okuninga kaume kaye.

JEHOVA OHA AMENE OOKAUME KAYE

4, 5. Jehova oha amene ngahelipi ookaume kaye?

4 Ombiibeli oya popya kutya Jehova ‘oha kwafa neenghono ovo have liameke kuye nomutima aushe.’ (2 Omafimbo 16:9) Okwa udanekela ookaume kaye  mEpsalme 32:8 a ti: ‘Onda hala ndi ku longe, ndi ku udikile ondjila, ei u nokweenda nayo; onda hala ndi ku pe omayele; eisho lange tali ku pashukile.’

5 Ope na omutondi omunaenghono oo ina hala tu kale ookaume kaJehova. Ashike Jehova okwa hala oku tu amena. (Lesha Epsalme 55:23.) Ohatu longele Jehova nomutima aushe molwaashi otu li ookaume kaye. Ohatu kala ovadiinini kuye nonande otu li meenghalo didjuu. Nafye otu udite ngaashi omupsalme oo a shanga kombinga yaJehova a ti: “Eshi Ye e li kolulyo lange, ihandi tengauka.” (Epsalme 16:8; 63:8) Ongahelipi Satana ha kendabala okuteya po oukaume wetu naKalunga?

OMALUNDILO ASATANA

6. Satana okwa popya shike kombinga yovanhu?

6 Otwe lihonga mEtukulwa 11 kutya Satana okwa li a shonga Jehova noku mu lundila kutya oku li omunaipupulu noiha ungaunga novanhu pauyuki, eshi ina efa Adam naEva va tokole kuvo vene osho shi li mondjila naasho sha puka. Embo lOmbiibeli laJob otali tu hongo kutya Satana okwa li yo a lundila ovanhu ovo va hala okuninga ookaume kaKalunga. Okwa ti ohava longele ashike Kalunga omolwouwa oo he va ningile, ndele hamolwaashi ve mu hole shili. Okwa ti yo kutya ota dulu okwaamuna ko keshe umwe kuKalunga. Natu ka taleni osho hatu lihongo mehokololo laJob, nanghee Jehova e mu amena.

7, 8. (a) Jehova okwa li e uditile ngahelipi Job? (b) Satana okwa popya shike kombinga yaJob?

7 Job okwa li lyelye? Okwa li omulumenhu omuyuki oo a li ko omido 3 600 lwaapo da pita. Jehova okwa popya kutya pefimbo opo kombada yedu kakwa li nande omunhu e mu fa. Okwa kala a fimaneka Kalunga nokwa li e tonde osho shii. (Job 1:8) Okwa li shili kaume kaJehova.

8 Satana okwa ti Job okwa li ashike ta longele Kalunga  omolwokuliholamwene. Satana okwa lombwela Jehova a ti: “Ove mwene, ndi shii, we mu amena keembinga adishe neumbo laye naaishe e i kwete. Ove wa nangeka noupuna oilonga yomake aye noimuna yaye ya hapupala neenghono moshilongo. Ndelenee nana eke loye u kume aishe e i kwete: ye ote ke ku liteeka shili moipafi yoye.” — Job 1:10, 11.

9. Jehova okwa li a efa Satana a ninge shike?

9 Satana okwa lundila Job kutya oha longele ashike Jehova omolwouwa oo he mu ningile. Okwa ti yo kutya ota dulu oku mu efifa po okulongela Jehova. Jehova okwa li a efa Satana a yeleke Job, a tale ngeenge Job okwa li ngoo kaume kaye shili molwaashi e mu hole ile hasho.

SATANA TA PONOKELE JOB

10. Satana okwa li a ponokela Job ngahelipi, na Job okwa li e linyenga ngahelipi?

10 Shotete, Satana okwa li a vakifa po nokudipaifa oimuna aishe yaJob. Opo nee konima okwa dipaifa yo ovapiya vahapu vaJob, nokungaho Job okwa li a kanifa oinima yaye aishe. Xuuninwa Satana okwa ka dipaa ovana vaJob 10 moshikungulu. Ashike Job okwa kala omudiinini kuJehova. Ombiibeli oya ti: “Puaishe oyo Job ina nyona sha ndele ina popya sha shokupa Kalunga oushima.” — Job 1:12-19, 22.

Jehova okwa li a pa Job ondjabi omolwoudiinini waye

11. (a) Oshike vali Satana a li a ningila Job? (b) Job okwa li e linyenga ngahelipi?

11 Satana ka li a shuna omutwe moipeta. Okwa li a shonga Kalunga a ti: ‘Kuma omakipa aye nombelela yaye, ye ote ke ku liteeka shili moipafi yoye.’ Okudja opo Satana okwa li a etela Job omukifi mudjuu. (Job 2:5, 7) Ashike natango pomhito opo Job ka li a efa po oudiinini waye kuJehova. Okwa ti: “Fiyo ohandi ka fuda mo omufudo wange, itandi ekeleshi po ouyuki [ile itandi efa po oudiinini] wange.” — Job 27:5.

12. Job okwa li a ulika ngahelipi kutya Satana omunaipupulu?

 12 Job ka li e shii sha kombinga yomalundilo aSatana ile kutya omolwashike kwa li ta monene oixuna neenghono. Okwa li ta diladila kutya Jehova oye a li te mu etele omaupyakadi. (Job 6:4; 16:11-14) Ashike nande ongaho, Job okwa kala omudiinini kuJehova. Nopehe na omalimbililo, Job ka li e lihole mwene. Okwa li kaume kaKalunga molwaashi okwa li e mu hole shili. Ashishe osho Satana a li a popya osha li oipupulu yongaho.

13. Oidjemo ilipi Job a li a mona omolwoudiinini waye?

13 Nonande Job ka li e shii osho tashi ningwa po meulu, okwa li a tokola okukala omudiinini kuJehova nokuulika kutya Satana omunaipupulu. Jehova okwa li a nangeka noupuna Job omolwoudiinini waye. — Job 42:12-17.

SATANA OTA LUNDILE OVANHU AVESHE

14, 15. Satana okwa lundila ovanhu aveshe ngahelipi?

14 Ohatu dulu okulihonga mehokololo laJob oilihongomwa ya fimana. Kunena, Satana ohe tu lundile kutya ohatu longele ashike Jehova omolwouwa oo he tu ningile. MuJob 2:4, Satana okwa popya a ti: “Omunhu keshe osho e shi na, te shi yandjele omwenyo waye.” Onghee hano, Satana ka li ashike a lundila Job aeke, ndele okwa lundila ovanhu aveshe kutya ove lihole vo vene. Omido omafele konima eshi Job a fya, Satana okwa twikila okukala ta sheke Jehova nokulundila ovapiya vaYe. Pashihopaenenwa, Ombiibeli oya popya mOmayeletumbulo 27:11 ya ti: ‘Kala u neendunge, omumwange, hafifa omutima wange, opo nee handi dulu okunyamukula omulundili [ile omusheki] wange.’

15 Ngeenge owa hoolola okudulika kuJehova nokukala omudiinini kuye oto ka ulika kutya Satana omunaipupulu. Nonande owa pumbwa okuninga omalunduluko onhumba monghalamwenyo yoye opo u ninge kaume  kaKalunga, olo olo etokolo la denga mbada to dulu okuninga. Satana okwa ti kutya ito ka kala omudiinini kuKalunga ngeenge u na omaupyakadi, nomolwaasho ha kendabala oku ku efifa po oudiinini woye kuKalunga. Ngahelipi mbela?

16. (a) Satana oha longifa eenghedi dilipi opo a efife po ovanhu okulongela Jehova? (b) Ongahelipi tashi dulika Satana ta kendabala e ku efife po okulongela Jehova?

16 Satana oha longifa eenghedi di lili naku lili opo a teye po oukaume wetu naKalunga. Oha ponoka “ngaashi onghoshi hai kumbu, nota kongo ou te mu xwake po.” (1 Petrus 5:8) Inashi ku kumwifa ngeenge ookaume koye, ovapambele voye ile vamwe ve lili tava kendabala oku ku efifa po okukonakona Ombiibeli nokulonga osho shiwa. Otashi dulika u kale u udite wa fa wa ponokelwa. * (Johannes 15:19, 20) Satana ohe lifefa yo “omwengeli wouyelele.” Nomolwaasho oha kendabala oku tu ningifa tuha dulike kuJehova. (2 Ovakorinto 11:14) Onghedi imwe vali oyo Satana ha longifa opo e tu efife po okulongela Jehova, omoku tu diladilifa kutya inatu wana nande okulongela Jehova. — Omayeletumbulo 24:10.

DULIKA KOIPANGO YAJEHOVA

17. Omolwashike hatu dulika kuJehova?

17 Ngeenge ohatu dulika kuJehova, ohatu ulike kutya Satana omunaipupulu. Oshike tashi ke tu kwafela tu kale hatu dulika? Ombiibeli otai ti: “Ove hola Omwene Kalunga koye nomutima woye aushe nomwenyo woye aushe neenghono doye adishe.” (Deuteronomion 6:5) Ohatu  dulika kuJehova molwaashi otu mu hole. Eshi ohole yetu yokuhola Jehova tai kulu, ohatu ka ninga keshe shimwe osho te tu pula tu longe. Omuyapostoli Johannes okwa ti: “Osheshi ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.” — 1 Johannes 5:3.

18, 19. (a) Oinima imwe ilipi Jehova e tu lombwela kutya oya puka? (b) Otu shi shii ngahelipi kutya Jehova ite tu pula tu longe osho itatu dulu okuninga?

18 Oinima imwe ilipi oyo Jehova e tu lombwela kutya oya puka? Ope na oihopaenenwa imwe moshimhungu “ Kala u tonde osho Jehova e tonde.” Otashi dulika wa li to diladila kutya oinima imwe yomwaayo inai puka. Ashike konima eshi wa konakona eevelishe odo nokudiladila moule kombinga yado, owa uda ko nawa nghee shi li pandunge okudulika keemhango daJehova. Otashi dulika yo u udite kutya owa pumbwa okuninga omalunduluko onhumba  monghalamwenyo yoye. Nonande ihashi kala alushe shipu okuninga omalunduluko a tya ngaho, ngeenge owa ningi ngaho oto ka kala u na ombili nehafo olo hali di mokukala omudiinini kuJehova. (Jesaja 48:17, 18) Otu shi shii ngahelipi kutya ohatu dulu okuninga omalunduluko a tya ngaho?

19 Jehova ihe tu pula tu longe osho itatu dulu okuninga. (Deuteronomion 30:11-14) E li kaume ketu kashili, oku tu shii nawa e tu dule. Oku shii okudula kwetu nosho yo omaunghundi etu. (Epsalme 103:14) Omuyapostoli Paulus okwe tu twa omukumo a ti: “Kalunga Oye omudiinini, ite mu efa mu yelekwe nomayeleko e dule eenghono deni, ndele mumwe neyeleko ota longele yo omhito yokupita mo, opo mu dule oku li humbata.” (1 Ovakorinto 10:13) Ohatu dulu okukala noushili kutya Jehova ote tu pameke opo tu dule okulonga osho shiwa. Ote ke tu pa ‘eenghono’ tu dule okulididimikila omaupyakadi. (2 Ovakorinto 4:7)  Konima eshi Paulus a mona nghee Jehova e mu kwafela eshi a li meenghalo didjuu, okwa popya a ti: “Aishe ohandi i dulu [omolwaau, NW] ta pameke nge.” — Ovafilippi 4:13.

KALA U TONDE OSHO KALUNGA E TONDE

20. Omaukwatya elipi u na okuhopaenena, nomolwashike?

20 Ngeenge otwa hala okukala ookaume kaJehova, otu na okuninga shihapu shihe fi ashike okweefa po okulonga osho Jehova ina hokwa. (Ovaroma 12:9) Ookaume kaKalunga ove hole osho e hole. Ova hokololwa mEpsalme 15:1-5. (Lesha.) Ookaume kaJehova ohava hopaenene omaukwatya aye ngaashi ‘ohole, ehafo, ombili, onheni, oukaume, ouwa, oudiinini, engungumano nelididimiko.’ — Ovagalati 5:22.

21. Ongahelipi to dulu okulihonga okuulika omaukwatya oo Kalunga e hole?

21 Ongahelipi to dulu okulihonga okukala ho ulike omaukwatya mawa? Owa pumbwa okulihonga osho Jehova e hole mokukala ho lesha nokukonakona Ombiibeli alushe. (Jesaja 30:20, 21) Ngeenge owa kala to ningi ngaho, ohole yoye yokuhola Jehova otai kulu noto ka kala ho dulika kuye.

22. Oidjemo ilipi to ka mona ngeenge owa kala ho dulika kuJehova?

22 Omalunduluko oo tashi dulika wa pumbwa okuninga monghalamwenyo yoye otaa dulu okuyelekwa nokudula mo oikutu ikulu nokudjala oikutu ipe. Ombiibeli oya ti otwa pumbwa ‘okulidula omunhu mukulu’ nokudjala “omunhu mupe.” (Ovakolossi 3:9, 10) Nonande haalushe hashi kala shipu okuninga omalunduluko, ngeenge otwe a ningi nokukala hatu dulika kuJehova, okwe tu udanekela kutya ote ke tu pa “ondjabi inene.” (Epsalme 19:12) Hoolola okudulika kuJehova nokuulika kutya Satana omunaipupulu. Kala to longele Jehova omolwohole yokuheliholamwene, ndele hamolwondjabi oyo to ka mona monakwiiwa. Kungaho oto ka ninga kaume elela kaKalunga!

^ okat. 16 Osho inashi hala kutya ovanhu ovo tava kendabala oku ku efifa po okukonakona Ombiibeli otava wilikwa sha yukilila kuSatana. Ashike Satana oye ‘kalunga kefimbo lounyuni ou,’ ‘nounyuni aushe ou li mepangelo laye.’ Onghee hano, inashi ku kumwifa ngeenge vamwe tava kendabala oku ku efifa po okulongela Jehova. — 2 Ovakorinto 4:4; 1 Johannes 5:19.

Lihonga shihapu

Ehena popepi naJehova

Oto dulu ngoo shili ‘okweehena popepi naKalunga’?

Jehova Kalunga, Omushiti weulu nedu, okwe tu pa eshivo neudaneko.