Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Oshike hatu lihongo mOmbiibeli?

 ETUKULWA 13

Kala wa fimaneka omwenyo

Kala wa fimaneka omwenyo

1. Olyelye e tu pa omwenyo?

JEHOVA “Oye Kalunga omunamwenyo,” molwaashi oye Omushiti noye e tu pa omwenyo. (Jeremia 10:10) Ombiibeli oya ti: “Ove wa shita oinima aishe, ndele kehalo loye i li po noya shitwa.” (Ehololo 4:11) Nopehe na omalimbililo, Jehova okwa hala tu kale nomwenyo. Omwenyo ou li oshali i na ondilo ya dja kuye. — Lesha Epsalme 36:10.

2. Ongahelipi hatu dulu okupondola monghalamwenyo?

2 Jehova ohe tu pe keshe osho twa pumbwa ngaashi oikulya nomeva opo tu kale nomwenyo. (Oilonga 17:28) Kakele kaasho, okwa hala tu hafele onghalamwenyo. (Oilonga 14:15-17) Opo tu pondole monghalamwenyo, otwa pumbwa okudulika keemhango daKalunga. — Jesaja 48:17, 18.

KALUNGA OKWA TALA KO NGAHELIPI OMWENYO?

3. Jehova okwa li a ninga po shike eshi Kain a dipaa Abel?

3 Ombiibeli otai tu hongo kutya eemwenyo detu nodavakwetu oda fimana koshipala shaJehova. Pashihopaenenwa, Kain, omona waAdam naEva, okwa li a handukila ondenge yaye Abel, ndele Jehova okwa li e mu londwela a pangele ehandu laye. Ashike Kain ka li a pwilikina nokwa li a handuka fiyo osheshi a “nukila Abel ndee te mu dipaa.” (Genesis 4:3-8) Jehova okwa li a handukila Kain eshi a dipaa Abel. (Genesis 4:9-11) Onghee hano, ehandu noutondwe oya nyika oshiponga molwaashi otai dulu oku tu ningifa tu kale ovakwanyanya nohatu longifa nai eenghono detu. Omunhu oo e li ngaho ita ka mona omwenyo waalushe. (Lesha 1 Johannes 3:15.) Opo tu wapalele Jehova, otu na okulihonga okukala tu hole ovanhu aveshe. — 1 Johannes 3:11, 12.

4. Oshike hatu lihongo muimwe yomomhango oyo Kalunga a li a pa Ovaisrael i na sha nomwenyo?

 4 Omido omayovi konima yefyo laAbel, Jehova okwa li a ulika kutya okwa fimaneka omwenyo eshi a pa Moses Oipango Omulongo. Shimwe shomoipango oyo oshosho kutya “ino dipaa.” (Deuteronomion 5:17) Ngeenge omunhu a li a dipaa mukwao owina, naye okwa li ha dipawa.

5. Kalunga okwa tala ko ngahelipi okulikufa edimo?

5 Kalunga okwa tala ko ngahelipi okulikufa edimo? Nokuli nomwenyo wokaana inaka dalwa owa fimana kuJehova. MOmhango oyo Jehova a li a pa Ovaisrael, okwa ti kutya ngeenge omunhu okwa ngwadjula omukainhu e li meteelelo ndele okaana taka fi, omunhu oo e mu ngwadjula okwa li e na okudipawa. (Lesha Exodus 21:22, 23; Epsalme 127:3.) Osho otashi tu hongo kutya okulikufa edimo osha puka. — Tala omafatululo oitya pexulilo lembo, oshitwa 28.

6, 7. Ongahelipi hatu dulu okuulikila Jehova kutya otwa fimaneka omwenyo?

6 Ongahelipi hatu dulu okuulikila Jehova kutya otwa fimaneka eemwenyo detu nosho yo dovanhu vakwetu? Omokuhaninga keshe osho tashi tula omwenyo wetu ile davakwetu moshiponga. Onghee hano, itatu ka shila omakaya nokufenya ile tu longife oingangamifi molwaashi otai nyono po oukolele wetu ile tashi dulika i tu dipae.

7 Kalunga okwe tu pa omwenyo nolutu, onghee hano, otu na oku li longifa monghedi oyo a hala. Otu na okufila oshisho omalutu etu, nongeenge hasho, ohatu ka kala inatu koshoka koshipala shaKalunga. (Ovaroma 6:19; 12:1; 2 Ovakorinto 7:1) Itatu dulu okulongela Jehova oo e tu pa omwenyo ngeenge inatu u fimaneka. Nonande otashi dulika shidjuu okweefa po eenghedindjikilile odo dii, Jehova ote ke tu kwafela ngeenge ohatu kendabala ngaashi hatu dulu tu ulike kutya otwa fimaneka omwenyo.

8. Ohatu ka ninga po shike opo tu shilipaleke kutya itatu tula eemwenyo detu ile davamwe moshiponga?

 8 Otwe lihonga kutya omwenyo owa fimana. Jehova okwe lineekela kutya ohatu ka ninga ngaashi hatu dulu tuha tule eemwenyo detu moshiponga ile davamwe. Osho osha kwatela mo okukala twa lungama ngeenge hatu shingi eehauto detu, eemota ile oyeendifo ikwao. Ohatu henuka omaudano elongifo leenghono ile oo a nyika oshiponga. (Epsalme 11:5) Ohatu ningi yo ngaashi hatu dulu opo omaumbo etu a kale onhele ya amenwa. Jehova okwa li a lombwela Ovaisrael a ti: “Ove ngeenge ho tungu ongulu ipe, u nokutunga kombada yayo oshikelelifongubu, [ile tu tye, ekuma la ya pombada] opo u ha kwatifile ongulu yoye etimba lohonde, umwe ngeenge ta u ko.” — Deuteronomion 22:8.

9. Ongahelipi tu na okuungaunga noinamwenyo?

9 Onghedi omo hatu ungaunga noinamwenyo nayo oya fimana kuJehova. Okwe tu pitika tu dipae oinamwenyo opo tu lye notu mone ko oidjalomwa. Okwe tu pitika yo tu dipae oinamwenyo ngeenge oya nyika oshiponga kufye. (Genesis 3:21; 9:3; Exodus 21:28) Ashike inatu pumbwa okuungaunga nonyanya noinamwenyo ile tu i dipae ashike omolwomalihafifo. — Omayeletumbulo 12:10.

FIMANEKA OUYAPUKI WOMWENYO

10. Otu shi shii ngahelipi kutya ohonde oi lile po omwenyo?

10 Ohonde oiyapuki kuJehova molwaashi oi lile po omwenyo. Konima eshi Kain a dipaa Abel, Jehova okwa lombwela Kain a ti: “Ondaka yohonde yondenge yoye tai kuwile nge onghuwo medu.” (Genesis 4:10) Okwa li a handukila Kain eshi a dipaa Abel molwaashi ohonde yaAbel oya li i lile po omwenyo. Konima yEyelu, natango Jehova okwa li a ulika kutya ohonde oi lile po omwenyo. Okwa li a pitika Noa noukwaneumbo waye va lye ombelela yoinamwenyo,  a ti: “Aishe ei tai linyenge i nomwenyo nai ninge [eendja] deni. Nosho yo oimeno aishe italala Ame ohandi i yandje aishe kunye.” Ashike ope na oshinima shimwe osho e va lombwela vaha lye, a ti: “Ombelela i nomwenyo nokutya, i nohonde, inamu i lya. — Genesis 1:29; 9:3, 4.

11. Omhango i na sha nohonde ilipi Kalunga a li a pa oshiwana shOvaisrael?

11 Omido 800 lwaapo konima eshi Jehova a lombwela Noa kutya inava lya ohonde, okwa li yo a lombwela oshiwana shaye, a ti: ‘Keshe umwe womovana vaIsrael ile womovanailongo ava hava kala mokati keni, ou ta kwata oshifitukuti ile odila tai liwa, ye e nokutilashi ohonde yayo noku i fufila nedu.’ Okwa weda ko vali ta ti: “Inamu lya ohonde.” (Leviticus 17:13, 14) Natango Jehova okwa teelela oshiwana shaye shi tale ko ohonde iyapuki. Ova li tava dulu okulya ombelela kakele kohonde. Ngeenge va li va dipaa oshinamwenyo, ova li ve na okutilashi ohonde.

12. Ovakriste ove na okutala ko ohonde ngahelipi?

12 Omido dinini konima yefyo laJesus, ovayapostoli novakulunhuongalo meongalo lopaKriste muJerusalem ova li va shakena opo va tokole kutya oiteelelwa ilipi yomOmhango oyo ya li ya pewa Ovaisrael tai longo nokOvakriste. (Lesha Oilonga 15:28, 29; 21:25.) Jehova okwa li e va kwafela va ude ko kutya ohonde oya fimana kuye nokwa li ve na okukala ve i tala ko iyapuki. Ovakriste vonale kava li ve na okulya nokunwa ohonde ile va lye ombelela yoshinamwenyo inashi dja nawa ohonde. Ngeno ove shi ningile, ngeno osha faafana ashike nomanyono ngaashi okulongela oikalunga ile okuya moluhaelo. Okudja tuu pefimbo olo Ovakriste inava kala nandenande hava li ile va nwe ohonde. Ongahelipi kunena? Jehova natango okwa teelela tu kale twa tala ko ohonde iyapuki.

13. Omolwashike Ovakriste ihava tulwa ohonde?

 13 Mbela osho sha kundafanwa metetekelo osha hala yo kutya Ovakriste ove na okwaanya okutulwa ohonde? Heeno osho. Jehova okwe tu lombwela kutya inatu lya ile tu nwe ohonde. Ngeenge ndokotola okwe ku lombwele kutya ino nwa oikunwa yoalkoholi, mbela oto ke i livendela? Hasho nandenande! Monghedi ya faafana, elombwelo olo kutya inatu lya nokunwa ohonde ola hala kutya katu na oku i tulwa. — Tala omafatululo oitya pexulilo lembo, oshitwa 29.

14, 15. Osha fimana shi fike peni kOmukriste a kale a fimaneka omwenyo nokudulika kuJehova?

14 Ongahelipi ngeenge ndokotola okwe tu lombwele kutya ohatu fi ngeenge otwa kala inatu tulwa ohonde? Keshe umwe ota ka ninga etokolo kutya ota ka dulika komhango yaJehova i na sha nohonde ile hasho. Ovakriste ova fimaneka filufilu oshali yomwenyo, nohatu ka hoolola eenghedi dikwao douhaku opo tu kale nomwenyo; ashike itatu ka tambula ko nande okutulwa ohonde.

15 Ohatu ka ninga ngaashi hatu dulu opo tu kaleke po oukolele wetu, ndele itatu ka dimina tu tulwe ohonde molwaashi omwenyo owa fimana kuJehova. Osha fimana okudulika kuJehova shi dulife okuhadulika kuYe opo tu lelepeke onghalamwenyo yetu. Jesus okwa ti: “Ou a hala okuxupifa omwenyo waye, oye te u kanifa po, ndele ou ta kanifile nge omwenyo waye, oye ote u limonene.” (Mateus 16:25) Otwa hala okudulika kuJehova molwaashi otu mu hole. Okwe tu halela ouwa, nohatu tale ko omwenyo u na ondilo nouyapuki, ngaashi Jehova he u tale ko. — Ovaheberi 11:6.

16. Omolwashike ovapiya vaKalunga hava dulika kuye?

16 Ovapiya vaJehova ovadiinini ova tokolatoko okudulika keemhango daye di na sha nohonde. Itava ka lya ile va  nwe ohonde, noitava ka tulwa ohonde omolwelalakano lopaunamiti. * Ndele nande ongaho, ohava tambula ko omauhaku amwe oo inaa kwatela mo ohonde opo va xupife eemwenyo davo. Ova tomhwa filufilu kutya Omushiti womwenyo nohonde okwe tu halela ouwa. Owa itavela ngoo shili kutya Jehova okwe tu halela ouwa?

ELONGIFO LOHONDE OLO LA HOKIWA KUJEHOVA

17. Ohonde oya li hai longifwa nelalakano lashike muIsrael shonale?

17 Jehova okwa li a lombwela Ovaisrael mOmhango oyo a li a pa Moses a ti: “Osheshi omwenyo wombelela u li mohonde, ndele ame nde i mu pa koaltari i ninge ekwatakanifo [ile okupula ediminepo] leemwenyo deni, shaashi ohonde tai kwatakanifa.” (Leviticus 17:11) Ngeenge Ovaisrael va li va nyona, ova li hava pula Jehova e va dimine po mokuyamba oinamwenyo nokupula omupristeri a shashamine ohonde imwe koaltari motembeli. Oyo oyo ashike onghedi omo Jehova a li a pitika Ovaisrael va longife ohonde.

18. Eyambo laJesus ola ningifa shike tashi shiiva?

18 Eshi Jesus a li kombada yedu, okwa li a pingena po omhango i na sha yokuyamba oinamwenyo, mokuyamba po omwenyo waye, ile ohonde yaye, omolwedimepo lomatimba etu. (Mateus 20:28; Ovaheberi 10:1) Omwenyo waJesus ou na ondilo, nomolwaasho eshi Jehova e mu nyumunina meulu, ovanhu aveshe ovo ve na eitavelo muJesus ove na omhito yoku ka kala nomwenyo fiyo alushe. — Johannes 3:16; Ovaheberi 9:11, 12; 1 Petrus 1:18, 19.

Ongahelipi to dulu okuulika kutya owa fimaneka omwenyo nosho yo ohonde?

19. Otu na okuninga po shike ngeenge otwa hala okukala ‘tuhe netimba nande olohonde yomunhu’?

19 Inatu pandula tuu eshi Jehova e tu pa oshali  yomwenyo! Ohatu lombwele ovanhu kutya ngeenge ova kala ve na eitavelo muJesus, otava dulu oku ka kala fiyo alushe. Otu hole ovanhu nohatu ningi keshe osho hatu dulu tu va honge nghee tava dulu oku ka mona omwenyo waalushe. (Hesekiel 3:17-21) Opo nee ohatu dulu okupopya ngaashi omuyapostoli Paulus oo a ti: “Ame ndi he netimba nande olohonde yomunhu. Osheshi ame inandi fiya po sha, ndelenee onde mu udifila omhangela aishe yexupifo laKalunga.” (Oilonga 20:26, 27) Ohatu ulike kutya otwa fimaneka omwenyo nohonde eshi hatu lombwele ovanhu vakwetu kombinga yaJehova nonghee omwenyo wa fimana kuye.

^ okat. 16 Opo u mone ouyelele u na sha nokutulwa ohonde, tala embo ‘Likalekeni mohole yaKalunga’ epandja 77-79, la nyanyangidwa kEendombwedi daJehova.