Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Oshike hatu lihongo mOmbiibeli?

 ETUKULWA 18

Mbela ondi na okuliyapulila Kalunga nokuninginifwa?

Mbela ondi na okuliyapulila Kalunga nokuninginifwa?

1. Konima eshi wa konakona embo eli, otashi dulika u lipule shike?

OWE lihonga osho Ombiibeli tai hongo eshi wa hovela okukonakona embo eli. Pashihopaenenwa, owe lihonga kombinga yeudaneko laKalunga lomwenyo waalushe, onghalo yoonakufya nosho yo kombinga yeteelelo lenyumuko. (Omuudifi 9:5; Lukas 23:43; Johannes 5:28, 29; Ehololo 21:3, 4) Otashi dulika wa hovela okwoongala nEendombwedi daJehova nowa itavela kutya ohadi tula moilonga osho tadi lihongo mOmbiibeli. (Johannes 13:35) Otashi dulika wa hovela okukala u na ekwatafano lopofingo  naJehova, nowa tokola nokuli oku mu longela. Onghee hano, otashi dulika u lipule kutya: ‘Mbela ondi na okuninga po shike opo ndi longele Kalunga?’

2. Omolwashike omulumenhu wokuEtiopia a li a hala okuninginifwa?

2 Omulumenhu umwe Omuetiopia oo a li ko pefimbo laJesus naye okwa li e lipula kutya oku na okuninga po shike opo a longele Kalunga. Konima eshi Jesus a nyumunwa, omuhongwa waye wedina Filippus okwa li a udifila omulumenhu oo. Filippus okwa li a hololela omulumenhu oo kutya Jesus oye Messias. Omulumenhu oo okwa li a tomhwa kwaasho e lihonga ndele ta ti: “Tala, omeva oo aa, oshike tashi kelele nge ndi ha [ninginifwe, NW]?” — Oilonga 8:26-36.

3. (a) Jesus okwa lombwela ovashikuli vaye va ninge shike? (b) Omunhu oku na okuninginifwa ngahelipi?

3 Ombiibeli otai hongo kutya ngeenge owa hala okulongela Jehova, ou na okuninginifwa. Jesus okwa lombwela ovashikuli vaye a ti: “Ningeni ovanhu aveshe ovalongwa vange, noku va [ninginifa, NW].” (Mateus 28:19) Jesus okwa tula po oshihopaenenwa eshi a ninginifwa. Okwa li a tulwa koshi yomeva ndele hakushashwa nomeva momutwe ngaashi sha tolokwa mOmbiibeli yOshikwanyama muMateus 3:16. Sha faafana, nokunena Omukriste oku na okuninginifwa ta tulwa koshi yomeva.

4. Eninginifo loye otali ulikile ovanhu shike?

4 Ngeenge owa ninginifwa, otashi ulikile ovanhu kutya owa hala shili okuninga kaume kaKalunga noku mu longela. (Epsalme 40:8, 9) Onghee hano, otashi dulika u lipule kutya: ‘Ondi na okuninga po shike opo ndi ninginifwe?’

ESHIIVO NEITAVELO

5. (a) Ou na okuninga shike tete fimbo ino ninginifwa? (b) Omolwashike okwoongala kwopaKriste kwa fimana?

5 Manga ino ninginifwa, owa pumbwa okushiiva Jehova naJesus. Owa hovela nale okuninga ngaho eshi to konakona  Ombiibeli. (Lesha Johannes 17:3.) Ndele inashi wana ashike okuninga ngaho. Ombiibeli oya ti ou na ‘okuyadifwa eshiivo’ lokushiiva ehalo laJehova. (Ovakolossi 1:9) Okukala pokwoongala kwEendombwedi daJehova otaku ke ku kwafela u kale u na ekwatafano lopofingo naJehova. Nomolwaasho osha fimana okukala po alushe. — Ovaheberi 10:24, 25.

Ou na okukonakona Ombiibeli fimbo ino ninginifwa

6. Owa pumbwa okukala u shii Ombiibeli shi fike peni opo u ninginifwe?

6 Jehova ina teelela u kale u shii oinima aishe mOmbiibeli opo u ninginifwe. Ka li yo a teelela omulumenhu Omuetiopia a kale e shii keshe shimwe fimbo ina ninginifwa. (Oilonga 8:30, 31) Ashike Ombiibeli otai ulike kutya otu na okutwikila okulihonga kombinga yaKalunga fiyo alushe. (Omuudifi 3:11) Opo u ninginifwe, owa pumbwa okushiiva nokutambula ko omahongo Ombiibeli opehovelo. — Ovaheberi 5:12.

7. Ekonakonombiibeli ole ku kwafela ngahelipi?

7 Ombiibeli oya ti: “Kape na ou ta dulu okuwapalela Kalunga, ngenge kape neitavelo.” (Ovaheberi 11:6) Nomolwaasho owa pumbwa okukala u na eitavelo opo u ninginifwe. Ombiibeli oye tu lombwela kombinga yovanhu vamwe vokuKorinto kutya ova li va tambula ko osho ovahongwa vaJesus ve va honga, noshidjemo “ova itavela, ndele va [ninginifwa, NW].” (Oilonga 18:8) Sha faafana, ekonakonombiibeli ole ku kwafela u kale u na eitavelo momaudaneko aKalunga nomekuliloyambo laJesus olo tali dulu oku tu xupifa moulunde nefyo. — Josua 23:14; Oilonga 4:12; 2 Timoteus 3:16, 17.

LOMBWELA OVANHU VAKWENI KOMBINGA YOSHILI YOMBIIBELI

8. Oshike tashi ke ku linyengifa u lombwele ovanhu vakweni kombinga yaasho to lihongo?

8 Eshi to lihongo shihapu okudja mOmbiibeli nokumona  nghee tai ku kwafele monghalamwenyo yoye, eitavelo loye otali ka enda tali kolo. Oto ka kala yo wa hala okulombwela ovanhu vakweni kombinga yaasho to lihongo. (Jeremia 20:9; 2 Ovakorinto 4:13) Ndele mbela ou na okulombwela oolyelye?

Eitavelo oli na oku ku linyengifa u lombwele ovanhu vakweni osho wa itavela

9, 10. (a) Oolyelye tashi dulika u hovele okulombwela kombinga yaasho to lihongo? (b) Ou na okuninga po shike ngeenge owa hala okuhovela okuudifa pamwe neongalo?

9 Otashi dulika u kale wa hala okulombwela ovapambele voye, ookaume koye, ovashiinda shoye, ile ovanailonga pamwe naave kombinga yaasho to lihongo. Osho oshinima shiwa neenghono, ashike dimbuluka kutya ou na oku shi ninga nonghenda nonohole. Mokweendela ko kwefimbo, oto ka dula okuhovela okuudifa pamwe neongalo. Ngeenge owa hala okuninga ngaho, lombwela ou te ku hongo Ombiibeli kutya owa hala okuhovela okuudifa pamwe neongalo. Ngeenge oku wete kutya owa wana nonokutya onghalamwenyo yoye oi li metwokumwe nomifikamhango dOmbiibeli, otamu dulu okukundafana novakulunhuongalo vavali.

10 Oshike tamu ka kundafana novakulunhuongalo ovo? Otava ka kundafana naave va tale ngeenge ou udite ko nowa itavela omahongo Ombiibeli opehovelo, ngeenge oho dulika ngoo kwaasho Ombiibeli tai ti nongeenge owa halelela ngoo shili okuninga Ondombwedi yaJehova. Dimbuluka kutya ovakulunhuongalo ohava file oshisho oilyo yeongalo aishe naave wa kwatelwa mo, nomolwaasho ino pumbwa okukala wa tila okupopya navo. (Oilonga 20:28; 1 Petrus 5:2, 3) Konima eshi mwa kundafana navo, otave ke ku lombwela ngeenge oto dulu okuhovela okuudifa pamwe neongalo ile hasho.

11. Omolwashike sha fimana okuninga omalunduluko fimbo ino hovela okuudifa pamwe neongalo?

11 Otashi dulika ovakulunhuongalo ve ku lombwele kutya  owa pumbwa okuninga omalunduluko onhumba fimbo ino hovela okuudifa pamwe neongalo. Omolwashike sha fimana okuninga omalunduluko a tya ngaho? Tu li Eendombwedi daJehova, ohatu lombwele ovanhu vakwetu kombinga yaye, nomolwaasho otu na okukala nonghalamwenyo oyo tai mu fimanekifa. — 1 Ovakorinto 6:9, 10; Ovagalati 5:19-21.

ELIDILULULO NELIALULUKO

12. Omolwashike ovanhu aveshe va pumbwa okulidilulula?

12 Ope na sha shimwe vali osho wa pumbwa okuninga fimbo ino ninginifwa. Omuyapostoli Petrus okwa ti: “Lidilululeni, nye mu lialuluke, omatimba eni opo a dimwe po.” (Oilonga 3:19) Mbela okulidilulula osha hala okutya shike? Osha hala kutya okukala u udite nai omolwoshinima shii osho wa ninga. Pashihopaenenwa, ngeenge owa li u na onghalamwenyo inai koshoka, owa pumbwa okulidilulula. Nokuli nonande owa kendabala okulonga osho shiwa onghalamwenyo yoye aishe, natango owa pumbwa okulidilulula molwaashi atusheni ohatu nyono notwa pumbwa okupula Kalunga e tu dimine po. — Ovaroma 3:23; 5:1.

13. ‘Okulialuluka’ osha hala okutya shike?

13 Mbela ou na ashike okukala u udite nai omolwoshinima shii osho wa ninga? Hasho nandenande. Petrus okwa ti owa pumbwa yo ‘okulialuluka.’ Osho osha hala kutya owa pumbwa okweefa po elihumbato keshe inali koshoka, ndele to kala to longo osho shiwa. Oku shi faneka, diladila nee ngeno to i konhele yonhumba oko ino enda nale. Lwanima owa didilika kutya oto i nondjila ya puka. Mbela oto ka ninga po shike? Nopehe na omalimbililo, oto ka shunifa onhapo pedu, to kanghama, ndele to tanauka u ye nondjila oyo ya yuka oko wa hala okuya. Sha faafana, eshi to konakona Ombiibeli otashi dulika u didilike kutya ope  na eenghedindjikilile ile oinima imwe monghalamwenyo yoye oyo wa pumbwa okuninga omalunduluko muyo. Kala wa halelela ‘okulialuluka’ nokuninga omalunduluko a pumbiwa, ndele to kala to longo osho shiwa.

OKULIYAPULILA JEHOVA

Mbela owa udanekela Jehova kutya oto ke mu longela?

14. Ongahelipi omunhu he liyapulile Jehova?

14 Onghatu imwe vali ya fimanenena oyo to dulu okukatuka fimbo ino ninginifwa oyo okuliyapulila Jehova. Ngeenge to liyapulile Jehova, oho ilikana to mu udanekele kutya owa hala oku mu longela oye aeke nokukala wa pitifa komesho okulonga ehalo laye monghalamwenyo yoye. — Deuteronomion 6:15.

15, 16. Oshike hashi linyengifa omunhu e liyapulile Jehova?

15 Ngeenge to udanekele Jehova u mu longele oye aeke osha faafana nokuudaneka kutya owa hala okukala nomunhu oo u hole onghalamwenyo yoye aishe. Diladila kombinga yomumati nokakadona tava endelafana. Eshi omumati ta ende ta shiiva nawa okakadona, oha hovele okukala e ka hole nokonima ota ka kala a hala oku ka hombola po. Nonande etokolo olo ola kwata moiti, omumati ota ka tambula ko oshinakuwanifwa osho molwaashi oku hole okakadona oko.

16 Eshi to lihongo kombinga yaJehova, oto ka kala u mu hole nokukala wa hala oku mu longela. Naasho otashi ke ku linyengifa u mu udanekele meilikano kutya owa hala oku mu longela. Ombiibeli oya ti keshe oo a hala okushikula Jesus ‘ne lidimbwe ye mwene.’ (Markus 8:34) Mbela osho osha hala okutya shike? Osha hala kutya ou na okukala wa pitifa komesho okudulika kuJehova monghalamwenyo yoye. Osho Jehova a hala u ninge osha fimana shi dulife omalalakano nosho yo omahalo oye. — Lesha 1 Petrus 4:2.

INO KALA WA TILA KUTYA ITO KA PONDOLA

17. Omolwashike ovanhu vamwe hava ongaonga okuliyapulila Jehova?

17 Ovanhu vamwe ohava ongaonga okuliyapulila Jehova, molwaashi va tila kutya itava dulu okuwanifa po eudaneko lavo loku mu longela. Inava hala oku mu nyemateka,  ile otashi dulika va tye kutya ngeenge inave mu liyapulila, ite va katukile onghatu ngeenge otava longo osho inashi yuka.

18. Oshike tashi ke ku kwafela u finde oumbada wokukala wa tila okunyemateka Jehova?

18 Ohole yoye yokuhola Jehova otai ke ku kwafela u finde oumbada wokukala wa tila oku mu nyemateka. Molwaashi ou mu hole, oto ka ninga ngaashi to dulu opo u wanife po osho we mu udanekela. (Omuudifi 5:3; Ovakolossi 1:10) Ito ka diladila kutya oshidjuu okulonga ehalo laye. Omuyapostoli Johannes okwa ti: “Ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.” — 1 Johannes 5:3.

19. Omolwashike ino pumbwa okukala wa tila okuliyapulila Jehova?

19 Ino pumbwa okukala wa wanenena opo u liyapulile Jehova. Jehova ina teelela tu ninge shihapu shi dulife pwaasho hatu dulu okuninga. (Epsalme 103:14) Ote ke ku kwafela u longe osho sha yuka. (Jesaja 41:10) Kala we mu lineekela nomutima woye aushe opo nee “ota ka lalakanifa omalila oye.” — Omayeletumbulo 3:5, 6.

OKUHEPAULULA MOIPAFI OMOLWEXUPIFO

20. Ngeenge owe liyapulile Kalunga, onghatu ilipi ya shikula ko?

20 Mbela oto diladila kutya owa wana okuliyapulila Jehova? Ngeenge owe mu liyapulila, owa wana yo okukatuka onghatu ya shikula ko, okuninginifwa.

21, 22. Ongahelipi to dulu ‘okuhepaulula’ moipafi eitavelo loye?

21 Shiivifila omuunganeki wolutu lovakulunhuongalo  kutya owe liyapulila Jehova nowa hala okuninginifwa. Opo nee ovakulunhuongalo vamwe otave ke ku pula omapulo onhumba a kanghamena komahongo opehovelo Ombiibeli. Ngeenge ova mono kutya owa wana okuninginifwa, otave ke ku lombwela, noto ka dula okuningifwa poshoongalele tashi landula ko. Poshoongalele, otapa ka yandjwa  oshipopiwa tashi yelifa eityo leninginifo. Omupopi ota ka pula ovo va wana okuningifwa omapulo avali. Eshi tamu nyamukula omapulo oo, otamu ‘hepaulula nokanya,’ ile moipafi eitavelo leni. — Ovaroma 10:10.

 22 Konima yokuhepaulula moipafi, otamu ka ninginifwa. Eshi to ninginifwa, olutu loye alishe otali i koshi yomeva. Eninginifo otali ulikile keshe oo e li po kutya owe liyapulila Jehova nowa ninga Ondombwedi yaye.

ENINGINIFO LOYE OTALI TI SHIKE?

23. Osha hala okutya ngahelipi okuningifwa ‘medina laXe nolOmona nolomhepo iyapuki?’

23 Jesus okwa ti kutya ovahongwa vaye ove na okuninginifwa ‘medina laXe nolOmona nolomhepo iyapuki.’ (Lesha Mateus 28:19.) Osho osha hala okutya shike? Osha hala kutya owa dimina eenghonopangelo daJehova nosho yo onghandangala oyo Jesus ta dana mokuwanifwa kwelalakano laXe, nonghee Jehova ta longifa omhepo iyapuki a wanife po ehalo laye. — Epsalme 83:19; Mateus 28:18; Ovagalati 5:22; 2 Petrus 1:21.

Ngeenge owa ninginifwa, oto ulike kutya owa hala okulonga ehalo laKalunga

24, 25. (a) Eninginifo otali ti shike? (b) Ohatu ka kundafana shike metukulwa tali landula?

24 Eninginifo oli na eityo la fimanenena. Ngeenge owa tulwa koshi yomeva, osha hala kutya owa efa po onghalamwenyo yoye yonale. Ngeenge owa di ko koshi yomeva, owa hovela onghalamwenyo ipe yokulonga ehalo laKalunga. Oto ulike yo kutya paife oto longele Jehova. Dimbuluka kutya ino liyapulila omunhu, ehangano ile oilonga yonhumba, ndele owe liyapulila Jehova.

25 Eliyapulo loye otali ku kwafele u kale u na ekwatafano lopofingo naKalunga. (Epsalme 25:14) Ashike osho inashi hala kutya omunhu ota ka xupifwa molwaashi a ninginifwa. Omuyapostoli Paulus okwa ti: “Longeni shili nokutila nokukakama mu xupifwe.” (Ovafilippi 2:12) Eninginifo oli li ashike ehovelo. Ndele mbela ongahelipi to dulu okukala popepi naJehova? Epulo olo otali ka nyamukulwa metukulwa laxuuninwa lembo eli.