Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

‘Likalekeni mohole yaKalunga’

 ETUKULWA 3

Kala u hole ovanhu ovo Kalunga e hole

Kala u hole ovanhu ovo Kalunga e hole

“Kala nokweenda novanongo, opo nee naave yo u ninge omunongo.” — OMAYELETUMBULO 13:20.

1-3. (a) Ombibeli oya popya oshili ihe fi okupatanekwa ilipi? (b) Ongahelipi hatu dulu okupanga oukaume novanhu ovo tava dulu oku tu nwefa mo nawa?

OVANHU otava dulu okufaafanifwa nomundele, molwaashi ove na eamo lokutambula ko onghedi keshe oyo i li momudingonoko wavo. Oshipu neenghono komunhu okutambula ko oikala, omifikamhango nosho yo omaukwatya ovanhu ovo ha endafana navo, nonande ine shi lalakanena.

2 Ombibeli oya popya oshili ihe fi okupatanekwa, ya ti: “Kala nokweenda novanongo, opo nee naave yo u ninge omunongo. Ndele ou ha endafana novashima, ota ka laipala.” (Omayeletumbulo 13:20) Eyeletumbulo olo itali popi ashike eendafano longahenya, sha hala okutya, okushakena nomunhu omalufe. Outumbulilo ‘okweenda naumwe’ otau ulike keendafano tali twikile. * Embo limwe lomauyelele e na sha nOmbibeli ola popya shi na sha novelishe oyo la ti: “Okweenda pamwe nomunhu otashi yandje ediladilo lokukala mu holafane nokukala mu na ekwatafano.” Mbela ito dimine kutya ohatu kala tu na eamo lokuhopaenena ovanhu ovo tu hole? Molwaashi ohatu kala twa hokwa neenghono ovanhu ovo tu hole, ovanhu va tya ngaho otava dulu oku tu nwefa mo neenghono, kutya nee onawa ile onai.

3 Opo tu likaleke mohole yaKalunga, osha fimanenena okupanga oukaume novanhu ovo tava dulu oku tu nwefa mo nawa. Ongahelipi hatu dulu oku shi ninga? Oku shi popya  paunafangwa, ohatu dulu oku shi ninga mokukala tu hole ovanhu ovo Kalunga e hole, sha hala okutya, okupanga oukaume naavo ve li ookaume kaKalunga. Diladila kwaashi: Mbela oolyelye tava dulu okukala ookaume vawa ve dule ovanhu ovo ve na omaukwatya oo a hokiwa kuJehova? Onghee hano, natu ka konakoneni kutya Jehova oku hole ovanhu ovo ve na omaukwatya a tya ngahelipi. Ngeenge otwa kala tu na etaleko la fa laJehova, ohatu ka dula okupanga oukaume novanhu ovo tave ke tu nwefa mo nawa.

OVANHU OVO VE HOLIKE KUKALUNGA

4. Omolwashike Jehova e na oufemba wokuhoolola ovo ta pange oukaume navo, nomolwashike a li a ifana Abraham ‘kaume kaye’?

4 Jehova iha pange oukaume nakeshe umwe. Mbela ke na oufemba wokuhoolola kutya ota pange oukaume nalyelye? Molwaashi oye Omwene Omunamapangelo aeshe, oku na oufemba wokuhoolola kutya ota pange oukaume nalyelye, noshi li oufembanghenda munene okukala kaume kaye. Mbela Jehova oha pange oukaume novanhu ovo ve na omaukwatya a tya ngahelipi? Jehova oha ehene kwaavo ve mu lineekela nove mu itavela filufilu. Pashihopaenenwa, diladila kombinga yatatekulululwa Abraham, omulumenhu oo a shiivika omolweitavelo laye la tongomana. Oshi li eyeleko linenenene leitavelo kuxe wopanhu okupulwa a yambe po omona waye exwikiloyambo. * Ndele nande ongaho, Abraham okwa li a ‘yandja Isak a ninge ngeno eyambo,’ molwaashi okwa li a itavela filufilu kutya ‘Kalunga ota dulu oku mu nyumuna koufi.’ (Ovaheberi 11:17-19) Molwaashi Abraham okwa li a ulika kutya oku na eitavelo noha dulika, Jehova okwa li e mu hokwa nokwe mu ifana ‘kaume kaye.’ — Jesaja 41:8; Jakob 2:21-23.

5. Jehova oha tale ko ngahelipi ovo hava dulika kuye noudiinini?

5 Jehova okwa lenga neenghono ovo hava dulika kuye noudiinini. Oku hole ovo va hala okukala ovadiinini kuye komesho  yoinima aishe. (Lesha 1 Ovakorinto 4:2.) Jehova oha hokwa neenghono ovo va tokola okudulika kuye molwaashi ve mu hole, ngaashi twa mona mEtukulwa 1 lembo eli. Omayeletumbulo 3:32 otaa ti: ‘Ye omushiivikile wovayuki.’ Ovo hava wanifa po oiteelelwa yaKalunga noudiinini ote va shivi pahole va ninge ovaenda “monduda” ile metwali laye, va dule oku mu longela noku mu ilikana efimbo keshe. — Epsalme 15:1-5.

6. Ongahelipi hatu dulu okuulika kutya otu hole Jesus, na Jehova oha kala e udite ngahelipi shi na sha naavo ve hole Omona waye?

6 Jehova oku hole ovo ve hole Jesus, Omona waye ewifa. Jesus okwa ti: “Ngenge ku na ou e hole nge, oye ta diinine eendjovo dange, naTate ota kala e mu hole, ndele fye ohatu uya kuye, ndele hatu diki onhele yokukala muye.” (Johannes 14:23) Ongahelipi hatu dulu okuulika kutya otu hole Jesus? Omokudiinina oipango yaye, mwa kwatelwa elombwelo li na sha nokuudifa onghundana iwa nokuninga ovanhu ovahongwa. (Mateus 28:19, 20; Johannes 14:15, 21) Ohatu ulike yo ohole yetu yokuhola Jesus ngeenge hatu ‘shikula oshikoti shaye,’ sha hala okutya, hatu mu hopaenene meendjovo nomoilonga ngaashi hatu dulu, tu li ovanhu inava wanenena. (1 Petrus 2:21) Omutima waJehova ohau kala wa hafa eshi hatu ningi eenghendabala okutula moilonga omaukwatya opaKriste omolwohole yetu yokuhola Jesus.

7. Omolwashike shi li pandunge okupanga oukaume naavo ve li ookaume kaJehova?

7 Jehova okwa hala ookaume kaye va kale ve na eitavelo, ovadiinini, ve hole Jesus nohava dulika komifikamhango daye. Keshe umwe womufye oku na okulipula kutya: ‘Mbela ookaume kange kopofingo ove na omaukwatya a tya ngaho nohava dulika komifikamhango daJesus? Mbela onda panga ngoo oukaume novanhu ovo ve li ookaume kaJehova?’ Oshi li pandunge okupanga oukaume novanhu ovo ve li ookaume kaJehova. Ovanhu ovo ve na omaukwatya opakalunga nohava udifa onghundana iwa yOuhamba nouladi otava dulu oku tu nwefa mo nawa opo tu kale metwokumwe netokolotoko letu lokuhafifa Kalunga. — Tala oshimhungu “ Kaume muwa oku na okukala a tya ngahelipi?” pepandja 29.

 LIHONGA KOIHOPAENENWA YOVANHU OVO VA POPIWA MOMBIBELI

8. Oshike tashi ku kumwifa shi na sha noukaume oo wa li pokati (a) kaNaomi naRut? (b) kovanyasha vatatu Ovaheberi? (c) kaPaulus naTimoteus?

8 Omishangwa odi yadi oihopaenenwa ihapu yovanhu ovo va li va mona ouwa omolwokupanga oukaume muwa. Oto dulu okulesha mOmishangwa kombinga youkaume oo wa li pokati kaNaomi noshitenya shaye Rut, oukaume wa kola oo wa li pokati kovanyasha vatatu Ovaheberi, ovo va li muBabilon, nosho yo oukaume oo wa li pokati kaPaulus naTimoteus. (Rut 1:16; Daniel 3:17, 18; 1 Ovakorinto 4:17; Ovafilippi 2:20-22) Ndele paife natu ka konakoneni oshihopaenenwa vali shimwe sha tongomana shi na sha noukaume oo wa li pokati kaDavid naJonatan.

9, 10. Oukaume waDavid naJonatan owa li we likolelela kushike?

9 Ombibeli otai ti kutya konima eshi David a dipaa Goljat, “Omwenyo waJonatan we limanga kumwe nomwenyo waDavid, ndele Jonatan [okwa li e] mu hole ngaashi omwenyo waye mwene.” (1 Samuel 18:1) David naJonatan ova li va panga oukaume wa kola nonande kava li ve fike pamwe meedula, nova kala ookaume fiyo Jonatan a fila molwoodi. * (2 Samuel 1:26) Oukaume wa kola waDavid naJonatan owa li we likolelela kushike?

10 David naJonatan ova li ookaume kopofingo molwaashi ova li ve hole Kalunga nova li va halelela okukala ovadiinini kuye. Aveshe ova li va hala okuhafifa Kalunga nova li ve na omaukwatya oo e va kwafela va kale ve holafane. Nopehe na omalimbililo, Jonatan okwa li a kumwifwa keyombamo nosho yo kouladi womulumenhu oo omunyasha, David, oo a li ha popile edina laJehova nopehe na oumbada. Osha yela yo kutya David okwa li a fimaneka omulumenhu Jonatan, oo a li omukulunhu kuye, oo a li ha yambidida noudiinini omalongekido  aJehova nokwa li a pitifa komesho ouwa waDavid nopehe na okulihola mwene. Pashihopaenenwa, tala kwaasho sha li sha ningwa po eshi David a li a teka omukumo neenghono monghalamwenyo yaye, eshi a li onhauki mombuwa tai onhapo ohamba ii Saul, xe yaJonatan. Jonatan okwa li a ulika oudiinini waye kuDavid monghedi ididilikwedi, eshi a li a katuka onghatu a ‘ye kuDavid ndele te mu nyatipalifa muKalunga.’ (1 Samuel 23:16) David ka li tuu e udite a tuwa omukumo eshi kaume  kaye omuholike a li a ya kuye ndele te mu kwafele noku mu twa omukumo! *

11. Oshike we lihonga shi na sha noukaume moshihopaenenwa shaJonatan naDavid?

11 Oshike hatu lihongo moshihopaenenwa shaJonatan naDavid? Ohatu lihongo mo oshilihongomwa sha fimanenena kutya, ovanhu ovo ve li ookaume ove na okukala aveshe ve na omaukwatya opamhepo. Ngeenge hatu pange oukaume novaitaveli vakwetu ovo ve na eenghedi da fa detu nove na ehalo  lokukala ovadiinini kuKalunga, ohatu dulu okulombwelafana omadiladilo nomaliudo etu nosho yo oimoniwa oyo tai tu tu omukumo notai tu pameke. (Lesha Ovaroma 1:11, 12.) Ookaume va tya ngaho ohatu dulu oku va mona mokati kovalongelikalunga vakwetu. Ndele mbela osho osha hala okutya keshe umwe oo he uya kokwoongala kOlupale lOuhamba oku li kaume muwa? Hasho lela.

OOLYELYE HATU DULU OKUPANGA NAVO OUKAUME WOPOFINGO?

12, 13. (a) Omolwashike tu na okulungama ngeenge hatu pange oukaume, nokuli nomokati kOvakriste vakwetu? (b) Omaongalo omefelemudo lotete okwa li a shakeneka oupyakadi ulipi, na Paulus okwa li a yandja elondwelo la kwata moiti lilipi?

12 Ngeenge otwa hala okukala tu na ookaume ovo tave tu pameke pamhepo, otu na okulungama ngeenge hatu pange oukaume, nokuli nomeongalo. Mbela osho oshi na oku tu kumwifa? Ahowe, kashi na lela oku tu kumwifa. Otashi dulika shi pule efimbo kOvakriste vamwe meongalo opo va kale va pyokoka pamhepo, ngaashi naanaa oiimati oyo i li komuti ihai pile oshita; imwe ohai kufa efimbo lile opo i pye. Onghee hano, meongalo keshe omu na Ovakriste ve na oupamhepo wa yoolokafana. (Ovaheberi 5:12–6:3) Nomolwaasho otu na okuungaunga naavo vape ile ovo va nghundipala nelidiiniko nosho yo nohole, molwaashi otwa hala oku va kwafela va kule pamhepo. — Ovaroma 14:1; 15:1.

13 Omafimbo amwe, meongalo otashi dulika mu holoke onghalo oyo tai tu pula tu kale twa lungamena eendafano letu. Ovakriste vamwe otashi dulika va kale ve na elihumbato tali limbililike. Vamwe otashi dulika va kale ve na oikala yokukwatela vakwao onghone ile ve na oikala yokungongota. Momaongalo omefelemudo lotete O.P. namo omwa li mu na oupyakadi wa tya ngaho. Nonande Ovakriste vahapu ova li ovadiinini, oohandimwe vamwe kava li ve na eenghedi diwa. Omuyapostoli Paulus okwa li a londwela eongalo lomuKorinto molwaashi Ovakriste vamwe meongalo olo kava li hava diinine omahongo amwe opaKriste, a ti: “Inamu puka: Ookaume [vai] otava nyono po eenghedi diwa.” (1 Ovakorinto 15:12, 33) Paulus okwa li a londwela  Timoteus kutya nomokati kOvakriste vakwao otashi dulika mu kale ovo vehe na eenghedi diwa. Timoteus okwa li a lombwelwa a kale kokule novanhu va tya ngaho, sha hala okutya, aha pange oukaume wopofingo navo. — Lesha 2 Timoteus 2:20-22.

14. Ongahelipi hatu dulu okutula moilonga efinamhango olo li li meendjovo daPaulus delondwelo li na sha nookaume?

14 Ongahelipi hatu dulu okutula moilonga efinamhango olo li li meendjovo daPaulus delondwelo? Omokuhenuka okupanga oukaume wopofingo novanhu ovo ve na enwefemo lii, kutya nee omeongalo ile okondje yeongalo. (2 Ovatessaloniki 3:6, 7, 14) Otu na okwaamena ekwatafano letu naJehova. Natu dimbuluke kutya ohatu tambula ko oikala nosho yo eenghedi dookaume ketu kopofingo, twa fa omundele. Ngaashi ashike itatu dulu okutula omundele momeva ndele hatu teelele u fipe omaviinyu, nafye itatu dulu okweendafana naavo ve na enwefemo lii ndele hatu teelele ve tu nwefe mo nawa. — 1 Ovakorinto 5:6.

Oto dulu okumona ookaume vawa mokati kOvakriste vakweni

15. Ou na okuninga shike opo u pange oukaume novanhu ovo ve na oupamhepo muwa meongalo?

15 Lao linene, ohatu dulu okumona ookaume vawa mokati kovalongelikalunga vakwetu. (Epsalme 133:1) Ndele ongahelipi to dulu okupanga oukaume novanhu ovo ve na oupamhepo muwa meongalo? Nopehe na omalimbililo, ngeenge owa kala u na omaukwatya opakalunga, ovo ve na omaukwatya opakalunga otava ka nanenwa kwoove. Pefimbo opo tuu opo, otashi dulika wa pumbwa okukatuka eenghatu donhumba opo u pange oukaume navamwe. (Tala oshimhungu “ Nghee twa li twa dula okupanga oukaume wopofingo navamwe” pepandja 30.) Panga oukaume naavo ve na omaukwatya oo wa hala okukala u na. Dulika komayele Ombibeli e na sha ‘nokumbwalangadjeka,’ sha hala okutya, okupanga oukaume nOvakriste vakweni, kashi na nee mbudi kutya ovomuhoko ulipi, ovoshiwana shilipi ile oveputuko lilipi. (2 Ovakorinto 6:13; lesha 1 Petrus 2:17.) Ino kala ashike u na oukaume naavo vepupi loye. Dimbuluka kutya Jonatan okwa li omukulunhu e dule David. Ovakulunhu vahapu otava dulu okukala ookaume vawa, molwaashi otava dulu oku tu lombwela oimoniwa ihapu yomonghalamwenyo noku tu nongopaleka.

 OTU NA OKUNINGA PO SHIKE NGEENGE PA HOLOKA OKUHAUDAFANA?

16, 17. Ngeenge Omukriste mukwetu okwe tu nyemateka monghedi yonhumba, omolwashike tuhe na okweefa po okukala hatu i kokwoongala?

16 Omafimbo nomafimbo ohapa holoka omaupyakadi, molwaashi meongalo omu na ovanhu ve na omaukwatya a yoolokafana nova dja momaputuko a yoolokafana. Omwiitaveli mukwetu otashi dulika a popye sha ile a ninge oshinima osho tashi tu ehameke. (Omayeletumbulo 12:18) Omafimbo amwe omaupyakadi ohaa etifwa kokukala tu na omaukwatya a yoolokafana, okuhaudafana nawa ile okukala tu na omataleko a yoolokafana. Mbela ohatu ka pundukifwa komaupyakadi a tya ngaho ndele hatu efa po okuya kokwoongala? Ngeenge otu hole shili Jehova nosho yo ovanhu ovo e hole, itatu ka efa po okukala hatu i nandenande kokwoongala.

17 Otwa wana okukala tu hole Jehova noku mu longela filufilu, molwaashi oye Omushiti nOmuyandjimwenyo wetu. (Ehololo 4:11) Natango, otwa pumbwa okukala hatu yambidida  noudiinini eongalo olo a hokwa okulongifa. (Ovaheberi 13:17) Onghee hano, ngeenge omulongelikalunga mukwetu okwe tu yahameka ile e tu nyemateka monghedi yonhumba, itatu ka efa po okuya kokwoongala opo tu ulike kutya otwa handuka shi fike peni. Omolwashike tuhe na okuninga ngaho? Omolwaashi Jehova haye e tu nyemateka. Natango, ohole yetu yokuhola Jehova otai ke tu linyengifa tu kale ovadiinini kuye nokoshiwana shaye. — Lesha Epsalme 119:165.

18. (a) Oshike hatu dulu okuninga opo tu xumife komesho ombili meongalo? (b) Ohatu ka mona omanangeko noupuna elipi ngeenge otwa dimine po vamwe ngeenge ope na etomheno liwa loku shi ninga?

18 Ohole yetu yokuhola Ovakriste vakwetu ohai tu linyengifa tu xumife komesho ombili meongalo. Jehova ina teelela ovo ve mu hole va kale va wanenena. Onghee hano, nafye katu na okuteelela va kale va wanenena. Ohole ohai tu linyengifa tuha konenene omaunghundi manini Ovakriste vakwetu, molwaashi otu shii kutya atusheni inatu wanenena nohatu ningi omapuko. (Omayeletumbulo 17:9; 1 Petrus 4:8) Ohole ohai tu linyengifa yo tu twikile ‘okudiminafana po.’ (Ovakolossi 3:13) Ihashi kala alushe shipu okutula moilonga omayele oo. Ngeenge otwa kala twa handuka neenghono, oshi na oupu tu kwatele vamwe onghone, tashi dulika hatu diladila kutya eshi twa handuka ohatu talifa nawa omunhu oo e tu nyemateka. Ndelenee okukala tu kwetele vamwe onghone osha nyika oshiponga kufye. Okudimina po vamwe ngeenge pe na etomheno liwa loku shi ninga otashi tu etele omanangeko noupuna mahapu. (Lukas 17:3, 4) Pashihopaenenwa, ohashi tu etele ombili yopamadiladilo noyokomutima, ohashi kaleke po yo ombili yeongalo, nokomesho yaaishe oyo, ohashi amene ekwatafano letu naJehova. — Mateus 6:14, 15; Ovaroma 14:19.

ONAINI TU NA OKWEEFA PO OKWEENDAFANA NAUMWE?

19. Eenghalo dilipi tadi dulu okuholoka po odo tadi tu pula tu efe po okweendafana naumwe?

19 Omafimbo amwe, ohapa holoka eenghalo odo tadi tu pula tu efe po okweendafana nomunhu wonhumba oo a kala oshilyo sheongalo. Onghalo ya tya ngaho ohai holoka po ngeenge omunhu oo a nyona omhango yaKalunga nopehe na okulivela  ombedi okwa kondwa mo meongalo ile ngeenge umwe a efa po oshili mokuhonga omahongo oipupulu ile e liteta ko ye mwene keongalo. Eendjovo daKalunga otadi tu lombwele kondadalunde ‘tuha endafane’ novanhu va tya ngaho. * (Lesha 1 Ovakorinto 5:11-13; 2 Johannes 9-11) Otashi dulika shi kale shidjuu neenghono okuhenuka okweendafana naumwe oo tashi dulika a li kaume ketu ile omupambele. Ndele mbela ohatu ka kala ngoo twa tokola toko okuulika kutya otwa lenga oudiinini wetu kuJehova nosho yo eemhango daye douyuki komesho yoinima aishe? Dimbuluka kutya Jehova okwa lenga neenghono oudiinini neduliko.

20, 21. (a) Omolwashike okukonda mo ovanyoni meongalo ku li elongekido lopahole? (b) Omolwashike sha fimanenena okuhoolola eendafano letu pandunge?

20 Okukonda mo ovanyoni meongalo oku li elongekido lopahole olo la tulwa po kuJehova. Omolwashike taku dulu okutiwa ngaho? Okukonda mo omunyoni ine livela ombedi ohashi ulike kutya eongalo oli hole edina laJehova liyapuki nosho yo omifikamhango daye. (1 Petrus 1:15, 16) Okukonda mo omunyoni ohaku amene yo eongalo. Oilyo yeongalo idiinini ohai kala ya amenwa kenwefemo lii lomunhu oo a nyonena owina, notai dulu okutwikila okulongela Kalunga i shii kutya eongalo oli li onhele yeameno kounyuni ou woukolokoshi. (1 Ovakorinto 5:7; Ovaheberi 12:15, 16) Okupewa outekuduliko wa kwata moiti ohaku ulike kutya omunyoni oku holike. Otashi dulika outekuduliko wa tya ngaho oo naanaa a pumbwa opo a mone kutya oku na okulundulula oikala yaye nokukatuka eenghatu da pumbiwa opo a alukile kuJehova. — Ovaheberi 12:11.

21 Osha yela filufilu kutya ookaume ketu kopofingo otava dulu oku tu nwefa mo neenghono. Onghee hano, osha fimanenena okuhoolola eendafano letu pandunge. Ohatu ka kala tu na ookaume vawa kuhe na vali ngeenge otwa pange oukaume novanhu ovo ve li ookaume kaJehova nokukala tu hole ovo Jehova e hole. Enwefemo lavo otali ke tu kwafela tu kale metwokumwe netokolotoko letu lokuhafifa Jehova.

^ okat. 2 Oshitya shOshiheberi osho sha tolokwa “endafana” osha tolokwa yo ‘okuninga kaume.’ — Ovatokolipangeli 14:20; Omayeletumbulo 22:24.

^ okat. 4 Eshi Jehova a li a pula Abraham a yambe po omona waye, okwa li tashi faneke eyambo olo Jehova a li ta ka ninga, okuyamba po Omona waye ewifa. (Johannes 3:16) Ashike eshi Abraham a li e li pokuyamba po omona waye, Jehova okwa li e mu kangheka ehe shi ninge ndele te mu pe odi yondume i ninge exwikiloyambo ponhele yaIsak. — Genesis 22:1, 2, 9-13.

^ okat. 9 David okwa li “omunyasha” eshi a li a dipaa Goljat, nokwa li e na omido 30 lwaapo eshi Jonatan a fya. (1 Samuel 17:33; 31:2; 2 Samuel 5:4) Jonatan, oo a li e na omido 60 lwaapo eshi a fya, osha yela kutya okwa li e dule David nomido 30 lwaapo.

^ okat. 10 Ngaashi sha shangwa mu 1 Samuel 23:17, Jonatan okwa li a popya oinima itano opo a twe David omukumo: (1) Okwa li a ladipika David aha kale a tila. (2) Okwa li a shilipaleka David kutya eenghendabala daSaul itadi ka pondola. (3) Okwa li a dimbulukifa David kutya ota ka pewa ouhamba, ngaashi Kalunga a udaneka. (4) Okwa li a udanekela David kutya ota ka kala alushe omudiinini kuye. (5) Jonatan okwa li yo a lombwela David kutya Saul naye oku shi shii kutya ye (Jonatan) oku li omudiinini kuDavid.

^ okat. 19 Opo u mone ouyelele muhapu u na sha nanghee u na okuungaunga naavo va kondwa mo meongalo ile ve liteta ko vo vene, tala Oshiwedelwako pepandja 207-209.

Lihonga shihapu

Oshiwana shaJehova osha ‘efa ouhenouyuki’

Ongahelipi outumbulilo “na efe ouhenouyuki” wa pambafana noiningwanima yopefimbo laMoses? Oilihongomwa ilipi hatu lihongo moiningwanima oyo?