Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

‘Likalekeni mohole yaKalunga’

 OSHIWEDELWAKO

Ombibeli oya tala ko ngahelipi eteyohombo netopoko?

Ombibeli oya tala ko ngahelipi eteyohombo netopoko?

Jehova okwa hala ovalihomboli va kale ovadiinini keano lavo lohombo. Eshi a li a hombolifa omulumenhu nomukainhu wotete, okwa ti: ‘Omulumenhu e na okweefa xe naina nokukanyatela komukainhu waye. Ndele vo otava ka kala onhumba imwe aike.’ Konima yefimbo, Jesus Kristus okwa ka endulula eendjovo odo nokwa weda ko a ti: “Hano osho Kalunga e shi tula kumwe, inashi kufwa kumwe komunhu.” (Genesis 2:24; Mateus 19:3-6) Hano osha yela kutya Jehova naJesus ova tala ko ohombo i li ekwatafano tali kalelele nohali xulu  po ashike ngeenge umwe womovalihomboli a fya. (1 Ovakorinto 7:39) Molwaashi ohombo oi li oshinima shiyapuki, eteyohombo oli li oshinima sha kwata moiti. Jehova oku tonde eteyohombo olo tali ningwa nopehe na etomheno lopamishangwa. — Malakia 2:15, 16.

Etomheno lopamishangwa lilipi tali dulu okuningifa ovalihomboli va teye ohombo? Jehova oku tonde oluhaelo. (Genesis 39:9; 2 Samuel 11:26, 27; Epsalme 51:6) Oku tonde oluhaelo neenghono, nomolwaasho okwa ufa kutya ovalihomboli otava dulu okuteya ohombo ngeenge umwe womuvo okwa i moluhaelo. (Opo u mone kutya oluhaelo ola kwatela mo shike, tala Etukulwa 9, okatendo okati-7.) Jehova okwa yandja oufemba kukaume kopahombo oo ehe na ondjo a tokole ngeenge ota twikile okukala pamwe nakaume kaye kopahombo oo e na ondjo ile ote mu henge po. (Mateus 19:9) Onghee hano, ngeenge kaume kopahombo oo ehe na ondjo okwa tokola okuhenga po mukwao oo e na ondjo, ita nyono kuJehova. Ndele nande osho shi li ngaho, eongalo lopaKriste ihali ladipike ovalihomboli va hengafane. Ashike otashi dulika pa kale eenghalo dimwe odo tashi dulika di linyengife kaume kopahombo oo ehe na ondjo a twikile okukala pamwe nakaume kaye oo e na ondjo, unene tuu ngeenge okwe livela ombedi shili. Ndele ovalihomboli ovo ve na omatomheno opamishangwa okuhengafana ove na okuninga etokolo kuvo vene nokutambula ko oilanduliko keshe oyo tashi dulika tai ke va hanga. — Ovagalati 6:5.

Ngeenge opa holoka eenghalo da kwata moiti mohombo, Ovakriste vamwe ohava tokola okutopoka ile okuhengafana nonande kape na oo a ya moluhaelo. Meenghalo da tya ngaho, Ombibeli oya popya kutya kaume kopahombo oo a fiya po mukwao “na kale ina hombolwa ile nava pafane ombili.” (1 Ovakorinto 7:11) Omukriste a tya ngaho ita dulu okukonga kaume kopahombo umwe opo a hombole vali. (Mateus 5:32) Natu ka tale keenghalo dimwe da kwata moiti odo ovalihomboli vamwe hava tale ko di li etomheno lokutopoka.

Ngeenge omushamane ina hala okufila oshisho oukwaneumbo waye. Oukwaneumbo otau dulu okukala wa hepa neenghono oipumbiwa yonghalamwenyo ngeenge omushamane ihe u file oshisho nonande ota dulu oku shi ninga. Ombibeli oya ti: ‘Ou iha file oshisho ava va vambulaye, ye okwe lidimbika eitavelo noku dulike kuou e he fi omwiitaveli.’ (1 Timoteus 5:8) Ngeenge omulumenhu a tya ngaho ina hala okulundulula eenghedi daye, omukulukadi ota dulu okutokola okwaamena onghalonawa yaye nosho yo younona vaye mokukonga omukanda wopaveta wokutopoka. Ovakulunhuongalo Ovakriste ove na okukonakona nawa va tale ngeenge eshi taku tiwa kutya  Omukriste oo iha file oshisho oukwaneumbo waye oshoshili ngoo. Omukriste oo ina hala okufila oshisho oukwaneumbo waye ota dulu okukondwa mo meongalo.

Ngeenge kaume kopahombo oha hepeke neenghono mukwao palutu. Oukolele nosho yo omwenyo wakaume kopahombo oo ha hepekwa otai dulu okukala i li moshiponga ngeenge kaume kaye kopahombo omukwanyanya neenghono. Ngeenge kaume kopahombo oo ta hepeke mukwao palutu Omukriste, ovakulunhuongalo ove na okukonakona nawa oshinima sha tya ngaho va tale ngeenge oshoshili ngoo. Omunhu oo ha kala a fula onya noha longifa eenghono ota dulu okukondwa mo meongalo. — Ovagalati 5:19-21.

Ngeenge oupamhepo wakaume kopahombo oo e li Omukriste ou li moshiponga. Kaume kopahombo oo ehe fi Omukriste otashi dulika a kale ta kendabala alushe oku shi ninga shidjuu kukaume kaye kopahombo oo e li Omukriste okulongela Jehova ile oku mu kondjifa a nyone oipango yaJehova monghedi yonhumba ile yongadi. Monghalo ya tya ngaho, kaume kopahombo oo e li moshiponga ota dulu okutokola a konge omukanda wopaveta wokutopoka, osho tashi dulika osho ashike tashi ke mu kwafela a kale ta ‘dulika kuKalunga ponhele yokudulika kovanhu.’ — Oilonga 5:29.

Meenghalo adishe odo da kwata moiti ngaashi odo twa kundafana, kape na oo e na oufemba okufininika umwe womovalihomboli oo ehe na ondjo a topoke nakaume kaye kopahombo ile a twikile okukala pamwe naye. Nonande ookaume kaye va pyokoka pamhepo nosho yo ovakulunhuongalo otava dulu oku mu kwafela noku mu pa omayele e likolelela kOmbibeli, ihava kala ve shii filufilu keshe shimwe osho tashi ningwa pokati kovalihomboli. Jehova oye ashike ta dulu okumona keshe osho tashi ningwa po. Ndele ngeenge omushamane ile omukainhu Omukriste ota nenepeke omaupyakadi oo e li moukwaneumbo wavo molwaashi ashike a hala okutopoka nakaume kaye kopahombo, ota ulike kutya iha fimaneke Kalunga nosho yo elongekido lohombo. Jehova oha mono eemhangela doukengeleledi keshe odo hadi ningwa kwaavo va hala okutopoka nookaume kavo kopahombo, nonande omunhu oku kendabale oku shi holeka. Oshoshili kutya “aishe oya kala ngaho poluhaela momesho aye, kuou tu noku mu lihepaululila.” (Ovaheberi 4:13) Ndele ngeenge eenghalo odo da nyika oshiponga neenghono otadi twikile moukwaneumbo, kape na oo e na oufemba okukembaula Omukriste oo tashi dulika a tokola okutopoka nakaume kaye kopahombo, molwaashi xuuninwa, “atusheni otu nokuholoka kolukalwatokolo laKalunga.” — Ovaroma 14:10-12.