Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

‘Likalekeni mohole yaKalunga’

 ETUKULWA 7

Owa fimaneka ngoo omwenyo ngaashi Kalunga?

Owa fimaneka ngoo omwenyo ngaashi Kalunga?

“Muove, omo omu nofifiya yomwenyo.” — EPSALME 36:10.

1, 2. (a) Oshali i na ondilo ya dja kuKalunga ilipi tu na? (b) Omolwashike okukala tu udite ko omafinamhango Ombibeli kwa fimanenena kunena?

TATE yetu womeulu okwe tu pa oshinima shi na ondilo inenenene, oshali yomwenyo oyo e tu pa tu li ovanhu ovanaendunge, ovo tava dulu okuhopaenena omaukwatya aye. (Genesis 1:27) Ohatu dulu okuuda ko nghee omafinamhango Ombibeli taa dulu oku tu etela ouwa, omolwoshali oyo i na ondilo yomwenyo tu li oishitwa inaendunge. Ngeenge otwa tula moilonga omafinamhango oo, ohatu dulu okukala twa pyokoka pamhepo nokukala tu hole Jehova. Ohatu ka kala yo twa ‘ika okutongola ouwa nowii.’ — Ovaheberi 5:14.

2 Okukala tu udite ko omafinamhango Ombibeli osha fimanenena kunena, molwaashi mounyuni omu na eenghalo da kitakana, omo tashi dulika paha kale eemhango dokondadalunde odo tadi ufa kutya oshike tu na okuninga po meenghalo da tya ngaho. Pashihopaenenwa, ounongononi wopaunamiti owa longa po oilongomwa ya dja mohonde nope na omilandu dopauhaku odo da kwatela mo ohonde. Oshinima osho oshihokwifa nosha wana okupewa elitulemo kwaaveshe ovo va hala okudulika kuJehova. Ndele nande ongaho, ngeenge otu shii omafinamhango Ombibeli oo taa wapalele, ohatu ka dula okuninga omatokolo e li pandunge, oo taa ka mbilipaleka eliudo letu notae ke tu kwafela tu likaleke mohole yaKalunga. (Omayeletumbulo 2:6-11) Natu ka kundafane amwe omomafinamhango oo.

OMWENYO NOHONDE OIYAPUKI

3, 4. Onaini Omishangwa da ulika oshikando shotete kutya ohonde oiyapuki, nouyapuki wohonde owe likolelela komafinamhango elipi?

3 Jehova okwa li a yelifa oshikando shotete nghee omwenyo nohonde ya pambafana filufilu nonokutya oiyapuki, okafimbo  kanini konima eshi Kain a dipaa Abel. Kalunga okwa li a lombwela Kain a ti: “Ondaka yohonde yondenge yoye tai kuwile nge onghuwo medu.” (Genesis 4:10) Pataleko laJehova, ohonde yaAbel oya li i lile po omwenyo waye ile onghalamwenyo yaye oyo Kain a xulifa po eshi e mu dipaa nonyanya. Onghee hano, otaku dulu okutiwa kutya, ohonde yaAbel oya li tai kuu kuKalunga a handukile oo e i tila shi. — Ovaheberi 12:24.

4 Konima yEyelu laNoa, Kalunga okwa li a lombwela ovanhu va kale tava li ombelela yoinamwenyo, ndele okwa li e va indika okulya ohonde. Kalunga okwa ti: “Ombelela i nomwenyo nokutya, i nohonde, inamu i lya. Ndelenee ohonde yeni vene ohandi ke i kwatela onghone.” (Genesis 9:4, 5) Oshipango osho otashi longo koludalo alishe laNoa fiyo okunena. Otashi koleke eityo leendjovo odo Kalunga a li a lombwela Kain, kutya omwenyo woishitwa aishe ou lilwe po kohonde. Oshipango osho osha yelifa nawa kutya Jehova, Odjo yomwenyo, ota ka handukila ovanhu aveshe ovo ihava fimaneke omwenyo nohonde. — Epsalme 36:10.

5, 6. Omhango yaMoses oya li ya ulika ngahelipi kutya ohonde oiyapuki noi na ondilo? (Tala yo  oshimhungu pepandja 78.)

5 Eeshili odo dopavali da fimanenena oda li da tumbulwa yo mOmhango yaMoses. Leviticus 17:10, 11 ota ti: ‘Keshe umwe ta li ohonde, keshe ohonde, heeno, kukeshe ou ha li ohonde, Ame ohandi ke mu taalelifa oshipala shange nehandu noku mu dima mo moshiwana shavo. Osheshi omwenyo wombelela u li mohonde, ndele Ame onde i mu pa koaltari i ninge ekwatakanifo leemwenyo deni, shaashi ohonde tai kwatakanifa, osheshi omwenyo u li muyo.’ * — Tala oshimhungu “Eenghono dohonde dokukwatakanifa,” pepandja 76.

6 Ngeenge ohonde yoshinamwenyo osho sha li sha dipawa kaya li tai ka longifwa koaltari, okwa li i na okutilwashi medu. Kungaho, omwenyo owa li hau shunifwa kOmuyandji  wao, monghedi yopafaneko. (Deuteronomion 12:16; Hesekiel 18:4) Ndele didilika kutya, Ovaisrael kava li ve na okulandula omilandu da kitakana opo va kufe mo okahonde keshe oko ka li mombelela yoshinamwenyo. Omuisrael okwa li ta dulu okulya ombelela neliudo la yela, shimha ashike oshinamwenyo sha li sha dipawa monghedi ya yuka nosha dja ohonde, molwaashi onghedi ya tya ngaho oya li tai fimanekifa Omuyandjimwenyo.

7. David okwa li a ulika ngahelipi kutya okwa fimaneka ouyapuki wohonde?

 7 David, ‘omulumenhu oo a li a hokiwa komutima’ waKalunga, okwa li a uda ko omafinamhango oko kwa li kwa kanghamena omhango yaKalunga i na sha nohonde. (Oilonga 13:22) Pomhito imwe eshi a li a fya enota neenghono, ovakwaita vaye vatatu ova li va ya monhanda yovatondi vavo, nokuteka omeva mondungu ndele tave mu etele. David okwa li e linyenga ngahelipi? Okwa li a pula a ti: “Ndi nwe ngeno ohonde yovalumenhu ava va ile ko nokuyandja eemwenyo davo?” Pataleko laDavid, omeva oo a li a etelwa okwa li e a tala ko paulelalela a fa ohonde yovaikwata vaye ovo va li va tula eemwenyo davo moshiponga. Nonande David okwa li a fya enota, omeva oo okwa li e a “tilashi poshi kokufimaneka Omwene.” — 2 Samuel 23:15-17.

8, 9. Mbela etaleko laKalunga li na sha nomwenyo nosho yo ohonde ola li la lunduluka eshi kwa totwa eongalo lopaKriste? Shi yelifa.

8 Omido 2 400 lwaapo konima yoshipango shi na sha nohonde osho sha li sha pewa Noa nosho yo omido 1 500 lwaapo konima eshi ehangano lOmhango la dikwa po, Jehova okwa li a nwefa mo olutuwiliki leongalo lopaKriste lonale li shange kutya: “Omhangela yOmhepo Iyapuki noyetu yo oyo ei mu ha twikwe nande omutengi umwe. Oyo tuu ei aike i he shii kweefiwa: Nye mu lidilike keshe eshi sha yambelwa oikalunga, nohonde nombelela ya fya oshunguungu, nohole yoipala.” — Oilonga 15:28, 29.

9 Osha yela kutya olutuwiliki lonale ola li la didilika kutya ohonde oiyapuki nonokutya osha puka oku i longifa nai naanaa ngaashi ashike okulongela oikalunga ile okuya moluhaelo. Ovakriste vashili kunena navo ova tambula ko oshipango osho. Kakele kaasho, otava dulu okuhafifa Jehova ngeenge tava ningi omatokolo e likolelela komafinamhango Ombibeli, shi na sha nokulongifwa kwohonde.

OKULONGIFWA KWOHONDE MOUNAMITI

Ongahelipi handi dulu okuyelifila ndokotola etokolo lange li na sha noutukulwa vanininini ovo va kufwa mohonde?

10, 11. (a) Eendombwedi daJehova ohadi tale ko ngahelipi okutulwa ohonde aishe nosho yo oitukuwa yohonde inene? (b) Omoinima ilipi i na sha nohonde Ovakriste tashi dulika va kale ve na omataleko a yoolokafana?

10 Eendombwedi daJehova odi shii kutya ‘okulidilika ohonde’  otashi ti okuhatulwa ohonde, okuhe i yandja opo i ka tulwe vamwe ile okutuvikilifa ohonde yomunhu mwene opo e ke i tulwe monakwiiwa. Ihadi dimine okutulwa oitukulwa inhe inene yohonde, ngaashi eesele ditilyana, eesele ditoka, oplatelets nosho yo oplasma, molwaashi ohadi dulika komhango yaKalunga i na sha nokulidilika ohonde.

11 Kunena, okupitila momilandu donhumba, oitukulwa inene yohonde luhapu ohai tukaulwa moutukulwa vanininini ovo hava longifwa meenghedi di lili noku lili. Mbela Omukriste ota dulu okudimina okutulwa outukulwa ovo? Mbela oku na oku va tala ko ve li “ohonde”? Keshe umwe oku na okutokola kuye mwene moshinima osho. Keshe umwe oku na yo okutokola kuye mwene ngeenge tashi uya pomauhaku oo a kwatela mo eshina lokuwapaleka ohonde (hemodialysis), omulandu wokuhaula ohonde (hemodilution) nosho yo okuxupifa ohonde yomunhu mwene oyo tai di molutu neshina lokufipa po ohonde pefimbo letando  (cell salvage), shimha ashike ya kala inai tuvikilwa oule wefimbo. — Tala Oshiwedelwako pepandja 215-218.

12. Otu na okutala ko nokuungaunga ngahelipi noinima oyo ya kwatela mo eliudo?

12 Mbela oinima omo tu na okuninga omatokolo pauhandimwe inai fimana kuJehova? Hasho nandenande, molwaashi Jehova oku na ohokwe mwaasho hatu diladila nosho yo momalinyengotomheno etu. (Lesha Omayeletumbulo 17:3; 24:12.) Onghee hano, ngeenge otwa pula ewiliko kuJehova okupitila meilikano nokukonga omauyelele noukeka shi na sha nouhaku wonhumba, otu na okupwilikina keliudo letu la deulwa kOmbibeli. (Ovaroma 14:2, 22, 23) Katu na okweefa vamwe ve tu findile omataleko avo, ndele nafye katu na okupula vamwe kutya: “Ngeno oove wa li monghalo ya fa yange, ngeno oto ningi po shike?” Omukriste keshe oku na ‘okuhumbata omutengi waye mwene’ moinima ya tya ngaho. * — Ovagalati 6:5; Ovaroma 14:12; tala oshimhungu “ Ohandi tale ko ngoo ohonde kutya oiyapuki?” pepandja 81.

EEMHANGO DAJEHOVA OTADI ULIKE KUTYA OKU LI TATE OMUNAHOLE

13. Eemhango nosho yo omafinamhango aJehova otaa holola shike shi na sha naye? Shi yelifa.

13 Eemhango nosho yo omafinamhango oo e li mOmbibeli otaa ulike kutya Jehova oku li Omuyandjimhango omunaendunge naXe omunahole, oo e na ko nasha shili nonghalonawa yovana vaye. (Epsalme 19:8-12) Nonande oshipango shi na sha ‘nokulidilika ohonde’ kasha li sha yandjwa omolwokukaleka po oukolele wovanhu, otashi tu amene komaupyakadi oo haa etifwa kokutulwa ohonde. (Oilonga 15:20) Ovanhu vahapu ovo ve li moikondo i na sha nounamiti ova tala ko okutanda nopehe na okulongifa ohonde ku li “onghedi ya denga mbada” i na sha nouhaku wopashinanena. Osho otashi yandje oumbangi kOvakriste vashili kutya Jehova omunongo kuhe na vali nonokutya omunahole. — Lesha Jesaja 55:9; Johannes 14:21, 23.

14, 15. (a) Ohole yaKalunga yokuhola oshiwana shaIsrael oya li i liwetikile meemhango dilipi? (b) Ongahelipi to dulu okutula moilonga omafinamhango oko kwa li kwe likolelela eemhango di na sha neameno odo da li da pewa Ovaisrael?

 14 Okunakonasha kwaKalunga shi na sha nonghalonawa yoshiwana shaye muIsrael shonale okwa li ku liwetikile meemhango dihapu odo a li e shi pa. Pashihopaenenwa, okwa li e va lombwela kutya omaumbo avo okwa li e na okukala e na oshikelelifongubu kombada yonduda opo ku kelelwe oiponga, molwaashi kombada yeenduda okwa li haku longelwa oilonga ihapu. (Deuteronomion 22:8; 1 Samuel 9:25, 26; Nehemia 8:16; Oilonga 10:9) Kalunga okwa li yo e va lombwela kutya nava pashukile eemhedi odo da nyika oshiponga. (Exodus 21:28, 29) Ngeenge omunhu okwe lipwililikile oipango oyo, okwa li hashi ulike kutya ina fimaneka onghalonawa yavamwe nosha li tashi dulu okweetifa etimba lohonde.

15 Ongahelipi hatu dulu okutula moilonga omafinamhango oko kwa li kwa kanghamena eemhango odo? Oto dulu okukonakona onghalo yohauto yoye, onghedi omo ho shingi, oinamwenyo yoye, eumbo loye, onhele oko ho longele nosho yo omalihafifo oye. Moilongo imwe, ovanyasha vahapu ohava file moiponga oyo hai etifwa luhapu kokuhenakonasha. Ndele ovanyasha ovo va hala okulikaleka mohole yaKalunga ova fimaneka omwenyo nomolwaasho ihave lihafifa noinima oyo ya nyika oshiponga. Ihave lifufya mokudiladila kutya ovanyasha ihava mono oiponga noupu. Ndele ponhele yaasho, ohava hafele ounyasha wavo mokuhenuka omaupyakadi. — Omuudifi 11:9, 10.

16. Efinamhango lOmbibeli lilipi tali ulike kutya osha puka okulikufa edimo? (Tala yo eshangelo lopedu.)

16 Omwenyo wokaana oko inaka dalwa nao ou na ondilo koshipala shaKalunga. MuIsrael shonale, ngeenge omunhu okwa monifa oshiponga omukainhu mufimba, ndele ta fi ile okaana, Kalunga okwa li ha tale ko omunhu oo a etifa oshiponga e li omudipai, nomunhu a tya ngaho okwa li e na okuyandja ‘omwenyo waye.’ *  (Lesha Exodus 21:22, 23.) Onghee hano, diladila kunghee Jehova ha kala e udite ngeenge e wete ounona vahapu inava dalwa tava fi omolwovanhu ovo have likufa omadimo owina omudo keshe, navahapu ohave shi ningi omolwouwa wavo vene nomolwokuhena eenghedi.

17. Ongahelipi to dulu okuhekeleka omunhu oo a li e likufa edimo fimbo ine lihonga kombinga yomifikamhango daKalunga?

 17 Ongahelipi shi na sha nomukainhu oo a li e likufa edimo fimbo ina shiiva oshili yOmbibeli? Mbela osho osha hala okutya Jehova ita dulu oku mu fila onghenda? Hasho nandenande! Omunhu oo e livela ombedi shili ota dulu okudiminwa po kuJehova pakanghameno lohonde yaJesus ya tika. (Epsalme 103:8-14; Ovaefeso 1:7) Kristus okwa ti: “Ame inandi uya okwiifana ovayuki, ndele ovalunde ve lidilulule.” — Lukas 5:32.

INO KALA U NA OUTONDWE

18. Ombibeli oya popya kombinga yoshietifi shinene shetileshi lohonde shilipi?

18 Kakele kokuhaningila vamwe owii, Jehova okwa hala tu kufe mo outondwe momitima detu, oo hau etifa luhapu etileshi lohonde. Omuyapostoli Johannes okwa ti: “Keshe ou ta tondo omumwaxe oye omudipai.” (1 Johannes 3:15) Omunhu a tya ngaho ke tonde ashike omumwaxe ndele ohe mu halele yo efyo. Outondwe waye otashi dulika u limonikile mokulundila omumwaxe nomalundilo manyanyalifa, oo ngeno okwa li oshili, ngeno otaa dulu okutokolifa omumwaxe kuJehova. (Leviticus 19:16; Deuteronomion 19:18-21; Mateus 5:22) Onghee hano, osha fimana okukufa mo outondwe oo tashi dulika wa mena omidi momitima detu. — Jakob 1:14, 15; 4:1-3.

19. Omunhu oo ha wilikwa komafinamhango Ombibeli oha tale ko ngahelipi omishangwa ngaashi Epsalme 11:5 nosho yo Ovafilippi 4:8, 9?

19 Ovo va fimaneka omwenyo ngaashi Jehova nova hala okulikaleka mohole yaye ohava henuka yo elongifo leenghono loludi keshe. Epsalme 11:5 otali ti kutya Jehova oku ‘tonde ou e hole owii,’ ile tu tye, elongifo leenghono. Omushangwa oo itau popi ashike kombinga youkwatya waKalunga, ndele ou na efinamhango olo li na okunwefa mo onghedi yetu yokukalamwenyo. Ou na okulinyengifa ovo ve hole Kalunga va henuke oludi keshe lomalihafifo oo tashi dulika taa xwaxwameke elongifo leenghono. Natango, omushangwa oo tau ti kutya Jehova ‘oKalunga kombili’ ohau linyengifa ovapiya vaye va yadife omadiladilo nomitima davo noinima oyo iholike, iwa noi shii okupandulwa, oyo hai etifa ombili. — Lesha Ovafilippi 4:8, 9.

 KALA KOKULE NOMAHANGANO OO E NA ETIMBA LOHONDE

20-22. Ovakriste ohava tale ko ngahelipi ounyuni, nomolwashike?

20 Pataleko laKalunga, ounyuni aushe waSatana ou na etimba lohonde. Onghalelo yao yeepolotika, oyo ya popiwa mOmishangwa pafaneko i li oilyani oikwanyanya, oya dipaifa ovanhu omamiliyona mahapu, mwa kwatelwa ovapiya vaJehova vahapu. (Daniel 8:3, 4, 20-22; Ehololo 13:1, 2, 7, 8) Omahangano opangeshefa nosho yo opaunongononi, oo haa longele kumwe nomahangano opapolotika, okwa longa po oilwifo ya nyika oshiponga, nokungaho otae likola oimaliwa ihapu okupitila monghedi ya tya ngaho. Osho itashi ulike tuu shili kutya ‘ounyuni aushe ou li mepangelo lomunawii’! — 1 Johannes 5:19.

21 Molwaashi ovashikuli vaJesus ‘kave fi vomounyuni’ noihava kufa ombinga nandenande meepolotika dao nosho yo moita, ohava henuka okukala netimba lohonde pauhandimwe nosho yo momudingonoko. * (Johannes 15:19; 17:16) Ngaashi Kristus, ihava alulile  vamwe owii ngeenge tava hepekwa. Ndele ponhele yaasho, ove hole ovatondi vavo nohave va ilikanene nokuli. — Mateus 5:44; Ovaroma 12:17-21.

22 Komesho yaaishe, Ovakriste vashili ohava henuka okulimbwanga ‘muBabilon Shinene,’ ouhamba wounyuni womalongelokalunga oipupulu, osho shi na unene etimba lohonde. Eendjovo daKalunga oda ti: “Musho omwa monikile ohonde yovaprofeti, nohonde yovayapuki noyaava aveshe va dipawa kombada yedu.” Onghee hano, otwa londwelwa taku ti: “Djeni mo musho, nye ovanhu vange.” — Ehololo 17:6; 18:2, 4, 24.

23. Okudja mo muBabilon Shinene osha hala okutya shike?

23 Okudja mo muBabilon Shinene osha kwatela mo shihapu shihe fi ashike okudimifa mo edina loye. Osha kwatela mo yo okutonda oilonga ii oyo ya tambulwa ko komalongelokalunga oipupulu ile oyo haa xwaxwameke nokuhafya ohoni, ngaashi oluhaelo, okulidopa meepolotika nosho yo okulalakanena oupuna omolwolwisho. (Lesha Epsalme 97:10; Ehololo 18:7, 9, 11-17) Oilonga ya tya ngaho ohai etifa luhapu etileshi lohonde.

24, 25. (a) Opakanghameno lashike Kalunga ha file onghenda omunhu oo e na etimba lohonde ndele okwe livela ombedi? (b) Osho otashi tu dimbulukifa elongikido lilipi olo la li ko pefimbo lOmbibeli?

24 Fimbo twa li inatu tambula ko elongelokalunga lashili, keshe umwe womufye okwa li ha yambidida onghalelo yaSatana monghedi yonhumba ile yongadi, nokungaho, okwa li tu na etimba lohonde. Ndelenee molwaashi otwa lundulula onghedi yetu yokukalamwenyo, otu na eitavelo mekuliloyambo laKristus notwe liyapulila Kalunga, Kalunga okwe tu fila onghenda note tu amene pamhepo. (Oilonga 3:19) Eameno olo otali tu dimbulukifa kombinga yoihondamenolando yopefimbo lOmbibeli. — Numeri 35:11-15; Deuteronomion 21:1-9.

25 Elongekido olo ola li hali longo ngahelipi? Ngeenge Omuisrael a li a dipaa mukwao shihe fi oshiningilewina, okwa li e na okuya onhapo kushimwe shomoilando oyo. Ngeenge ovatokoli ovo ve na owino ova ningi etokolo li na sha naasho, omunhu oo a dipaa mukwao shihe fi oshiningilewina okwa li e na okukala moshihondamenolando omo a ya fiyo osheshi omupristeri omukulunhu a fya. Opo nee konima yaasho omunhu oo okwa li ta dulu okukala keshe opo a hala. Kashi fi tuu oshihopaenenwa sha tongomana shonghenda yaKalunga! Osho otashi ulike yo kutya okwa lenga neenghono omwenyo womunhu. Oihondamenolando oyo yonale otai yelekwa nelongekido  laKalunga lokunena olo la kanghamena kekuliloyambo laKristus, li na sha noku tu amena kefyo ngeenge twa nyona oipango yaKalunga i na sha nouyapuki womwenyo nohonde shihe fi oshiningilewina. Mbela owa fimaneka ngoo efiloshisho olo? Ongahelipi to dulu okuulika kutya owe li fimaneka? Onghedi imwe omo to dulu okuulika kutya owa fimaneka efiloshisho olo oyo okushiva vamwe va tambule ko elongekido laKalunga loku tu amena, unene tuu eshi ‘oudjuu munene’ tau ehene popepi neenghono. — Mateus 24:21; 2 Ovakorinto 6:1, 2.

ULIKA KUTYA OWA FIMANEKA OMWENYO MOKUUDIFA ETUMWALAKA LOUHAMBA

26-28. Omonghedi ilipi onghalo yetu ya faafana naayo yomuprofeti Hesekiel, nongahelipi hatu dulu okulikaleka mohole yaKalunga?

26 Onghalo yoshiwana shaJehova kunena otai tu dimbulukifa omuprofeti Hesekiel wonale, oo a li a tumwa kuJehova a ka udifile Ovaisrael omalondwelo aYe, e li omunangeli, meityo lopamhepo. Kalunga okwa li e mu lombwela a ti: “Ngenge to udu ondjovo mokanya kange u noku va londola.” Ngeno Hesekiel okwa efele po oshilonga osho, ngeno okwa ka kala e na etimba lohonde yaavo va li va dipawa eshi Jerusalem sha li sha hanaunwa po. (Hesekiel 33:7-9) Ndele Hesekiel ka li e lietela etimba lohonde molwaashi okwa li a dulika.

27 Kunena, otwa teelela exulilo lounyuni aushe waSatana. Onghee hano, Eendombwedi daJehova oda tala ko oilonga yokuudifa ‘efiku longhone’ yaKalunga nosho yo etumwalaka lOuhamba i li oshinakuwanifwa noufembanghenda. (Jesaja 61:2; Mateus 24:14) Mbela oho kufa ngoo ombinga pauyadi moilonga ya tya ngaho ya fimanenena? Omuyapostoli Paulus okwa li a wanifa po oilonga yaye yokuudifa noudiinini. Nomolwaasho okwa li a popya a ti: “Ame ndi he netimba nande olohonde yomunhu. Osheshi ame inandi fiya po sha, ndelenee onde mu udifila omhangela aishe yexupifo laKalunga.” (Oilonga 20:26, 27) Kashi fi tuu oshihopaenenwa shiwa kufye!

28 Opo tu likaleke mohole yaTate yetu Jehova, katu na ashike okutala ko omwenyo nohonde ngaashi he i tale ko. Ndele otu na yo okukala twa koshoka ile tu va yapuki koshipala shaye, ngaashi hatu ke shi kundafana metukulwa tali landula.

^ okat. 5 Oshishangomwa Scientific American osha popya kombinga youtumbulilo “omwenyo wombelela u li mohonde” oo wa popiwa kuKalunga, sha ti: “Nonande oshoshili kutya ohonde otai dulu okutalwa ko i li omwenyo pamufefifo, outumbulilo oo otau popi oshinima sholelalela, oushili oo kutya omaludi aeshe eesele dohonde okwa pumbiwa opo oshishitwa shi kale nomwenyo.”

^ okat. 12 Tala o-Awake! yaAuguste 2006, epandja 3-12, ya nyanyangidwa kEendombwedi daJehova.

^ okat. 16 Ovashangi vomamboitya Ombibeli ova popya kutya eendjovo odo di li muExodus “osha yela kutya itadi ulike ashike kokuyahameka omukainhu oye aeke.” Didilika yo kutya Ombibeli inai popya kutya Kalunga oha tale kutya engwili ile okaana oka kala oule wefimbo li fike peni moshidalelo opo a tokole omunhu.

^ okat. 21 Tala Etukulwa 5 lembo eli, li na oshipalanyole “Ongahelipi hatu dulu okukala twa yooloka ko kounyuni?

^ okat. 70 Tala Oshiwedelwako pepandja 215-218, opo u mone ouyelele muhapu.