Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 48

Oto ka kala ngoo mounyuni mupe waKalunga wombili?

Oto ka kala ngoo mounyuni mupe waKalunga wombili?

KALUNGA okwa li a tula Adam naEva moshikunino shaEden. Ndele nonande Adam naEva kava li va dulika kuKalunga nova fya, Kalunga okwe shi ninga tashi shiiva opo oludalo lavo, nafye kunena twa kwatelwa mo, li dule oku ka kala nomwenyo mOparadisa fiyo alushe. Ombibeli oya udaneka ya ti: “Ovayuki, vo otava ka fyuulula [edu, OB-1986], ndee tava kala mo alushe.” — Epsalme 37:29.

Ombibeli oya popya shi na sha ‘neulu lipe nedu lipe.’ (Jesaja 65:17; 2 Petrus 3:13) ‘Eulu’ lokunena olo omapangelo opanhu, ashike Jesus Kristus nosho yo ovo tava ka pangela pamwe naye meulu ovo tava ka kala oshitukulwa ‘sheulu lipe.’ Itashi ka kala tuu shihafifa eshi eulu olo lipe, sha hala okutya, epangelo laKalunga li li pauyuki nolombili, tali ka pangela edu alishe!

Ndele mbela ‘edu lipe’ oshike? —  Edu lipe olo ovanhu ovayuki ovo ve hole Jehova. Owa pumbwa okushiiva kutya ngeenge Ombibeli tai popi ‘edu’ omafimbo amwe, otai popi shi na sha novanhu ovo ve li kombada yedu, ndele hadu lo vene. (Genesis 11:1, NW; Epsalme 66:4, OB-1986; 96:1) Onghee hano, ovanhu ovo ve li edu lipe otava ka kala oku kombada yedu.

Ounyuni ou wovahenakalunga itau ka kala po vali. Dimbuluka kutya Eyelu lopefimbo laNoa ola li la hanauna po ounyuni wovanhu ovakolokoshi. Ndele ngaashi twe lihonga, ounyuni ou wonena wovakolokoshi otau ka hanaunwa po puHarmagedon. Paife natu ka tale kutya konima yaHarmagedon onghalo otai ka kala ya tya ngahelipi mounyuni mupe waKalunga.

Mbela owa hala oku ka kala fiyo alushe mOparadisa mounyuni mupe  waKalunga wombili? —  Itatu ka pumbwa eendokotola opo tu dule okukala nomwenyo fiyo alushe. Itapa ka kala eepela odo tadi ke tu kwafela tuha fye. Opo tu ka kale nomwenyo fiyo alushe, otwa pumbwa ashike okweehena popepi naKalunga. Omuhongi Munene okwe tu lombwela shi na sha nanghee hatu dulu okweehena popepi naKalunga.

Natu kufe Eembibeli detu, ndele hatu pandje kuJohannes 17:3. Omuhongi Munene okwa popya momushangwa omo a ti: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.”

Jesus okwa ti otwa pumbwa vati okuninga shike opo tu ka kale nomwenyo fiyo alushe? —  Tete otu na okushiiva Tate yetu womeulu, Jehova, nosho yo Omona waye, oo a yandja omwenyo waye omolwetu. Osho osha hala okutya otwa pumbwa okukonakona Ombibeli. Embo eli Lihonga kOmuhongi Munene otali ke tu kwafela tu konakone Ombibeli.

Ongahelipi okulihonga shi na sha naJehova tashi tu kwafele tu ka kale nomwenyo waalushe? —  Ngaashi ashike twa pumbwa oikulya efiku keshe, otwa pumbwa yo okulihonga kombinga yaJehova efiku keshe. Ombibeli oya ti: “Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.” — Mateus 4:4.

Otwa pumbwa yo okushiiva Jesus Kristus molwaashi Kalunga okwa li a tuma Omona waye opo tu dule okudiminwa po omatimba etu. Ombibeli oya ti: ‘Kaku na umwe exupifo la kala muye.’ Ombibeli oya ti yo kutya “ou ta itavele Omona, oye e nomwenyo waalushe.” (Oilonga 4:12; Johannes 3:36) ‘Okwiitavela’ Jesus osha hala okutya shike? — Osha hala okutya otwa itavela filufilu Jesus notu shii kutya ohatu dulu ashike oku ka kala nomwenyo waalushe omolwaye. Otwa itavela ngoo shili Jesus? —  Ngeenge otwe mu itavela, otu na okutwikila okulihonga kOmuhongi Munene efiku keshe nokuninga osho te tu lombwele tu ninge.

Onghedi imwe ya denga mbada omo hatu dulu okulihonga kOmuhongi Munene omokulesha embo eli lwoikando nokutala komafano  aeshe oo e li mo nosho yo okudiladila kuo. Kendabala yo okunyamukula omapulo oo e li pomafano. Owa pumbwa yo okulesha embo eli nameme woye ile natate woye. Ngeenge ku li pamwe novadali voye, lesha pamwe nomunhu wonhumba a kula ile nounona vakweni. Mbela itashi ka kala shiwa ngeenge owa kwafele vamwe ve lihonge kOmuhongi Munene osho va pumbwa okuninga opo va ka kale nomwenyo fiyo alushe mounyuni mupe waKalunga? — 

Ombibeli oye tu lombwela ya ti: “Ounyuni otau xulu po.” Ashike Ombibeli oya yelifa yo kutya ongahelipi hatu dulu oku ka kala nomwenyo fiyo alushe mounyuni mupe waKalunga, ya ti: “Ou ta longo ehalo laKalunga, oye ta kala alushe.” (1 Johannes 2:17) Ndele mbela oshike tashi tu kwafele tu dule oku ka kala mounyuni mupe waKalunga? — Otu na okushiiva Jehova nosho yo Omona waye omuholike Jesus. Ndele otwa pumbwa yo okuninga osho hatu lihongo. Okukonakona kwoye embo eli naku ku kwafele u lihonge kombinga yaJehova naJesus, nou tule moilonga oinima oyo to lihongo.