Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 43

Oolyelye ve li ovamwaxo novamwanyoko?

Oolyelye ve li ovamwaxo novamwanyoko?

OMUHONGI MUNENE okwa li a pula epulo likumwifa pomhito imwe a ti: “Meme olyelye novamwameme oolyelye?” (Mateus 12:48) Mbela oto dulu okunyamukula epulo olo? —  Otashi dulika u shii kutya ina yaJesus oMaria. Ndele mbela ou shii ngoo omadina ovamwainamati vaJesus? —  Mbela Jesus okwa li ngoo e na ovamwainakadona? — 

Ombibeli oya ti kutya ovamwainamati vaJesus ovo ‘Jakob, Josef, Simon naJudas.’ Jesus okwa li yo e na ovamwainakadona ovo va li po pefimbo olo a li ta udifa. Ashike ovamwaina vaJesus aveshe ovo ova li vanini kuye molwaashi Jesus oye a li oshiveli. — Mateus 13:55, 56; Lukas 1:34, 35.

Mbela ovamwainamati vaJesus navo ova li ovahongwa vaye? — Ombibeli oya ti kutya tete kava li ve “mu itavela.” (Johannes 7:5) Ndele konima yefimbo, Jakob naJudas ova li va ninga ovahongwa vaJesus, nova shanga nokuli omambo amwe Ombibeli. Mbela ou shi shii kutya omambo oo va shanga oelipi? —  Oo embo laJakob nosho yo laJudas.

Nonande ovamwainakadona vaJesus inava tumbulwa komadina mOmbibeli, otu shi shii kutya okwa li e na ovamwainakadona vavali lwaapo, notashi dulika nokuli va li ve dule po. Mbela ovamwainakadona vaJesus ova li va ninga ovashikuli vaye? —  Ombibeli inai popya kombinga yaasho, nomolwaasho katu shi shii ngeenge ova li va ninga ovashikuli vaye ile hasho. Ndele mbela ou shi shii kutya omolwashike Jesus a li a pula epulo eli kutya: “Meme olyelye novamwameme oolyelye?” — Natu ka tale kutya omolwashike.

Pomhito imwe, Jesus okwa li ta hongo ovahongwa vaye eshi omunhu umwe a li a nukila mo ndele te mu lombwele ta ti: “Nyoko novamwanyoko  [ove] li pondje ndele va hala ve ku popife.” Jesus okwa li a longifa omhito oyo opo a honge ovanhu oshilihongomwa sha fimana eshi a li a pula epulo likumwifi, a ti: “Meme olyelye novamwameme oolyelye?” Opo nee Jesus okwa li a ulika kovahongwa vaye ndele ta nyamukula ta ti: “Tala, meme, novamwameme ovo ava!”

Opo nee, Jesus okwa li a yelifa kutya okwa hala okutya shike, a ti: “Keshe tuu ou ta wanifa ehalo laTate meulu, oye omumwameme omulumenhu nomumwameme omukainhu nameme.” (Mateus 12:47-50) Osho otashi ulike kutya Jesus okwa li e hole ovahongwa vaye neenghono. Jesus okwa li a hala oku tu honga kutya ovahongwa vaye ova li ngaashi ovamwainamati novamwainakadona nooina.

Jesus okwa ti kutya ovamwaxe novamwaina ovo oolyelye?

Pefimbo opo ovamwainamati vaJesus, Jakob, Josef, Simon naJudas, kava li va hangwa va itavela kutya Jesus Omona waKalunga. Otashi dulika kava li va itavela osho omweengeli Gabriel a li a lombwela ina. (Lukas 1:30-33) Onghee hano, otashi dulika va li ve tonde Jesus. Keshe oo he lihumbata monghedi ya tya ngaho ke fi omumwainamati ile omumwainakadona wetu wolela.  Mbela ou shii omunhu wonhumba oo e tonde omumwainamati ile omumwainakadona? — 

Ombibeli otai tu lombwele kombinga yaEsau naJakob nosho yo nghee Esau a li a handuka neenghono ndele ta ti: “Omumwameme Jakob ohandi mu dipaa.” Rebekka, ina yaEsau naJakob, okwa li a tila neenghono ndele ta lombwele Jakob a ka kale kokule neumbo lavo opo Esau ehe mu dipae. (Genesis 27:41-46) Ashike konima yomido dihapu, Esau okwa li a lundulula oikala yaye ndele ta papatele nokuxupita Jakob eshi va li va shakena. — Genesis 33:4.

Konima yefimbo, Jakob okwa ka dala ovanamati 12, ndele ovo va kula kava li ve hole Josef oo a li munini. Ova li va twila Josef ondubo molwaashi okwa li e holike neenghono kuxe. Onghee hano, ova li va landifa po Josef kovanhu ovo va li hava landifa ovapika fimbo va li tava i kuEgipti. Opo nee, ovamwaina vaJosef ova li va lombwela xe kutya Josef okwa dipawa koshifitukuti. (Genesis 37:23-36) Oshinima osho kasha li tuu shii, hasho mbela? — 

Konima yefimbo ovamwaxe vaJosef ova li ve livela ombedi kwaasho va li va ninga, na Josef okwa li e va dimina po.  Mbela ou wete nghee Josef a li a hopaenena Jesus? —  Ovayapostoli vaJesus ova li ve mu fiya po eshi a li moudjuu, na Petrus okwa li e mu lidimbika nokuli. Ndele nande ongaho, Jesus okwa li e va dimina po aveshe, ngaashi Josef a ninga.

Oshike tu na okulihonga mwaasho Kain a li a ningila Abel?

Opa li vali ovamwainafana vavali, Kain naAbel, ovo hatu dulu okulihonga oshilihongomwa kuvo. Kalunga okwa li a mona momutima waKain kutya ke hole shili omumwaxe. Onghee hano, Kalunga okwa li a lombwela Kain kutya na lundulule oikala yaye. Ngeno Kain okwa li e hole shili Kalunga, ngeno okwa pwilikina kwaasho a li e mu lombwela. Ndele Kain ka li e hole Kalunga. Efiku limwe, Kain okwa li a lombwela Abel a ti: “Natu ye moixwa.” Abel okwa li a ya pamwe naKain moixwa, ndele fimbo va li moixwa ovo aveke, Kain okwa li a denga Abel neenghono, ndele te mu dipaa. — Genesis 4:2-8.

Ombibeli otai tu lombwele kutya otu na okulihonga mo oshilihongomwa she likalekelwa moshiningwanima osho. Mbela ou shi shii kutya oshike hatu lihongo mo? —  Ombibeli oya ti: ‘Ondaka ei mwe i uda pehovelo, oyo ei, fye otu na okuholafana, tuha fe Kain, oo a dja momunawii.’ Onghee hano, ovamwainamati novamwainakadona ove na okukala ve holafane. Kave na okukala va fa Kain. — 1 Johannes 3:11, 12.

Omolwashike inatu hala okukala twa fa Kain? —  Omolwaashi Ombibeli otai ti kutya Kain ‘okwa dja momunawii,’ Satana Ondiaboli. Molwaashi Kain okwa li e na oikala ya fa yOndiaboli, okwa li a fa a dalwa kOndiaboli.

Mbela ou wete kutya omolwashike sha fimana okukala u hole ovamwainamati novamwainakadona voye? —  Ngeenge owa kala uhe va hole, oto hopaenene ounona valyelye? —  Ounona vOndiaboli. Mbela owa hala okukala wa fa ounona ovo? —  Ndele mbela ongahelipi to dulu okuulika kutya owa hala okukala okaana kaKalunga? — Omokukala u hole ovamwainamati novamwainakadona voye.

Ndele mbela ohole oshike? —  Ohole oyo omaliudo omomutima oo hae tu ningifa tu kale twa hala okulongela vamwe ouwa. Ohatu ulike kutya otu hole vamwe ngeenge hatu ungaunga nawa navo nosho yo  ngeenge hatu va ningile ouwa. Ndele mbela oolyelye ve li ovamwatate novamwameme, ovo tu na okukala tu hole? —  Dimbuluka kutya Jesus okwa li a popya kutya ovovo ve li meongalo lopaKriste.

Ongahelipi to dulu okuulika okutya ou hole ovamwaxo?

Osha fimana shi fike peni okukala tu hole ovamwatate novamwameme Ovakriste? —  Ombibeli oya ti: “Ou e he hole omumwaxe, nande e mu wete, oye ita dulu okuhola Kalunga e he mu wete.” (1 Johannes 4:20) Onghee hano, katu na ashike okukala tu hole ovanhu vonhumba meongalo lopaKriste, ndele otu na okukala tu va hole aveshe. Jesus okwa ti: “Opo tuu opo aveshe tave mu koneke kutya, nye ovalongwa vange, ngenge mu holafane.” (Johannes 13:35) Mbela ou hole ovamwatate novamwameme aveshe? —  Dimbuluka kutya ngeenge ku va hole, ito dulu okukala u hole shili Kalunga.

Ongahelipi hatu dulu okuulika kutya otu hole shili ovamwatate novamwameme? —  Ngeenge otwa kala tu va hole, itatu ke va henuka molwaashi inatu hala okupopya navo. Ohatu ka kala tu na oukaume navo aveshe. Ohatu ke va ningila yo alushe ouwa nokukala twa hala oku va pa sha. Ngeenge ova i moupyakadi wonhumba, ohatu ke va kwafela molwaashi otu li oumwainafana wa kula.

Ngeenge otwa kala tu hole shili ovamwatate novamwameme aveshe, mbela otashi ulike shike? —  Otashi ulike kutya otu li ovahongwa vaJesus, Omuhongi Munene. Mbela inatu hala okukala ovahongwa vaJesus? — 

Okuulikila ovamwatate novamwameme ohole okwa kundafanwa yo mOvagalati 6:10, 21 nosho yo 1 Johannes 4:8, 21. Pandja Ombibeli yoye ndele to lesha omishangwa odo.