Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 40

Ongahelipi hatu dulu okuhafifa kalunga?

Ongahelipi hatu dulu okuhafifa kalunga?

OSHIKE hatu dulu okuninga po opo tu hafife Kalunga? Mbela ohatu dulu ngoo oku mu pa sha? —  Jehova okwa ti: “Oifitukuti aishe oyange.” Okwa ti yo: “Oshisilveri oshange noshingoldo oshange.” (Epsalme 24:1; 50:10; Haggai 2:8) Ndele ope na oshinima shonhumba osho hatu dulu okupa Kalunga. Oshike mbela hatu dulu oku mu pa? — 

Jehova okwe tu pa emanguluko lokuhoolola ngeenge otwa hala oku mu longela ile hasho. Ihe tu kondjifa tu longe osho a hala tu ninge. Natu kendabale okuuda ko kutya omolwashike Kalunga e tu shita tu kale hatu dulu okuhoolola ngeenge otwa hala oku mu longela ile hasho.

Mbela ou shii omashina oo haa longwa a kale ashike taa longo she likolelela kokushitelwa kwao? Omashina a tya ngaho ohaa ningi keshe osho a shitelwa a ninge, nomolwaasho ihaa dulu okuninga ehoololo. Jehova okwa li ta dulu oku tu shita atusheni twa fa omashina a tya ngaho, hatu ningi ashike osho a hala tu ninge. Ashike Jehova ine tu shita monghedi ya tya ngaho. Mbela ou shi shii kutya omolwashike ine tu shita twa fa omashina a tya ngaho? —  Oudanaukifo vamwe navo ova longwa va fa omashina oo twa popya metetekelo. Ngeenge omunhu okwa findi okabande koudanaukifo va tya ngaho, ohava ningi ashike oinima oyo va shitelwa va kale tava ningi. Mbela owa mona nale okadanaukifo ka tya ngaho? — Luhapu ovanhu ohava loloka okudanauka noudanaukifo ovo hava ningi ashike  oinima oyo va shitelwa va kale tava ningi. Ndele Kalunga ina hala tu kale hatu dulika kuye molwaashi twa fa omashina oo a shitelwa a kale tae mu longele. Jehova okwa hala tu kale hatu mu longele molwaashi tu mu hole nomolwaashi twa hala okudulika kuye.

Omolwashike Kalunga ine tu shita twa fa omashina oo haa longo she likolelela kokushitelwa kwao?

Mbela oto diladila kutya Tate yetu womeulu oha kala e udite ngahelipi ngeenge hatu dulika kuye nehalo liwa? —  Lombwele nge kutya elihumbato loye ohali kumu ngahelipi ovadali voye? —  Ombibeli oya ti kutya okaana okanaendunge ‘otaka hafifa xe’ ndelenee okaana kalai ‘oko oluhodi laina.’ (Omayeletumbulo 10:1) Mbela owa didilika kutya ngeenge to ningi osho meme woye natate woye tave ku lombwele u ninge, ohashi va hafifa? —  Ndele mbela ohava kala ve udite ngahelipi ngeenge ito dulika kuvo? — 

Ongahelipi to dulu okuhafifa Jehova nosho yo ovadali voye?

Paife natu diladile kombinga yaTate yetu womeulu, Jehova. Jehova ohe tu lombwele kutya oshike tu na okuninga opo tu mu hafife. Kufa Ombibeli yoye, ndele to pandje kOmayeletumbulo 27:11. Kalunga ota popi nafye momushangwa oo ta ti: ‘Kala u na eendunge, omumwange, hafifa omutima wange, opo nee handi dulu okunyamukula ovalundili vange.’ Mbela ou shi shii kutya okulundila omunhu osha hala okutya ngahelipi? —  Omunhu otashi dulika e ku lundile ile e ku sheke te ku yolo nokupopya kutya ito dulu okuninga oinima oyo wa popya kutya oto dulu okuninga. Mbela Satana oha lundile Jehova ngahelipi? —  Natu ka tale kutya ohe shi ningi ngahelipi.

Dimbuluka osho twe lihonga mEtukulwa eti-8 lembo eli kutya Satana okwa hala okukala a fimana nonokutya okwa hala ovanhu aveshe va kale  tava dulika kuye. Satana okwa ti kutya ovanhu ohava longele ashike Jehova molwaashi Jehova a udaneka kutya ngeenge ove mu longele ote ke va pa omwenyo waalushe. Eshi Satana a li a ningifa Adam naEva va kale ihava dulika kuJehova, kungaho Satana okwa shonga Jehova. Satana okwa lombwela Kalunga a ti: ‘Ovanhu otave ku longele ashike omolwouwa oo ho va ningile. Penge ashike omhito, opo ndi dule oku va ningifa aveshe va kale itave ku longele vali.’

Satana okwa li a shonga Jehova ngahelipi eshi Adam naEva va nyone?

Oshoshili kutya eendjovo odo di li mokatendo ka tetekela itadi hangwa mOmbibeli kondadalunde. Ndele ngeenge otwa lesha kombinga yomulumenhu Job, otashi ka kala sha yela kutya Satana okwa li a ula Kalunga eendjovo da yukila oko. Satana okwa li ta patana kutya Job ita ka kala omudiinini ngeenge okwa yelekwa, ofimbo Jehova a li e na elineekelo kutya Job ota ka kala omudiinini. Natu pandje Eembibeli detu kuJob etukulwa lo-1 nosho yo eti-2, tu ka tale osho sha li sha ningwa po.

Didilika muJob etukulwa lo-1 kutya Satana okwa li e li meulu eshi ovaengeli va li va ka popya naJehova. Onghee hano, Jehova okwa li  a pula Satana a ti: ‘Oto di peni?’ Satana okwa li a nyamukula kutya ota di kokweelaela kwaye kombada yedu. Opo nee Jehova okwa li a pula Satana a ti: ‘Owa didilika ngoo omupiya wange Job, oo ha longele nge noha kukuma owii?’ — Job 1:6-8.

Satana okwa li a hovela okupataneka Kalunga ta ti: ‘Job ohe ku longele ashike molwaashi ehe na omaupyakadi asha. Ngeenge owa kala ino mu amena vali noito mu nangeke vali noupuna, ote ke ku liteeka moipafi yoye.’ Opo nee Jehova okwa li a nyamukula Satana a ti: ‘Eewa Satana, oto dulu okuningila Job keshe osho wa hala, ndele ino mu yahameka nande.’ — Job 1:9-12.

Mbela Satana okwa li a ninga po shike? —  Okwa li a xwaxwameka ovanhu vonhumba va vake po eengobe neendongi daJob ndele tava dipaa ovafita ovo va li have di lifa. Opo nee eedi daJob novafita vado ova li va dipawa kokashelu. Konima yefimbo, ovanhu vamwe ova li va vaka po eengamelo daJob ndele tava dipaa ovafita vado. Xuuninwa, Satana okwa li a etifa oshikungulu shomhepo, osho sha li sha hanauna po eumbo omo mwa li ovana vaJob omulongo, ndele aveshe tava file mo. Ashike nonande Job okwa li a ningilwa oinima aishe oyo, ka li a efa po okulongela Jehova. — Job 1:13-22.

Eshi Jehova a li a shakena vali naSatana, Jehova okwa li a popya kutya Job oku li omudiinini natango. Ndele Satana okwa li natango a pataneka Jehova, a ti: ‘Ngeenge owa efa ndi yahameke olutu laJob, ote ke ku liteeka moipafi yoye.’ Okudja opo, Jehova okwa li  a efa Satana a yahameke olutu laJob, ndele Jehova okwa li a londwela Satana kutya ina dipaa nandenande Job.

Job okwa li e lididimikila shike, nomolwashike osho sha li sha hafifa Kalunga?

Opo nee, Satana okwa li a ningifa olutu laJob alishe li tumbuke oitumbuka. Oitumbuka yaJob oya li tai nyika nai, nomolwaasho ovanhu kava li va hala okweehena popepi naye. Omukulukadi waJob naye okwa li e mu lombwela nokuli a ti: “Efa Kalunga u fye!” Ovanhu vamwe ovo va li tave liningifa va fa ookaume kaJob ova li ve uya kuJob ndele tave mu ningifa a kale a nyika oluhodi neenghono eshi va li tave mu ula kutya okwa nyona sha kwata moiti eshi a hangwa komaupyakadi oo. Ashike nonande Satana okwa li a etela Job omaupyakadi aeshe oo, Job okwa li a twikila okulongela Jehova noudiinini. — Job 2:1-13; 7:5; 19:13-20.

Mbela oto diladila kutya Jehova okwa li e udite ngahelipi omolwoudiinini waJob? —  Jehova okwa li a hafa, molwaashi okwa li ta dulu okulombwela Satana ta ti: ‘Tala kuJob! Ota longele nge nehalo liwa.’ Mbela naave oto ka kala ngaashi Job, oo Jehova a li a dula okupopya kutya oku li oshihopaenenwa osho tashi ulike kutya Satana omunaipupulu? —  Oshi li oufembanghenda shili okuyandja enyamukulo komalundilo aSatana eshi a ti kutya ota dulu okuningifa ovanhu aveshe va efe po okulongela Jehova. Jesus naye okwa li a tala ko oshinima sha tya ngaho shi li oufembanghenda.

Omuhongi Munene ka li nande a efa Satana e mu ningife a nyone. Jesus ka li tuu a hafifa Xe! Jehova okwa li ta dulu okupopya shi na sha naJesus ta lombwele Satana ta ti: ‘Tala kOmona wange! Okwa dula okukala omudiinini filufilu kwaame molwaashi oku hole nge!’ Jesus naye ka li tuu a hafa eshi a li a hafifa omutima waXe! Jesus okwa li a dula nokuli okulididimikila efyo komuti womahepeko omolwehafo la tya ngaho. — Ovaheberi 12:2.

Mbela ino hala okukala ngaashi Omuhongi Munene nokuhafifa Jehova? —  Hano twikila okulihonga kombinga yaasho Jehova a hala u ninge, noku shi ninga opo u mu hafife.

lesha osho Jesus a li a ninga opo a hafife Kalunga nosho yo osho twa pumbwa okuninga opo tu hafife Kalunga momayeletumbulo 23:22-25; johannes 5:30; 6:38; 8:28; nosho yo 2 johannes 4.