Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 1

Jesus okwa li omuhongi munene

Jesus okwa li omuhongi munene

OMIDO di dule pomayovi avali da pita, opa li pa dalwa okaana ke likalekelwa, naashi ka ka kula oka ka ninga omunhu munene oo a li ko nale. Pefimbo olo eshi okaana oko ka dalwa, kapa li oihauto ile eedila. Ovanhu kava li yo ve na oinima ngaashi ee-TV, neeradio.

Okaana oko oka li ka lukwa Jesus, na Jesus okwa li omunongo e dule ovanhu aveshe kombada yedu. Okwa li yo omuhongi a denga mbada. Jesus okwa li ha yelifa oinima idjuu monghedi omo ovapwilikini vaye va li tava dulu oku i uda ko noupu.

Jesus okwa li ha hongele ovanhu ponhele keshe opo a li e va hanga. Okwa li he va hongele peenhele ngaashi pominghulofuta nosho yo meewato. Okwa li yo he va hongele momaumbo avo nongeenge a li a shakena navo meendjila. Jesus ka li e na ohauto, noka li ha ende meebesa ile momashina okolutenda. Okwa li ha ende kolupadi ta i koilando noilando opo a ka honge ovanhu.

Nonande ohatu lihongo oinima ihapu kuvamwe, ohatu dulu okulihonga oinima ya fimanenena kOmuhongi Munene, Jesus. Ndele ohatu dulu ashike okulihonga oinima oyo ya fimanenena kuJesus okupitila mOmbibeli. Ngeenge hatu pwilikine keendjovo daye tadi leshwa okudja mOmbibeli, ohatu kala twa fa tu udite Jesus ta popi nafye odikilila.

Omolwashike taku dulu okutiwa kutya Jesus okwa li Omuhongi Munene? Etomheno limwe ololo kutya Jesus okwa li naye a hongwa. Okwa li e shii kutya osha fimana okupwilikina. Ndele mbela Jesus okwa li ha pwilikine kulyelye? Olyelye a li e mu honga? — Xe Kalunga oye a li e mu honga.

Jesus okwa kala meulu pamwe naKalunga fimbo a li ine uya kombada yedu e li omunhu. Onghee hano, Jesus ka li a fa ovanhu vakwao, molwaashi  kape na omunhu umwe vali oo a li meulu ndele te uya a dalwe e li omunhu kombada yedu. Eshi Jesus a li meulu okwa li ha dulika nokwa li ha pwilikine kuXe. Nomolwaasho Jesus a li a dula okuhonga ovanhu kombinga yoinima oyo a li e lihonga kuKalunga. Ngeenge owa kala ho pwilikine kumeme woye nokutate woye, oto hopaenene Jesus.

Etomheno limwe vali molwaashi Jesus a li Omuhongi Munene ololo kutya okwa li e hole ovanhu. Okwa li a hala okukwafela ovanhu ve lihonge kombinga yaKalunga. Jesus okwa li ehole ovakulunhu nokwa li yo e hole ounona. Ounona okwa li ve hole okukala naJesus molwaashi okwa li e hole okupopya navo, nokwa li ha pwilikine kuvo ngeenge tava popi.

Omolwashike ounona va li ve hole okukala naJesus?

Efiku limwe ovadali vamwe ova li va eta ounona vavo kuJesus. Ndele ookaume kaJesus ova li ve udite kutya Omuhongi Munene okwa li e lipyakidila unene noka li ta dulu okupopya nounona, nomolwaasho ova li va lombwela ovadali nounona vavo va ye. Mbela Jesus okwa li e linyenga ngahelipi? — Jesus okwa ti: “Efeni ounona ve uye kuame nye inamu va kelela ko.” Jesus okwa li a hala ounona ve uye kuye. Nonande okwa li omulumenhu  omunongo elela nokwa fimana neenghono, okwa li a longifa efimbo opo a honge ounona. — Markus 10:13, 14.

Mbela ou shii kutya omolwashike Jesus a li ha hongo ounona noha pwilikine kuvo? Etomheno limwe ololo kutya okwa li a hala okuhafifa ounona moku va lombwela oinima kombinga yaKalunga, Xe womeulu. Ongahelipi to dulu okuhafifa ovanhu? — Omoku va lombwela oinima oyo we lihonga kombinga yaKalunga.

Pomhito imwe, Jesus okwa li a longifa okaana opo a honge ookaume kaye oshilihongomwa sha fimana. Okwa li a kufa okaana oko ndele te ka fikameke mokati kovahongwa vaye. Opo nee Jesus okwa li e va lombwela kutya nava lundulule oikala yavo ndele tai kala ya fa yokaana oko a li a fikameka mokati kavo.

Oshilihongomwa shilipi ounona ovo va kula nosho yo ovakulunhu tava dulu okulihonga kounona ovo vanini?

Mbela Jesus okwa li a hala okutya shike eshi a ti ngaho? Mbela ou shi shii kutya ongahelipi omukulunhu ile okaana ka kula tava dulu okukala ngaashi okaana kanini? — Okaana kake shii shihapu ngaashi omukulunhu noha ka kala ke na ehalo lokulihonga. Onghee hano, Jesus okwa li ta ti kutya ovahongwa vaye ova pumbwa okukala ovalininipiki ngaashi ounona. Atusheni ohatu dulu okulihonga oinima ihapu kuvamwe, ndele otu na okudimina kutya omahongo aJesus okwa fimanenena e dule omadiladilo etu. — Mateus 18:1-5.

Etomheno vali limwe molwaashi Jesus a li Omuhongi Munene ololo kutya okwa li ha ningifa oinima oyo ta popi i kale ihokwifa kovanhu. Okwa li ha yelifa oinima monghedi i li paunafangwa noya yela. Okwa li ha popi kombinga youdila, eengala nosho yo oinima ikwao oyo ya li i shiivike nawa kovanhu opo a kwafele ovanhu va ude ko oinima yonhumba i na sha naKalunga.

 Fimbo Jesus a li pefina lomhunda yonhumba efiku limwe, ovanhu vahapu ova li ve uya kuye. Okwa li a kala omutumba ndele te va pe oshipopiwa, ngaashi u shiwete pefano olo. Oshipopiwa osho ohashi ifanwa Eudifo lokOmhunda. Okwa ti: ‘Taleni keedila dokeulu ihadi kunu, ihadi tuvikile momaanda, ndelenee Kalunga oo e li meulu ohe di palula. Nye kamu di dule mbela?’

Jesus okwa li a hala okuhonga ovanhu oshilihongomwa shilipi eshi a li ta popi kombinga youdila eenhemo?

Jesus okwa ti vali: ‘Taleni nokudidilika eenhemo domoixwa, nhumbi hadi kulu, do ihadi longo. Ndele nande ongaho, odiwa. NaSalomo omoshinge shaye ashishe ka djalele ngaashi imwe yado. Hano Kalunga ngenge ta djaleke ngaha eidi lomoixwa, ite shi mu ningile mbela?’ — Mateus 6:25-33.

Mbela ou shi shii kutya Jesus okwa li a hala okuhonga ovapwilikini vaye oshilihongomwa shilipi? — Jesus ka li a hala tu kale hatu lipula kutya ohatu ka lya shike ile kutya ohatu ka djala shike. Kalunga oku shii kutya otwa pumbwa oinima aishe oyo. Jesus ka li a hala okutya ngeno inatu  longa opo tu limonene oikulya nosho yo oidjalomwa. Ndele okwa li a hala okutya otu na okupitifa komesho oinima yaKalunga. Ngeenge otwa ningi ngaho, Kalunga ota ka fya oshisho opo tu mone oikulya nosho yo oidjalomwa. Mbela owa itavela kutya Kalunga ote ke tu fila oshisho? —

Ovanhu ova li ve linyenga ngahelipi eshi Jesus a mana okuyandja oshipopiwa shaye? — Ombibeli otai ti kutya ova li va kuminwa onghedi yaye yokuhonga. Osha li shihokwifa neenghono okupwilikina kuye. Osho a li a honga osha li sha kwafela ovanhu opo va dule okulonga osho sha yuka. — Mateus 7:28.

 Onghee hano, osha fimanenena okulihonga kuJesus. Mbela ou shii kutya ongahelipi hatu dulu okulihonga kuye? — Osho a li a honga osha shangwa membo lonhumba. Mbela ou shii kutya embo olo olilipi? — Embo olo olo Ombibeli Iyapuki. Osho osha hala okutya ohatu dulu okupwilikina kuJesus mokukala hatu yandje elitulemo koinima oyo hatu lesha mOmbibeli. Ombibeli oi na nokuli ehokololo limwe lihokwifa li na sha nanghee Kalunga e tu lombwela tu pwilikine kuJesus. Natu ka tale kutya oshike sha ningilwe po.

Efiku limwe Jesus okwa li a ya pamwe nookaume kaye vatatu komhunda. Ookaume kaye ovo, ovo Jakob, Johannes naPetrus. Ohatu ke lihonga shihapu kombinga yovalumenhu ovo momatukulwa oo e li komesho, molwaashi aveshe vatatu ova li ookaume kaJesus vopofingo. Mefiku olo le likalekelwa, oshipala shaJesus osha li tashi vema. Oikutu yaye oya li ya toka, ya fa ouyelele ngaashi u shi wete mefano olo.

‘Ou Omona wange mu udeni’

Konima yaasho, Jesus nookaume kaye ova li va uda ondaka ya dja meulu, tai ti: “Ou Omona wange omuholike, onde mu hokwa; mu udeni.” (Mateus 17:1-5) Mbela ou shii kutya ondaka oyo oya li yalyelye? — Ondaka oyo oya li yaKalunga. Kalunga oye a li e va lombwela kutya nava pwilikine kOmona waye.

Ongahelipi shi na sha nafye kunena? Mbela ohatu ka dulika ngoo kuKalunga nokupwilikina kOmona waye, Omuhongi Munene? — Atusheni osho tu na okuninga ngaho. Mbela oto dimbuluka kutya ongahelipi hatu dulu oku shi ninga? —

Ohatu dulu okupwilikina kOmona waKalunga mokulesha omahokololo Ombibeli e na sha nokukalalmwenyo kwaye. Ope na oinima ihapu ya denga mbada oyo Omuhongi Munene te tu hongo. Oto ka hafela okulihonga kombinga yoinima oyo mOmbibeli. Oto ka kala yo wa hafa ngeenge owa lombwele ookaume koye kombinga yoinima iwa oyo to lihongo.

Opo u mone ouyelele muhapu u na sha nouwa oo hau etifwa kokupwilikina kuJesus, pandja Ombibeli yoye ndele to lesha Johannes 3:16; 8:28-30 nosho yo Oilonga 4:12.