Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 33

Jesus ota dulu oku tu amena

Jesus ota dulu oku tu amena

Mbela oho tale ko Jesus e li Ohamba inaenghono ile oku li okahanana itaka dulu okulikwafa?

ESHI Jesus a kula nokwa li e lihonga nghee a li a amenwa eshi a li okaana, mbela oto diladila kutya okwa li a ilikana kuJehova noku mu pandula? —  Mbela oto diladila kutya konima yefimbo Jesus otashi dulika a ka lombwela shike Maria naJosef eshi a li a shiiva kutya ova xupifa omwenyo waye eshi va li ve mu twala kuEgipti?  — 

Ashike paife Jesus ke fi vali okahanana, noke li vali kombada yedu ngaashi a li ko nale. Ndele mbela owa didilika ngoo kutya ovanhu vamwe kunena ohava diladila kutya Jesus oku li okahanana ke li metemba lokulila oimuna? —  Osho ohashi limonikila pefimbo lOkrismesa eshi peenhele dihapu hapa kala pa fanekwa omafano aJesus e li okahanana.

Ndele nonande Jesus ke li vali kombada yedu, mbela owa itavela ngoo kutya oku na omwenyo? — Okwa li a nyumunwa koufi, nopaife oku li Ohamba inaenghono meulu. Mbela oto diladila kutya oshike osho Jesus ta dulu okuninga po opo a amene ovo have mu longele? —  Eshi Jesus a li kombada yedu, okwa li a ulika nghee ta dulu okwaamena ovo ve mu hole. Natu ka taleni kutya okwa li e shi ninga ngahelipi efiku limwe eshi a li mowato pamwe novahongwa vaye.

Efiku limwe efimbo lokomatango, Jesus okwa li a lombwela ovahongwa vaye a ti: “Tu  yeni langhele kwinya yefuta.” Efiku olo Jesus okwa li a uhala ta hongo ovanhu efiku alishe pEfuta laGalilea, olo li na oule weekilometa 20 nosho yo omutamo weekilometa 12. Onghee hano, ova li va ya mowato ndele tava shingi va tauluke efuta. Jesus okwa li a loloka neenghono, nomolwaasho okwa li a ya konima yowato ndele ta nangala a wila koshiwilo, nokonima yokafimbo okwa li a kofa.

Jesus okwa li ta lombwele shike omhepo nosho yo omakufikufi?

Ovahongwa ova li oupafi opo va shinge owato. Pehovelo oinima oya li tai ende nawa, ndele konima yefimbo mefuta omwa li mwa tukuluka omhepo yoshikungulu. Oya li tai pepe neenghono, nomakufikufi okwa li taa tumbalala neenghono. Opo nee, omakufikufi okwa li a hovela okulidenga mowato, nowato oya li ya hovela okuyada omeva.

Ovahongwa ova li va tila, tava diladila kutya ove li pokuningina momeva, ndele Jesus ka li a tila, molwaashi okwa li a kofa natango konima yowato. Xuuninwa, ovahongwa ova li ve mu pendula, ndele tava ti: ‘Omuhongi, omuhongi, tu xupifa, otu li pokufila moshikungulu eshi.’ Opo nee, Jesus okwa li a penduka ndele ta lombwele omhepo nomakufikufi a ti: “Mwena, ove u lote.”

Diva omhepo oya li ya oka, nefuta ola li la lota. Ovahongwa ova li va kumwa, molwaashi inava mona nale  oshiningwanima sha fa osho. Ova li va pulafana va ti: “Ou olyelye, eshi ta lombwele omhepo nomeva, ndee taa dulika kuye”? — Lukas 8:22-25; Markus 4:35-41.

Mbela ou shi shii kutya olyelye a li Jesus? —  Mbela ou shii kutya okwa li a pewa eenghono dinene kulyelye? —  Ovahongwa kava li ve na okukala va tila eshi Jesus a li pamwe navo, molwaashi Jesus okwa li omunhu e likalekelwa. Oha dulu okulonga oikumwifilonga oyo itai dulu okulongwa kovanhu vamwe. Nandi ku lombwele vali kombinga yoshinima shimwe osho a li a ninga mefuta omo mwa li mwa tukuluka oshikungulu.

Efiku limwe vali konguloshi, Jesus okwa li a lombwela ovahongwa vaye va londe mowato opo ve mu tetekele kombinga ikwao yefuta. Ashike Jesus ye okwa li a ya oye aeke komhunda, konhele ye likalela opo a ka ilikane kuXe, Jehova Kalunga.

Ovahongwa ova li va ya mowato ndele tava shingi va ye kombinga ikwao yefuta. Diva mefuta omwa li mwa tukuluka omhepo, noya li tai pepe neenghono. Ovahongwa ova li va tonya eefaila ndele tava hovele  okushinga owato, molwaashi okwa li kwa toka. Ndele kava li va dula okweendelela molwaashi omhepo oya li i na eenghono. Owato oya li tai ningi ya i komesho ya shuna monima, nomeva okwa li taa i meni lowato. Ovahongwa ova li tava kendabala noudiinini opo va fike komutunda, ndele kava li tava dulu.

Jesus okwa li natango komhunda oye aeke. Okwa li a kala ko oule wefimbo, ndele okwa li a mona kutya ovahongwa vaye ove li moshiponga mefuta. Nomolwaasho okwa li a londoloka ko komhunda ndele ta i komunghulofuta. Jesus okwa li a hala okukwafela ovahongwa vaye, onghee hano, okwa li a ya kuvo ta ende kombada yomeva efuta omo mwa li oshikungulu.

Oshike tashi ka ningwa po ngeenge owa kendabala okweenda kombada yomeva? —  Oto ka ningina, ndele tashi dulika to fi omeva. Ndele Jesus omunhu e likalekelwa noku na eenghono de likalekelwa. Jesus okwa li a enda oshinano shile opo a fike powato omo mwa li ovahongwa vaye. Eshi eluwa la li tali hale okutenda, ovahongwa ova li ve wete Jesus te uya kuvo ta ende kombada yomeva, ndele kava li tava dulu oku shi itavela. Onghee hano, ova li va kwatwa koumbada neenghono ndele tava kuu pombada omolwoumbada. Opo nee Jesus okwa li a popya navo a ti: “Kaleni nomwenyo muwa, Aame ou, inamu tila.”

Omolwashike Jesus a li ha longo oikumwifilonga?

Diva eshi Jesus a li a fika mowato, oshikungulu osha li sha lota. Ovahongwa ova li va kumwa natango, opo nee ova li va wila peemhadi daJesus, ndele tava ti: “Oove shili Omona waKalunga.” — Mateus 14:22-33; Johannes 6:16-21.

Mbela ngeno inashi kala shiwa ngeno owa li ko pefimbo olo Jesus a li kombada yedu nokumona nghee ta longo oilonga ya tya ngaho? —  Mbela ou shi shii kutya omolwashike Jesus a li a longa oikumwifalonga ya tya ngaho? —  Okwa li a longa oikumwifalonga ya tya ngaho molwaashi okwa li e hole ovahongwa vaye nokwa li a hala oku va kwafela. Okwa li yo a longa oikumwifalonga ya tya ngaho opo a ulike kutya oku na eenghono dinene note ke di longifa monakwiiwa e li Omupangeli wOuhamba waKalunga.

Jesus oha amene ngahelipi ovashikuli vaye kunena?

 Kunena, Jesus oha longifa yo eenghono daye luhapu okwaamena ovashikuli vaye keenghendabala odo Satana ta ningi opo e va kelele okulombwela vamwe kombinga yOuhamba waKalunga. Ashike Jesus iha longifa eenghono daye opo a amene ovahongwa vaye vaha yahame ile e va velule ngeenge tava ehama. Ovayapostoli vaye aveshe navo xuuninwa ova ka fya. Jakob, omumwaina waJohannes, okwa li a dipawa, na Johannes okwa li a tulwa modolongo. — Oilonga 12:2; Ehololo 1:9.

Onghalo oya faafana nokunena, ovanhu aveshe ohava ehama notava dulu okufya, kutya nee ohava longele Jehova ile ihave mu longele. Ndele mafiku, eshi Jesus ta ka pangela edu e li Ohamba yepangelo laKalunga, oinima hasho tai ka kala ngaho. Opo nee pefimbo opo kape na oo ta kala a tila, molwaashi Jesus ota ka longifa eenghono daye opo a etele ouwa ovanhu aveshe ovo hava dulika kuye. — Jesaja 9:5, 6.

Apa ope na omishangwa dimwe odo tadi ulike kutya Jesus oo Kalunga a tula po e li Omupangeli wOuhamba waYe oku na eenghono dinene: Daniel 7:13, 14; Mateus 28:18 nosho yo Ovaefeso 1:20-22.