Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 42

Omolwashike twa pumbwa okulonga?

Omolwashike twa pumbwa okulonga?

OSHINIMA shilipi u hole unene okuninga, okulonga ile okudanauka? —  Inashi puka okudanauka. Ombibeli oya popya kutya muJerusalem omwa li ‘mu yadi oulume noupaka, tava danauka keendabo.’ — Sakaria 8:5.

Omuhongi Munene okwa li ha hafele okutala ounona tava danauka. Fimbo a li ine uya kombada yedu, okwa li a popya a ti: ‘Opo nee ame nda li puKalunga ngaashi omulongi onghulungu, nda nyakukwa pombada efiku nefiku.’ Didilika kutya Jesus okwa li ha longo pamwe naJehova meulu. Okwa li yo vali a popya fimbo a li meulu a ti: ‘Onda li nda nyakukilwa ovana vovanhu.’ Ngaashi twe lihonga nale, Omuhongi Munene okwa li e hole ovanhu aveshe, mwa kwatelwa nounona. — Omayeletumbulo 8:30, 31, yelekanifa, NW.

Omuhongi munene okwa li ha hafele shike manga a li ine uya kombada yedu?

 Mbela oto diladila kutya Jesus okwa li ha danauka eshi a li okaana? —  Heeno, otashi dulika a li ha danauka. Ndele molwaashi okwa li “omulongi onghulungu” meulu, mbela okwa li yo ha longo eshi a li kombada yedu? —  Jesus okwa li ha ifanwa “omona womuhongi womiti.” Ndele okwa li yo ha ifanwa “omuhongi womiti.” Osho otashi ulike shike mbela? —  Josef oo a li a tekula Jesus e li omona waye okwa li e mu honga okuhonga omiti, onghee hano, Jesus okwa li yo a ninga omuhongi womiti. — Mateus 13:55; Markus 6:3.

Jesus okwa li omuhongi womiti a tya ngahelipi? —  Molwaashi Jesus okwa li omulongi onghulungu meulu, mbela oto diladila kutya okwa li a ninga omuhongi womiti onghulungu kombada yedu? —  Diladila kutya okukala omuhongi womiti okwa li tashi pula oilonga youdiinini i  fike peni pefimbo opo. Otashi dulika Jesus kwa li e na okuya a ka ke omiti noku di tetaula opo nee te di tutile keumbo, opo a ka ninge oitaafula, oipundi nosho yo oinima ikwao.

Mbela oto diladila kutya oilonga ya tya ngaho oya li ya hafifa Jesus? — Mbela ngeno okwa li oove ngeno oto ka kala wa hafa ngeenge owa ningile ovanhu oitaafula iwa, oipundi nosho yo oinima imwe i lili? —  Ombibeli otai ti kutya oshiwa komunhu “okuhafela oilonga yaye.” Oilonga ohai hafifa omunhu monghedi i lili shi dulife ehafo olo omunhu ta dulu okumona mokudanauka. — Omuudifi 3:22.

Oilonga otai dulu oku tu etela ouwa palutu nosho yo pamadiladilo. Ounona vahapu ohava kala ashike tava tale o-TV nokudanauka oudano weevidio, ndele ohashi va ningifa ashike va kale va ondoka neenghono, vehe na eenghono noihava kala naanaa va hafa. Ounona va tya ngaho ihava hafifa vamwe nokuli. Mbela oto diladila kutya oshike tu na okuninga opo tu kale twa hafa? — 

Otwe lihonga mEtukulwa eti-17 lembo eli kutya okuyandja nokukwafela vamwe ohashi eta ehafo. (Oilonga 20:35) Ombibeli oya popya kutya Jehova ‘oKalunga omunelao.’ (1 Timoteus 1:11, OB-1954) Jesus okwa li ha kala a “nyakukwa pombada efiku nefiku,” ngaashi twa lesha mOmayeletumbulo. Mbela omolwashike Jesus a li ha kala a hafa? —  Jesus okwa yandja etomheno limwe a ti: “Tate ta longo fiyo paife, naame yo handi longo.” — Johannes 5:17.

Eshi Jesus a li kombada yedu ina kala ta longo e li omuhongi womiti efimbo alishe. Jehova Kalunga okwa li e mu pa oilonga ye likalekelwa kombada yedu. Mbela ou shii kutya oilonga oyo oya li yashike? —  Jesus okwa ti: “Ondi na okuudifila oilando imwe yo evangeli louhamba waKalunga, osheshi olo tuu eli [nde] li tuminwa.” (Lukas 4:43) Omafimbo amwe ngeenge Jesus a li ta udifile ovanhu, ova li have mu itavele ndele tava ka lombwela vamwe oinima oyo e va lombwela, ngaashi omukainhu Omusamaria a li a ninga oo tu wete mefano olo. — Johannes 4:7-15, 27-30.

Oilonga yopavali ilipi Jesus a li a longa eshi a li kombada yedu?

Jesus okwa li e udite ngahelipi eshi a li ta longo oilonga yokuudifa? Mbela oto diladila kutya okwa li ngoo a hala oku i longa? —  Jesus okwa ti: “Oikulya yange ei, Ame ndi longe ehalo laau a tuma nge nondi wanife  oshilonga shaye.” (Johannes 4:34) Mbela ou hole okulya shi fike peni oikulya oyo u hole? —  Osho otashi ku kwafele u ude ko kutya Jesus okwa li e hole oilonga oyo a li a pewa kuKalunga shi fike peni.

Kalunga okwe tu shita tu kale hatu hafele oilonga. Kalunga okwa popya kutya okwa pa ovanhu oshali va kale ‘tava hafele oilonga yavo idjuu.’ Onghee hano, ngeenge owe lihongo okulonga fimbo u li omunyasha, oto ka kala wa hafa onghalamwenyo yoye aishe. — Omuudifi 5:18.

Osho inashi hala okutya ounona otava dulu okulonga oilonga oyo hai longwa kovakulunhu, ndele atusheni ohatu dulu okulonga oilonga yonhumba. Ovadali voye otashi dulika va kale hava i va ka longe efiku keshe opo va mone oimaliwa nopo oukwaneumbo weni u kale u na oikulya nosho yo onhele yokukala. Ndele ope na oilonga ihapu oyo hai kala ya pumbwa okulongwa meumbo opo li kale la koshoka, ngaashi u shi shii nawa.

Oilonga ilipi to dulu okulonga meumbo oyo otai dulu okweetela oukwaneumbo aushe ouwa? —  Oto dulu okukwafela mokuyala oshitaafula shokulila, okukosha oiyasha, oku ka ekelashi oimbodi, okukomba onduda yoye nosho yo okutula oidanaukifo yoye peenhele ngeenge wa mana okudanauka. Otashi dulika ho longo nale oilonga imwe yomwaayo, ndele shiiva kutya oilonga ya tya ngaho ohai etele shili oukwaneumbo ouwa.

Omolwashike sha fimana okutula nawa oidanaukifo yoye peenhele ngeenge wa mana okudanauka?

Natu ka taleni kutya ongahelipi oilonga ya tya ngaho tai dulu okweetela oukwaneumbo ouwa. Ou na okutula oidanaukifo yoye peenhele ngeenge wa mana okudanauka. Omolwashike to diladila kutya okutula oidanaukifo yoye peenhele osha fimana? —  Ohashi kwafele eumbo li kale la yela nohashi amene ovanhu vaha mone oiponga. Ngeenge oidanaukifo yoye inoi tula peenhele eshi wa mana okudanauka, meme woye otashi dulika a ende po a humbata oinima nomaoko aeshe ndele ta lyata koshidanaukifo shoye shimwe, notashi dulika e lidenge po ndele ta mono oshiponga. Otashi dulika a kale a pumbwa nokuli okuya koshipangelo. Mbela osho itashi ka kala tuu oshinima shii? —  Onghee hano, ngeenge owa tula oidanaukifo yoye peenhele konima eshi wa mana okudanauka, otashi ka etela oukwaneumbo aushe ouwa.

Ope na oilonga imwe natango oyo ounona ve na okulonga. Pashihopaenenwa, oilonga yokofikola. Kofikola oko ho lihongo okulesha, ndele  ounona vamwe ohava kala ve wete okulesha ku li oshinima shihokwifa, ofimbo vamwe hava mono kudjuu. Ndele nonande ou wete okulesha kudjuu pehovelo, oto ka kala wa hafa ngeenge owe lihongo okulesha nawa. Ngeenge owa kala u shii nawa okulesha, oto ka hafela okulihonga oinima ihapu ihokwifa. Oto ka dula nokuli okulesha embo laKalunga, Ombibeli, kwoove mwene. Onghee hano, ngeenge owa kala ho longo nawa oilonga yoye yokofikola otashi ke ku etela ouwa, hasho mbela? — 

Ope na ovanhu vamwe ovo vehe hole okulonga. Otashi dulika u shii omunhu wonhumba oo ehe hole okulonga. Ndele molwaashi Kalunga okwe tu shita tu kale hatu longo, otwa pumbwa okulihonga okukala hatu hafele oilonga. Mbela Omuhongi Munene okwa li ha hafele oilonga shi fike peni? —  Okwa li ei tala ko ya fa oikulya yaye oyo e hole unene. Jesus okwa li a popya kombinga yoilonga ilipi eshi a li a popya ngaho? —  Okwa li ta popi shi na sha nokulombwela vamwe kombinga yaJehova Kalunga nosho yo nghee tava dulu oku ka mona omwenyo waalushe.

Apa ope na oshinima shimwe osho tashi dulu oku tu kwafela tu kale hatu hafele oilonga. Lipula kutya: ‘Omolwashike oilonga ei ya pumbwa okulongwa?’ Ngeenge u shii kutya oshinima shonhumba osha fimana, ohashi kala shipu oku shi longa. Ndele kutya nee oilonga oihapu ile oinini, i longa nawanawa. Ngeenge owa ningi ngaho, oto ka hafela oilonga yomake oye, ngaashi ashike Omuhongi Munene a li a hafela oilonga yaye.

Ombibeli otai dulu okukwafela omunhu a kale omulongi muwa. Tala kutya Ombibeli otai ti shike mOmayeletumbulo 10:4; 22:29; Omuudifi 3:12, 13; nosho yo Ovakolossi 3:23.