Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 35

Ohatu dulu ngoo okunyumuka ngeenge otwa fi?

Ohatu dulu ngoo okunyumuka ngeenge otwa fi?

KALUNGA ota ka kala ngoo a hala oku tu nyumuna ngeenge otwa fi? —  Omulumenhu omuyuki Job okwa li a itavela kutya Kalunga okwa hala okunyumuna ovanhu ovo va fya. Eshi Job a li a diladila kutya oku li pokufya, okwa li a popya naKalunga a ti: ‘Ove ngeno u ifane, ame ohandi ku nyamukula.’ Job okwa popya kutya Jehova Kalunga okwa djuulukwa, ile okwa halelela oku mu nyumuna. — Job 14:14, 15.

Jesus naye okwa fa Xe, Jehova Kalunga, molwaashi naye okwa hala oku tu kwafela. Eshi omulumenhu umwe oo a li ta vele oudu woshilundu a li a pula Jesus a ti kutya ‘ngeenge owa hala, oto dulu okuyelifa nge,’ Jesus okwa li a nyamukula omulumenhu oo a ti: ‘Onda hala, yela,’ ndele ta velula omulumenhu oo koudu waye woshilundu. — Markus 1:40-42.

Jehova okwa li a ulika ngahelipi kutya oku hole ounona?

Jesus okwa li e lihonga kuXe okukala e hole ounona. Mefimbo lonale, Jehova okwa longifile ovapiya vaye va nyumune ounona peemhito dopavali. Elia okwa li a ilikana Jehova opo a nyumune omonamati womukainhu oo a li a yakula nawa Elia, na Jehova okwa li e mu nyumuna. Jehova okwa li yo a longifa omupiya  waye Elisa a nyumune okamati kamwe. — 1 Eehamba 17:17-24; 2 Eehamba 4:32-37.

Kashi hafifa mbela okushiiva kutya Jehova oku tu hole neenghono? — Iha diladila ashike kombinga yetu ngeenge tu na omwenyo, ndele ote ke tu dimbuluka yo ngeenge otwa fi. Jesus okwa ti kutya Xe oha tale ko ovanhu ovo e hole va fa ve na omwenyo nonande ova fya. (Lukas 20:38) Ombibeli otai ti kutya ‘kape na nande oshimwe tashi dulu oku tu tukula mohole yaKalunga, kutya nee efyo ile omwenyo, oinima yopaife ile ei yokomesho.’ — Ovaroma 8:38, 39.

Eshi Jesus a li kombada yedu, okwa li a ulika kutya Jehova oku hole ounona. Dimbuluka kutya Jesus okwa li a longifa efimbo opo a lombwele ounona kombinga yaKalunga. Ndele mbela ou shi shii kutya Kalunga okwa pa Jesus eenghono opo a dule okunyumuna ounona ovo va fya? —  Natu ka kundafane kombinga yaashi Jesus a li a nyumuna okakadona komido 12, ka dalwa komulumenhu wedina Jairus.

Jairus okwa li ha di popepi nEfuta laGalilea, pamwe nomukulukadi waye nosho yo okaana kavo kamwe akeke. Efiku limwe, okakadona oko kanini oka li taka vele neenghono, na Jairus okwa li e wete kutya oke li pokufya. Jairus okwa li a diladila kombinga yaJesus, omulumenhu mukumwifi oo Jairus a li a uda kutya oha dulu okuvelula ovanhu. Onghee hano, Jairus okwa li a ya a ka konge Jesus, ndele te mu hange komunghulo wEfuta laGalilea, ta hongo ovanhu vahapu.

Jairus okwa li a pita mokati kovanhu ndele ta wile peemhadi daJesus, ndele ta ti: ‘Okamwange okakadona otaka vele unene, kwafele nge u uye u ka velule?’ Diva Jesus okwa li a ya pamwe naJairus. Eengudu dovanhu odo da li de uya okutala Omuhongi Munene nado oda li de va shikula. Ndele fimbo va li mondjila, ova li va shakenekwa kovalumenhu va dja keumbo laJairus ndele tave mu lombwele tava ti: “Omumwoyekadona okwa fya, oshike to lolokifa vali omuhongi?”

Jesus okwa li a uda eshi ovalumenhu ovo va popya. Okwa li e shii kutya Jairus okwa nyika oluhodi neenghono eshi a filwa okamonakadona kaye oko ka li oko akeke. Onghee hano, Jesus okwa li a lombwela Jairus a  ti: ‘Ino tila, itavela ashike Kalunga, okamonakadona koye otaka ka kala ke li nawa.’ Okudja opo ova ya fiyo va fika keumbo laJairus, omo va li va hanga ookaume koukwaneumbo waJairus tava lili molwaashi ova li va nyika oluhodi omolwakaume kavo munini oo a fya. Ndele Jesus okwa li e va lombwela a ti: ‘Inamu lila, okaana inaka fya, oka kofa po.’

Eshi Jesus a li a popya eendjovo odo, ovanhu ova li va hovela oku mu yola, molwaashi ova li ve shi shii kutya okakadona oka fya. Mbela oto diladila kutya omolwashike Jesus a li a popya kutya okaana oka kofa? —  Mbela oto diladila kutya okwa li a hala okuhonga ovanhu oshilihongomwa shilipi? — Okwa li a hala va shiive kutya efyo ola fa omunhu a kofa eemhofi didjuu. Okwa li yo a hala oku va honga kutya ota dulu okunyumuna ovanhu ovo va fya, ta longifa eenghono odo a pewa kuKalunga, ngaashi ashike hashi kala shipu okupendula omunhu oo a kofa.

Oshike hatu lihongo shi na sha naashi Jesus a li a nyumuna okamonakadona kaJairus?

Jesus okwa li a lombwela ovanhu aveshe va dje mo meumbo laJairus, ndele tava fyaala mo ashike nomuyapostoli Petrus, Jakob naJohannes nosho yo xe naina yokaana. Opo nee okwa li a ya monduda omo mwa li mwa nangala okaana, ndele te ka kwata keke noku ka lombwela ta ti: “Okakadona, ohandi ku lombwele, penduka.” Diva okakadona oka li ka penduka ndele taka hovele okweenda. Xe naina ova li va hafa neenghono. — Markus 5:21-24, 35-43; Lukas 8:40-42, 49-56.

 Paife diladila kombinga yaasho. Molwaashi Jesus okwa li a dula okunyumuna okakadona oko kanini, mbela ita dulu okunyumuna ovanhu vamwe? —  Mbela oto diladila kutya ote ke shi ninga ngoo shili? —  Heeno, ote ke shi ninga. Jesus okwa ti: “Efimbo tali uya, opo aveshe ava va kala meembila otava udu ondaka [yange]. Ndee tava holoka mo.” — Johannes 5:28, 29.

Mbela oto diladila kutya Jesus okwa hala okunyumuna ovanhu ovo va fya? —  Ombibeli oya yandja oshihopaenenwa shimwe vali osho tashi dulu oku tu kwafela tu nyamukule epulo olo. Oshiningwanima osho sha li sha ningwa efiku limwe popepi noshilando Nain otashi ulike kutya Jesus oha kala e uditile ovanhu ngahelipi ovo hava kala va nyika oluhodi ngeenge ve li pepako.

Omukainhu umwe okwa li ta i pamwe nongudu yovanhu tava ka paka okamonamati kaye okudja muNain. Omukainhu oo opo ashike a hangwa a filwa omushamane waye, ndele paife okaana kaye oko a li e na oko akeke oka li yo ka fya. Omukainhu oo ka li tuu a nyika oluhodi! Ovanhu vahapu vomuNain ova li va findikila oshimhu shokaana eshi sha li tashi twalwa kondje yoshilando. Omukainhu oo okwa li ta lili, novanhu kava li tava dulu oku mu hekeleka.

Efiku olo Jesus novahongwa vaye ova li tave uya koshilando osho Nain. Fimbo va li popepi noshivelo shoshilando, ova li va shakeneka ongudu yovanhu tava ka paka omonamati womukainhu oo. Eshi Jesus a li a mona omukainhu oo ta lili, okwa li e mu etela onghenda. Omutima waJesus owa li we linyengifwa koluhodi lomukainhu oo, nokwa li a hala oku mu kwafela.

Onghee hano, Jesus okwa li a popya nomukainhu oo neyavelelo nonomufindo, opo omukainhu oo a dule okupwilikina kuye, a ti: “Ino lila.” Onghedi omo Jesus a li a ungaunga nomukainhu oo oya li ya ningifa ovanhu aveshe va kale va hokwa oku mu tala. Ovanhu aveshe ova li tave lipula kutya Jesus ota ka ninga po shike eshi va li ve wete ta ende a yuka poshimhu shokaana. Opo nee Jesus okwa li a popya a ti: “Omunyasha, ohandi ku lombwele, penduka po.” Diva okamati oka li ka kala omutumba, ndele taka hovele okupopya. — Lukas 7:11-17.

 Mbela omukainhu oo ka li tuu a hafa! Ngeno oove ngeno oto kala u udite ngahelipi ngeenge owa mono omuholike woye oo a li a fya a nyumuka? —  Mbela osho itashi ulike kutya Jesus oku hole shili ovanhu nokwa hala oku va kwafela? —  Itashi ka kala tuu shikumwifa mounyuni mupe waKalunga oku ka hambelela ovanhu ovo tava ka nyumuka! — 2 Petrus 3:13; Ehololo 21:3, 4.

Okunyumunwa kwokaana komukainhu ou oko a li e na oko akeke otaku ulike shike?

Ovanhu vamwe ovo tava ka nyumuka mounyuni mupe otu va shii, mwa kwatelwa nokuli nounona. Ohatu ka kala tu va shii, ngaashi naanaa Jairus a li e shii okamonakadona konima eshi ka li ka nyumunwa kuJesus. Ovanhu vamwe ovo tava ka nyumuka ovovo va fya omido omafele ile omayovi da pita. Kalunga ite ke va dimbwa nandenande nonande ova li ko omido donale.

Mbela kashi hafifa okushiiva kutya Jehova Kalunga nosho yo Omona waye, Jesus, ove tu hole neenghono? —  Ova hala tu ka kale nomwenyo fiyo alushe, ndele haule ashike womido donhumba.

Lesha omishangwa odo tadi popi kombinga yeteelelo likumwifi li na sha noonakufya olo la popiwa mOmbibeli: Jesaja 25:8; Oilonga 24:15 nosho yo 1 Ovakorinto 15:20-22.