Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli oi na etumwalaka lilipi?

 OSHILESHWA 25

Ovakriste ove na okukala ve na eitavelo, elihumbato la koshoka nohole

Ovakriste ove na okukala ve na eitavelo, elihumbato la koshoka nohole

Jakob, Petrus, Johannes naJudas ova li va shangela ovaitaveli vakwao eenhumwafo tadi ladipike

JAKOB naJudas ova li ovamwaina vaJesus. Petrus naJohannes ova li vamwe vomovayapostoli vaJesus 12. Ovalumenhu ovo vane ova shanga eenhumwafo heyali kumwe adishe, odo di li oshitukulwa shOmishangwa dopaKriste dOshigreka. Eenhumwafo odo oda lukilwa ovashangi vado. Omayele a nwefwa mo oo taa hangwa meenhumwafo odo okwa li a nuninwa okukwafela Ovakriste va kale ovadiinini kuJehova nosho yo kOuhamba waye.

Nghee Ovakriste ve na okuulika kutya ove na eitavelo. Inashi wana ashike okutya kutya otu na eitavelo. Eitavelo lashili ohali ulikwa okupitila moilonga. Jakob okwa shanga a ti: ‘Eitavelo li he noilonga, ola fya.’ (Jakob 2:26) Nonande otu yelekwe, ngeenge otu na eitavelo, ohatu ke lididimika. Opo Omukriste a pondole monghalamwenyo, okwa pumbwa okwiindila kuKalunga ounongo, e na eitavelo kutya Kalunga ote ke u mu pa. Ngeenge Omukriste oku na elididimiko, Kalunga ota ka kala e mu hokwa. (Jakob 1:2-6, 12) Ngeenge omulongelikalunga okwa kala e na eitavelo nokwa kala omudiinini, Jehova Kalunga ota ka ehena popepi naye. Jakob okwa ti: “Eheneni kuKalunga, opo nee Ye ta ehene kunye.” — Jakob 4:8.

Ovakriste ova pumbwa okukala neitavelo la pama opo va dule okukondjifa omayeleko nosho yo omanwefemo mai. Molwaashi pefimbo laJudas opa li enyonauko lopaenghedi, okwa li e udite a fininikwa a ladipike ovaitaveli vakwao va “kondjele eitavelo.” — Judas 3.

Ovakriste ove na okukala nelihumbato la koshoka. Jehova okwa hala ovo tave mu longele va kale ovayapuki, sha hala okutya, va kale va koshoka meembinga adishe dokukalamwenyo kwavo. Petrus okwa shanga a ti: ‘Ningeni ovayapuki mokukala kweni akushe, osheshi opa shangwa: Kaleni ovayapuki, osheshi Aame [Jehova] omuyapuki.’ (1 Petrus 1:15, 16) Jesus Kristus okwe tu tulila po oshihopaenenwa, nomolwaasho Petrus okwa shanga a ti: “Osheshi naKristus yo okwe mu hepekelwa nokwe mu fiila oshihopaelelwa mu shikule oshikoti shaye.” (1 Petrus 2:21) Nonande Ovakriste ova kale tava hepekwa molwaashi tava dulika komifikamhango daKalunga, ohava kala ve “neliudo liwa.” (1 Petrus 3:16, 17) Petrus okwa li a ladipika Ovakriste va kale ve na elihumbato la koshoka nova kale tava longo oilonga oyo tai ulike kutya ove na etilokalunga, ofimbo va teelela efiku laKalunga letokolo nosho yo ounyuni mupe oo wa udanekwa, “omo tamu ka kala ouyuki.” — 2 Petrus 3:11-13.

“Eheneni kuKalunga, opo nee Ye ta ehene kunye.” — Jakob 4:8

Ovakriste ove na okukala ve na ohole. Omuyapostoli Johannes okwa ti: “Kalunga Oye ohole.” Okwa yelifa yo kutya Kalunga okwa ulika kutya oku tu hole neenghono eshi a tuma Jesus “a ninge ekulilo lomatimba etu.” Mbela Ovakriste ove na okulinyenga ngahelipi kwaasho? Johannes okwa yelifa a ti: “Ovaholike, Kalunga eshi a kala e tu hole ngaha, hano nafye yo otu nokukala tu holafane.” (1 Johannes 4:8-11) Onghedi imwe omo hatu dulu okuulika kutya otu holafane omokukala hatu yakula ovaitaveli vakwetu. — 3 Johannes 5-8.

Ndele mbela ongahelipi ovalongelikalunga vashili tava dulu okuulika kutya ove hole Jehova? Johannes okwa nyamukula epulo olo a ti: “Osheshi ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.” (1 Johannes 5:3; 2 Johannes 6) Ovo ve hole Kalunga nohava dulika kuye ova shilipalekwa kutya Kalunga ota kala e va hole nove na ‘eteelelo lomwenyo waalushe.’ — Judas 21.

— Oshileshwa eshi osha kanghamena kuJakob; Petrus wo-1 nomuti-2; Johannes omuti-3; nosho yo Judas.