Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli oi na etumwalaka lilipi?

Omolwashike twa pumbwa okukonakona Ombibeli?

Omolwashike twa pumbwa okukonakona Ombibeli?

Mbela ou shii Ombibeli shi fike peni? Ombibeli oi li embo le likalekelwa, noya tandavela apeshe mounyuni. Ovanhu vomomaputuko aeshe ohava hafele okulesha etumwalaka layo, molwaashi ohali va hekeleke noku va kwafela va kale ve na eteelelo. Ohava mono yo ouwa momayele ayo, molwaashi ohae va kwafele mokukalamwenyo kwavo kwakeshe efiku. Ndele ope na ovanhu vahapu kunena ovo vehe shii lela Ombibeli. Kutya nee ou na ohokwe momalongelokalunga ile hasho, otashi dulika ho kala wa hala okushiiva Ombibeli. Oshishangomwa eshi osha nuninwa oku ku kwafela u shiive kutya Ombibeli oi na lela etumwalaka lilipi.

FIMBO ino hovela okulesha Ombibeli, oshiwa okushiiva kutya oya unganekwa ngahelipi. Ombibeli, oyo hai ifanwa yo Omishangwa Diyapuki, oya fikama po momambo 66, okudja kuGenesis fiyo okEhololo.

Olyelye Odjo yetumwalaka olo li li mOmbibeli? Epulo olo olihokwifa neenghono. Odoshili kutya omambo Ombibeli okwa shangwa kovalumenhu 40 lwaapo momukokomoko womido 1 600 lwaapo, ndele shididilikwedi, ovalumenhu ovo ova dimina kutya havo Odjo yetumwalaka olo li li mOmbibeli. Umwe womwaavo va longifwa okushanga Ombibeli okwa ti: “Omishangwa adishe [oda] yandjwa keenghono dOmhepo yaKalunga.” (2 Timoteus 3:16) Omushangi umwe vali okwa ti: “Omhepo yOmwene tai popi muame, neendjovo daye di li kelaka lange.” (2 Samuel 23:2) Kungaho, ovashangi vOmbibeli ova dimina kutya Jehova Kalunga, Omupangeli Munenenene weshito alishe, oye Odjo yetumwalaka olo li li mOmbibeli. Ovashangi vOmbibeli ova ulika kutya Kalunga okwa hala ovanhu ve mu shiive nova ehene popepi naye.

Otu na yo okukaleka momadiladilo oshinima shimwe vali sha fimanenena ngeenge otwa hala okushiiva Ombibeli. Otu na okukala tu shii enenediladilo layo, olo kutya: Kalunga ota ka longifa Ouhamba waye womeulu opo a yukipalife oufemba waye wokupangela ovanhu. Momukokomoko woshishangomwa eshi, oto ka mona nghee enenediladilo olo la divilikwa okudja kuGenesis fiyo okEhololo.

Tu na oinima aishe oyo momadiladilo, paife natu ka taleni ketumwalaka olo li li mOmbibeli, embo olo li li apeshe mounyuni.

^ okat. 9 Ope na eenghedi di lili noku lili dokuulika komido omo mwa ningwa oiningwanima yomondjokonona. Moshishangomwa eshi omwa longifwa omaxupipiko ngaashi O.P. (tali ti, “Oshivalo sheedula doPaife”) naK.O.P. (tali ti, “Komesho yOshivalo sheedula doPaife”). Omaxupipiko oo okwa longifwa moshiuliki shefimbo loiningwanima osho shi li pedu lomapandja moshishangomwa eshi.

Lihonga shihapu

Omolwashike u na okukonakona Ombibeli?

Ombibeli otai kwafele ovanhu omamiliyona mounyuni aushe va mone omanyamukulo omapulo oo a fimanenena monghalamwenyo. mbela ino hala okukala umwe womuvo?