Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli oi na etumwalaka lilipi?

 OSHILESHWA 23

Nghee onghundana iwa ya li ya tandavela

Nghee onghundana iwa ya li ya tandavela

Paulus okwa li ha i momalweendo okuudifa ta tavakana edu nefuta

PAULUS, oo a li nale omupataneki, okwa li a halelela neenghono okuudifa onghundana iwa i na sha nOuhamba waKalunga, ndele okwa li ta patanekwa neenghono. Omuyapostoli oo omunandjungu okwa kala ha i momalweendo mahapu okuudifa, ta ende oinano ile ta tandavelifa onghundana iwa i na sha nOuhamba waKalunga oo tau ka wanifa po elalakano laKalunga lopehovelo li na sha novanhu.

Eshi Paulus a li muListra fimbo a li e li molweendo laye lotete lokuudifa, okwa li a velula omulumenhu oo a li a dalwa oshingudu. Eemhunga dovanhu ovo va li po eshi Paulus a velula omulumenhu oo oda li da ingida tadi ti kutya Paulus nomweendi pamwe naye Barnabas ookalunga. Ovanhu ovo ova li nokuli va hala okuningila Paulus naBarnabas omaxwikiloyambo. Ashike Paulus naBarnabas ova kendabala neenghono oku va kelela vehe shi ninge. Ndele lwanima, eemhunga odo oda li da hekwa kovatondi vaPaulus di mu denge nomamanya. Opo nee ode mu denga nomamanya ndele tadi mu efa tadi diladila kutya okwa fya. Paulus okwa li a xupa moshiponokela osho nopomhito imwe okwa li vali a alukila koshilando osho opo a twe omukumo ovahongwa ovo va li mo.

Ovakriste vamwe ovo va li Ovajuda ova li tava ti kutya ovaitaveli vakwao ovo vehe fi Ovajuda ove na okudulika koiteelelwa yonhumba yOmhango yaMoses. Paulus okwa li a twala omhata oyo kovayapostoli novakulunhu vomuJerusalem. Konima eshi ovalumenhu ovo va konakona moule Omishangwa nova wilikwa komhepo iyapuki, ova shangela omaongalo eenhumwafo omo va kumaida Ovakriste vakwao va henuke okulongela oikalunga, va kukume oluhaelo, vaha lye ohonde nosho yo ombelela inai dja ohonde. Oipango oyo kaya li ‘i shii okweefiwa.’ Ndele okudulika koipango oyo itashi ti kutya ovanhu ova li ve na okushikula Omhango yaMoses. — Oilonga 15:28, 29.

Pefimbo lolweendo laPaulus olutivali, okwa li a talela po ovanhu vomuBerea, osho paife shi li muGreka. Ovajuda ovo va li moshilando osho ova li va tambula ko Eendjovo daKalunga nohokwe nova li hava konakona Omishangwa efiku keshe opo va tale ngeenge osho Paulus e va honga oshoshili tuu. Ndele molwaashi ovapataneki vaye ova li ve mu landulila ko koshilando osho, okwa li a ya kuAtena. Ofimbo Paulus a li muAtena, okwa li a yandja oshipopiwa kovahongwanhu Ovaatena, osho sha li tashi kumu omutima. Okupitila moshipopiwa osho, Paulus okwe tu tulila po oshihopaenenwa shiwa shi na sha nokuhonga vamwe nelungi, hatu longifa eendunge dokuyoolola nokutomhafana pandunge.

Paulus okwa li a ya kuJerusalem konima yolweendo laye olutitatu lokuudifa. Eshi a li a ya kotembeli, Ovajuda vonhumba ova li ve mu ponokela va hala oku mu dipaa. Ovakwaita Ovaroma ova li ve va kelela vehe mu dipae. Opo nee ove mu kufa po ve ke mu pule okanaku. Molwaashi Paulus okwa li Omuroma, okwa li e lipopila koshipala shomupangeli Omuroma, Feliks. Ovajuda kava li ve na oumbangi oo tau yambidida oinima oyo va li tava lundilile Paulus. Paulus okwa li yo a holoka koshipala shomupangeli umwe Omuroma wedina Festus. Opo omupangeli oo ehe mu yandje kOvajuda, okwa indila e ke lipopile koshipala shOmukesari a ti: “Ame onde liameka komukesari.” Festus okwa li e mu nyamukula a ti: “Hano u nokuya koshipala shomukesari.” — Oilonga 25:11, 12.

Okudja opo, Paulus okwa li a twalwa kuItalia noshikepa opo a ka pangulwe. Ndele molwaashi oshikepa oyo oya li ya tekela mondjila, okwa kala konhunhu yedina Melite pefimbo lokufu kwokoilongo oyo. Lwanima eshi a fika muRoma, okwa kala oule womido mbali meumbo omo a kala te lifutile ye mwene. Nonande eshi Paulus a kala meumbo omo okwa kala mepashukilo lomukwaita, okwa kala ta udifile nouladi aveshe ovo tave mu talele po, te va hepaululile kombinga yOuhamba waKalunga.

— Oshileshwa eshi osha kanghamena kOilonga 11:22–28:31.