Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli oi na etumwalaka lilipi?

 OSHILESHWA 12

Ounongo wopakalunga oo tau dulu oku tu kwafela monghalamwenyo yetu

Ounongo wopakalunga oo tau dulu oku tu kwafela monghalamwenyo yetu

Omayeletumbulo oku yadi omayele a nwefwa mo oo taa dulu oku tu kwafela monghalamwenyo yetu yakeshe efiku. Mahapu omuo okwa shangwa kuSalomo

MBELA Jehova Omupangeli ngoo e na ounongo? Onghedi imwe ya fimana omo hatu dulu okumona enyamukulo kepulo olo oyo okukonakona omayele oo a yandja. Mbela omayele aye ohaa longo ngoo? Mbela ngeenge omunhu okwe a tula moilonga otae ke mu kwafela ngoo a kale nonghalamwenyo iwa noi na eityo? Ohamba inaendunge Salomo oya shanga omayeletumbulo omafele, oo taa dulu oku tu kwafela konyala meembinga adishe dokukalamwenyo. Paife natu ka konakoneni amwe omuo.

Kala we lineekela Kalunga. Osha fimanenena okulineekela Jehova ngeenge otwa hala okukala nekwatafano liwa naye. Salomo okwa shanga a ti: “Nomutima woye aushe lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye.” (Omayeletumbulo 3:5, 6) Ohatu dulu okuulika kutya otwe lineekela Kalunga mokukonga ewiliko kuye nokudulika kuye, naasho otashi ke tu kwafela tu kale tu na onghalamwenyo i na eityo. Kakele kaasho, ohatu ka hafifa yo omutima waKalunga nota ka dula okunyamukula eemhata odo da etifwa komutondi waYe, Satana. — Omayeletumbulo 27:11.

Otwa pumbwa okukala hatu ungaunga nawa navamwe. Omayele oo Kalunga a yandja kovashamane, kovakulukadi nosho yo kounona oku li lela pefimbo shi dulife nale. Kalunga okwa kumaida omushamane keshe a kale omudiinini komukulukadi waye, eshi a ti: ‘Nyakukilwa omukainhu woye womounyasha.’ (Omayeletumbulo 5:18-20) Embo lOmayeletumbulo ola hokolola kombinga yomukulukadi oo a li ha longo noudiinini nokwa li ha pandulwa komushamane waye nokounona vaye. Ovakulukadi va hombolwa otava dulu okulihonga shihapu koshihopaenenwa shaye. (Omayeletumbulo etukulwa 31) Ounona ova kumaidwa va kale hava dulika kovadali vavo. (Omayeletumbulo 6:20) Embo lOmayeletumbulo ola ulika yo kutya osha fimanenena okupanga oukaume navamwe, molwaashi ou te litongola ko oha kala e na oikala yokuliholamwene. (Omayeletumbulo 18:1) Ndelenee ookaume ketu otava dulu oku tu nwefa mo nawa ile nai. Onghee hano, otwa pumbwa okuhoolola ookaume pandunge. — Omayeletumbulo 13:20; 17:17.

Nghee hatu dulu okulifila oshisho fye vene. Membo lOmayeletumbulo omu na omayele mahapu mawa oo tae tu kwafele tu henuke okulongifa oikolwifa sha pitilila, tu kulike omaukwatya oo tae tu kwafele tu kale tu na oukolele muwa notu henuke oo taa nyono po oukolele wetu, notali tu ladipike tu kale hatu longo noudiinini. (Omayeletumbulo 6:6; 14:30; 20:1) Embo olo ola londwela kutya osha nyika oshiponga okulineekela omadiladilo opanhu oo itaa tu kumwe nehalo laKalunga. (Omayeletumbulo 14:12) Otali tu ladipike yo tu amene ounhu wetu womeni, omutima wopafaneko, komanwefemo mai, “osheshi muo [momutima] tamu di omwenyo.” — Omayeletumbulo 4:23.

Ope na ovanhu omamiliyona ovo va kwafelwa komayele oo taa hangwa membo lOmayeletumbulo opo va xwepopaleke okukalamwenyo kwavo. Ovanhu va tya ngaho paife ove na omatomheno mahapu okutambula ko Jehova e li Omupangeli wavo.

— Oshileshwa eshi osha kanghamena kembo lOmayeletumbulo.

Lihonga shihapu

Oho tula ngoo moilonga ‘ounongo oo hau di pombada’?

Ombibeli oya popya kombinga yoinima 4 oyo tai tu kwafele tu kulike ‘ounongo oo hau di pombada.