Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli oi na etumwalaka lilipi?

 OSHILESHWA 14

Kalunga okwa li ha popi noshiwana shaye okupitila movaprofeti

Kalunga okwa li ha popi noshiwana shaye okupitila movaprofeti

Jehova okwa li a nangeka po ovaprofeti va kale tava udifa omatumwalaka aye e na sha nomatokolo aye, elongelokalunga lashili nosho yo eteelelo lOuhamba wopaMessias

ESHI Israel naJuda ya li tai pangelwa keehamba, Kalunga okwa li ha longifa ovaprofeti ve li ovapopikalelipo vaye. Ovaprofeti ovo ova li ovalumenhu ve na eitavelo la pamenena novaladi nova li hava shiivifa omatokolo aKalunga. Natu ka taleni koitwa ine ya fimana oyo ya li ya divilikwa momatumwalaka ovaprofeti vaKalunga.

1. Ehanauno laJerusalem. Kalunga okwa li a xunganeka komesho yefimbo okupitila movaprofeti ngaashi Jesaja naJeremia kutya Jerusalem otashi ka hanaunwa po nokuninga eputu. Ovaprofeti ovo ova li va yelifa kutya omolwashike Kalunga a li a handukila oshilando osho. Ovakalimo vomusho ova li tave liti kutya otava longele Jehova, ndele okukufa ombinga kwavo melongelokalunga loipupulu, enyonauko lavo lopaenghedi nosho yo elongifo lavo leenghono oya ulika kutya hasho. — 2 Eehamba 21:10-15; Jesaja 3:1-8, 16-26; Jeremia 2:1–3:13.

2. Okutungululwa kwelongelokalunga la koshoka. Konima eshi oshiwana shaKalunga sha kala moukwatwa waBabilon oule womido 70, osha li sha mangululwa. Opo nee osha li sha shuna keduumbo lasho olo la li la ninga eputu opo shi ka tungulule otembeli yaJehova muJerusalem. (Jeremia 46:27; Amos 9:13-15) Omido 200 lwaapo komesho yefimbo, Jesaja okwa li a xunganeka kutya otape ke uya omufindani wedina Kores, oo a li ta ka finda Babilon nokumangulula oshiwana shaKalunga opo shi ka tungulule elongelokalunga la koshoka. Jesaja okwa li nokuli a popya kondadalunde nhumbi Kores a li ta ka kwata ko Babilon nopehe na okulwa. — Jesaja 44:24–45:3.

3. Euyo laMessias nosho yo oiningwanima yomokukalamwenyo kwaye. Messias okwa li ta ka dalelwa moshilando Betlehem. (Mika 5:1) Okwa li te ke uya muJerusalem a londa kokambulu, osho tashi ulike kutya omulininipiki. (Sakaria 9:9) Nonande Messias okwa li omunanghenda nomunambili, okwa li ta ka tondika kuvahapu. (Jesaja 42:1-3; 53:1, 3) Okwa li ta ka fya efyo liudifa omwenyo munyenye. Ndele mbela okwa li ta ka fya ashike ndele opuwo ngaho? Okwa li ta ka fya efyo lopayambo opo ovanhu va dule okudiminwa po omatimba avo. (Jesaja 53:4, 5, 9-12) Onghee hano, okwa li a pumbwa okunyumunwa opo ovanhu va dule okudiminwa po.

4. Messias ota ka pangela edu. Mepingafano novanhu inava wanenena, ovo itava dulu lela okupangela ovanhu vakwao nokukaleka po ombili, Ombibeli oya li ya xunganeka kutya Ohamba yopaMessias otai ka kala Ohamba yombili. (Jesaja 9:5, 6; Jeremia 10:23) Eshi Messias ta ka pangela edu, ovanhu aveshe otava ka kala pamwe ve na ombili, notapa ka kala nokuli ombili pokati kovanhu noinamwenyo. (Jesaja 11:3-7) Itapa ka kala vali omikifi. (Jesaja 33:24) Nokuli nefyo otali ka xulifwa po fiyo alushe. (Jesaja 25:8) Pefimbo olo, oonakufya otava ka nyumuninwa momwenyo kombada yedu. — Daniel 12:13.

— Oshileshwa eshi osha kanghamena kembo laJesaja, Jeremia, Daniel, Amos, Mika nosho yo Sakaria.