Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli oi na etumwalaka lilipi?

 OSHILESHWA 7

Kalunga okwa li a mangulula Ovaisrael muEgipti

Kalunga okwa li a mangulula Ovaisrael muEgipti

Jehova okwa li a katukila Ovaegipti onghatu. Moses okwa li a wilika Ovaisrael okudja muEgipti. Jehova okwa li a pa Ovaisrael Omhango okupitila muMoses

OVAISRAEL ova kala efimbo lile muEgipti nova li va hepuluka nokuhapupala neenghono. Ndele ope ke uya Farao omukwanyanya oo a li ina shiiva Josef. Farao oo okwa li a tila eshi Ovaisrael va li tava hapupala neenghono. Onghee okwa li e va ninga ovapika nokwa li a yandja elombwelo kutya ounona oumati aveshe vOvaisrael ovo tava dalwa nava ekelwe momulonga waNil. Ndele omudalakadi umwe omuladi okwa li a amena omona waye. Okwa li e mu tula moshimbaba ndele te shi holeke mokati keembungu domulonga waNil. Okaana oko oke ke lituwa komonakadona waFarao, nokwa kala te ka tekula mombala yaEgipti. Okwa li e ka luka Moses.

Eshi Moses a li e na omido 40, okwa li a ya moupyakadi eshi a li a amena omupika Omuisrael oo a li ta dengwa komupashukili woilonga Omuegipti. Moses okwa li a ya onhapo koshilongo shokokule oko a kala e li onauki. Eshi Moses a li e na omido 80, Jehova Kalunga okwa li e mu tuma a ka popye naFarao, e mu pule a mangulule Ovaisrael.

Farao okwa li e shi anya filufilu. Opo nee Kalunga okwa li a handukila Ovaegipti nomahandukilo omulongo. Konima yehandukilo keshe, Moses okwa li ha i kuFarao e ke mu pule a mangulule Ovaisrael, opo a henuke ehandukilo olo la li tali ka shikula ko. Ndele molwaashi Farao okwa li a dina Moses nosho yo Jehova Kalunga, okwa li a kukutika omutima waye. Hauxuuninwa, eshi Ovaegipti va handukilwa nehandukilo etimulongo, oiveli yavo aishe oya dipawa, kakele ashike koiveli yomaukwaneumbo oo a li a dulika kelombwelo laJehova li na sha nokudipaa odjona yeyambo nokuvaeka ohonde yayo keemhango nokoikulo yomivelo davo. Omweengeli wehanauno oo a li a tumwa kuKalunga okwa li a koyelela po omaumbo oo a li a didilikwa nohonde. Okudja opo Ovaisrael ova kala hava dimbuluka omudo keshe oshiningwanima osho shikumwifi, nedano olo ola li hali ifanwa Opaasa.

Molwaashi omonamati waFarao woshiveli naye okwa li a fya pefimbo lehandukilo etimulongo, Farao okwa li a lombwela Moses nOvaisrael aveshe va fiye po Egipti. Ovaisrael ova li ve liunganeka diva ndele tave litwike olweendo okudja muEgipti. Opo nee Farao okwa li a ninguluka ndele ta unganeke etangakwaita linene nomatemba oita mahapu opo a ka alule Ovaisrael. Ovaisrael ova li tava monika va fa ve li poupatekenedi eshi va li va tula manga pEfuta Litilyana. Ashike Jehova okwa li a tukaula omeva Efuta Litilyana, opo nee Ovaisrael ova tauluka efuta olo poukukutu. Ovaegipti ova li ve va landulila mo mefuta, ndele Kalunga okwa li a efa omeva a ye kumwe nokuhanauna po Farao netangakwaita laye.

Lwanima, Ovaisrael ova li va onga onhanda pomhunda yaSinai, opo Jehova a li a ninga ehangano navo okupitila muMoses e li omupokati. Okwa li e va pa eemhango opo di va wilike noku va amena meembinga adishe dokukalamwenyo kwavo. Jehova okwa li a udaneka kutya ota ka kala pamwe navo noku va longifa va etele oiwana ikwao omanangeko noupuna, shimha ashike tava dulika kuye nokukala ovadiinini.

Nonande Jehova okwa li a ningila oshiwana osho ouwa muhapu, Ovaisrael vahapu kava li ve na eitavelo. Molwaashi Jehova okwa li e va handukila, okwa li e va efa va kale tava elaela mombuwa oule womido 40. Lwopexulilo lomido odo, Moses okwa li a nangeka po Josua e mu pingene po. Hauxuuninwa, Ovaisrael ova li ve lilongekida okuya medu olo Kalunga a li a udanekela Abraham.

— Oshileshwa eshi osha kanghamena kuExodus; Leviticus; Numeri; Deuteronomion; Epsalme 136:10-15; nosho yo Oilonga 7:17-36.