Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli oi na etumwalaka lilipi?

 OSHILESHWA 6

Job okwa li a kanyatela oudiinini waye kuKalunga

Job okwa li a kanyatela oudiinini waye kuKalunga

Satana okwa li a shonga oudiinini waJob, ndele Job okwa kala a kanyatela oudiinini waye kuKalunga

MBELA ope na ngoo omunhu ta ka kala omudiinini kuKalunga ngeenge okwa yelekwa sha kwata moiti, nongeenge okudulika otaku monika kwa fa itaku mu etele ouwa washa? Epulo olo ola li la holoka po pefimbo laJob nola nyamukulwa pefimbo lokuyelekwa kwaJob.

Eshi Ovaisrael va li natango muEgipti, Job, omupambele waAbraham, okwa li ha kala moshitukulwa osho paife hashi ifanwa Arabia. Efiku limwe, fimbo ovaengeli va li va ongala koshipala shaKalunga meulu, omweengeli omunashibofa, Satana, naye okwa li e uya koshoongalele osho. Poshoongalele osho, Jehova okwa li a popya kutya okwe lineekela omupiya waye omudiinini Job. Okwa li a popya yo kutya kape na omunhu umwe omudiinini ngaashi Job. Ndele Satana okwa ti kutya Job oha longele ashike Kalunga molwaashi e mu nangeka noupuna nokwe mu amena. Okwa ti yo kutya ngeenge Job okwa kufwa keshe osho e na, ote ke liteeka po Kalunga.

Kalunga okwa li a efa Satana a yeleke Job. Opo nee Satana okwa hanauna po omaliko aJob, ta dipaa po ovana vaye noku mu etela omukifi. Molwaashi Job ka li e shii kutya Satana oye e mu etela omaupyakadi aeshe oo, okwa li te lipula kutya omolwashike Kalunga e mu efa a kale ta mono oixuna ya tya ngaho. Ndele nande ongaho, Job ka li e liteeka po Kalunga.

Ookaume kaJob vatatu ovanaipupulu ova li ve uya kuye eshi a li ta mono oixuna. Omatukulwa mahapu embo laJob okwa popya shi na sha nomalundilo ovalumenhu ovo va li tava kendabala okutomha Job kutya Kalunga okwe mu handukila molwaashi okwa nyona meholeko. Ova li yo va popya kutya Kalunga iha hokwa noihe lineekele ovapiya vaye. Ndele Job ka li a tambula ko omapopyo avo oipupulu. Okwa li a popya nomukumo kutya ota ka kanyatela oudiinini waye kuKalunga fiyo okefyo.

Ndele nande ongaho, Job okwa li a ninga epuko, molwaashi okwa li e lishii unene ouyuki. Omulumenhu omunyasha wedina Elihu, oo a li ta pwilikine fimbo Job nookaume kaye vatatu tava popi, okwa ya mo ndele te va kumaida. Elihu okwa li a kwafela Job a mone kutya okuyukipalifwa kwounamapangelo waJehova Kalunga okwa fimanenena ku dule okuliyukipalifa kwomunhu keshe. Ndele Elihu okwa li yo a hanyena sha kwata moiti ookaume vaJob ovanaipupulu.

Jehova Kalunga naye okwa li a popya naJob, te mu pukulula. Okwa li a popya naJob shi na sha neshito laYe likumwifi, opo a ulike kutya Ye omunenenene mokuyelekanifa novanhu. Job okwa li a tambula ko nelininipiko omayele oo a li a pewa kuKalunga. Jehova, oo e li “omunalukeno nomunamutimanghenda,” okwa li a velula Job nokwa li a hapupalifa lwomapa avali oupuna oo a li e na potete. Okwa li yo e mu nangeka noupuna nounona omulongo. (Jakob 5:11) Eshi Job a kala omudiinini kuJehova fimbo a li momayeleko madjuu, okwa li a nyaneka pomutenya oipupulu yaSatana oyo kutya ovanhu itava ka kala ovadiinini kuKalunga ngeenge ova yelekwa.

— Oshileshwa eshi osha kanghamena kembo laJob.

Lihonga shihapu

“MuKalunga omu na tuu mbela ouhenouyuki?”

Ngeenge Jehova oku tonde ouhenouyuki, omolwashike u yadi mo mounyuni?