Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli oi na etumwalaka lilipi?

 OSHILESHWA 22

Ovayapostoli ova li hava udifa nouladi

Ovayapostoli ova li hava udifa nouladi

Eongalo lopaKriste ola li tali kulu neendelelo nonande opa li omahepeko

OMAFIKU omulongo okudja eshi Jesus a ya meulu, ovahongwa vaye 120 lwaapo ova li va ongala meumbo lonhumba muJerusalem pefimbo lOshivilo shOvajuda shOpentekoste mo 33 O.P. Ohaluka, monhele omo va li va ongala omwe uya oshihomo sha fa oshikungulu shinene. Opo nee ovahongwa ova hovela okupopya pashikumwifilonga omalaka oo va li vehe shii nale. Mbela oshike sha li sha etifa oshiningwanima sha tya ngaho shikumwifi? Kalunga okwa li a pa ovahongwa ovo omhepo yaye iyapuki.

Ofimbo ovahongwa va li va ongala meni, pondje opa li ongudu inene yovanhu ovo va dja koilongo i lili noku lili, va li ve uya okudana Oshivilo shOpentekoste. Ovanhu ovo ova li va kumwa neenghono eshi va uda ovahongwa vaJesus tava popi nawanawa omalaka avo oshidalelwamo. Petrus okwa li a yelifa eityo loshiningwanima osho, a tofa eendjovo domuprofeti Joel oo a li a xunganeka kutya Kalunga okwa li ta ka “tilila” ovanhu omhepo yaye iyapuki notai ke va pa eeshali dopashikumwifilonga. (Joel 2:28, 29) Oshiningwanima osho osha li oumbangi wa kola oo tau ulike kutya opa ningwa elunduluko linene mondjokonona yovalongelikalunga, olo kutya Kalunga ka li vali a hokwa Ovaisrael, ndele okwa li a hokwa eongalo lopaKriste olo opo la totwa. Ovo va li va hala okulongela Kalunga monghedi oyo a hokwa ova li ve na okuninga ovashikuli vaKristus.

Ndele nande ongaho, ovatondi vovahongwa vaJesus ova twikila okukala tave va pataneke noku va tula meedolongo. Ndele oufiku umwe, omweengeli waJehova okwa li a yeulula omivelo dodolongo ndele ta lombwele ovahongwa va twikile okuudifa. Eshi kwa sha, ovahongwa ova twikila nokuudifa. Ova ya kotembeli ndele tava hepaululile ovanhu onghundana iwa i na sha naJesus. Ovatondi vavo vopalongelokalunga ova li va handuka neenghono ndele tave va lombwele vaha udife vali. Ovayapostoli ova li ve va nyamukula vehe na oumbada va ti: “Okudulika kuKalunga ku dule okudulika kovanhu.” — Oilonga 5:28, 29.

Ovatondi ova li va twikila okuhepeka neenghono ovahongwa. Ovajuda vamwe ova li va lundila omuhongwa Stefanus kutya okwa sheka Kalunga ndele tave mu dipaa nomamanya. Omulumenhu umwe omunyasha, Saulus wokuTarsus, opo a li nokwa li a hokwa okudipawa kwaStefanus. Opo nee okwa li a ya kuDamaskus opo a ka kwate po ngeno ovashikuli vaKristus. Ofimbo Saulus a li molweendo, okwa li a minikilwa kouyelele wa dja meulu ndele ta udu ondaka tai ti: “Saul, Saul, oshike to taata nge?” Saulus, oo a li a twikifwa kouyelele, okwa li a pula a ti: ‘Oove lyelye?’ Ondaka oya li ye mu nyamukula ya ti: “Aame Jesus, ou to taata.” — Oilonga 9:3-5.

Eshi pa pita omafiku atatu, Jesus okwa tuma omuhongwa Ananias a ka twikulule omesho aSaulus. Saulus okwa li a ninginifwa ndele ta hovele okuudifa nouladi kombinga yaJesus. Okwa ka shiivika e li omuyapostoli Paulus nokwa li omuhongwa waKristus omuladi.

Ovahongwa vaJesus ova li ashike hava udifile Ovajuda nosho yo Ovasamaria onghundana iwa yOuhamba waKalunga. Ndele omweengeli umwe waKalunga okwa li e lihololela omulumenhu omutilikalunga, Kornelius, ondjai yetangakwaita laRoma, nokwa li e mu lombwela a tume a ka ifanenwe omuyapostoli Petrus. Petrus okwa li a ya pamwe novahongwa vakwao ndele ta udifile Kornelius noukwaneumbo waye. Ofimbo omuyapostoli Petrus a li ta popi, omhepo iyapuki oya li ye uya kombada yovaitaveli ovo vehe fi Ovajuda, ndele omuyapostoli Petrus ta ti nava ninginifwe medina laJesus. Okudja opo, omhito yoku ka mona omwenyo waalushe oya li ya yeulukila ovanhu vomoiwana aishe. Eongalo ola li le lilongekidila okuudifa onghundana iwa keshe pamwe.

— Oshileshwa eshi osha kanghamena kOilonga 1:1–11:21.