Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli oi na etumwalaka lilipi?

 OSHILESHWA 13

Eehamba diwa naado dii odo da li da pangela muIsrael

Eehamba diwa naado dii odo da li da pangela muIsrael

Ouhamba waIsrael owa li wa tukauka. Eehamba dihapu domuIsrael kada li didiinini. Jerusalem osha li sha hanaunwa po kOvababilon

KONIMA eshi Salomo a fiya po elongelokalunga lashili, ouhamba wOvaisrael owa li wa tukauka ngaashi ashike Jehova a li a xunganeka. Omona waSalomo, Rehabeam, oo a li e mu pingena po, okwa li omukwanyanya. Onghee hano, omapata omulongo aIsrael okwa li e mu tukululila oshibofa ndele taa toto po ouhamba waIsrael wokolundume. Omapata makwao avali okwa kala a diinini kohamba yomepata laDavid oyo ya li tai pangele okudja muJerusalem, nouhamba oo owa li hau ifanwa ouhamba waJuda wokolukadi.

Omauhamba aeshe oo opavali kaa li tae shi endifa nawa, molwaashi eehamba odo da li tadi pangele kada li di na eitavelo nokada li hadi dulika. Ouhamba wokolundume owa li wa naipala unene shi dulife wokolukadi, molwaashi eehamba odo da li tadi pangele kolundume oda li hadi xumifa komesho elongelokalunga loipupulu. Ovaisrael ova kala tava longo oukolokoshi nonande opa li ovaprofeti mokati kavo, ngaashi Elia naElisa, ovo va li va longa oilonganghono. Ovaprofeti ovo keshe umwe womuvo okwa li nokuli a nyumuna omunhu. Hauxuuninwa, Jehova okwa efa ouhamba wokolundume u hanaunwe po kOvaassiria.

Ouhamba waJuda owa kala po omido inadi fika kefele okudja eshi Ouhamba waIsrael wa hanaunwa po. Ashike nao Kalunga okwa ka efa u hanaunwe po. Eehamba ashike dinini domuJuda da li da katuka metwokumwe nomalondwelo ovaprofeti vaKalunga noda li da kendabala okukwafela oshiwana shi kale hashi longele Jehova. Pashihopaenenwa, ohamba Josia oya li ya xulifa po elongelokalunga loipupulu muJuda noya wapekulula otembeli yaJehova. Eshi Josia a li a pewa embo lOmhango oyo Kalunga a li a yandja okupitila muMoses, ola li le mu linyengifa a kale a tokola toko okutungulula elongelokalunga lashili.

Ndele shinyikifa oluhodi, eehamba odo da ka pangela konima eshi Josia a fya kada li da shikula oshihopaenwa shaye shiwa. Onghee hano, Jehova okwa li a efa Ovababilon va finde Ovajuda nokuhanauna po Jerusalem notembeli yasho. Ovajuda ovo inava dipawa ova li va twalwa moukwatwa kuBabilon. Kalunga okwa li a xunganeka kutya Ovajuda ovo otava ka kala moukwatwa oule womido 70. Ngaashi sha li sha xunganekwa, Juda osha kala eputu oule womido adishe odo fiyo osheshi Ovajuda va ka efiwa va alukile koshilongo shavo.

Ndele okudja eshi Juda sha li sha hanaunwa po, kapa li vali ohamba yomepata laDavid ya li tai ka pangela fiyo osheshi Omuxupifi, Messias omuudanekwa a hovela okupangela. Eehamba dihapu domeehamba odo da li kolukalwapangelo laDavid muJerusalem oda ulika kutya ovanhu inava wanenena inava wana okupangela. Messias oye aeke a wana okupangela. Onghee hano, Jehova okwa li a lombwela ohamba yaxuuninwa yomeehamba domepata laDavid a ti: ‘Oshikoroni nashi dje ko! Ndele itashi ka kala po fiyo Ou te uya, a wana ndee Ame ohandi ke shi mu pa.’ — Hesekiel 21:26, 27.

— Oshileshwa eshi osha kanghamena kembo lEehamba do-1 neenhi-2; Omafimbo omati-2 etukulwa eti-10 fiyo eti-36; nosho yo Jeremia 25:8-11.

Lihonga shihapu

Jona okwe lihonga komapuko aye

Mbela ope na efimbo limwe naave wa li wa tila oshinakuwanifwa osho wa pewa kuJehova ngaashi Jona? Ehokololo laye otali tu hongo oilihongomwa ya fimana kombinga yelididimiko nonghenda yaJehova.