Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Natu hopaeneneni eitavelo lavo

 Eenhetekelindjovo

Onhumwafo ya dja kolutuwiliki

Onhumwafo ya dja kolutuwiliki

Kovamwatate novamwameme ovaholike:

Omido dinini da pita, mOshungonangelo yomoukalele omwa kala hamu holoka oitukulwa ipe i na oshipalanyole “Natu hopaeneneni eitavelo lavo.” Okudja opo otwa kala hatu hafele oitukulwa oyo ya kala hai piti omalufe.

Mbela ovaleshi ove uditile ngahelipi oitukulwa oyo? Omukainhu umwe eshi a lesha oshitukulwa tashi popi kombinga yaMarta, okwa shanga a ti: “Onda yola eshi nde shi lesha molwaashi naame ondi li ngaashi ye, alushe ohandi kala nda hala okuyakula ovaenda nokukala nde lipyakidila ndele efimbo limwe ohandi dimbwa okweefa po omalipyakidilo opo ndi hafele pamwe nookaume kange.” Omunyasha umwe womido 15 okwa li a fika pexulifodiladilo shi na sha nehokololo laEster a ti: “Otashi dulika tu kale hatu yandje elitulemo lihapu koidjalomwa nokoinima oyo opo ya kondo. Oshoshili kutya otwa pumbwa okukala tu na omidjalo da, ashike inatu hala okukala tuhe na ondjele.” Okwa weda ko vali a ti: “Jehova oha tale kounhu wetu womeni.” Oshitukulwa osho tashi popi kombinga yomuyapostoli Petrus oshe linyengifa omumwameme umwe omuKriste nokwa popya a ti: “Onda li ndi udite nda kwatelwa mo filufilu mehokololo nonda li ndi udite nda fa opo nda li. Onda li nda longifa omaliudo opo ndi kale ndi udite kutya ehokololo ola yuka peni.”

Ovaleshi ovo nosho yo vakwao vahapu ovo va shanga va ulike olupandu lavo omolwoitukulwa oyo, otava koleke osho omuyapostoli Paulus a li a shanga nalenale a ti: “Keshe eshi sha shangwa nale, osha shangelwa elongo letu.” (Rom. 15:4) Jehova okwa shangifa omahokololo oo mOmbibeli opo e tu honge oilihongomwa ya fimana. Kashi na nee mbudi kutya otwa kala moshili efimbo li fike peni, atusheni ohatu dulu okulihonga kuo.

Ohatu mu ladipike mu leshe embo eli diva ngaashi tashi dulika. Otamu dulu oku li kwatela mo mElongelokalunga lOukwaneumbo weni, notwe lineekela kutya ounona navo otave ke li hafela. Eshi tali ka konakonwa pEkonakonombibeli lEongalo, inamu faula nande muha pitililwe po. Li konakoneni nawa nefimbo ndele inamu tondoka mo ashike. Kala wa fa u wete oiningwanima eshi tai ningwa nokukala wa fa u udite wa kwatelwa mo pamaliudo. Kendabala okukala u udite ngaashi ovanhu ovo va popiwa mOmbibeli va li ve udite, kala yo wa fa u wete oinima oyo va li ve wete. Yelakanifa nghee va li ve linyenga keenghalo odo va li va shakeneka nanghee ove tashi dulika ngeno we linyenga.

Otwa hafa neenghono okutukulilafana nanye ouyelele oo u li moshishangomwa eshi. Otwe lineekela otau ka kala enangekonoupuna kunye pamwe nomaukwaneumbo eni. Otu mu hole nohole inene notwe mu halela ehafo nombili,

Olutuwiliki lEendombwedi daJehova