Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Natu hopaeneneni eitavelo lavo

Exulifo

Exulifo

‘Ningeni ovashikuli [ile tu tye “ovahopaeleli,” NW] vaavenya va ninga keitavelo nokelididimiko ovafyuululi vaasho sha udanekwa.’ — OVAHEBERI 6:12.

1, 2. Omolwashike sha fimanenena okukulika eitavelo letu paife? Shi yelifa.

EITAVELO. Oshitya osho oshiwa lela noshi lile po oukwatya muhokwifa. Onghee hano, ngeenge otwa udu oshitya osho, ohatu ka diladila yo koutumbulilo oo tau ti: “Osha endelela!” Nomolwaasho ngeenge katu na eitavelo, otwa pumbwa okuninga po sha meendelelo opo tu kale tu li na. Ndele ngeenge otu li na, otwa pumbwa okukatuka meendelelo opo tu li amene noku li fila oshisho. Omolwashike?

2 Diladila nee ngeno to tavakana mombuwa ya kula, nowa pumbwa omeva neenghono. Ngeenge owe a mono, owa pumbwa oku a amena ketango opo aha pwiinine mo nowa pumbwa okukala to weda mo opo e ku fikife oko wa yuka. Kunena nafye otu li mombuwa yopamhepo, mounyuni omu eitavelo lashili la pumba noha li dulu okukana po ngaashi omeva ngeenge inaa amenwa noihamu wedwa. Otu na omhumbwe inene; ngaashi ashike ita tu dulu okuxupa ngeenge ka tu na omeva, ita tu dulu okukala nekwatafano naJehova ngeenge katu na eitavelo. — Rom.1:17.

3. Jehova okwe tu longekidila shike osho tashi tu kwafele tu pameke eitavelo, noinima ivali ilipi twa pumbwa okukaleka momadiladilo?

3 Jehova oku shii kutya otwa pumbwa eitavelo meendelelo, oku shii yo nghee shidjuu oku li kulika noku li kaleka po kunena. Nopehe na omalimbililo, osho osho she mu linyengifa e tu longekidile oihopaenenwa opo tu i shikule. Okwa nwefa mo omuyapostoli Paulus a shange ta ti: ‘Ningeni ovashikuli [ile tu tye “ovahopaeleli,” NW] vaavenya va ninga keitavelo nokelididimiko ovafyuululi vaasho sha udanekwa.’ (Heb. 6:12) Nomolwaasho ehangano laJehova hali tu ladipike tu longe noudiinini mokuhopaenena oihopaenenwa yovalumenhu novakainhu ovadiinini, ngaashi ovo twa kundafana membo eli. Oshike tu na okuninga po paife? Na tu kalekeni oinima ei ivali momadiladilo: (1) Otwa pumbwa okutwikila okupameka eitavelo letu; (2) otu na okukaleka eteelelo la twa momadiladilo.

4. Ongahelipi Satana a ulika kutya oku li omutondi weitavelo, nomolwashike tuhe na okutila?

4 Twikila okupameka eitavelo loye. Eitavelo oli na omutondi munene, Satana. Omupangeli wounyuni ou okwa lundululila onghalelo ei yoinima monghalo oyo idjuu okukaleka po eitavelo, noku na eenghono e tu dule. Ndele mbela otu na okukala twa tila kutya ita tu dulu okukulika nokupameka eitavelo letu? Hasho nandenande! Jehova oku li Kaume munene waaveshe ovo tava kendabala okukala ve na eitavelo lashili. Okwe tu shilipaleka kutya, E li omukwafi wetu oha tu dulu okukondjifa Ondiaboli notai ke tu ya onhapo. (Jak. 4:7) Ohatu kondjifa Ondiaboli mokulongifa efimbo efiku keshe tu kulike nokupameka eitavelo letu. Ngahelipi?

5. Osha enda ngahelipi opo ovalumenhu novakainhu ovadiinini ovo va tumbulwa mOmbibeli va kale ve na eitavelo? Shi yelifa.

5 Ngaashi twe lihonga, ovalumenhu novakainhu  ovadiinini ovo va tumbulwa mOmbibeli inava dalwa ve na eitavelo. Okukalamwenyo kwavo okwa yandja oumbangi kutya eitavelo oli li oshiimati shomhepo iyapuki yaJehova. (Gal. 5:22) Ova li hava ilikana kuJehova e va kwafele, na Jehova okwa kala nokupameka eitavelo lavo. Nafye natu ningeni ngaashi vo, tuha dimbwe nande kutya Jehova oha yandje omhepo yaye iyapuki nehalo liwa kwaavo have i pula nohava katuka metwokumwe nomailikano avo. (Luk. 11:13) Ndele mbela ope na vali osho hatu dulu okuninga?

6. Ongahelipi hatu dulu okumona ouwa pauyadi mokukonakona omahokololo opaMbibeli?

6 Membo eli, otwa kundafana ashike oihopaenenwa inini yaavo va li ve na eitavelo la tongomana. Ashike ope na yo natango ihapu. (Lesha Ovaheberi 11:32.) Ohatu ka hafela okulesha nokulihonga koihopaenenwa yovalumenhu novakainhu ovo ovadiinini membo e li pefimbo lekonakono lopaumwene. Ngeenge otwa lesha ashike hatu tondoka momahokololo Ombibeli e na sha novanhu ovo vali ovadiinini, itashi ka pameka eitavelo letu. Opo tu mone ouwa pauyadi mwaasho hatu lesha, otwa pumbwa okulongifa efimbo tu dule okudilonga moule koshikalimo nosho yo komauyelele makwao oo a pamba omahokololo opaMbibeli. Ngeenge otwa kala hatu dimbuluka alushe kutya ovalumenhu novakainhu ovo navo ova li ‘ovanhu ngaashi fye,’ [ile tu tye ve na “omaliudo ngaashi etu,” NW] oihopaenenwa yavo otai ka kala yolela kufye. (Jak. 5:17) Ngeenge otwa kala tu va uditile oukwao wananghali, ohatu ka kala twa fa tu wete nghee tashi dulika va li hava kala ve udite ngeenge va taalela omashongo nosho yo omaupyakadi a faafana naao etu.

7-9. (a) Ovalumenhu novakainhu ovadiinini vopefimbo lOmbibeli otashi dulika ngeno va kale ve udite ngahelipi shi na sha nokulongela Jehova monghedi oyo hatu mu longele kunena? (b) Omolwashike twa pumbwa okupameka eitavelo letu pailonga?

7 Ohatu pameke yo eitavelo letu okupitila meenghatu detu, molwaashi ‘eitavelo lihe noilonga, ola fya.’ (Jak. 2:26) Ovalumenhu novakainhu ovo twa dja nokukundafana ngeno ovo va li va pewa oilonga oyo twa pewa kuJehova kunena, mbela ngeno itava ka kala tuu ve i hafela!

8 Pashihopaenenwa, ongahelipi ngeno ngeenge Abraham okwa lombwelwa kutya ita ka longela vali Jehova meealtari da nafangwa da tungwa nomamanya mombuwa, ndele opamwe novalongelikalunga vakwao va unganekwa mOmalupale Ouhamba mawa nosho yo poyoongalele, opo omaudaneko oo a li a tala ashike “kokule,” haa kundafanwa nokufatululwa monghedi ikumwifi? (Lesha Ovaheberi 11:13.) Ndele ongahelipi ngeno ngeenge Elia okwa lombwelwa kutya oilonga yaye inai kwatela mo okudipaa ovaprofeti voshikalunga Baal ofimbo a li ta kendabala okulongela Jehova koshi yepangelo lomupangeli omushunimonima, ndele okutalela po ovanhu nombili moku va twaalela etumwalaka tali hekeleke notali yandje eteelelo? Mbela ngeno ovalumenhu novakainhu ovadiinini ovo vopefimbo lOmbibeli itava ka tambula ko meendelelo oinakuwanifwa opo valongele Jehova ngaashi hatu shi ningi kunena?

9 Natu twikileni okupameka eitavelo letu mokukatuka eenghatu. Okuninga ngaho, ohatu ka tula moilonga oihopaenenwa yovalumenhu  novakainhu ovadiinini oyo tai hangwa mEendjovo daKalunga da nwefwa mo. Ngaashi sha tumbulwa mEtwalemo, ohatu ka kala tu udite tu li lela popepi navo ngaashi ookaume ketu. Onghee hano, mafiku oukaume wa tya ngaho otau ka ninga wolela.

10. Oshike hatu ka hafela mOparadisa?

10 Twikila okukaleka eteelelo loye la twa momadiladilo. Ovalumenhu novakainhu ovo ovadiinini alushe ova li hava mono eenghono meteelelo lavo olo va pewa kuKalunga. Mbela naave osho ho ningi? Pashihopaenenwa, diladila ashike kehafo olo tali ka kala po eshi tamu ka shakena novapiya vaKalunga ovadiinini eshi tava ka alukila momwenyo ‘penyumuko lovayuki.’ (Lesha Oilonga 24:15.) Omapulo amwe elipi to ka kala wa hala oku va pula?

11, 12. Mounyuni mupe, omapulo elipi tashi dulika u ka pule (a) Abel? (b) Noa? (c) Abraham? (d) Rut? (e) Abigail? (f) Ester?

11 Ngeenge owa ka shakena naAbel, mbela oto ka kala wa halelela oku mu pula kutya ovadali vaye ova li va tya ngahelipi? Ile otashi dulika u mu pule: “Ovakerubi ovo va li va kelela moshikunino shaEden mbela owa popile navo? Ova li ngoo ve ku nyamukula?” Ongahelipi shi na sha naNoa? Otashi dulika u mu pule: “Kwa li nande ho kala wa tila Ovatongolume? Ongahelipi wa li wa dula okufila oshisho oinamwenyo aishe oyo ya li monguluwato omudo aushe?” Ngeenge owa shakene naAbraham, otashi dulika u mu pule: “Owa shakenene ngoo nale naSem? Olyelye e ku honga kombinga yaJehova? Mbela osha li shidjuu kwoove okufiya po Ur?”

12 Sha faafana, tala komapulo amwe oo tashi dulika to ka kala wa hala okupula ovakainhu ovadiinini ovanyumunwa. “Rut, oshike sha li she ku linyengifa opo u ninge omulongeli waJehova?” “Abigail, mbela kwa li wa tila okulombwela Nabal shi na sha nanghee wa li wa kwafela David?” “Ester,oshike sha li she mu ningilwa nye naMordekai lwanima eshi ehokololo lOmbibeli li na sha nanye la xula?”

13. (a) Ovanyumunwa otashi dulika ve ke ku pule omapulo elipi? (b) Ou udite ngahelipi shi na sha noku ka shakena novalumenhu novakainhu ovadiinini vopefimbo lOmbibeli?

13 Oshoshili kutya, Ovalumenhu novakainhu ovo ovadiinini navo otashi dulika ve ku na omapulo mahapu. Ito ka kala tuu wa tunhukwa oku va lombwela shi na sha noiningwanima itunhula yomomafiku a xuuninwa nanghee Jehova a li a nangeka noupuna oshiwana shaye pomafimbo madjuu! Kape na omalimbililo otashi ke va kuma neenghono ngeenge va udu nghee Jehova a wanifa po omaudaneko aye aeshe oo a li a udaneka. Momafiku okomesho ita tu ka pumbwa vali okudiladila kovapiya vaKalunga ovadiinini ovo va tumbulwa mOmbibeli molwaashi ohatu ka kala pamwe navo mOparadisa. Twikila okuninga keshe osho to dulu paife opo ovanhu ovo va kale volela kwoove. Kala nokuhopaenena eitavelo lavo. Hafela okulongela Jehova pamwe navo, ve li ookaume koye fiyo alushe.