Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ehena popepi naJehova

 ETUKULWA 16

‘Ninga eshi sha yuka’ eshi to ende pamwe naKalunga

‘Ninga eshi sha yuka’ eshi to ende pamwe naKalunga

1-3. (a) Omolwashike tu na oshikolo sholupandu kuJehova? (b) Omuxupifi wetu omunahole okwa hala tu ninge shike?

DILADILA nee ngeno u li moshikepa tai hale okuningina. Fimbo wa li to diladila kutya kape na vali eshi tashi dulu okuningwa po, ope uya omuxupifi oo e uya oku mu kwafela. Ito ka kala tuu u udite nawa ngeenge omuxupifi okwe ku xupifa moshiponga ndele ta ti: “Paife ou li meameno”! Mbela ito ka kala udite u na oshikolo sholupandu komunhu oo? Otaku dulu lela okutiwa kutya ou na oshikolo shomwenyo kuye.

2 Efaneko olo otali tu kwafele tu ude ko osho Jehova e tu ningila. Doshili, otu na oshikolo sholupandu kuye. Jehova okwe tu pa ekulilo olo le shi ningifa tashi shiiva opo tu xupifwe moulunde nefyo. Ohatu ka kala tu udite twa amenwa eshi tu shii kutya ngeenge otu na eitavelo tali longo mekuliloyambo olo li na ondilo, omatimba etu otaa ka dimwa po nonakwiiwa yetu yaalushe otai ka kala ya amenwa. (1 Johannes 1:7; 4:9) Ngaashi twe shi mona metukulwa eti-14, ekulilo olo onghedi ya denga mbada omo Jehova a ulika ohole nouyuki waye. Osho oshi na oku tu linyengifa tu ninge shike?

3 Oshiwa okukonakona kutya Omuxupifi wetu omunahole okwa hala tu ninge shike. Jehova okwa li a popya okupitila momuprofeti Mika a ti: “Omunhu ove, Ye okwe ku shiivifila eshi shiwa. Nashike shimwe Omwene ta pula kuove, nokutya u ninge eshi sha yuka nokuhola efilonghenda nokweenda nelininipiko pamwe naKalunga koye?” (Mika 6:8) Didilika kutya oshinima shimwe osho Jehova ta pula kufye osho ‘okuninga eshi sha yuka.’ Ongahelipi hatu dulu okuninga ngaho?

Lalakanena ‘ouyuki washili’

4. Otu shi shii ngahelipi kutya Jehova okwa hala tu kale metwokumwe nomifikamhango daye douyuki?

4 Jehova okwa hala tu kale metwokumwe nomifikamhango  daye di na sha naasho shi li mondjila nosho yo osho sha puka. Molwaashi omifikamhango daye oda yuka, otu na okulalakanena ouyuki eshi hatu dulika kudo. Jesaja 1:17 ota ti: “Lilongeni okuninga ouwa; shikuleni ouyuki.” Eendjovo daKalunga ode tu kumaida tadi ti: “Kongeni ouyuki!” (Sefanja 2:3) Ode tu ladipika yo tu ‘djale omunhu mupe a shitwa a fe Kalunga omouyuki woshili.’ (Ovaefeso 4:24) Ouyuki washili otau ke tu kwafela tu henuke oinima ngaashi elongifo leenghono, onyata keshe nosho yo oluhaelo, molwaashi oinima oyo oi li omhinge naasho shiyapuki. — Epsalme 11:5; Ovaefeso 5:3-5.

5, 6. (a) Omolwashike shihe fi shidjuu okudulika komifikamhango daJehova? (b) Ombibeli oya ulika ngahelipi kutya okulalakanena ouyuki oshinima tashi twikile?

5 Mbela oshi li omutengi mudjuu kufye okudiinina omifikamhango daJehova douyuki? Ahowe. Omunhu oo e na ekwatafano lopofingo naJehova ita ka kala e wete oiteelelwa yaye idjuu. Molwaashi otu hole Jehova nosho yo omaukwatya aye, otwa hala okukala nonghedi yokukalamwenyo oyo tai mu hafifa. (1 Johannes 5:3) Dimbuluka kutya Jehova ‘oku hole ouyuki.’ (Epsalme 11:7) Ngeenge otwa hala shili okuhopaenena ouyuki waKalunga, otu na okukala tu hole osho e hole nokutonda osho e tonde. — Epsalme 97:10.

6 Oshidjuu kovanhu inava wanenena okulalakanena ouyuki. Ndele otu na okulidula omunhu mukulu pamwe noilonga yaye youlunde nokudjala omunhu mupe. Ombibeli oya ti kutya omunhu mupe ota ‘shitwa’ okupitila meshiivo lashili. (Ovakolossi 3:9, 10) Outumbulilo “ou ta shitilwa” otau ulike kutya okudjala omunhu mupe oshinima tashi twikile, osho tashi pula eenghendabala da mana mo. Kashi na nee mbudi kutya ohatu kendabale shi fike peni okulonga osho sha yuka, omafimbo amwe okuhawanenena kwetu ohaku tu ningifa tu diladile, tu popye ile tu longe osho inashi yuka. — Ovaroma 7:14-20; Jakob 3:2.

7. Otu na okutala ko ngahelipi oinima oyo tai tu i moshipala eshi hatu ningi eenghendabala tu lalakanene ouyuki?

7 Otu na okutala ko ngahelipi oinima oyo tai tu i moshipala eshi hatu kendabala okulalakanena ouyuki? Odoshili kutya inatu hala okutala ko oulunde wa fa oshinima inashi kwata moiti. Ashike nande ongaho, katu na okusholola nokukala tu udite  kutya omapuko oo twa ninga otae tu ningifa tu kale inatu wana okulongela Jehova. Kalunga ketu omunanghenda okwa ninga omalongekido oo taa kwafele ovo ve livela ombedi va kale va hokiwa natango kuye. Konakona eendjovo domuyapostoli Johannes odo tadi tu shilipaleke tadi ti: “Edi ohandi di mu shangele mu ha nyone.” Ndele okwa weda ko a ti: ‘Ndele ngenge pe na ou ta nyono, [omolwokuhawanenena oko twa fyuulula] otu nomupopili puTate, Jesus Kristus.’ (1 Johannes 2:1) Doshili, Jehova okwa longekida ekuliloyambo laJesus opo tu dule oku mu longela monghedi oyo ta hokwa nonande inatu wanenena. Mbela osho kashi na oku tu linyengifa tu kale twa hala okulonga osho tashi hafifa Jehova?

Onghundana iwa nosho yo ouyuki wopakalunga

8, 9. Ongahelipi okuudifwa kwonghundana iwa taku ulike kutya Jehova omuyuki?

8 Ohatu dulu okulonga ouyuki, hatu hopaenene ouyuki wopakalunga, mokukala hatu kufa ombinga pauyadi moilonga yokuudifila vamwe onghundana iwa yOuhamba waKalunga. Ouyuki waJehova owa pambafana ngahelipi nonghundana iwa?

9 Jehova ita xulifa po onghalelo youkolokoshi ofimbo ina londwela tete ovanhu. Jesus okwa popya mexunganeko laye li na sha naasho tashi ka ningwa mefimbo lexulilo a ti: “Tete evangeli oli na okuudifilwa oiwana aishe.” (Markus 13:10; Mateus 24:3) Oshitya “tete” osho sha longifwa otashi ulike kutya ope na oiningwanima imwe oyo tai ka ningwa konima ngeenge oilonga yokuudifa mounyuni aushe oya pu. Oiningwanima oyo oya kwatela mo efimbo loudjuu munene oo wa xunganekwa, opo ovakolokoshi tava ka hanaunwa po nokonima yaasho otapa ka kala ounyuni mupe wouyuki. (Mateus 24:14, 21, 22) Onghee hano, itashi ka kala sha yuka okukembaula Jehova kutya ina ungaunga pauyuki novakolokoshi. Eshi ta londwela ovanhu, ota pe ovakolokoshi omhito ya wana yokulundulula eenghedi davo opo vaha ka hanaunwe po. — Jona 3:1-10.

Ohatu ulike kutya ohatu longo ouyuki wopakalunga ngeenge hatu udifile ovanhu onghundana iwa nopehe na onhondo

10, 11. Ongahelipi okuudifa onghundana iwa taku ulike kutya ohatu longo ouyuki wopakalunga?

10 Ongahelipi okuudifa kwetu onghundana iwa taku ulike kutya ohatu lalakanene ouyuki wopakalunga? Shotete, ohatu ningi  nawa eshi hatu kwafele vamwe ngaashi hatu dulu opo va ka xupifwe. Diladila vali kefaneko li na sha nokuxupifwa moshikepa oyo tai hale okuningina. Nopehe na omalimbililo, eshi u li mokambautu oko ke uya oku mu xupifa oto ka kala yo wa hala okukwafela vakweni ovo ve li natango momeva. Sha faafana, otu na oshinakuwanifwa shokukwafela ovo tava kondjo ve li momeva opafaneko ounyuni ou woukolokoshi. Odoshili kutya ovanhu vamwe ihava tambula ko etumwalaka letu. Ndele fimbo ashike Jehova ta twikile okutala ovanhu onheni, otu na oshinakuwanifwa shoku va kwafela “ve lialulukile melidilululo” opo va dule oku ka xupifwa. — 2 Petrus 3:9.

11 Eshi hatu udifile ovanhu ovo hatu shakeneke onghundana iwa, ohatu longo ouyuki monghedi imwe vali ya fimana, sha hala okutya, ohatu ulike kutya katu na onhondo. Dimbuluka kutya “Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.” (Oilonga 10:34, 35) Ngeenge otwa hala okuhopaenena ouyuki waye, katu na okukala nonhondo. Ponhele yaasho, otu na okuudifila ovanhu onghundana iwa kashi na nee mbudi kutya ovomuhoko ulipi, ove li pomufika ulipi moulikumwe wovanhu ile ova hepuluka shi fike peni. Kungaho ohatu ka kwafela ovo tave tu pwilikine va ude onghundana iwa nove i tambule ko. — Ovaroma 10:11-13.

Nghee tu na okuungaunga novanhu vakwetu

12, 13. (a) Omolwashike tuhe na okweendelela okutokola vamwe? (b) Omayele aJesus oo kutya “efeni okutokola” nosho yo kutya “efeni okuyandja oushima” otaa ti shike? (Tala yo eshangelo lopedu.)

12 Ohatu ka ulika yo kutya ohatu longo ouyuki mokukala hatu ungaunga navamwe ngaashi Jehova ha ungaunga nafye. Ohashi kala shipu neenghono okutokola vamwe, oku va kembaula omolwomapuko avo nokukala twa limbililwa shi na sha nomalinyengotomheno avo. Olyelye womufye ta ka kala a hala Jehova a konenene omalinyengotomheno etu nosho yo omapuko etu nopehe na oku tu fila onghenda? Lao linene, Jehova hasho ha ungaunga nafye ngaho. Omupsalme okwa ti: “Omwene, ngenge to konenene omawii, Omwene, olyelye ta kala po?” (Epsalme 130:3) Mbela inatu pandula eshi Kalunga ketu omuyuki  nomunanghenda iha yandje elitulemo komapuko etu? (Epsalme 103:8-10) Ongahelipi nee fye tu na okuungaunga navamwe?

13 Ngeenge otwa dimina nolupandu kutya ouyuki waKalunga ohau endele pamwe nonghenda, itatu ka endelela okutokola vamwe moinima oyo inai tu pamba, ile inai fimana lela. Jesus okwa li a londwela mEudifo lokOmhunda a ti: “Efeni okutokola, opo muha tokolwe.” (Mateus 7:1, NW) Pahokololo laLukas, Jesus okwa weda ko vali a ti: “Efeni okuyandja oushima opo muha pewe oushima.” * (Lukas 6:37, NW) Jesus okwa ulika kutya oku shii kutya ovanhu inava wanenena ove na eamo lokutokola vakwao. Keshe omupwilikini waye oo a li e na onghedindjikilile yokutokola nonyanya ovanhu vakwao okwa li e na oku i xulifa po.

14. Otu na ‘okweefa okutokola’ vamwe omolwomatomheno elipi?

14 Omolwashike tu na ‘okweefa okutokola’ vamwe? Etomheno limwe ololo kutya, eenghonopangelo detu oda ngabekwa. Omuyapostoli Jakob okwe tu dimbulukifa a ti: “Omuyandjimhango nomutokoli umwe aeke,” Jehova. Onghee hano, Jakob okwa li a pula a ti: “Oove lyelye eshi to tokola omukweni?” (Jakob 4:12; Ovaroma 14:1-4) Kakele kaasho, okuhawanenena kwetu ohaku tu ningifa tuha tokole pauyuki. Luhapu oikala yetu nosho yo omalinyengotomheno, oo haa kala a kwatela mo onhondo, onghone, ondubo nosho yo okukala tu li shii ouyuki, ohai nwefa mo onghedi omo hatu tale ko ovanhu vakwetu. Otu na yo omangabeko amwe vali, nongeenge otwa dilonga kuo otashi ke tu kwafela tu henuke okukala hatu yandje unene elitulemo komapuko avamwe. Ihatu dulu okumona osho shi li momitima davamwe, nokatu shii eenghalo adishe omo ve li. Onghee hano, omolwashike tu na okukala hatu fekelele ovaitaveli vakwetu omalinyengotomheno a puka, ile oku va kembaula omolweenghendabala odo tava ningi mokulongela Kalunga? Itashi ka kala tuu shiwa okuhopaenena Jehova mokukala hatu yandje  elitulemo komaukwatya mawa ovamwatate novamwameme ponhele yokuyandja elitulemo komapuko avo!

15. Ovalongelikalunga ove na okuhenuka okupopya eendjovo dilipi nokuungaunga novanhu ngahelipi, nomolwashike?

15 Otu na okuungaunga ngahelipi noilyo yomaukwaneumbo etu? Shinyikifa oluhodi kunena, momaumbo omo ngeno mu na okukala ombili, omo unene ovanhu hava tokola vakwao nonyanya. Osha sha okuuda ovashamane, ovakulukadi ile ovadali ovakwanyanya ovo hava monifa oixuna nohava hepeke oilyo yomaukwaneumbo avo moku i ula omalaka mai ile oku i yahameka palutu. Ovalongelikalunga kave na okulongifa omalaka mai, okusheka nosho yo okuungaunga nai navamwe. (Ovaefeso 4:29, 31; 5:33; 6:4) Omayele aJesus oo kutya “efeni okutokola” ile kutya “efeni okuyandja oushima” oku na yo okutulwa moilonga meumbo. Dimbuluka kutya okulonga osho sha yuka okwa kwatela mo okuungaunga navamwe ngaashi Jehova ha ungaunga nafye. Kalunga ketu iha ungaunga nafye nai ile nonyanya. Ndele  ponhele yaasho, oha ‘kenukile’ ovo ve mu hole. (Jakob 5:11) Ine tu tulila po tuu oshihopaenenwa sha denga mbada!

Ovakulunhuongalo ove na okulonga ‘pauyuki’

16, 17. (a) Jehova okwa hala ovakulunhuongalo va ninge shike? (b) Oshike shi na okuningwa po ngeenge omunyoni ine livela ombedi shili, nomolwashike?

16 Atusheni meongalo lopaKriste otwa teelelwa tu longe ouyuki, ndele unene tuu ovakulunhuongalo. Didilika nghee ‘omalenga’ ile ovakulunhuongalo va hokololwa mexunganeko laJesaja taku ti: “Tala, ohamba otai ka pangela pauyuki, nomalenga otaa ka tokola etokolo la yuka.” (Jesaja 32:1) Doshili, Jehova okwa hala ovakulunhuongalo va longe pauyuki. Ongahelipi tava dulu okulonga pauyuki?

17 Ovalumenhu ovo va pyokoka pamhepo ove shi shii nawa kutya ouyuki owa kwatela mo okukaleka eongalo la koshoka paenghedi nosho yo pamhepo. Omafimbo amwe ovakulunhuongalo ohava ungaunga nomanyono a kwata moiti. Ngeenge tava ningi ngaho, ove na okudimbuluka kutya ouyuki wopakalunga owa kwatela mo okufila vamwe onghenda ngeenge otashi dulika. Onghee hano, ove na okukendabala okukwafela oo a nyona e livele ombedi. Ndele mbela otava ka ninga po shike ngeenge omunyoni ine livela ombedi shili nonande ova kendabala oku mu kwafela? Omolwouyuki waJehova wa wanenena, ove na okushikula omayele oo e li mEendjovo daJehova oo taa ti: “Kondeni mo ou mwii womokati keni.” Osho osha hala okutya omunhu oo ke na okukala vali oshilyo sheongalo. (1 Ovakorinto 5:11-13; 2 Johannes 9-11) Okukonda mo umwe meongalo ohashi nyemateke ovakulunhuongalo, ndele ove shii kutya ova pumbwa okuninga ngaho opo va kaleke eongalo la koshoka paenghedi nosho yo pamhepo. Ndele nande ongaho, ohava kala ve na elineekelo kutya fiku limwe omunyoni ote ke livela ombedi nota ka alukila meongalo. — Lukas 15:17, 18.

18. Ovakulunhuongalo ove na okukaleka shike momadiladilo ngeenge tava pe vamwe omayele a kanghamena kOmbibeli?

18 Okulonga ouyuki okwa kwatela mo yo okuyandja omayele a kanghamena kOmbibeli ngeenge osha pumbiwa. Ashike ovakulunhuongalo kave na okukala tava konenene vamwe opo ve va  mone omapuko. Kave na yo okukendabala okuyandja omapukululo efimbo keshe. Ndele Omukriste otashi dulika a ‘nyone ine shi nongela.’ Okudimbuluka kutya ouyuki waKalunga owa kwatela mo okukala tu na ko nasha navamwe noku va kenukila otashi ke linyengifa ovakulunhuongalo va ‘pukulule nomhepo yonheni’ oo a nyona. (Ovagalati 6:1, yelekanifa NW.) Onghee hano, ovakulunhuongalo kave na okutangunina omunhu oo a nyona ile ve mu ule omalaka mai. Ponhele yaasho, omayele ngeenge otaa yandjwa pahole, otaa ka twa omukumo oo te a pewa. Nokuli nongeenge ovakulunhuongalo tava hanyene omunyoni sha yukilila, tava popi kondadalunde oilanduliko yeenghatu daye dihe li pandunge, ove na okukaleka momadiladilo kutya omunyoni oo odi yomoufita waJehova. * (Lukas 15:7) Ngeenge omunhu okwa hanyenwa ile a pewa omayele pahole, otashi dulika e livele ombedi.

19. Ovakulunhuongalo ohava ningi omatokolo elipi, noku na okukala a kanghamena kushike?

19 Luhapu ovakulunhuongalo ohava ningi omatokolo oo haa kumu ovaitaveli vakwao. Pashihopaenenwa, ovakulunhuongalo ohava ongala oikando noikando opo va kundafane ngeenge ovamwatate vamwe meongalo ova wana okuninga ovakulunhuongalo ile ovayakuliongalo. Ovakulunhuongalo ove shii kutya osha fimana okuhakala nonhondo. Onghee hano, ohava efa oiteelelwa oyo Kalunga a tula po oyo i va wilike eshi tava ningi omatokolo, ndele ihava kala ve lineekela omataleko avo vene. Kungaho otava ka longa ‘vehe na etokolo lasha, la tetekela oshinima ndele itava yolola ovanhu.’ — 1 Timoteus 5:21.

20, 21. (a) Ovakulunhuongalo ove na okukendabala okuninga shike, nomolwashike? (b) Ovakulunhuongalo ove na okuninga shike opo va kwafele ovo “va polimana”?

20 Ovakulunhuongalo ohava wilikwa kouyuki wopakalunga  meenghedi dimwe vali. Konima eshi Jesaja a xunganeka kutya ovakulunhuongalo ove na okulonga ‘pauyuki,’ okwa li a twikila ko a ti: “Keshe umwe [womuvo] ta ka kala ngaashi oshikelelifo shokukelela omhepo nongaashi ehondameno lokuyaama oshikungulu ngaashi omakungulukilo omeva medu loluteni nomudidimbe wemanya lile medu lenotelo.” (Jesaja 32:2) Ovakulunhuongalo ove na okukendabala va kale hava hekeleke nokutulumukifa ovaitaveli vakwao.

21 Kunena, ovanhu vahapu ova pumbwa etwomukumo molwaashi oku na omaupyakadi oo haa teya ovanhu omukumo. Ovakulunhuongalo, oshike tamu dulu okuninga opo mu kwafele ovo “va polimana”? (Jesaja 61:2) Kaleni hamu pwilikine kuvo nolukeno. (Jakob 1:19) Ovanhu ovo va polimana otashi dulika va pumbwa okulombwela omunhu oo ve lineekela ‘oshisho shomomitima’ davo. (Omayeletumbulo 12:25) Va shilipaleka kutya ova pumbiwa nove holike kuJehova nosho yo kovamwatate nokovamwameme. (1 Petrus 1:22; 5:6, 7) Kakele kaasho, oto dulu  yo okwiilikana pamwe nomunhu oo a polimana noku mu kwatela momailikano oye. Ngeenge ovo va polimana ova udu omukulunhuongalo te va tumbula meilikano, otashi ke va hekeleka neenghono. (Jakob 5:14, 15) Eenghendabala dopahole odo to ningi opo u kwafele ovo va polimana Kalunga oo omuyuki oku di wete.

Ovakulunhuongalo ohava ulike kutya ohava longo ouyuki ngeenge tava tu omukumo ovo va polimana

22. Omeenghedi dilipi hatu dulu okuhopaenena ouyuki waJehova nohatu ka mona oidjemo ilipi?

22 Ohatu ka ehena popepi elela naJehova ngeenge otwa hopaenene ouyuki waye. Ohatu ka ulika kutya ohatu longo ouyuki wopakalunga ngeenge otwa kala hatu yambidida omifikamhango daye douyuki, hatu kufa ombinga moilonga yokuudifila vamwe etumwalaka olo tali xupifa eemwenyo nosho yo ngeenge hatu yandje elitulemo komaukwatya mawa avamwe ponhele yokukala hatu konenene omapuko avo. Ovakulunhuongalo, otamu ka ulika kutya ohamu longo ouyuki wopakalunga ngeenge tamu amene eongalo liha nyatekwe, ngeenge tamu yandje omayele taa tungu opamishangwa, tamu ningi omatokolo nopehe na onhondo nosho yo ngeenge tamu tu omukumo ovo va polimana. Ihashi hafifa tuu omutima waJehova, oo e li meulu, ngeenge ta tale oshiwana shaye tashi kendabala ‘okuninga eshi sha yuka’ eshi tashi ende pamwe naye!

^ okat. 13 Omatoloko amwe okwa longifa outumbulilo “inamu tokola,” nosho yo “inamu yandja oushima.” Osho otashi ti “ino hovela okutokola.” Ndele peemhito odo, ovashangi vOmbibeli ova li va longifa omalombwelotumbulo e li meanyo mepaifefimbo tali twikile. Onghee hano, oshinima eshi tashi popiwa apa otashi ningwa nale, ndele oshi na okuxulifwa po.

^ okat. 18 Mu 2 Timoteus 4:2, Ombibeli oya popya kutya ovakulunhuongalo omafimbo amwe ove na ‘okuhanyena, okuvela eembedi, nokukumaida.’ Oshitya shOshigreka (parakaleo) osho sha tolokwa “kumaida” otashi dulu yo okutolokwa “okutwa omukumo.” Oshitya shOshigreka parakletos osho sha pambafana noshitya osho otashi ulike kokuyambidida oshinima pamhangu. Onghee hano, nokuli nonande ovakulunhuongalo ova pumbwa okuhanyena oohandimwe sha kwata moiti, ove na okukala hava kwafele keshe oo a pumbwa ekwafo lopamhepo.

Lihonga shihapu

Ovakulunhuongalo ‘ovalongi pamwe nafye omolwehafo letu’

Omeenghedi dilipi ovakulunhuongalo hava kwafele ovaitaveli vakwao va kale va hafa moilonga yaKalunga?