Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ehena popepi naJehova

 ETUKULWA 19

“Ounongo waKalunga oo u li moshiholekwa shiyapuki”

“Ounongo waKalunga oo u li moshiholekwa shiyapuki”

1, 2. “Oshiholekwa shiyapuki” shilipi tu na okukala twa hokwa, nomolwashike?

IHASHI kala tuu shitunhula, shihokwifa noshikumwifi ngeenge wa lombwelwa oiholekwa yonhumba! Molwaashi osho shi li ngaho, ovanhu luhapu ohava mono shidjuu okudiinina oiholekwa. Ndele Ombibeli otai ti: “Efimano laKalunga olo okuholeka oshinima.” (Omayeletumbulo 25:2) Doshili, osha yeleka eshi Omushiti nOmupangeli weshito alishe, Jehova, ha kaleke oinima yonhumba oiholekwa noku i hololela ovanhu pefimbo laye la wapala.

2 Ndele ope na oshiholekwa shihokwifa noshitunhula osho Jehova e tu hololela mEendjovo daye. Ohashi ifanwa “oshiholekwa [shiyapuki, NW] shehalo laye.” (Ovaefeso 1:9) Okulihonga kombinga yoshiholekwa osho kaku fi ashike oshinima shihokwifa, ndele eshiivo olo hatu mono li na sha noshiholekwa osho otali ke tu pefa omwenyo waalushe notali tu kwafele tu ude ko ounongo waJehova uhe fi okuyelekwa.

Osha enda tashi hololwa kanini nakanini

3, 4. Exunganeko olo li li muGenesis 3:15 otali yandje ngahelipi eteelelo, ‘noshiholekwa shiyapuki’ shilipi sha kwatelwa mexunganeko olo?

3 Eshi Adam naEva va nyona, otashi dulika sha li tashi monika sha fa kutya elalakano laJehova li na sha nokuninga edu alishe oparadisa omo mu na okukala ovanhu va wanenena ola ponya. Ndele Kalunga okwa li a katuka onghatu meendelelo opo a ungaunge noupyakadi oo wa holoka po. Okwa li a xunganeka a ti: ‘Ohandi ka tula outondanhu pokati koye [keyoka] nomwalikadi nopokati koludalo loye noludalo laye. Lo otali ka nyanyaula omutwe woye, ndele ove oto ke li twa moshififinwa.’ — Genesis 3:15.

4 Eendjovo odo domuGenesis 3:15 oda li da fa otumbutumbu, molwaashi oda li tadi pendula omalipulo kutya: Omwalikadi okwa li ta ulike kushike? Eyoka ola li tali ulike kushike? Olyelye a li ta ka kala ‘oludalo’ olo tali ka nyanyaula omutwe weyoka? Adam naEva kava li ve shii kutya exunganeko olo ola li tali ti shike, shapo okumbeleka  ashike. Ndele nande ongaho, exunganeko olo ola li tali ulike kutya ovana ovadiinini vovalihomboli ovo va li vehe fi ovadiinini ova li ve na eteelelo lomonakwiiwa. Ouyuki owa li tau ka findana. Elalakano laJehova ola li tali ka wanifwa. Ndele kutya osho osha li tashi ka enda ngahelipi osha li oshiholekwa, osho Ombibeli tai shi ifana “ounongo waKalunga oo u li moshiholekwa shiyapuki, ounongo wa holekwa.” — 1 Ovakorinto 2:7NW.

5. Yelifa to longifa efaneko okuulika nghee Jehova ha ende ta holola oshiholekwa shaye shiyapuki.

5 Molwaashi Jehova oha “holola oiholekwa,” okwa li ta ka holola lwanima oinima aishe yo ya kwatelwa mo moshiholekwa osho shiyapuki. (Daniel 2:28) Ndele okwa li ta ka holola oinima oyo mokweendela ko kwefimbo, kanini nakanini. Oku shi faneka, natu tye nee ngeno xe omudali omunahole okwa pulwa kokamonamati kanini kutya: “Tate, onda dja peni?” Xe omunaendunge ote ke ka pa ashike ouyelele oo taka ka dula okuuda ko pefimbo olo. Eshi taka ende taka kulu, ota dulu oku ka lombwela ouyelele wa wedwa po. Jehova oha tale kutya onaini sha yeleka okuhololela oshiwana shaye omauyelele onhumba e na sha nokuwanifwa kwehalo laye nokwelalakano laye. — Omayeletumbulo 4:18; Daniel 12:4.

6. (a) Ehangano ile eudafanotwokumwe ohali ningwa nelalakano lashike? (b) Omolwashike shididilikwedi eshi Jehova ha ningi omahangano novanhu?

6 Jehova okwa kala ta holola ngahelipi omauyelele e na sha noshiholekwa shaye? Okwa enda ta ningi omahangano ile tu tye omaudafanotwokumwe opo a holole omauyelele oo. Otashi dulika pomhito yonhumba wa li wa ninga eudafanotwokumwe naumwe li na sha nokulanda nande ohauto, okulya ile okuyandja omukuli. Eudafanotwokumwe la shangwa la tya ngaho ola li ekwashilipaleko lopaveta olo la li tali shilipaleke kutya oinima oyo ya shangwa momukanda oo oya li tai ka wanifwa po. Ndele mbela omolwashike Jehova a li a pumbwa okuninga omahangano ile omaudafanotwokumwe novanhu? Ngeno eendjovo daye oda wana ashike okushilipaleka ovanhu kutya omaudaneko aye otaa ka wanifwa. Odoshili kutya Kalunga ita nyengwa okuwanifa po omaudaneko aye. Ashike peemhito dihapu, omolwokunakonasha kwaye, okwa hoolola okuninga omaudafanotwokumwe opaveta novanhu opo a koleke osho a li  a udaneka. Omaudafanotwokumwe a tya ngaho a kwashilipalekwa ohaa pe ovanhu inava wanenena ekanghameno la kola lokwiitavela omaudaneko aJehova. — Ovaheberi 6:16-18.

Kalunga okwa li a ninga ehangano naAbraham

7, 8. (a) Ehangano lilipi Jehova a li a ninga naAbraham, nola li la yandja ouyelele ulipi u na sha noshiholekwa shiyapuki? (b) Jehova okwa enda ngahelipi ta holola epata omo mwa li tamu ka dja Oludalo la udanekwa?

7 Konima eshi pwa pita omido da konda pomayovi avali okudja eshi ovanhu votete va tewa mo mOparadisa, Jehova okwa li a udanekela omupiya waye omudiinini, Abraham, a ti: “Ohandi ke ku nangeka noupuna unene noludalo loye ohandi li hapupalifa unene ngaashi eenyofi dokeulu . . . Noiwana aishe kombada yedu tai ka nangekwa noupuna moludalo loye, osheshi ove wa uda ondaka yange.” (Genesis 22:17, 18) Osho kasha li ashike eudaneko longaho. Jehova okwa li a ninga ehangano lopaveta naAbraham, nokwa li a ana, opo a shilipaleke Abraham kutya osho a popya itashi kala inashi wanifwa. (Genesis 17:1, 2; Ovaheberi 6:13-15) Kashi fi tuu oshinima shididilikwedi okushiiva kutya Omwene Omunamapangelo aeshe okwa li a ninga eudafanotwokumwe li na sha nokunangeka noupuna ovanhu!

‘Oludalo loye ohandi ke li hapupalifa ngaashi eenyofi dokeulu’’

8 Jehova okwa li a holola okupitila mehangano olo a li a ninga naAbraham kutya Oludalo la udanekwa ola li tali ke uya molupe lopanhu, molwaashi ola li tali ka dja moludalo laAbraham. Ndele olyelye a li ta ka kala Oludalo olo? Lwanima, Jehova okwa li a udaneka kutya Oludalo olo ola li tali ka dja mepata laIsak, oo a li umwe womovanamati vaAbraham. Lwanima vali, Jehova okwa li a udaneka kutya Oludalo olo otali ka dja mepata laJakob, umwe womovanamati vavali vaIsak. (Genesis 21:12; 28:13, 14) Konima vali yefimbo, Jakob okwa li a xunganekela umwe womovanamati vaye 12, a ti: “Epangelodibo itali ka kufwa muJuda nodibo youhamba itai di po peemhadi daye fiyo ou e nokuuya te uya. Noiwana tai ka dulika kuye.” (Genesis 49:10) Exunganeko olo ola li la ulika kutya Oludalo la udanekwa ola li tali ka ninga ohamba yomepata laJuda.

Kalunga okwa li a ninga ehangano nOvaisrael

9, 10. (a) Jehova okwa li a ninga ehangano lilipi nOvaisrael, nola li la amena ngahelipi oshiwana osho? (b) Omhango oya li ya ulika ngahelipi kutya ovanhu ova pumbwa ekuliloyambo?

9 Mo 1513 K.O.P., Jehova okwa li a ninga elongekido lonhumba  opo a kale ta yandje ouyelele wa wedwa po u na sha noshiholekwa shiyapuki. Okwa li a ninga ehangano noludalo laAbraham, oshiwana shaIsrael. Nonande ehangano lOmhango olo a li a ninga okupitila muMoses ola kwisha, ola li la dana onghandangala ya fimana mokuwanifwa kwelalakano laJehova li na sha nolOludalo la udanekwa. Omolwashike taku dulu okutiwa ngaho? Diladila komatomheno atatu taa landula. Lotete, Omhango oya li ya fa ohotekuma yeameno. (Ovaefeso 2:14) Oiteelelwa yOmhango i li pauyuki oya li ya amena Ovajuda vehe limbwange mumwe noiwana yovapaani. Kungaho, Omhango oya li ya amena epata omo mwa ka dja Oludalo la udanekwa. Osho osha li she shi ningifa tashi shiiva opo oshiwana shOvajuda shi kale po fiyo osheshi Messias a holoka peufwafimbo laKalunga.

10 Etomheno etivali, Omhango oya li ya ulika filufilu kutya ovanhu ova pumbwa ekuliloyambo. Molwaashi Omhango oya li ya wanenena, oya li ya nyaneka pomutenya oushili oo kutya ovanhu inava wanenena itava dulu oku i wanifa po filufilu. Kungaho, otaku dulu okutiwa kutya “oya wedelwa po omolwomatauluko, i kale po fiyo oludalo la pewa eudaneko tali uya.” (Ovagalati 3:19) PaMhango, ovanhu ova li hava yambe oinamwenyo opo va diminwe po pakafimbo omatimba avo. Ndele ngaashi Paulus e shi popya, “ohonde yeemhedi noyoikombo itai dulu nande okukufa po omatimba,” nomolwaasho, omayambo oo okwa li ashike taa faneke ekuliloyambo laKristus. (Ovaheberi 10:1-4) Onghee hano, kOvajuda ovadiinini, ehangano olo ola li ‘omutekuli wavo, woku va twala kuKristus.’ — Ovagalati 3:24.

11. Ehangano lOmhango ola li la pa Ovaisrael etimaumbwile likumwifi lilipi, ndele osha enda ngahelipi opo oshiwana osho shi kanife etimaumbwile olo?

11 Etomheno etitatu, ehangano lOmhango ola li la pa Ovaisrael etimaumbwile likumwifi. Jehova okwa li a lombwela oshiwana osho kutya ngeenge osha kala shidiinini kehangano olo, otashi ka ninga “ouhamba wovapristeri noshiwana shiyapuki.” (Exodus 19:5, 6) Ovaisrael vamwe vopambelela ova li va ninga oilyo yotete youhamba womeulu wovapristeri. Ndele molwaashi Ovaisrael ve li oshiwana kava li hava dulika kehangano lOmhango, ova li va anya okutambula ko Oludalo lopaMessias, nokungaho, ove likanifila etimaumbwile olo la popiwa muExodus 19:5, 6. Oolyelye nee va li tava ka weda Ovaisrael ovadiinini opo ouhamba oo wovapristeri u kale  we lixwapo? Noshiwana osho sha punikwa osha li tashi ka kala sha pambafana ngahelipi nOludalo la udanekwa? Ouyelele komapulo oo e na sha noshiholekwa shiyapuki owa li tau ka yela mo pefimbo laKalunga la wapala.

Kalunga okwa li a ninga ehangano naDavid li na sha nouhamba

12. Jehova okwa li a ninga ehangano naDavid li na sha nashike, nola li la yandja ouyelele ulipi u na sha noshiholekwa shiyapuki?

12 Jehova okwa li a yandja ouyelele wa wedwa po u na sha noshiholekwa shiyapuki eshi a li a ninga ehangano limwe vali mefelemudo eti-11 K.O.P. Okwa li a udanekela ohamba idiinini David, a ti: “Ohandi ka lenga oludalo loye . . . ndee handi pameke ouhamba walo. . . . Ohandi ka pameka olukalwapangelo laye louhamba fiyo alushe.” (2 Samuel 7:12, 13; Epsalme 89:4) Kungaho, Jehova okwa li a ulika kutya Oludalo la udanekwa ola li tali ka dja mepata laDavid. Ndele mbela omunhu wopambelela okwa li ngoo ta ka dula okupangela “fiyo alushe”? (Epsalme 89:21, 30, 35-37) Ohamba yopanhu oya li ngoo tai ka dula okumangulula ovanhu moulunde nefyo?

13, 14. (a) PaPsalme 110, Jehova okwa li a udanekela shike Ohamba oyo a vaeka? (b) Ovaprofeti vaJehova ova li va yandja omauyelele a wedwa po elipi e na sha nOludalo la udanekwa?

13 David okwa li a nwefwa mo a shange ta ti: ‘Jehova okwa tya kOmwene wange: Kala omutumba kolulyo lange, fiyo handi ningi ovatondi voye oshilyatelo shokeemhadi doye. Jehova okwa ana, ndee ite shi lundulula: Oove omupristeri fiyo alushe panghedi yaMelkisedek.’ (Epsalme 110:1, 4, yelekanifa NW.) Eendjovo odo David a popya oda li da yukifwa odikilila kOludalo la udanekwa lopaMessias. (Oilonga 2:35, 36) Ohamba oyo kaya li tai ka pangela okudja muJerusalem, ndele oya li tai ka pangela okudja meulu, i li “kolulyo” laJehova. Osho osha hala okutya ohamba oyo kaya li ashike tai ka pangela muIsrael, ndele oya li tai ka pangela edu alishe. (Epsalme 2:6-8) Opa li yo vali oshinima shimwe osho sha li sha hololwa mEpsalme sha pamba oshiholekwa shiyapuki. Didilika kutya Jehova okwa li a ana kutya Messias okwa li ta ka kala ‘omupristeri panghedi yaMelkisedek.’ Ngaashi ashike Melkisedek a li ohamba nomupristeri pefimbo laAbraham, Oludalo la udanekwa ola li tali ka nangekwa po kuKalunga li li Ohamba nOmupristeri. — Genesis 14:17-20.

14 Jehova okwa kala ta yandje ouyelele wa wedwa po okupitila  movaprofeti mokweendela ko kwefimbo. Pashihopaenenwa, Jesaja okwa li a xunganeka kutya Oludalo ola li tali ka fya efyo lopayambo. (Jesaja 53:3-12) Mika okwa li a xunganeka kutya openi Messias a li ta ka dalelwa. (Mika 5:1) Daniel okwa li a xunganeka omudo wokondadalunde omo Oludalo olo la li tali ka holoka nomudo omo la li tali ka dipawa. — Daniel 9:24-27.

Nghee oshiholekwa shiyapuki sha hololwa

15, 16. (a) Osha enda ngahelipi opo Omona waKalunga a ‘dalwe komukainhu’? (b) Jesus okwa fyuulula shike kuina naxe omutekuli, nOludalo la udanekwa ola holoka naini?

15 Onghedi omo omaxunganeko oo a popiwa metetekelo a li taa ka wanifwa oya li oshiholekwa fiyo osheshi Oludalo la holoka. Ovagalati 4:4 otava ti: ‘Efimbo eshi la fika, Kalunga okwa tuma Omona waye a dalwe komukainhu.’ Momudo omuti-2 K.O.P., okakadona Okajuda kedina Maria oka li ka lombwelwa komweengeli taku ti: “Tala, ove to ningi omufimba ndee to dala okamati, ndee to ka [luku] edina lako Jesus. Ye ota ningi omunene, ndele Ye e nokwiifanwa Omona waou wOkombadambada. Kalunga Omwene ote mu pe olukalwa louhamba waxe David . . . Omhepo Iyapuki otai ku dile kombada, neenghono daau wOkombadambada otadi ku tuvikile, onghee hano omudalwa ou omuyapuki ota ka lukwa Omona waKalunga.” — Lukas 1:31, 32, 35.

16 Lwanima, Jehova okwa li a lundululila omwenyo wOmona waye womeulu moshidalelo shaMaria, opo a dalwe komukainhu. Omukainhu oo Maria ka li a wanenena. Ndele nande ongaho, Jesus ina fyuulula okuhawanenena kuMaria, molwaashi Jesus okwa li “Omona waKalunga.” Ndelenee ina yaJesus naxe omutekuli ova li va dja mepata laDavid, nokungaho, Jesus okwa li e na oufemba wopakudalwa nowopaveta wokufyuulula ouhamba waDavid. (Oilonga 13:22, 23) Eshi Jesus a ninginifwa mo 29 O.P., Jehova okwa li e mu vaeka nomhepo iyapuki ndele ta ti: “Ou Omona wange omuholike.” (Mateus 3:16, 17) Kungaho, Oludalo ola li la holoka. (Ovagalati 3:16) Efimbo ola li la fika opo ku hololwe ouyelele muhapu u na sha noshiholekwa shiyapuki. — 2 Timoteus 1:10.

17. Eityo laGenesis 3:15 ola ka yela mo ngahelipi?

17 Pefimbo loukalele waye, Jesus okwa li a holola kutya eyoka olo la popiwa muGenesis 3:15 ola li tali faneke Satana, ofimbo oludalo leyoka la li tali faneke ovashikuli vaSatana. (Mateus 23:33; Johannes  8:44) Lwanima, Ombibeli oya ka holola kutya Satana noludalo laye otava ka hanaunwa po ngahelipi fiyo alushe. (Ehololo 20:1-3, 10, 15) Ombibeli oya holola yo kutya omwalikadi oo a popiwa muGenesis 3:15 okwa li ta faneke ‘Jerusalem shopombada,’ ehangano laJehova loishitwa yopamhepo, olo li li omukulukadi waye wopafaneko. * — Ovagalati 4:26; Ehololo 12:1-6.

Ehangano lipe

18. “Ehangano lipe” ola totwa po nelalakano lashike?

18 Jesus okwa li a holola oshinima shihokwifa neenghono moufiku oo wa tetekela efyo laye. Pomhito oyo, Jesus okwa li a lombwela ovahongwa vaye ovadiinini kombinga ‘yehangano lipe.’ (Lukas 22:20) Ngaashi naanaa ehangano lOmhango yaMoses, ehangano lipe nalo ola li la nuninwa okweetifa po “ouhamba wovapristeri.” (Exodus 19:6; 1 Petrus 2:9) Ndelenee ehangano lipe kala li tali ka etifa po oshiwana shopambelela, ndele oshiwana shopamhepo, ‘Israel yaKalunga,’ osho sha fikama po movashikuli vaKristus ovadiinini ovo va vaekwa nomhepo. (Ovagalati 6:16) Ovakriste ovo va kwatelwa mehangano lipe otava ka kala pamwe naJesus notava ka etela ovanhu omanangeko noupuna.

19. (a) Omolwashike ehangano lipe la dula okweetifa po “ouhamba wovapristeri”? (b) Omolwashike Ovakriste ovavaekwa tava ifanwa “eshito lipe,” novanhu vangapi tava ka pangela pamwe naKristus meulu?

19 Omolwashike ehangano lipe la dula okweetifa po “ouhamba wovapristeri” oo tau ka nangeka noupuna ovanhu? Omolwaashi ponhele yokutokola ovahongwa vaKristus kutya ove li ovalunde, ehangano olo ole shi ninga tashi shiiva opo va kale tava diminwa po omatimba avo pakanghameno lekuliloyambo laye. (Jeremia 31:31-34) Ngeenge Ovakriste ovo ova yukipalifwa koshipala shaJehova, Jehova ohe va tale ko ve li oshitukulwa shoukwaneumbo waye womeulu nohe va vaeke nomhepo iyapuki. (Ovaroma 8:15-17; 2 Ovakorinto 1:21) Kungaho, ohe va ‘dalulula omolweteelelo olo e va tuvikilila meulu.’ (1 Petrus 1:3, 4) Molwaashi okukala pomufika oo wa tumbala  oshinima shipe kovanhu, Ovakriste ovo va vaekwa nomhepo ohava ifanwa “eshito lipe.” (2 Ovakorinto 5:17, NW) Ombibeli oya holola kutya hauxuninwa otapa ka kala ovanhu 144 000 ovo tava ka pangela pamwe naJesus meulu, tava ka pangela ovanhu ovakulilwa ovo tava ka kala kombada yedu. — Ehololo 5:9, 10; 14:1-4.

20. (a) Ombinga imwe ilipi i na sha noshiholekwa shiyapuki ya li ya hololwa mo 36 O.P.? (b) Oolyelye tava ka hafela omanangeko noupuna oo a li a udanekelwa Abraham?

20 Ngaashi Jesus, ovavaekwa navo ohava ningi “oludalo laAbraham.” * (Ovagalati 3:29) Ovo va ninga oilyo yotete yoludalo olo ova li va hoololwa moshiwana shOvajuda. Ndele mo 36 O.P., ombinga imwe yoshiholekwa shiyapuki oya li ya hololwa: Ovanhu vomoiwana imwe, ovo vehe fi Ovajuda, ova li yo tava dulu okukala neteelelo lokuya meulu. (Ovaroma 9:6-8; 11:25, 26; Ovaefeso 3:5, 6) Ndele mbela Ovakriste ovavaekwa ovo aveke va li tava ka hafela omanangeko noupuna oo a li a udanekelwa Abraham? Hasho, molwaashi ekuliloyambo laJesus ola nuninwa okweetela ouwa ounyuni aushe. (1 Johannes 2:2) Lwanima, Jehova okwa li a holola kutya otapa ka kala “ongudu inene,” oyo tai ka nyengana okuvalulwa, yovanhu ovo tava ka xupa eshi onghalelo ei yoinima tai ka xulifwa po. (Ehololo 7:9, 14) Natango, ope na ovanhu vahapuvahapu ovo tava ka nyumunwa notava ka pewa omhito yokukala nomwenyo fiyo alushe mOparadisa. — Lukas 23:43; Johannes 5:28, 29; Ehololo 20:11-15; 21:3, 4.

Ounongo waKalunga nosho yo oshiholekwa shiyapuki

21, 22. Oshiholekwa shiyapuki osha holola ngahelipi ounongo waJehova?

21 Oshiholekwa shiyapuki osha holola monghedi ikumwifi neenghono “ounongo uhapu waKalunga.” (Ovaefeso 3:8-10) Kau fi tuu ounongo munenenene oo Jehova a holola eshi a tota po oshiholekwa osho nokweenda te shi holola kanini nakanini! Okwa kala ta yavelele pandunge okudula kwovanhu okuuda ko oinima, noku va pa omhito va holole oikala yashili yomitima davo. — Epsalme 103:14.

 22 Jehova okwa ulika yo kutya oku na ounongo uhe fi okuyelekwa eshi a hoolola Jesus a ninge Ohamba. Omona waJehova oye oshishitwa oshilineekelwa kuhe na vali moishitwa yaye aishe. Eshi Jesus a li kombada yedu, okwa li a shakeneka omashongo e lili noku lili. Onghee hano, oku shii filufilu omaupyakadi oo haa hange ovanhu. (Ovaheberi 5:7-9) Ongahelipi shi na sha naavo tava ka pangela pamwe naye? Mokweendela ko kwomafelemido, opa kala tapa hoololwa ovalumenhu novakainhu ovo va dja moiwana aishe, momalaka nomomaputuko e lili noku lili, va ninge ovavaekwa. Ovanhu va tya ngaho ova kala tava shakeneke omaupyakadi e lili noku lili oo haa shakenekwa mokukalamwenyo nova pondola omaupyakadi oo. (Ovaefeso 4:22-24) Itashi ka kala tuu tashi tulumukifa okupangelwa keehamba novapristeri ovananghenda va tya ngaho!

23. Oufembanghenda ulipi Ovakriste ve na shi na sha noshiholekwa shaJehova shiyapuki?

23 Omuyapostoli Paulus okwa ti: “Oshiholekwa osho sha li sha holekwa omafimbo nomapupi . . . paife sha hololelwa ovayapuki vaye.” (Ovakolossi 1:26) Doshili, Jehova okwa kwafela ovayapuki vaye ovavaekwa opo va ude ko oinima ihapu i na sha noshiholekwa shiyapuki, nova kwafela yo ovanhu omamiliyona ve lihonge yo kombinga yoshiholekwa osho. Kashi fi tuu oufembanghenda eshi Jehova “e tu shiivifila oshiholekwa [shiyapuki, NW] shehalo laye”! (Ovaefeso 1:9) Onghee hano, natu hepaululileni vamwe oshiholekwa osho shikumwifi, opo tu va kwafele va konakone ounongo waJehova Kalunga uhe fi okuyelekwa.

^ okat. 17 “Oshiholekwa sheitavelo” osha ka hololwa kuJesus. (1 Timoteus 3:16, OB-1986) Okutya kutya ovanhu otava dulu okukanyatela oudiinini wavo kuJehova monghedi ya wanenena osha kala oshiholekwa. Ndele Jesus okwa kufa po eemhata di na sha naasho. Okwa li a kanyatela oudiinini waye nonande okwa li a yelekwa kuSatana nomayeleko mahapu. — Mateus 4:1-11; 27:26-50.

^ okat. 20 Jesus okwa li a ninga “ehangano . . . li na sha nouhamba” novavaekwa ovo tuu ovo. (Lukas 22:29, 30, NW) Kungaho, okwa ninga eudafanotwokumwe ‘nokangudu’ oko li na sha noku ka pangela pamwe naye meulu ve li oshitukulwa oshitivali sholudalo laAbraham. — Lukas 12:32.

Lihonga shihapu

Dulika kuKalunga u mone ouwa momaudaneko aye

Oshike hatu lihongo momaudaneko aKalunga, meano nosho yo omahangano oo a ninga?