Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ehena popepi naJehova

 ETUKULWA 22

Oho tula ngoo moilonga ‘ounongo oo hau di pombada’?

Oho tula ngoo moilonga ‘ounongo oo hau di pombada’?

1-3. (a) Salomo okwa li a ulika ngahelipi kutya okwa li e na ounongo mukumwifi monghedi omo a li a pongolola po omhata oyo ya li pokati kovakainhu vavali? (b) Jehova okwa udaneka okuyandja shike, nomapulo elipi a holoka po?

OMBIBELI oya popya kombinga yoshikoya shimwe osho sha li shidjuu okupotokonona. Osha li shi na sha novakainhu vavali ovo va li hava kala meumbo limwe. Ovakainhu ovo ova li va dala ounona oumati, ve lipitifila po ashike omafiku manini. Lwanima, okamonamati komukainhu umwe oka ka fya, nomukainhu oo a filwa okamonamati okwa li ta luvilile po okamonamati kamukwao oko ka li ke na omwenyo. * Omhata oyo otashi dulika ya li ya twalwa komhangu yopedu, ndele omhangu oyo inai dula okupongolola po oshinima osho. Osha li shidjuu okupongolola po eemhata pokati kovakainhu ovo, molwaashi kapa li pe na eembangi odo tadi dulu okuyandja ouyelele moshinima osho. Hauxuuninwa, oshinima osho osha li sha shiivifilwa ohamba yaIsrael, Salomo. Ndele mbela Salomo okwa li ngoo ta ka dula okumona kutya ina yokaana oko ke na omwenyo elipipo?

2 Salomo okwa kala ta pwilikine oule wokafimbo eshi ovakainhu ovo va li tava tu eemhata. Opo nee okwa tuma ku ka etwe eongamukonda opo okaana oko taka kondjelwa ka tetwe pokati, opo keshe omukainhu a mone ombinga imwe. Divadiva, omukainhu oo a li shili ina yokaana oko okwa pula ohamba opo kaha tetwe pokati. Okwa indila opo okaana kaye okaholike ka yandjwe po komukainhu mukwao. Ndelenee omukainhu oo ehe fi ina yako shili okwa li ta ti kutya naka tetwe ashike pokati. Opo nee Salomo okwa mona kutya ina yokaana elipipo, molwaashi okwa mona kutya ina  yako okwe ka udila olukeno olo hali kala li niwe komudalakadi. Eshiivo laSalomo li na sha nanghee ovadalakadi hava kala ve uditile ovana vavo ole mu kwafela a pongolole po omhata oyo. Ina yako ka li tuu a pepelelwa eshi Salomo a ti kutya: “Oye ina yako,” nokwe ka pewa! — 1 Eehamba 3:16-27.

3 Salomo ka li tuu a ulika kutya oku na ounongo mukumwifi! Eshi ovanhu va uda nhumbi Salomo a pongolola po omhata oyo, ova li va kumwa neenghono nova li “va mona nokutya, muye omu na [ounongo wopakalunga, NW].” Salomo okwa li a pewa oshali younongo kuKalunga. Ombibeli oya ti kutya okwa pewa “omutima u [na ounongo, NW] neendunge.” (1 Eehamba 3:12, 28) Ongahelipi nee shi na sha nafye? Mbela nafye ohatu dulu ngoo okukala tu na ounongo wopakalunga? Heeno, nomolwaasho Salomo okwa li a nwefwa mo a shange ta ti: “Omwene ta yandje ounongo.” (Omayeletumbulo 2:6) Jehova okwa udaneka okuyandja ounongo, oo u li oukwatya wokudula okutula moilonga eshiivo, eudeko neendunge dokuyoolola, kwaavo tave u kongo shili. Mbela ongahelipi hatu dulu okumona ounongo oo hau di pombada? Nongahelipi hatu dulu oku u tula moilonga mokukalamwenyo kwetu?

Ongahelipi hatu dulu ‘okulikongela ounongo’?

4-7. Oiteelelwa yopane ilipi tu na okuwanifa po ngeenge otwa hala okulikola ounongo?

Mbela otu na okukala tu na omaano okulihonga ile tu li ovahongwanhu opo tu dule okulikola ounongo wopakalunga? Hasho nandenande. Jehova ota dulu oku tu nongopaleka kashi na nee mbudi kutya otwa putukila momidingonoko da tya ngahelipi ile inatu mona ehongo lopombada. (1 Ovakorinto 1:26-29) Ndele nande ongaho, otu na okuninga eenghendabala donhumba, molwaashi Ombibeli otai tu ladipike tu ‘likongele ounongo.” (Omayeletumbulo 4:7) Mbela ongahelipi hatu dulu oku shi ninga?

5 Shotete, otwa pumbwa okukala tu na etilokalunga. Omayeletumbulo 9:10 otaa ti: “Efina lounongo olo okutila Omwene.” O-The New English Bible oya ti kutya etilokalunga olo “onghatu yotete yokumona ounongo.” Osha yela kutya opo omunhu a kale e na ounongo washili, okwa pumbwa okukala e na etilokalunga. Omolwashike taku tiwa ngaho? Dimbuluka kutya ounongo owa kwatela  mo okudula okutula moilonga eshiivo monghedi tai pondola. Etilokalunga olo oukwatya wokukala netilofimaneko nosho yo elineekelo muKalunga, ndele hakukala we mu tila ngaashi omunhu a tila oshilyani. Etilokalunga la tya ngaho ola yuka notali dulu oku tu linyengifa neenghono tu katuke eenghatu. Ohali tu linyengifa tu kale metwokumwe neshiivo letu li na sha nehalo laKalunga nosho yo eendjila daye. Kape na vali onghatu imwe i li pandunge i dule oyo, molwaashi omifikamhango daJehova ohadi tu etele alushe ouwa wa shiya ko ngeenge hatu di tula moilonga.

6 Oshitivali, otu na okukala ovalininipiki. Itatu dulu okukala tu na ounongo wopakalunga ngeenge katu fi ovalininipiki. (Omayeletumbulo 11:2) Omolwashike taku tiwa ngaho? Ngeenge otwe lininipika, itatu ka diladila kutya otu shii keshe shimwe, ile kutya omataleko etu alushe oku li mondjila. Ohatu ka dimina kutya otwa pumbwa ewiliko laJehova. Jehova “oku tonde ovalinenepeki,” ndele, oha nongopaleke ovo ve lininipika momitima. — Jakob 4:6.

Opo tu likole ounongo wopakalunga, otwa pumbwa okuninga eenghendabala doku u konga

7 Oshititatu, otwa pumbwa okukonakona Eendjovo daKalunga. Ounongo waJehova owa hololwa mEendjovo daye. Opo tu likole ounongo wa tya ngaho, otwa pumbwa okuninga eenghendabala da mana mo tu u konge. (Omayeletumbulo 2:1-5) Oshitine, otwa pumbwa okukala hatu ilikana. Ngeenge otwa kala hatu indile kuKalunga ounongo twa mana mo, ote ke u tu pa nehalo liwa. (Jakob 1:5) Ote ke tu pa yo omhepo yaye ngeenge hatu i mu indile. Omhepo yaye otai dulu oku tu kwafela tu mone omamona oo taa hangwa mEendjovo daye, oo taa dulu oku tu kwafela tu ungaunge nomupondo nomaupyakadi, tu henuke oiponga notu kale hatu ningi omatokolo opandunge. — Lukas 11:13.

8. Ngeenge otu na shili ounongo wopakalunga, otashi ke limonikila mo ngahelipi?

8 Ngaashi twe shi mona metukulwa 17, ounongo waJehova ohau longo. Onghee hano, ngeenge otu na shili ounongo wopakalunga, otashi ke limonikila melihumbato letu. Omuhongwa Jakob okwa tumbula oiimati younongo wopakalunga eshi a ti: “Ounongo ou hau di [pombada, tete owa] yela nopo nee u nombili nou [na ondjele, owe lilongekida okudulika, NW] nou yadi onghenda noiimati iwa; kau [na onhondo, NW] ile oihelele.” (Jakob 3:17) Eshi hatu ende nokundjadjukununa mo oiimati oyo younongo  wopakalunga, oto dulu okulipula kutya: ‘Ohandi tula ngoo moilonga ounongo oo hau di pombada mokukalamwenyo kwange?’

Ounongo oo hau di pombada ‘owa yela nou na ombili’

9. Okukala wa yela osha hala okutya ngahelipi, nomolwashike sha yeleka eshi oukwatya oo wa tumbulwa tete momusholondodo woiimati younongo?

9 ‘Tete owa yela.’ Okukala wa yela otashi ti okukala wa koshoka filufilu nouhe na nande edilo lasha kolutu ile momutima. Ombibeli otai ulika kutya omutima ohau dana onghandangala mokulikola ounongo. Ngeenge omunhu oku na omutima wa nyata omolwomadiladilo, omahalo ile omalinyengotomheno mai, ita dulu okukala e na ounongo wopakalunga. (Omayeletumbulo 2:10; Mateus 15:19, 20) Ndele ngeenge omitima detu oda yela, shi fike opo ovanhu inava wanenena tava dulu okukala va yela, ohatu ka ‘kala kokule nowii nohatu ka longa ouwa.’ (Epsalme 37:27; Omayeletumbulo 3:7) Inashi yeleka tuu eshi oukwatya wokukala twa yela wa tumbulwa tete momusholondodo woiimati younongo! Osha yeleka filufilu. Ngeenge inatu koshoka paenghedi nosho yo pamhepo, ohatu ka dula ngahelipi okwiimika oiimati ikwao younongo oo hau di pombada?

10, 11. (a) Omolwashike sha fimana okukala ovanambili? (b) Ngeenge owa didilike kutya ope na okuhaudafana pokati koye nomwiitaveli mukweni, ongahelipi to ka ulika kutya ou li omunambili? (Tala yo eshangelo lopedu.)

10 ‘Ou na ombili.’ Ounongo oo ohau tu linyengifa tu lalakanene ombili, oyo i li shimwe shomoiimati yomhepo yaKalunga. (Ovagalati 5:22) Ohatu kendabala okuhenuka oinima oyo tai dulu okunyona po ‘ombili,’ molwaashi ombili ohai hanganifa oshiwana shaJehova. (Ovaefeso 4:3) Ohatu ningi yo eenghendabala dokupaafana ombili navamwe ngeenge pa holoka oupyakadi washa pokati ketu navo. Omolwashike sha fimana okuninga ngaho? Ombibeli otai ti: “Diinineni ombili, opo Kalunga kohole nokombili ota kala pamwe nanye.” (2 Ovakorinto 13:11) Ngeenge otwa twikile okukala ovanambili, Kalunga kombili ota ka kala yo pamwe nafye. Onghedi omo hatu ungaunga novaitaveli vakwetu ohai kumu ekwatafano letu naJehova. Ndele mbela ongahelipi hatu dulu okuulika kutya otu li ovanambili? Natu ka taleni koshihopaenenwa tashi landula.

 11 Oto ke linyenga ngahelipi ngeenge owa didilike kutya pokati koye nOmukriste mukweni ope na sha? Jesus okwa ti: “Ngenge to twala oshali shoye koaltari, ndele oko wa dimbulukila omumwanyoko nokutya, e na sha naave, fiya ko oshali shoye koaltari, u ye manga mu ka pafane ombili nomumwanyoko, ove u aluke u ka yandje oshali shoye.” (Mateus 5:23, 24) Oto dulu okutula moilonga omayele oo mokukatuka onghatu moku ka popya nOmukriste mukweni oo e ku nine. Ndele mbela oto ke shi ninga nelalakano lashike? Ou na oku shi ninga nelalakano ‘loku ka paafana ombili.’ * Opo mu paafane ombili naye, owa pumbwa okudimina kutya owa yahameka omaliudo aye. Ngeenge owa i komumwaxo nelalakano moku ka paafana ombili, otamu ka kandula po okuhaudafana oko kwa holoka po, otamu ka paafana ombili noupu  nokudiminafana po. Eenghatu da tya ngaho otadi ulika kutya oto wilikwa kounongo wopakalunga.

‘Ou na ondjele, nowe lilongekida okudulika’

12, 13. (a) Oshitya osho sha tolokwa “ondjele” muJakob 3:17 (NW) otashi ti shike? (b) Ongahelipi hatu dulu okuulika kutya otu na ondjele?

12 ‘Ou na ondjele.’ Okukala u na ondjele osha hala okutya ngahelipi? Ovahongwanhu vOmbibeli ova ti kutya oshitya shOshigreka osho sha tolokwa “ondjele” muJakob 3:17 (NW) oshidjuu okutoloka. Omatoloko amwe Eembibeli okwa longifa oitya ngaashi “engungumano,” “outalonheni,” nosho yo “olukeno.” Eshangelo lopedu mo-New World Translation otali ti kutya oshitya osho otashi ti lelalela “okutifuka.” Ndele ongahelipi hatu dulu okuulika oshiimati osho shounongo mokukalamwenyo kwetu?

13 Ovafilippi 4:5 otava ti: “[Ondjele yeni nai, NW] shiivike kovanhu aveshe. Etoloko limwe ola ti: “Nashi kale shi liwetikile mo kutya omu na ondjele.” (The New Testament in Modern English, ku J. B. Phillips) Osho tu na okudimbuluka oshosho kutya kashi na nee mbudi kutya ohatu litale ko ngahelipi fye vene, otu na okulipula kutya vamwe ohave tu tale ko ngahelipi. Omunhu oo e na ondjele iha komangele ashike kutya keshe shimwe nashi ningwe paufomhango ile a kondjifile vamwe va ninge oinima monghedi omo ye a hala. Ponhele yaasho, oha pwilikine komaetepo avamwe, nopomhito opo sha pumbiwa, oha tifuka nokweefa vamwe va ninge omahoololo avo. Iha ungaunga navamwe nonyanya, ndele oha kala a ngungumana. Ovakriste aveshe ova pumbwa okukala ve na ondjele, ndele unene tuu ovakulunhuongalo. Engungumano ohali ningi ovakulunhuongalo va kale tava dulu okupopiwa navo noupu. (1 Ovatessaloniki 2:7, 8) Ndele atusheni otwa pumbwa okulipula kutya, ‘Onda shiivikila ngoo oikala yokuyavelela, okutifuka nosho yo engungumano?’

14. Ongahelipi hatu dulu okuulika kutya otwe “lilongekida okudulika”?

14 “Owe lilongekida okudulika.” Oshitya shOshigreka osho sha tolokwa “lilongekida okudulika” osha longifwa ashike lumwe mOmishangwa dopaKriste dOshigreka. Omuhongwanhu umwe wOmbibeli okwa ti kutya oshitya osho “ohashi longifwa luhapu okuulika keduliko lopaukwaita.” Otashi yandje ediladilo “lokutomwa noupu u itavele” nosho yo “okuliyandja.” Omunhu oo ha  wilikwa kounongo oo hau di pombada oha tambula ko noupu osho Omishangwa tadi ti. Iha kala e na oikala yokulineekela eendunge daye mwene nokwaanya oinima oyo itai tu kumwe naasho a itavela. Ponhele yaasho, oha endelele okutambula ko oumbangi wopamishangwa wa yele oo tau ulike kutya okwa katuka papuko ile okwa fika pexulifodiladilo la puka. Mbela ovanhu ove ku shiivile ngoo oukwatya oo?

‘Ou yadi onghenda noiimati iwa’

15. Onghenda oshike, nomolwashike sha yeleka eshi “onghenda” ya tumbulwa pamwe “noiimati iwa” muJakob 3:17?

15 ‘Ou yadi onghenda noiimati iwa.’  * Onghenda oi li oshitukulwa sha fimana shounongo oo hau di pombada, nomolwaasho taku tiwa ‘ou yadi onghenda.’ Didilika kutya “onghenda” oya tumbulwa pamwe “noiimati iwa.” Osho osha yeleka molwaashi paMbibeli oshitya onghenda luhapu ohashi ulike kokukala u na ko nasha navamwe, ile kolukeno olo hali linyengifa omunhu a longe oilonga ihapu yolune. Embo limwe lomauyelele ola ti onghenda oyo “okuudila umwe olukeno omolwonghalo ii oyo e li muyo nokukendabala okuninga po sha.” Onghee hano, ounongo wopakalunga inau kwatela mo ashike omadiladilo, ndele owa kwatela mo yo ohamu, omaliudo omoule nosho yo oikala yokuyavelela. Ongahelipi hatu dulu okuulika kutya otu yadi onghenda?

16, 17. (a) Kakele kohole yokuhola Kalunga, oshike vali hashi tu linyengifa tu kale hatu udifile vamwe, nomolwashike hashi tu linyengifa? (b) Ongahelipi hatu dulu okuulika kutya otu yadi onghenda?

16 Onghedi ya fimana omo hatu dulu okuulika kutya otu yadi onghenda oyo okuudifila vamwe onghundana iwa yOuhamba waKalunga. Oshike hashi tu linyengifa tu kufe ombinga moilonga oyo? Elinyengotomheno la fimanenena olo ohole yetu yokuhola Kalunga. Ndele ohatu linyengifwa yo konghenda nolukeno. (Mateus 22:37-39) Ovanhu vahapu kunena ova “hepekwa, [nova] loloka va fa eedi di he na omufita.” (Mateus 9:36) Ova ekelwashi nova pukifwa kovafita vomalongelokalunga oipupulu. Onghee hano, kave na ewiliko lopandunge olo tali hangwa mEendjovo daKalunga nokave shii omanangeko noupuna oo taa ka etwa mafiku kOuhamba  kombada yedu. Ngeenge hatu diladila komhumbwe yopamhepo yovanhu ovo ve tu dingilila, olukeno ohali tu linyengifa tu ninge ngaashi hatu dulu opo tu va shiivifile kombinga yelalakano laJehova lopahole.

Ngeenge hatu file vamwe onghenda noku va kenukila, ohatu ulike kutya otu na ‘ounongo oo hau di pombada’

17 Omeenghedi dimwe vali dilipi hatu dulu okuulika kutya otu yadi onghenda? Dimbuluka eyele laJesus li na sha nOmusamaria oo a li a hanga omulumenhu wonhumba oo a li a dengwa nokunyekwa oinima yaye kovanyeki. Molwaashi Omusamaria oo okwa li a etela omulumenhu oo “onghenda,” okwa manga oipute yaye noku mu fila oshisho. (Lukas 10:29-37) Mbela osho itashi ulike kutya onghenda oya kwatela mo okukwafela ovanhu ovo ve li momhumbwe? Ombibeli otai tu ladipike “tu ningileni aveshe ouwa, ndelenee unene tuu ovo oovakwetu vomeitavelo.” (Ovagalati 6:10) Tala koihopaenenwa imwe i na sha nouwa oo hatu dulu okulongela vamwe. Ohatu dulu okuninga elongekido lokukala hatu twaalele omwiitaveli mukwetu omunamido kokwoongala kwopaKriste. Ohatu dulu okukwafela omufiyekadi oo eumbo laye la pumbwa okuwapekwa. (Jakob 1:27) Ohatu dulu okuladipika omunhu oo a teka omukumo ‘neendjovo dehekeleko.’ (Omayeletumbulo 12:25) Ngeenge hatu ulike onghenda meenghedi da tya ngaho, ohatu ulike kutya ohatu tula moilonga ounongo oo hau di pombada.

“Kau na onhondo ile oihelele”

18. Ngeenge ohatu wilikwa kounongo oo hau di pombada, oikala ilipi tu na okukondjifa, nomolwashike tu na oku i kondjifa?

18 “Kau na onhondo.” Ounongo wopakalunga ohau tu kwafele tuha kale tu na okatongo ile oukwamuhoko. Ngeenge ohatu wilikwa kounongo wopakalunga, ohatu ka kondjifa oikala yolwaamambinga. (Jakob 2:9) Itatu ka kala hatu ningile vamwe ouwa hatu ve likumbu omolwouhongelwe wavo, oupuna wavo ile omolwoinakuwanifwa oyo ve na meongalo. Navali, itatu ka dina ovaitaveli vakwetu molwaashi tava monika va fa ve li pedu kufye. Ngeenge Jehova oku hole ovanhu va tya ngaho, mbela nafye katu na okukala tu va hole?

19, 20. (a) Oshitya shOshigreka osho sha tolokwa “oihelele” oshi na edimba la tya ngahelipi? (b) Ongahelipi hatu dulu okuulika kutya otu ‘hole ovamwatate nohole ihe noihelele,’ nomolwashike sha fimana?

19 ‘Kau na oihelele.’ Oshitya shOshigreka osho sha tolokwa “oihelele”  ohashi dulu okulongifwa okuulika “komunhu oo ta dana onghandangala moshinyandwa.” MuGreka nomuRoma shonale, ovadani voinyandwa ova li hava djala oiuvikilifo inene koipala ngeenge tava dana oinyandwa. Onghee hano, oshitya shOshigreka osho sha tolokwa “oihelele” osha kala hashi longifwa okuulika komunhu oo te liningifa ile ta kengelele. Oshiimati shounongo wopakalunga shokukala tuhe na oihelele oshi na okunwefa mo onghedi omo hatu ungaunga novaitaveli vakwetu nosho yo nghee hatu kala tu va uditile.

20 Omuyapostoli Petrus okwa ti kutya okukala hatu ‘dulika koshili’ oku na oku tu linyengifa tu kale tu ‘hole ovamwatate nohole ihe noihelele.’ (1 Petrus 1:22) Katu na okukala hatu liningifa twa fa tu hole ovamwatate, ndele mboli ohatu fufya ashike vamwe. Ohole yetu oi na okukala yashili, tai di komutima. Ngeenge otwa kala tu na ohole yashili, ovaitaveli vakwetu otava ka kala ve tu lineekela, molwaashi ove shii kutya itatu liningifa twa fa tu va hole. Osho otashi ka xumifa komesho omhepo yelineekelafano pokati  ketu nOvakriste vakwetu nohatu ka kala twa mangulukilafana meongalo.

“Diinina ounongo tau longo”

21, 22. (a) Oshike sha li sha ningifa Salomo a kanife ounongo oo a li e na? (b) Ongahelipi hatu dulu okudiinina ounongo, nouwa ulipi hatu ka mona ngeenge otwe u diinine?

21 Ounongo wopakalunga oshali ya dja kuJehova. Onghee hano, otu na oku u ndalapatela. Salomo okwa ti: “Omumwange, . . . diinina [ounongo tau longo, NW] neendunge.” (Omayeletumbulo 3:21) Mupya munene, Salomo ka li a ndalapatela oshali oyo. Okwa li a ashike omunongo eshi a li ha dulika kuJehova. Hauxuuninwa, ovakulukadi vaye vahapu vovanailongo ove mu hongaula a fiye po elongelokalunga la koshoka. (1 Eehamba 11:1-8) Oshimoniwa shaSalomo otashi ulike kutya itashi kwafa sha okukala tu na eshiivo, ngeenge itatu li longifa pandunge.

22 Ongahelipi hatu dulu okudiinina ounongo tau longo? Inashi wana ashike okukala hatu lesha pandjikilile Ombibeli noishangomwa ya kanghamena kOmbibeli, oyo hatu pewa ‘komupiya omudiinini nomunaendunge,’ ndele otu na okukendabala okukala hatu tula moilonga osho hatu lihongo. (Mateus 24:45) Osha fimana filufilu okutula moilonga ounongo wopaKalunga. Otau tu kwafele tu kale nonghalamwenyo ixwepo paife, notu ka “mone omwenyo waalushe” mounyuni mupe waKalunga. (1 Timoteus 6:19) Komesho yaaishe, okukala tu na ounongo oo hau di pombada otaku tu ehenifa popepi nodjo younongo aushe, Jehova Kalunga.

^ okat. 1 Me 1 Eehamba 3:16, ovakainhu ovo vavali otaku tiwa kutya ova li eembwada. O-Insight on the Scriptures oya ti: “Ovakainhu ovo ova li eembwada, tashi dulika meityo olo kutya ova li moluhaelo, ndele hakutya ngeno ova li hava landifa po omalutu avo. Otashi dulika va li Ovajuda ile va li vomoiwana imwe i lili.” — Embo olo ola nyanyangidwa kEendombwedi daJehova.

^ okat. 11 Outumbulilo wOshigreka oo wa tolokwa ‘okupaafana ombili’ owa dja koshityalonga osho tashi ti “ ‘okweetifa po elunduluko, okupingakanifa,’ naasho osha hala okutya ‘okuhanganifa.’ ” Ngeenge to i mu ka paafane ombili, elalakano loye olo okweetifa po elunduluko, nokumbilipaleka omutima womunhu oo wa nyemateka. — Ovaroma 12:18.

^ okat. 15 Etoloko limwe ola ti ounongo oo ou “yadi olukeno noilonga iwa.” — A Translation in the Language of the People, kuCharles B. Williams.

Lihonga shihapu

Mona ouwa pauyadi mokulesha Ombibeli

Ombibeli otai ke ku etela ashike ouwa ngeenge owe i konakona nokutula moilonga osho tai hongo. Lihonga nghee to dulu okukala ho lesha Ombibeli monghedi tai pondola.

Longifa Eendjovo daKalunga u likwafe nokukwafela vamwe

Ombibeli owe i tala ko ngoo i li oshinima shi na ondilo? Ngeenge owa konakona 2 Timoteus 3:16 otashi ke ku kwafela u pameke eitavelo loye moshali oyo twa pewa kuJehova.