Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ehena popepi naJehova

 ETUKULWA 30

‘Kaleni nokweenda mohole’

‘Kaleni nokweenda mohole’

1-3. Ohatu ka mona oidjemo ilipi ngeenge otwa hopaenene oshihopaenenwa shaJehova shokuulika ohole?

“OKUYANDJA oku nelao komesho yokutambula.” (Oilonga 20:35) Eendjovo daJesus odo oda divilika nawa oshili ya fimana oyo kutya: Ohole yokuheliholamwene ohai etifa oidjemo iwa. Nonande ohashi kala shihafifa okuyakulwa kuvamwe omolwohole, ohashi kala shihafifa neenghono okuyakula vamwe, to shi ningi pahole.

2 Kape na oo e shii oushili oo e dule Tate yetu womeulu. Ngaashi twa mona momatukulwa a tetekela oo e li moshitukulwa eshi, Jehova okwa tula po oshihopaenenwa sha denga mbada shokukala omunahole. Kape na omunhu a ulika ohole meenghedi da tongomana ile oule wefimbo lile ngaashi Jehova. Onghee hano, itashi kumwifa eshi Jehova ta ifanwa ‘Kalunga omunelao.’ — 1 Timoteus 1:11, OB-1954.

3 Tate yetu omunahole okwa hala tu kendabale oku mu hopaenena, unene tuu ngeenge tashi uya pokuulika ohole. Ovaefeso 5:1, 2 ova ti: “Ningeni . . . [ovahopaeleli] vaKalunga ngaashi ovana ovaholike, nye mu kale nokweenda mohole.” Ngeenge otwa hopaenene onghedi omo Jehova ha ulike ohole, ohatu ka mona ehafo linene olo hali di mokuyandja. Ohatu ka kala yo twa mbilipalelwa eshi tu shii kutya ohatu hafifa Jehova, molwaashi Eendjovo daye ode tu ladipika tu kale tu ‘holafane.’ (Ovaroma 13:8) Ndele ope na natango omatomheno amwe kutya omolwashike tu “nokweenda mohole.”

Osha fimana okukala tu hole vamwe

4, 5. Omolwashike sha fimana okuulikila ovaitaveli vakwetu ohole yeliyambo?

4 Omolwashike sha fimana okukala tu hole ovaitaveli vakwetu? Oku shi popya paunafangwa, ohole oukwatya wa fimanenena melongelokalunga lashili. Ngeenge katu na ohole, itatu dulu okukala tu na ekwatafano lopofingo nOvakriste vakwetu, nokomesho yaaishe ngeenge katu na ohole, katu fi sha momesho aJehova.  Natu ka taleni nghee Eendjovo daKalunga da divilika oushili oo.

5 Jesus okwa li a lombwela ovashikuli vaye moufiku waxuuninwa wokukalamwenyo kwaye kwokombada yedu a ti: “Oshipango shipe handi shi mu pe: mu holafane ngaashi Ame nda kala ndi mu hole, osho nanye yo mu holafane. Opo tuu opo aveshe tave mu koneke kutya, nye ovalongwa vange, ngenge mu holafane.” (Johannes 13:34, 35) Outumbulilo “ngaashi Ame nda kala ndi mu hole” otau ulike kutya otu na okuulika ohole ya fa yaJesus. Metukulwa 29, otwa mona kutya Jesus okwe tu tulila po oshihopaenenwa sha denga mbada shohole yeliyambo oyo ya li ye mu ningifa a pitife komesho eemhumbwe davamwe nosho yo ouwa wavo. Nafye ohatu dulu okuulika ohole yokuheliholamwene, hatu shi ninga monghedi oyo tai dulu okulimonikila nokuli nokovanhu ovo vehe fi Ovakriste vashili. Ohole yokuliyambela ovamwatate oyo tai tu didilikifa kutya otu li ovashikuli vashili vaKristus.

6, 7. (a) Otu shi shii ngahelipi kutya Eendjovo daJehova oda divilika efimano lokuulika ohole? (b) Eendjovo daPaulus odo tadi hangwa mo 1 Ovakorinto 13:4-8 oda popya shi na sha nohole ilipi?

Ongahelipi ngeenge katu na ohole? Omuyapostoli Paulus okwa ti kutya ngeenge “nghi nohole, onda ninga oshivela shitwima tashi lili, nongaashi ongedjo tai kwelengedja.” (1 Ovakorinto 13:1) Ongedjo ohai kwelengedja mokule nai. Ongahelipi shi na sha neweelelo loshivela shitwima? Omatoloko amwe okwa toloka outumbulilo oo taa ti “eweelelo lokangedjo.” Oo kae fi tuu omafaneko taa wapalele! Omunhu oo ehe na ohole okwa fa oshishikomwa shonhumba osho hashi ningi eweelelo lihapu unene ndele tashi kenyananeke ovanhu ponhele yoku va hafifa. Ongahelipi omunhu a tya ngaho ta dulu okuhafela ekwatafano lopofingo navamwe? Paulus okwa ti yo: “Nande ondi kale ndi neitavelo alishe lokudikula eemhunda, ndelenee ame nghi nohole, ame nghi fi sha.” (1 Ovakorinto 13:2) Diladila ashike kwaasho kutya omunhu ngeenge ke na ohole ‘ke fi sha’ kashi na nee mbudi kutya okwa longa oilonga ya tya ngahelipi. Osho mbela itashi ulike kutya Eendjovo daJehova oda divilika efimano lokuulika ohole?

7 Ndele ongahelipi hatu dulu okuulika oukwatya oo eshi hatu  ungaunga navamwe? Opo tu nyamukule epulo olo, natu ka konakoneni eendjovo daPaulus odo tadi hangwa mo 1 Ovakorinto 13:4-8. Eevelishe edi itadi divilike ohole oyo Kalunga e tu hole nayo ile ohole yetu yokuhola Kalunga. Ponhele yaasho, Paulus okwa li a divilika nghee hatu dulu okukala tu holafane. Okwa popya oinima oyo omunhu oo e na ohole e na okuninga nosho yo oyo ehe na okuninga.

Ohole oshike?

8. Outalanheni ohau tu kwafele ngahelipi eshi hatu ungaunga navamwe?

8 “Ohole i noutalanheni.” Okukala noutalanheni otashi ti okulididimikila vamwe. (Ovakolossi 3:13) Mbela inatu pumbwa elididimiko la tya ngaho? Molwaashi inatu wanenena nohatu longo pamwe, otwa teelela efimbo nefimbo Ovakriste vakwetu ve tu udife nai, ndele nafye otashi dulika tu va udife nai. Ndele elididimiko nosho yo onheni otai ke tu kwafela tu ungaunge nawa naavo ve tu udifa nai nopehe na okunyona po ombili yeongalo.

9. Omeenghedi dilipi hatu dulu okuulikila vamwe olukeno?

 9 “Ohole i nolukeno.” Olukeno ohali ulikwa mokukwafela vamwe nosho yo mokupopya to yavelele. Ohole ohai tu linyengifa tu konge eemhito dokuulikila ovanhu vakwetu olukeno, unene tuu ovo ve na omhumbwe. Pashihopaenenwa, omwiitaveli mukwetu omunamido otashi dulika e na owike nokwa pumbwa okutalelwa po opo a tuwe omukumo. Omumwameme oo ta tekula ounona oye aeke ile oo e li moukwaneumbo wa tukauka palongelokalunga otashi dulika a pumbwa ekwafo lonhumba. Omunhu oo ta yahama ile a taalela eenghalo donhumba didjuu otashi dulika a pumbwa okuuda eendjovo dolukeno okudja kukaume omudiinini. (Omayeletumbulo 12:25; 17:17) Ngeenge otwa ningi eenghendabala opo tu ulike olukeno meenghedi odo, ohatu ulike kutya otu na ohole yashili. — 2 Ovakorinto 8:8.

10. Ohole ohai tu kwafele ngahelipi tu kale twa lenga oshili noku i popya, nokuli nongeenge kashipu oku shi ninga?

10 ‘Ohole ohai nyakukilwa pamwe noshili.’ Omatoloko amwe okwa ti: ‘Ohole ohai popile nehafo oshili.’ Ohole ohai tu linyengifa tu kale twa lenga oshili notu kale hatu i ‘popi.’ (Sakaria 8:16) Pashihopaenenwa, ngeenge omupambele wetu ile kaume ketu okwa nyona enyono la kwata moiti, ohole yokuhola Kalunga nosho yo ohole yokuhola omunyoni otai ke tu kwafela tu diinine omifikamhango daKalunga ponhele yokuholeka enyono laye, oku mu popila ile okupopya oipupulu kombinga yaasho a ninga. Oshoshili kutya otashi ka kala shidjuu okutambula ko onghalo ya tya ngaho. Ndele ngeenge otu na ko nasha nouwa womupambele wetu ile wakaume ketu, ohatu ka kala twa hala a tambule ko outekuduliko waKalunga wopahole. (Omayeletumbulo 3:11, 12) Tu li Ovakriste ovanahole, otwa hala ‘okukala ovanashili moinima aishe.’ — Ovaheberi 13:18NW.

11. Molwaashi ohole “ohai tuvike aishe,” otu na okukendabala okuninga shike shi na sha nomapuko ovaitaveli vakwetu?

11 ‘Ohole ohai tuvike aishe.’ 1 Petrus 4:8 okwa ti: “Ohole ohai fufile onduba yomatimba.” Omukriste oo e na ohole ita ka nyaneka pomutenya okuhawanenena nosho yo omapuko aeshe Ovakriste vakwao. Peemhito dihapu, ovaitaveli vakwetu ohava ningi omapuko oo inaa kwata moiti notaa dulu okutuvikwa kohole. — Omayeletumbulo 10:12; 17:9.

Ohole ohai tu linyengifa tu kale twe lineekela ovamwatate

12. Omuyapostoli Paulus okwa li a ulika ngahelipi kutya okwe lineekela kutya Filemon ota ka ninga osho sha yuka, noshike hatu lihongo moshihopaenenwa shaPaulus?

 12 ‘Ohole ohai itavele aishe.’ Etoloko laMoffatt ola ti ohole “alushe oya halelela okwiitavela osho shiwa.” Katu na okukala twa limbililwa alushe omalinyengotomheno aeshe ovamwatate. Ohole ohai tu kwafele tu ‘itavele osho shiwa’ shi na sha novamwatate nokukala twe ve lineekela. * Tala koshihopaenenwa osho tashi hangwa monhumwafo oyo Paulus a li a shangela Filemon. Paulus okwa li a shanga onhumwafo oyo opo a twe omukumo Filemon a tambule ko omupiya waye Onesimus oo a li a ya onhapo, ndele lwanima okwa ninga Omukriste. Paulus ka li a fininika Filemon, ndele ponhele yasho, okwa li e mu pula pahole. Okwa li e lineekela kutya Filemon ota ka ninga osho sha yuka eshi a ti: “Ohandi ku shangele nokulineekela eduliko loye, ndi shi shii nokutya, ove to ka longa shi dule eshi nde shi tonga.” (Ovelishe 21) Ngeenge ohole oye tu linyengifa tu ulike kutya otwe lineekela ovamwatate, ohatu ke va kwafela va holole omaukwatya avo mawa.

13. Ohatu ulike ngahelipi kutya otwa teelela oinima i endele nawa ovamwatate?

13 ‘Ohole ohai teelele aishe.’ Ohole ihai tu linyengifa ashike tu kale twe lineekelafana, ndele ohai teelele yo. Omolwohole, ohatu kala twa teelela kutya oinima otai ka endela nawa ovamwatate. Pashihopaenenwa, ngeenge omumwatate okwa “nyona” ine shi nongela, otu na eteelelo kutya ota ka tambula ko omayele opahole aavo tave mu pukulula. (Ovagalati 6:1) Ohatu kala yo tu na eteelelo kutya ovo va nghundipala pamhepo onava ka kale vali ve na oupamhepo muwa. Ohatu teelele nelididimiko ovanhu va tya ngaho va xwepopale, hatu ningi keshe osho hatu dulu opo tu va kwafele va kale ve na eitavelo la kola. (Ovaroma 15:1; 1 Ovatessaloniki 5:14) Nonande omupambele wetu ile kaume ketu okwa yapuka mo moshili, otu na okukala twa teelela nelineekelo kutya ote ke livela ombedi fiku limwe ndele ta alukile kuJehova, ngaashi omumati a kanene womeyele laJesus. — Lukas 15:17, 18.

14. Omeenghedi dilipi tashi dulika elididimiko letu tali dulu okuyelekwa meongalo, nongahelipi ohole tai ke tu kwafela tu ungaunge neyeleko olo?

 14 ‘Ohole ohai lididimikile aishe.’ Elididimiko ohali tu kwafele tu kale twa pama, unene tuu ngeenge twa udifwa nai kuvamwe ile ngeenge tu li momaudjuu. Elididimiko letu ihali yelekwa ashike kwaavo vehe fi Ovakriste, ndele omafimbo amwe, omayeleko otashi dulika e tu dilile meongalo. Molwaashi inatu wanenena, omafimbo amwe ovamwatate otashi dulika ve tu ninge nai. Otashi dulika va popye eendjovo inadi diladilwa nawa odo tadi tu yahameke. (Omayeletumbulo 12:18) Otashi dulika oshinima shonhumba meongalo inashi ungaungwa nasho monghedi omo twa diladila ngeno omo shi na okuungaungwa nasho. Omumwatate oo e shii okulineekelwa otashi dulika e lihumbate monghedi ihafele notai tu ningifa tu lipule kutya, ‘Omolwashike Omukriste e na okulihumbata monghedi ya tya ngaha?’ Ngeenge otwa shakeneke eenghalo da tya ngaho, mbela ohatu ka efa po okwoongala nokulongela Jehova? Ngeenge otu na ohole, itatu ke shi ninga nande. Ohole otai ke tu kwafela tuha yandje elitulemo komapuko ovamwatate oo ta dulu oku tu imba tu yandje elitulemo komaukwatya avo mawa ile eongalo alishe. Ohole otai ke tu kwafela tu kale ovadiinini kuKalunga nokuyambidida eongalo kashi na nee mbudi kutya vamwe otava ti shike ile otava katuka ngahelipi omolwokuhawanenena kwavo. — Epsalme 119:165.

Ohole kai fi shike?

15. Efupa oshike, nongahelipi ohole tai tu kwafele tu henuke oukwatya oo hau yahameke ovanhu pamaliudo?

15 “Ohole ihai fi efupa.” Efupa ohali tu ningifa tu kale twa twila ondubo oinima yavamwe, ngaashi oiniwe yavo, omaufembanghenda avo nosho yo okudula kwavo. Efupa la tya ngaho, olo tali ulike oikala yokuliholamwene, ngeenge ola kala inali pangelwa, otali ka nyona po ombili yeongalo. Oshike tashi ke tu kwafela tu henuke eamo ‘lokutwila olwisho’ oinima yavamwe? (Jakob 4:5) Oku shi popya pauxupi: Ohole. Oukwatya oo u na ondilo otau ke tu kwafela tu hafe pamwe naavo ve na omauwa onhumba oo tuhe na. (Ovaroma 12:15) Ohole otai tu kwafele tuha ude nai ngeenge umwe ta pandulwa omolwokudula kwaye kwonhumba ile molwaashi a pondola moshinima shonhumba.

16. Ngeenge otu hole shili ovamwatate, omolwashike twa pumbwa okuhenuka okulitadela osho twa pondola moilonga yaJehova?

 16 ‘Ohole ihai litange, ihai fulalala.’ Ohole ohai tu kwafele opo tu henuke okuninga omalitalifa omolwounghulungu wetu ile osho twa pondola. Ngeenge otu hole shili ovamwatate, mbela ohatu ka kala ngoo alushe hatu litade omolwokupondola kwetu moukalele ile omolwomaufembanghenda oo tu na meongalo? Okulitada kwa tya ngaho otaku dulu okuteya vamwe omukumo, taku va ningifa va kale ve udite kutya vo kave fi sha. Ohole ohai tu kwafele opo tuhe litadele omaufembanghenda oo Kalunga e tu pa. (1 Ovakorinto 3:5-9) Kakele kaasho, ohole “ihai fulalala,” ile ihai “hafele oikala younhwa yokulitumbalekifa,” ngaashi etoloko limwe la ti. Ohole ohai tu kwafele tuha kale tu lishii oungame. — Ovaroma 12:3.

17. Ohole ohai tu linyengifa tu yavelele vamwe ngahelipi, noikala yoludi lilipi twa pumbwa okuhenuka?

17 ‘Ohole ihai holoka nai.’ Omunhu oo he lihumbata nai oha ningi oinima tai nyemateke vamwe. Oikala ya tya ngaho kai fi yopahole molwaashi otai ulike kutya omunhu oo ke na ko nasha nomaliudo avamwe nosho yo onghalonawa yavo. Mepingafano naasho, ngeenge otu na ohole ohatu ka ulika kutya otu na onghenda oyo tai ke tu linyengifa tu kale hatu yavelele vamwe. Ohole ohai kwafele ovanhu va kale ve na eenghedi diwa, ve lihumbate monghedi oyo ya hokiwa kuKalunga nova kale va fimaneka ovaitaveli vakwao. Onghee hano, ohole otai ke tu kwafela tu henuke “elihumbato lififohoni,” ile tu tye elihumbato keshe olo tali kumwifa Ovakriste vakwetu ile tali va udifa nai. — Ovaefeso 5:3, 4NW.

18. Omolwashike omunhu oo e na ohole ehe na okukomangela opo oinima aishe i ningwe nonghedi omo a hala?

18 ‘Ohole ihai kongo shayo vene.’ Etoloko limwe ola ti: “Ohole ihai komangele onghedi yayo vene.” Omunhu omunahole ke na okukala ha komangele opo oinima aishe i ningwe monghedi omo a hala, sha fa ngeno kutya omadiladilo aye alushe oo e li mondjila. Omunahole iha heke vamwe mokulongifa ounghulungu waye wokutomhafana opo a tomhe ovo ve na omaetepo a yooloka ko kulaye. Okukala nondudi kwa tya ngaho ohaku ulike kutya omunhu oku na ounhwa, nOmbibeli oya ti: ‘Ounhwa  otau tetekele ehanauno.’ (Omayeletumbulo 16:18) Ngeenge otu hole shili ovamwatate, ohatu ka kala twa fimaneka omataleko avo, nongeenge otashi dulika ohatu ka kala tu na ehalo okutifuka. Okutifuka oku li metwokumwe neendjovo daPaulus odo tadi ti: “Inapa kala ou ta kongo ouwa waye mwene, ndelenee keshe [umwe] na konge ouwa wamukwao.” — 1 Ovakorinto 10:24.

19. Ohole ohai tu kwafele tu linyenge ngahelipi ngeenge vamwe ve tu ninga nai?

19 ‘Ohole ihai kenyanana, ihai dimbulukwa owii ye u ningilwa.’ Omunhu oo e na ohole iha kenyananekwa noupu kwaasho vamwe tava popi ile tava ningi. Oshili paushitwe okuuda nai ngeenge vamwe ve tu ninga nai. Ndele nande otwa handuka shi li pauyuki, ohole otai ke tu kwafela opo tuha kale twa handuka efimbo lile. (Ovaefeso 4:26, 27) Katu na okukala hatu didilike eendjovo ile oilonga ii oyo vamwe ve tu ningila twa fa omunhu ta shange oinima oyo membo loikoya opo ehe i dimbwe. Ponhele yaasho, ohole otai ke tu linyengifa tu hopaenene Kalunga ketu omunahole. Ngaashi twe shi mona metukulwa 26, Jehova ohe tu dimine po ngeenge ope na etomheno la kola koku shi ninga. Ngeenge Jehova te tu dimine po, oha dimbwa omanyono etu, ndele iha kala e a didilika opo e ke tu handukile monakwiiwa molwao. Inatu pandula mbela eshi Kalunga iha dimbuluka owii oo hatu ningi?

20. Otu na okulinyenga ngahelipi ngeenge omwiitaveli mukwetu okwa nyono nokwa mona oilanduliko yenyono laye?

20 ‘Ohole ihai nyakukilwa osho inashi yuka.’ Etoloko limwe ola toloka outumbulilo oo tali ti: “Ohole . . . ihai hafele omanyono ovanhu vakwao.” Etoloko laMoffatt ola ti: “Ohole ihai hafe ngeenge vamwe va nyona.” Ohole ihai hafele okuhenouyuki. Onghee hano, katu na okutala ko onghedi keshe ya nyata ya fa oinima inai kwata moiti. Ohatu ke linyenga ngahelipi ngeenge omwiitaveli mukwetu okwa nyona nokwa mona oilanduliko yenyono laye? Ohole otai ke tu kwafela tuha kale twa hafa, twa fa ngeno hatu ti: ‘Onawa naanaa! Okwe shi li longela!’ (Omayeletumbulo 17:5) Ndele ohatu kala twa hafa ngeenge omumwatate oo a li a nyona ta katuka eenghatu opo a kale vali e na oupamhepo muwa.

 “Ondjila iwa unene”

21-23. (a) Paulus okwa li a hala okutya shike eshi a ti kutya “ohole ihai xulu po”? (b) Ohatu ka kundafana shike metukulwa laxuuninwa lembo eli?

21 “Ohole ihai xulu po nande.” Paulus okwa li a hala okutya shike eshi a popya eendjovo odo? Ngaashi shi liwetikile metukulwa 12 nosho yo 13 lOvakorinto ovativali, Paulus okwa li ta kundafana kombinga yeeshali dopamhepo odo da li di niwe kOvakriste vomefelemudo lotete. Eeshali odo oda li di li edidiliko kutya Kalunga okwa hokwa eongalo olo la li opo la totwa. Ndele havaKriste aveshe va li ve na oshali yokuvelula, yokuxunganeka ile yokupopya omalaka. Ndele osho kasha li shi na oshilonga unene, molwaashi eeshali dopashikumwifilonga odo oda  li tadi ka xula po. Ndele ope na oshinima shimwe osho sha li itashi ka xula po, osho Omukriste keshe e na okukala e shi na. Oshinima osho osha li sha tongomana nosha li tashi ka kalelela shi dule eeshali dopashikumwifilonga. Paulus okwa ti kutya oshinima osho osho “ondjila iwa unene.” (1 Ovakorinto 12:31) “Ondjila iwa unene” oyo oshike? Oyo ondjila yohole.

Oshiwana shaJehova ohashi didilikwa mo omolwohole yasho yokuholafana

22 Ohole yopaKriste oyo oya hokololwa kuPaulus kutya “ihai xulu po.” Fiyo okunena, ohole yokuliyambela ovamwatate ohai didilikifa mo ovashikuli vaJesus vashili. Mbela katu wete ohole ya tya ngaho momaongalo ovalongeli vaJehova mounyuni aushe? Ohole oyo otai kala po fiyo alushe, molwaashi Jehova okwa udanekela ovapiya vaye ovadiinini omwenyo waalushe. (Epsalme 37:9-11, 29) Onghee hano, natu twikileni okuninga ngaashi hatu dulu tu ‘ende mohole.’ Ngeenge otwa ningi ngaho, ohatu ka mona ehafo linene olo hali di mokuyandja. Kakele kaasho, ohatu ka kala nomwenyo waalushe, nokuulika ohole fiyo ofiyo ngaashi Kalunga ketu omunahole, Jehova.

23 Metukulwa eli laxuuninwa moshitukulwa shi na sha nohole, otwa kundafana nghee hatu dulu okuulikilafana ohole. Mokutala komauwa mahapu oo twa mona omolwohole yaJehova, eenghono daye, ouyuki nosho yo ounongo, oshiwa okulipula kutya, ‘Ongahelipi handi dulu okuulika kutya ondi hole shili Jehova?’ Epulo olo ohatu ke li kundafana metukulwa laxuuninwa lembo eli.

^ okat. 12 Okukala nohole yopaKriste itashi ti kutya otu na okukala tu na omaitavelela. Ombibeli oye tu kumaida ya ti: ‘Pashukileni ava hava eta olutandu nomashindo noku va yepa.’ — Ovaroma 16:17.