Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ehena popepi naJehova

 ETUKULWA 23

“Oye a kala e tu hole tete”

“Oye a kala e tu hole tete”

1-3. Oshike sha ningifa efyo laJesus li kale le likalekelwa mondjokonona?

OMIDO 2 000 lwaapo da pita, pefimbo lokwenye, omulumenhu umwe ehe na ondjo okwa li a pangulwa nohauxuuninwa okwa li a talika ko e li omukaulinyanga ndele ta hepekwa fiyo omokufya. Osho hasho ashike sha li oshiningwanima shihe li pauyuki noshinyanyalifi mondjokonona. Ashike efyo lomulumenhu oo ola li le likalekelwa.

2 Eshi omulumenhu oo a li ta mono oixuna i udifa omwenyo munyenye moshanga shomutenya, opa li pa ningwa oshinima shididilikwedi keulu, osho sha li tashi ulike kutya efyo lomulumenhu oo ola li la fimanenena. Opa li pa holoka omilaulu ombadilila. Omunandjokonona umwe okwa ti kutya ‘etango ola li la laula.’ (Lukas 23:44, 45) Opo nee fimbo omulumenhu oo ina fuda mo omufudo waye waxuuninwa, okwa popya eendjovo dihe fi okudimbuwa a ti: “Sha longwa sha pwa.” Efyo laye lopayambo ola li oshinima sha fimana neenghono. Ola li euliko linenenene lohole mondjokonona aishe younhu. — Johannes 15:13; 19:30.

3 Omulumenhu oo a popiwa metetekelo oJesus Kristus. Ovanhu ove shi shii nawa nhumbi a li a hepekwa fiyo a fya mefiku olo pa li pa holoka omilaulu, mo 14 Nisan 33 O.P. Ndele ope na oushili wa fimana oo ovanhu vahapu inava didilika. Oushili oo oyoo kutya nonande Jesus okwa li a mona oixuna neenghono pomhito oyo, opa li yo umwe vali oo a li a yahamekwa komutima neenghono koshinima osho. Omunhu oo oye nokuli a ninga eliyambo linenenene mefiku olo, naasho osha li euliko linenenene lohole meshito alishe. Omolwashike taku tiwa ngaho? Enyamukulo kepulo olo otali tu kwafele tu ude ko oshikundafanwa sha fimanenena moikundafanwa aishe: ohole yaJehova.

Euliko linenenene lohole

4. Omukwaita umwe Omuroma okwa li e shi mona mo ngahelipi kutya Jesus ka li ashike omunhu wongaho, nokwa li a fika pexulifodiladilo lilipi?

4 Omukwaita umwe omunefele wometangakwaita lOvaroma oo  a li ta pashukile ovo va li tava valele Jesus okwa li a kumwa eshi pa holoka omilaulu fimbo Jesus ina fya nosho yo ekakamo ledu linene. Okwa li a dimina a ti: “Oshili ou okwa li Omona waKalunga.” (Mateus 27:54) Heeno, Jesus ka li ashike omunhu wongaho. Omukwaita oo okwa li a kufa ombinga mokudipawa kwOmona ewifa laKalunga Omukombadambada. Mbela Kalunga okwa li e hole Omona oo shi fike peni?

5. Omona waKalunga okwa kala pamwe naXe oule wefimbo li fike peni ofimbo ine uya kombada yedu?

5 Ombibeli oya ti kutya Jesus “Omudalwa wotete [woishitwa] aishe.” (Ovakolossi 1:15) Diladila kwaasho. Osho osha hala okutya Omona waJehova oo okwa kala ko ofimbo eshito olo liwetike inali shitwa. Mbela Omona oo okwa kala pamwe naXe efimbo li fike peni? Ovanongononi vamwe otava tengeneke kutya ewangadjo oli na omido omabiliyona 13. Kali fi tuu efimbo lilelile! Kutya nee ewangadjo oli na shili omido omabiliyona 13 ile hasho, eshi sha yela oshosho kutya Omona waJehova okwa kala ko efimbo lile li dule olo ewangadjo la kala po. Mbela okwa kala ta longo shike efimbo alishe olo?

6. (a) Omona waJehova okwa li ha longo shike ofimbo ine uya kombada yedu? (b) Jehova nOmona ove na ekwatafano la tya ngahelipi?

6 Omona oo okwa kala ta hafele okulonga pamwe naXe e li “omulongi onghulungu.” (Omayeletumbulo 8:30, NW) Ombibeli oya ti: “Kape na nande oshinima shimwe sha shitwa, eshi inashi shitwa [okupitila] muye.” (Johannes 1:3) Osho otashi ulike kutya Jehova nOmona ova kala tava longo pamwe opo oinima aishe ikwao meshito i holoke po. Kava li tuu hava hafele nokushambukilwa pamwe! Vahapu ohatu ka dimina kutya ekwatafano lohole olo hali kala pokati komudali nomona ohali kala la kola neenghono. Ombibeli oya ti yo kutya ohole oyo ‘oshimangifo sha wana shoku tu mangela kumwe.’ (Ovakolossi 3:14) Ngeenge osho shi li ngaho, olyelye womufye ta dulu okuuda ko lela kutya Kalunga nOmona ova li ve na ekwatafano la kola shi fike peni, mokutala kefimbo lile neenghono olo va kala pamwe? Osha yela kutya Jehova nOmona ovo ve na ekwatafano lohole la kola kuhe na vali.

7. Jesus okwa ninginifwa e na omido ngapi lwaapo, na Jehova okwa li e uditile Omona waye ngahelipi eshi a ninginifwa?

7 Lwanima, Jehova okwa li a tuma Omona waye kombada yedu a  dalwe e li omunhu wopambelela. Kungaho, ka li ta ka dula okweendafana odikilila nOmona waye omuholike oule womido omilongo donhumba. Okwa kala ta tale nohokwe inene eshi Jesus, Omona waye a wanenena, ta kulu fiyo a ninga omulumenhu elela. Eshi Jesus a wanifa omido 30 lwaapo, okwa ninginifwa. Nopehe na omalimbililo, Jehova okwa li a tunhukwa neenghono koshiningwanima osho. Nomolwaasho, okwa popya okudja meulu a ti: “Ou Omona wange omuholike, onde mu hokwa.” (Mateus 3:17) Jehova ka li tuu a hafa eshi a kala ta tale nhumbi Jesus ta wanifa po noudiinini omaxunganeko nokulonga ehalo laYe! — Johannes 5:36; 17:4.

8, 9. (a) Oinima ilipi ya li ya ningilwa Jesus mo 14 Nisan 33 O.P., naasho osha li sha kuma ngahelipi Xe womeulu? (b) Omolwashike Jehova a li a efa Omona waye a monifwe oixuna nokufya?

8 Ndele mbela Jehova okwa li e udite ngahelipi mo 14 Nisan 33 O.P.? Okwa li e udite ngahelipi eshi a li ta tale Jesus ta kengelelwa nokukwatwa po oufiku kongudu ya homata? Eshi ookaume kaJesus va ya onhapo, nosho yo eshi Jesus a li ta pangulwa shihe li pauyuki? Eshi Jesus a li ta shekwa, ta fiilwa omate nokudengwa neengonyo? Eshi a li ta dengwa noshokoto kombuda? Eshi omake aye neemhadi daye da valelwa neembosha komuti womahepeko nokweendjelelifwa komuti oo, vo ovanhu tave mu sheke nee? Mbela Jehova okwa li e udite ngahelipi eshi Omona waye omuholike a lila mokule omolwouyahame tau udifa omwenyo munyenye? Okwa li e udite ngahelipi eshi Omona waye omuholike a fuda mo omufudo waye waxuuninwa nokukala ehe li vali momwenyo? — Mateus 26:14-16, 46, 47, 56, 59, 67; 27:38-44, 46; Johannes 19:1.

“Kalunga . . . Oye a yandja Omona waye Ewifa”

9 Itatu dulu okuyelifa lela neendjovo kutya okwa li e udite ngahelipi eshi Omona a fya. Ohatu dulu ashike okuyelifa etomheno kutya omolwashike a efa osho shi ningwe. Omolwashike Jehova a efa oshinima osho sha yahameka omaliudo aye shi ningwe? Etomheno ola yandjwa muJohannes 3:16, taku ti: “Osheshi osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” Elinyengotomheno laJehova ola li ohole. Oshali oyo Jehova e tu pa eshi a yandja Omona waye a hepekwe noku tu file oi li euliko linenenene lohole mondjokonona aishe.

 Eityo lohole yopakalunga

10. Ovanhu ova pumbwa okuulikilwa oukwatya ulipi, noshike tashi ningwa po shi na sha neityo loshitya “ohole”?

10 Oshitya “ohole” otashi ti lela shike? Ohaku tiwa kutya ovanhu ova pumbwa unene tuu okuulikilwa oukwatya wohole. Ovanhu ohava kala ve udite ouumbo ngeenge ova kala tava ulikilwa ohole okudja kounona wavo fiyo va ninga ovakulunhu. Otava dulu okupolimana ile va fye omutima nokuli ngeenge ihava ulikilwa ohole. Ndele shikumwifi, kashipu okufatulula kutya ohole oshike. Ashike ovanhu ohava popi luhapu kombinga yohole. Ope na omambo nomaimbilo mahapumahapu nosho yo oitevo oyo tai tangumuna ohole. Ndele nande ongaho, ovo va tota oinima oyo ihava fatulula eityo loshitya “ohole.” Osho sha yela oshosho kutya ovanhu ohava longifa ashike oshitya osho sha pitilila, ndele kave shii eityo lasho.

11, 12. (a) Openi hatu dulu okulihonga shihapu shi na sha nohole, nomolwashike hatu tile ngaho? (b) Omaludi ohole elipi a longifwa kondadalunde mOshigreka shonale, noshitya shilipi shi na sha nohole sha longifwa unene mOmishangwa dopaKriste dOshigreka? (Tala yo eshangelo lopedu.) (c) Agape otashi ti shike?

11 Ombibeli oya yelifa kutya ohole otai ti shike lela. O-Expository Dictionary of New Testament Words, ya shangwa kuVine, otai ti: “Ohole ohai didilikwa mo ashike moilonga oyo tai longwa omolwayo.” Ombibeli otai tu hongo shihapu shi na sha noukwatya waJehova wohole, oyo hai limonikila mokukala e na ko nasha noishitwa yaye. Pashihopaenenwa, oshike sha li tashi dulu okuulika ounene wohole yaJehova shi dule okuyandja Omona waye? Momatukulwa taa landula ko, ohatu ka tala koihopaenenwa vali imwe i na sha nanghee Jehova a ulika ohole yaye pailonga. Kakele kaasho, ohatu dulu okulihonga shihapu shi na sha nanghee oitya yopehovelo oyo ya tolokwa “ohole” ya li ya longifwa mOmbibeli. MOshigreka shonale, opa li oitya ine oyo tai ti “ohole.” *  Shimwe shomoitya oyo ine osho sha longifwa luhapu mOmishangwa dopaKriste dOshigreka osho agape. Emboitya limwe li na sha noitya yOmbibeli ola ti kutya osho osho “oshitya tashi yandje unene eityo la fimanenena lohole.” Omolwashike taku dulu okutiwa ngaho?

12 Oshitya agape otashi ulike kohole oyo hai wilikwa komafinamhango. Kashi fi ashike omaliudo ongaho oo omunhu ha kala e uditile omunhu mukwao. Oshitya osho oshi na eityo la mbwalangadja nosha kwatela mo okukatuka eenghatu da diladilwa nawa. Kakele kaasho, agape oludi lohole oyo inai kwatela mo nandenande oikala yokuliholamwene. Pashihopaenenwa, diladila vali kombinga yaJohannes 3:16. “Ounyuni” oo taku tiwa kutya Kalunga okwa kala e u hole nomolwaasho a yandja Omona waye ewifa otau ulike kushike? Otau ulike kovanhu ovakulilwa. Osho osha kwatela mo ovahenakalunga vahapu. Mbela osho osha hala okutya Jehova oku hole omunhu keshe ngaashi a li e hole omupiya waye omudiinini, Abraham, oo a li kaume kaye? (Jakob 2:23) Hasho nandenande, ndele nande ongaho, oha ningile ovanhu aveshe ouwa pahole, nokuli nonande otashi pula a ninge omaliyambo manene. Okwa hala ovanhu aveshe ngeno ve lidilulule nove lialuluke keendjila davo. (2 Petrus 3:9) Ope na vahapu ovo hava ningi ngaho. Ovo ovo nee ha pange oukaume navo.

13, 14. Oshike tashi ulike kutya o-agape oya kwatela mo omaliudo ohamu?

13 Ovanhu vamwe ova uda ko papuko oshitya agape. Ohava diladila kutya oludi lohole oyo inai kwatela mo omaliudo, ndele oya kwatela mo ashike omadiladilo. Ndele paulelalela o-agape ohai kala luhapu ya kwatela mo omaliudo ohamu. Pashihopaenenwa, Jesus okwa li a longifa oshitya agape eshi a ti: “Xe e hole Omona.” Mbela ohole ya tya ngaho inai kwatela mo omaliudo ohamu? Didilika yo kutya Jesus okwa li a longifa yo oshitya phileo a ti: “Xe e hole Omona.” (Johannes 3:35; 5:20) Osha yela kutya ohole yaJehova ohai kala ya kwatela mo omaliudo ohamu, ndele inashi hala okutya ohai kala ashike tai pangelwa komaliudo. Ohai wilikwa alushe komafinamhango oo e li pandunge nopauyuki.

14 Ngaashi twe shi mona, omaukwatya aeshe aJehova omakumwifi, okwa wanenena nomahokwifa. Ndele ohole oyo oukwatya waye uhokwifa unenenene. Ohole oyo unene hai tu nanene  kuJehova. Ohole oyo lela oukwatya waye wa tongomana unene u dule omaukwatya makwao. Omolwashike hatu tile ngaho?

“Kalunga Oye ohole”

15. Ombibeli oya ti shike kombinga youkwatya waJehova wohole, nomolwashike etumbulo olo le likalekelwa? (Tala yo eshangelo lopedu.)

15 Ombibeli oya popya kombinga yohole yaJehova monghedi ididilikwedi, ndele onghedi oyo inai longifwa nande shi na sha nomaukwatya aye makwao a tongomana. Kape na apa Omishangwa da ti kutya Kalunga oye eenghono ile Kalunga oye ouyuki ile kutya Kalunga oye ounongo. Ashike Kalunga oku na omaukwatya oo, noye odjo inenenene yomaukwatya oo atatu, nokape na ou ta yelekwa naye ngeenge tashi uya pomaukwatya oo. Ndele oukwatya waye utine owa popiwa monghedi ye likalekelwa taku ti: “Kalunga Oye ohole.” * (1 Johannes 4:8) Osho osha hala okutya shike?

16-18. (a) Omolwashike Ombibeli tai ti kutya “Kalunga Oye ohole”? (b) Omolwashike sha yeleka eshi Jehova a hoolola oshipala shomunhu okufaneka oukwatya waye wohole?

16 Etumbulo “Kalunga Oye ohole” itali ti kutya “Kalunga ota yelekanifwa nohole.” Noitya imwe, itatu dulu okutya “ohole oyo Kalunga.” Jehova ita dulu okuyelekanifwa noukwatya oo oukwakudilongwa, molwaashi ye omunhu oo e na omaliudo nosho yo omaukwatya mahapumahapu, mwa kwatelwa ohole. Ndele ohole oyo oukwatya waJehova wa shiya ko komaukwatya aye aeshe. Shi na sha noutumbulilo oo u li mu 1 Johannes 4:8, embo limwe lomauyelele ola ti: “Ohole oyo onghedi yaKalunga yokukalamwenyo.” Ohatu dulu oku shi yelifa ngaha: Eenghono daJehova ohadi mu dulifa a katuke eenghatu. Ouyuki nounongo waye oo ohau mu wilike nghee e na okukatuka. Ndele ohole yaye oyo hai mu linyengifa a katuke eenghatu. Ohole oyo hai dana alushe onghandangala shi na sha nanghee ha longifa omaukwatya aye makwao.

 17 Jehova oye ha ulike ohole monghedi ya denga mbada. Onghee hano, ngeenge otwa hala okulihonga shihapu kombinga yohole oyo hai wilikwa komafinamhango, otu na okulihonga shihapu kombinga yaJehova. Ashike oukwatya oo muwa ohau limonikila yo movanhu. Omolwashike shi li ngaho? Pefimbo eshi oinima yokombada yedu ya li tai shitwa, Jehova okwa li a popya eendjovo tadi landula, nopehe na omalimbililo a li ta lombwele Omona, a ti: “Tu meni ovanhu oshifeka shetu, ve tu fe.” (Genesis 1:26) Moishitwa aishe yokombada yedu, ovanhu, ovalumenhu novakainhu, ovo ashike tava dulu okuhoolola okuulika ohole, nokungaho otava hopaenene Xe yavo womeulu. Dimbuluka kutya Jehova okwa longifa oipala yoinamwenyo yonhumba okufaneka omaukwatya aye amwe a tongomana. Ndele okwa hoolola okulongifa oshipala shomunhu, oo e li oshishitwa shaye sha tongomana kombada yedu, opo a faneke oukwatya waye wohole oo wa tongomana unene. — Hesekiel 1:10.

18 Ngeenge hatu ulike ohole oyo tai wilikwa komafinamhango tuhe na oikala yokuliholamwene, ohatu hopaenene oukwatya waJehova wohole oo wa tongomana unene. Kungaho, ohatu ningi naanaa ngaashi omuyapostoli Johannes a popya, eshi a ti: “Ofye otu mu hole, osheshi Oye a kala e tu hole tete.” (1 Johannes 4:19) Mbela omeenghedi dilipi Jehova e tu ulikila tete ohole?

Jehova oye a ulika tete ohole

19. Omolwashike hatu dulu okutya kutya ohole oya li tai dana onghandangala mokushitwa kwoinima?

19 Kalunga oye a ulikila tete oishitwa yaye ohole. Mbela oshike sha li she linyengifa Jehova a hovele okushita oinima? Hakutya ngeno okwa li ta fi oudja ile e udite owike. Jehova okwe liwana; ina pumbwa ekwafo nande lasha. Ndele ohole yaye, oyo i li oukwatya tau longo, oyo ya li ye mu linyengifa opo a pe oishitwa yaye inaendunge oshali ihafifa yomwenyo, i dule yo okushambukilwa okukalamwenyo. Omona ewifa laKalunga oye “efina leshito laKalunga.” (Ehololo 3:14) Opo nee Kalunga okwa longifa Omona waye e li Omulongi Onghulungu opo a etife po oishitwa ikwao ngaashi ovaengeli. (Job 38:4, 7; Ovakolossi 1:16) Oishitwa oyo yopamhepo inaendunge oya shitwa i na emanguluko  lokuninga omatokolo, eendunge nosho yo omaliudo, naasho oshe shi ninga tashi shiiva opo i dule okukala i na ekwatafano lopahole noishitwa ikwao yopamhepo nosho yo naJehova Kalunga. (2 Ovakorinto 3:17) Oishitwa oyo oya li inahole molwaashi Kalunga oye tete e i ulikila ohole.

20, 21. Adam naEva ova li va dingililwa koumbangi ulipi oo wa li tau ulike kutya Jehova oku va hole, nova li ve linyenga ngahelipi kwaasho?

20 Kalunga okwa li yo a ulikila ovanhu vokombada yedu ohole. Okudja ngoo eshi Adam naEva va shitwa, Kalunga okwa kala te va file oshisho pahole. Eshi va li mOparadisa, muEden, ova li ve wete oumbangi wa yela keshe pamwe kutya Xe yavo okwa li e va hole. Didilika osho Ombibeli ya ti shi na sha nonhele oyo, eshi ya ti: “Kalunga okwa twika oshikunino muEden, moushilo, omo Ye a yandja komunhu ou e mu ma, onhele.” (Genesis 2:8) Mbela owa enda ngoo nande onale moshikunino shiwashiwa ile moparka? Oshike sha li shitunhula unene kwoove? Mbela ouyelele wetango oo hau kala u wetike tau pitile pokati komafo omiti? Mbela omaluvala eengala da yoolokafana? Mbela epopomo loumomolonga ovo va tavakana mo, ile okwiimba kwoudila ile okukwena kwoupuka? Mbela edimba loimeno, noloiimati neenhemo? Kashi na nee mbudi kutya oshike sha li shitunhula unene kwoove, oshikunino ile oparka ya tya ngaho itai dulu okuyelekwa noshikunino shaEden. Omolwashike hatu tile ngaho?

21 Oshikunino shaEden osha li sha longekidwa kuJehova ye mwene. Nopehe na omalimbililo, osho sha li onhele dingi kombada yedu. Omwa li omiti adishe da wapala okutala nosho yo odo dinyenye okuliwa. Oshikunino osho osha li shi na omeva a wana, osha li onhele ya kula nawa, nomwa li oinamwenyo yomaludi e lili noku lili ihokwifa okutala. Adam naEva ova li ve na keshe shimwe osho va pumbwa opo va kale ve na onghalamwenyo i na eityo noihafifa. Ova li va pewa oilonga tai shambula nova li tava hafele eendafano la wanenena. Jehova okwa li shili e va ulikila tete ohole. Onghee hano, omafiloshisho aJehova opahole okwa li e na oku ve linyengifa va kale yo ve mu hole. Ndelenee ova dopa okuninga ngaho. Ponhele yokukala ve hole Xe yavo womeulu nokudulika kuye, ove mu tukululila oshibofa omolwoikala yavo yokuliholamwene. — Genesis, etukulwa 2.

22. Jehova okwe linyenga ngahelipi konima younashibofa womuEden opo a ulike kutya ‘ohole yaye ihai xulu po nande’?

 22 Kasha li tuu sha yahameka Jehova eshi Adam naEva ve mu tukululila oshibofa! Ndele mbela osho osha li sha lindimaneka omutima waJehova omunahole? Hasho, nandenande. “Ouwanghenda [“ohole i na oudiinini”] waye tau kala po.” (Epsalme 136:1, yelekanifa neshangelo lopedu mo-NW.) Diva konima yoshiningwanima osho shomuEden, okwa hovela okuninga po omalongekido opahole e na sha nokukulila oludalo laAdam naEva olo tali ka longa ouyuki. Ngaashi sha kundafanwa nale, limwe lomomafiloshisho oo Kalunga a longekida po olo ekuliloyambo lOmona waye omuholike, olo le mu pula ondilo. — 1 Johannes 4:10.

23. Omolwashike taku tiwa kutya Jehova ‘oKalunga omunelao,’ nepulo la fimanenena lilipi tali ka nyamukulwa metukulwa tali landula?

23 Odoshili kutya okudja ngoo kehovelo leshito, Jehova okwa kala ta ulikile ovanhu aveshe ohole. Ope na eenghedi dihapu omo a ulika kutya “Oye a kala e tu hole tete.” Ohole ohai xumifa komesho oukumwe nelao (ile tu tye, ehafo), nomolwaasho taku tiwa kutya Jehova ‘oKalunga omunelao.’ (1 Timoteus 1:11, OB-1954) Ndele epulo la fimana olo tali dulu okuholoka po ololo kutya: Mbela Jehova oku tu hole ngoo shili pauhandimwe? Epulo olo otali ka nyamukulwa metukulwa tali landula.

^ okat. 11 Oshityalonga phileo, osho tashi ti “okukala wa nanenwa kuumwe ile wa hokwa umwe (ngaashi omunhu ho kala uditile kaume kopofingo ile omumwaxo),” osha longifwa luhapu mOmishangwa dopaKriste dOshigreka. Oshitya storge, osho tashi ti ohole yovapambele vopopepi, osha longifa mu 2 Timoteus 3:3, oo ta ulike kutya ohole ya tya ngaho oya li tai ka pumba momafiku axuuninwa. Eros, osho tashi ulike kohole yo hai kala pokati kovanhu voukashike kookanhu wa yoolokafana, ovo va hokwafana, inashi longifwa mOmishangwa dopaKriste dOshigreka. Ndele nande ongaho, oludi lohole oyo ola kundafanwa mOmbibeli. — Omayeletumbulo 5:15-20.

^ okat. 15 Ope na yo omatumbulo opamishangwa avali a yukila oko: “Kalunga Oye ouyelele,” na ‘Kalunga oye omundilo hau lungwinifa.’ (1 Johannes 1:5; Ovaheberi 12:29) Didilika kutya omatumbulo oo oku li molupe lomifefifo, sha hala okutya otaa faafanifa Jehova noinima yomeshito. Jehova otaa faafanifwa nouyelele molwaashi omuyapuki nomuyuki. Muye kamu na “omulaulu,” nokwa koshoka filufilu. Ota dulu yo okufaafanifwa nomundilo, molwaashi oku na eenghono dokuhanauna.