Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Etwalemo

Etwalemo

“Ame onda kulila momukunda unini u li koshitukulwa shokoumbangalanhu,” Dauda wokuSierra Leone ta ti. “Oshikando shimwe, eshi nda li okamati, okwa li pe na eenhamanana depya pokati kepata letu nepata limwe. Aeshe okwa pula epya olo tuu olo. Opo omukundu u xulifwe po, opa ka ifanwa ondudu. Yo oya pa omulumenhu umwe onhengelelo, ndee tai mu uvike nelapi litoka. Divadiva omulumenhu ou a uvikwa nelapi okwa tameka okukakama ye ta di oshinhwi. Eshi a tala monhengelelo, ye okwa ingida: ‘Ondi wete omuxungu ta ehene popepi! Ye okwa djala oikutu itoka. Ye omule nokwa kulupa, e na eenghwakutoka, nota ende omwoodimba.’

“Ye okwa li ta hepaulula Xekulu! Opo nee okwa yaluluka ndee ta ingida: ‘Ngeenge itamu itavele eshi handi tongo, ileni mu tale nye vene!’ Shoshili, kape na umwe womufye kwa li ta dulu oku shi ninga! Ondudu oye mu ngungumaneka tai mu shamine oimbodi youpule ya lumbakanifwa nomafo nomeva, oyo i na mokakola.

“‘Tatekulu’ okwa popya okupitila momulumenhu womonhengelelo, ta ti epya olepata letu. Ye okwa lombwela meekulu kutya ye oku na okulonga epya nope he na omalipulapulo. Epata linya likwao ola tambula ko etokolo olo. Omhata oya li ya xulifwa po.”

 Oimoniwa ya tya ngaha oi li apeshe mOuninginino waAfrika. Oko, nosho yo moitukulwa imwe younyuni, omamiliyona mahapu okwa itavela kutya ovafi ohava i mouhamba weemhepo, oko vo hava dulu okukonakona nokunwefa mo onghalamwenyo yovanhu kombada yedu. Mbela eitavelo eli oloshili? Ovafi ove na shili omwenyo? Ngeenge hasho, oolyelye have liningi eemhepo dovafi? Okukala u shii omanyamukulo a yuka komapulo aa osha fimanenena. Osho oshinima tashi ti omwenyo ile efyo.