Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Onghundana iwa ya dja kuKalunga!

 Oshileshwa 7

Ouhamba waKalunga oshike?

Ouhamba waKalunga oshike?

Oshike sha ningifa Jesus a kale Ohamba ya denga mbada? — MARKUS 1:40-42.

1. Ouhamba waKalunga oshike?

Ouhamba waKalunga oo epangelo lomeulu. Otau ka pingena po omapangelo makwao aeshe notau ka ningifa ehalo laKalunga li wanifwe meulu nokombada yedu. Oshi li onghundana iwa eshi Kalunga ta ka longifa Ouhamba waye monghedi ya tya ngaho. Mafiku, Ouhamba waKalunga otau ka wanifa po omhumbwe yovanhu yokukala va hala epangelo liwa. Otau ka hanganifa yo ovanhu aveshe ovo tava ka kala kombada yedu. — Lesha Daniel 2:44; Mateus 6:9, 10; 24:14.

Ouhamba keshe ohau kala u na ohamba. Onghee hano, Jehova okwa nangeka po Omona waye, Jesus Kristus, oye a ninge Ohamba yOuhamba waye. — Lesha Ehololo 11:15.

2. Omolwashike Jesus e li Ohamba ya denga mbada?

Omona waKalunga oku li Ohamba ya denga mbada, molwaashi oku na olukeno noku hole ouyuki. (Johannes 1:14) Oku na yo eenghono dokukwafela ovapangelwa vaye molwaashi ota ka pangela kombada yedu okudja meulu. Konima yenyumuko laye, okwa li a londa keulu nokwa ka kala omutumba kolulyo laJehova a teelela okupewa eenghonopangelo. (Ovaheberi 10:12, 13) Hauxuuninwa, Kalunga okwa ka pa Jesus eenghonopangelo a hovele okupangela. — Lesha Daniel 7:13, 14.

3. Oolyelye tava ka pangela pamwe naJesus?

Okangudu kaavo tava ifanwa ‘ovayapuki’ oko taka ka pangela pamwe naJesus meulu. (Daniel 7:27) Ovayapostoli vaJesus ovayapuki novadiinini ovo va li va hoololwa tete va ka pangele pamwe naye. Jehova ota twikile okuhoolola ovalumenhu novakainhu ovadiinini fiyo okunena ovo tava ifanwa ovayapuki. Ngaashi Jesus, navo ohava nyumunwa ve na omalutu opamhepo. — Lesha Johannes 14:1-3; 1 Ovakorinto 15:42-44.

 Ndele mbela ovanhu vangapi tava i meulu? Jesus okwa li e va ifana “okangudu.” (Lukas 12:32) Omuvalu wako aushe kumwe otau ka kala 144 000. Ovanhu ovo otava ka pangela pamwe naJesus kombada yedu. — Lesha Ehololo 14:1.

4. Oshike sha li sha ningwa po eshi Jesus a hovela okupangela?

Ouhamba waKalunga owa hovela okupangela mo 1914. * Onghatu oyo Jesus a li a katuka tete okudja eshi a nangekwa po e li Ohamba oyo okuumbila Satana neendemoni daye kombada yedu. Satana okwa kulukila kedu e na ehandu linene nokwa li a hovela okweetifa omaupyakadi mahapu. (Ehololo 12:7-10, 12) Okudja opo, ovanhu ohava hangwa komaupyakadi mahapu a kwata moiti. Oinima ngaashi oita, ondjala, omikifi dolutapo nomakakamo edu oi li oshitukulwa ‘shedidiliko’ olo tali ulike kutya mafiku Ouhamba waKalunga otau ka ya olunyala moinima yopanhu. — Lesha Lukas 21:7, 10, 11, 31.

5. Ouhamba waKalunga otau wanifa po shike?

Ouhamba waKalunga owa hovela nale okwoongela ongudu inene yovanhu va dja moiwana aishe okupitila moilonga yokuudifa onghundana iwa mounyuni aushe. Ovalininipiki omamiliyona otava ningi ovapangelwa vepangelo laJesus. Ovapangelwa vOuhamba waKalunga otava ka amenwa eshi Ouhamba tau ka hanauna po ounyuni ou woukolokoshi. Onghee hano, aveshe ovo va hala okumona omanangeko noupuna Ouhamba waKalunga ove na okukala hava dulika kuJesus. — Lesha Ehololo 7:9, 14, 16, 17.

Pefimbo lepangelo laKristus lomido 1000, Ouhamba otau ka wanifa po elalakano laKalunga lopehovelo li na sha novanhu. Edu alishe otali ka ninga oparadisa. Konima yaasho, Jesus ota ka shunifa Ouhamba kuXe. (1 Ovakorinto 15:24-26) Mbela kape na nande omunhu wonhumba oo wa hala okuhepaululila kombinga yOuhamba waKalunga? — Lesha Epsalme 37:10, 11, 29.

 

^ okat. 12 Opo u mone ouyelele muhapu u na sha nanghee Ombibeli ya xunganeka omudo 1914, tala membo Ombibeli otai hongo lela shike?, epandja 215-218.

Lihonga shihapu

Mbela otu li ‘momafiku axuuninwa’?

Konakona nghee eenghatu noikala oyo ye tu dingilila tai ulike kutya paife otu li ‘momafiku axuuninwa’ oo a xunganekwa kOmbibeli.

Ongahelipi Eendombwedi daJehova hadi unganeke oilonga yado yokuudifa?

Ohatu udifa monghedi omo Jesus a li ha udifa eshi a li kombada yedu. Eenghedi dimwe dokuudifa odilipi?