Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Onghundana iwa ya dja kuKalunga!

 Oshileshwa 9

Oshike tashi dulu okukwafela oukwaneumbo weni u kale wa hafa?

Oshike tashi dulu okukwafela oukwaneumbo weni u kale wa hafa?

1. Omolwashike okuhombola kwa fimanenena opo oukwaneumbo u kale wa hafa?

MOmbibeli omu na ‘onghundana iwa oyo ya dja kuKalunga omunelao.’ (1 Timoteus 1:11, NW) Kalunga omunelao okwa hala omaukwaneumbo a kale a hafa. Jehova oye Omutoti wohombo. Onghee hano, osha fimanenena okuhombola paveta opo oukwaneumbo weni u kale wa hafa molwaashi ounona otava ka tekulilwa momudingonoko wa amenwa.

Kalunga oha tale ko ngahelipi ohombo? Okwa hala eehombo di kalelele. Ovakriste ove na okukala va fimaneka eemhango domapangelo omoilongo yavo di na sha nokuhombola paveta. (Lukas 2:1, 4, 5) Jehova okwa hala yo ovashamane novakulukadi va kale ovadiinini kookaume kavo kopahombo. (Ovaheberi 13:4) Oku tonde eteyohombo. (Malakia 2:16) Ndele okwa pitika ashike Ovakriste va teye ohombo nokuhombolulula ngeenge kaume umwe kopahombo a ya momilele kondje yohombo. — Lesha Mateus 19:3-6, 9.

2. Omushamane nomukulukadi ove na okukalafana ngahelipi?

Jehova okwa shita omulumenhu nomukainhu opo va kale hava yambididafana mohombo yavo. (Genesis 2:18) E li omutwe woukwaneumbo, omushamane oku na oshinakuwanifwa shokufila oshisho oukwaneumbo waye palutu nosho yo oku u honga kombinga yaKalunga. Oku na okukala e na omhepo yeliyambo eshi ta ulikile omukulukadi waye ohole. Ovashamane novakulukadi ove na okukala ve holafane nohava fimanekafana. Ndele molwaashi ovashamane novakulukadi aveshe inava wanenena, osha fimanenena okulihonga okudiminafana po opo va kale va hafa meehombo davo. — Lesha Ovaefeso 4:31, 32; 5:22-25, 33; 1 Petrus 3:7.

3. Ngeenge kamu na ehafo mohombo yeni, mbela ou na okufiya po kaume koye kopahombo?

Ngeenge omwa shakeneke omaupyakadi mohombo yeni, keshe umwe na ungaunge namukwao pahole. (1 Ovakorinto 13:4, 5)  Eendjovo daKalunga itadi ti kutya ovalihomboli ove na ashike okutopoka opo ngeno va kandule po omaupyakadi omohombo. — Lesha 1 Ovakorinto 7:10-13.

4. Ounona, mbela omu shii kutya Kalunga okwa hala mu ninge shike?

Jehova okwa hala mu kale mwa hafa. Ohe mu pe omayele a denga mbada e na sha nanghee tamu dulu okuhafela ounyasha weni. Okwa hala mu mone ouwa mounongo nomoimoniwa yovadali veni. (Ovakolossi 3:20) Jehova okwa hala yo mu mone ehafo olo hali di mokulonga ehalo laye nosho yo lOmona waye. — Lesha Omuudifi 11:9–12:1; Mateus 19:13-15; 21:15, 16.

5. Ovadali, ongahelipi tamu dulu okukwafela ovana veni va kale va hafa?

Omu na okulonga noudiinini opo ovana veni va kale ve na oikulya, onhele yokukala nosho yo oidjalomwa. (1 Timoteus 5:8) Ndele opo ovana veni va kale va hafa, omwa pumbwa yo oku va honga va kale ve hole Kalunga nove lihonge kuye. (Ovaefeso 6:4) Oshihopaenenwa sheni shi na sha nokuulika kutya omu hole Kalunga otashi dulu okukuma neenghono omitima dovana veni. Ngeenge ehongo leni ola kanghamena kEendjovo daKalunga, otali dulu okuvyula nokunwefa mo nawa omadiladilo ovana veni. — Lesha Deuteronomion 6:4-7; Omayeletumbulo 22:6.

Ounona ohava mono ouwa ngeenge ohava tuwa omukumo nohava pandulwa. Ova pumbwa yo okupukululwa nokupewa outekuduliko. Edeulo la tya ngaho otali ke va amena opo vehe lihumbate monghedi oyo tai dulu okunyona po ehafo lavo. (Omayeletumbulo 22:15) Ashike outekuduliko kau na okuyandjwa nonyanya. — Lesha Ovakolossi 3:21.

Eendombwedi daJehova ohadi nyanyangida omambo e lili noku lili nelalakano lokukwafela ovadali nounona. Omambo oo okwa kanghamena kOmbibeli. — Lesha Epsalme 19:8, 12.

 

Lihonga shihapu

Kongeni ekwafo kuKalunga mu kale mwa hafa mohombo

Okulipula omapulo avali e li paunafangwa otaku dulu oku mu kwafela mu xwepopaleke ohombo yeni.

Nghee mu na okupongolola po omaupyakadi

Okukala netaleko liwa otaku yoolola ko ovalihomboli ovo ve na ohombo ya kola nova hafa kwaavo ve na ohombo ya nghundipala nova nyemata.

Nghee to dulu okuxumifa komesho ehafo moukwaneumbo weni

Ohole oyo Jesus a ulika oi li oshihopaenenwa osho ovashamane, ovakulukadi, ovadali nosho yo ounona tava dulu okulandula. Oshike hatu lihongo kuye?