Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Onghundana iwa ya dja kuKalunga!

 Oshileshwa 5

Elalakano laKalunga olashike li na sha nedu?

Elalakano laKalunga olashike li na sha nedu?

1. Omolwashike Kalunga a shitila edu?

Edu ola shitwa li ninge onhele yokukalwa kovanhu. Onghee hano, Kalunga ina shita ovalihomboli votete, Adam naEva, nelalakano loku ka kala meulu, molwaashi meulu okwa shitila mo nale ovaengeli. (Job 38:4, 7) Ponhele yaasho, Kalunga okwa li a tula omunhu wotete moparadisa iwaiwa hai ifanwa oshikunino shaEden. (Genesis 2:15-17) Okwa li yo e mu udanekela kutya ota ka kala nomwenyo fiyo alushe kombada yedu pamwe noludalo laye lomonakwiiwa. — Lesha Epsalme 37:29; 115:16.

Oshikunino shaEden osha li ashike sha kwata okatukulwa kanini kedu. Ovalihomboli votete, Adam naEva, ova li ve na okuyadifa edu noludalo lavo. Mokweendela ko kwefimbo, ova li ve na okufila oshisho edu alishe noku li longa ndele tali ningi oparadisa. (Genesis 1:28) Edu kali na fiku li ka hanaunwe po. Ovanhu oko tava kala fiyo alushe. — Lesha Epsalme 104:5.

2. Omolwashike edu lihe fi oparadisa kunena?

Adam naEva kava li va dulika kuKalunga nomolwaasho a li e va taataa mo moshikunino shaEden. Okudja opo, oparadisa oya kana nokape na vali omunhu a dula okuninga edu oparadisa. Ombibeli oya ti: “Edu ola yandjwa mepangelonghono lovakolokoshi.” — Job 9:24.Lesha Genesis 3:23, 24.

Ndele mbela Jehova okwa dimbwa elalakano laye lopehovelo li na sha novanhu? Hasho nandenande! Jehova omunaenghono adishe nokape na nande osha tashi dulu oku mu imba a wanife po elalakano olo. (Jesaja 45:18) Ota ka alulila ovanhu monghalo oyo a li e va halela pehovelo. — Lesha Epsalme 37:11, 34.

3. Oparadisa otai ka etululwa ngahelipi?

Oparadisa otai ka etululwa kombada yedu pefimbo opo Jesus ta ka pangela eli Ohamba yOuhamba waKalunga. Pefimbo loita yaHarmagedon, Jesus ota ka kwatela komesho ovaengeli notava ka hanauna po ovapataneki vaKalunga aveshe. Opo nee, ota ka pandeka Satana oule womido 1 000. Oshiwana shaKalunga otashi  ka xupa pefimbo olo lehanauno molwaashi Jesus ote ke shi wilika noku shi amena. Otashi ka kala yo nomwenyo fiyo alushe mOparadisa kombada yedu. — Lesha Ehololo 20:1-3; 21:3, 4.

4. Okumona oixuna otaku ka xula po naini?

Kalunga ota ka xulifa po naini owii kombada yedu? Jesus okwa li a yandja ‘edidiliko’ olo la li tali ka ulika kutya exulilo oli li popepi. Eenghalo domounyuni kunena oda tula okukalamwenyo kwovanhu moshiponga notadi ulike kutya otu li ‘pefimbo lexulilo longhalelo yoinima, NW.’ — Lesha Mateus 24:3, 7-14, 21, 22.

Momukokomoko womido 1 000, Jesus ota ka pangela edu okudja meulu nota ka xulifa po okumona oixuna akushe. (Jesaja 9:5, 6; 11:9) Kakele kaasho, oku li Omupristeri Omukulunhu nota ka dima po omatimba ovanhu ovo ve hole Kalunga. Kungaho, Kalunga ota ka xulifa po omikifi, oukulupe nosho yo efyo, te shi ningi okupitila muJesus. — Lesha Jesaja 25:8; 33:24.

5. Oolyelye tava ka kala mOparadisa monakwiiwa?

POlupale lOuhamba ohapa kala ovanhu ovo ve hole Kalunga nova hala okulihonga osho ve na okuninga opo va kale va hokiwa kuye

Ovanhu ovo hava dulika kuKalunga ovo tava ka kala mOparadisa. (1 Johannes 2:17) Jesus okwa li a tuma ovashikuli vaye va ka konge ovalininipiki noku va honga osho ve na okuninga opo va kale va hokiwa kuKalunga. Jehova ota longekida ovanhu omamiliyona mounyuni aushe kunena opo va dule oku ka kala nomwenyo mOparadisa kombada yedu. (Sefanja 2:3) Ovanhu kunena ohava hongwa mOmalupale Ouhamba Eendombwedi daJehova shi na sha nanghee tava dulu okukala ovashamane, ovakulukadi novadali ve li xwepo. Ounona novadali ohava longele Kalunga pamwe nohave lihongo kutya ongahelipi onghundana iwa tai dulu oku va etela ouwa. — Lesha Mika 4:1-4.

 

Lihonga shihapu

Elalakano laKalunga olashike li na sha nedu?

Mbela elalakano laKalunga li na sha neduparadisa oli na ngoo fiku li ka wanifwe? Ngeenge osho, otashi ka ningwa naini?