Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Onghundana iwa ya dja kuKalunga!

 Oshileshwa 8

Omolwashike Kalunga a efa oukolokoshi nokumona oixuna ku kale po?

Omolwashike Kalunga a efa oukolokoshi nokumona oixuna ku kale po?

Kalunga okwa efa ovanhu va kale tave lipangele oule wefimbo opo ve shi limonene kutya itava dulu okukandula po omaupyakadi avo

1. Oukolokoshi owa hovela naini?

Oukolokoshi owa hovela kombada yedu okudja eshi Satana a li a popya oipupulu yotetetete. Satana okwa li omweengeli a wanenena, ndele mupya munene, “ina kala moshili.” (Johannes 8:44) Okwa li a hala okukala oye ta longelwa kovanhu ponhele yokulongela Kalunga. Satana okwa li a heka omukainhu wotete, Eva, opo a kale ta dulika kuye ponhele yokukala ta dulika kuKalunga. Ngaashi Eva, Adam naye ka li a dulika kuKalunga, netokolo olo a li a ninga ola etifa okumona oixuna nosho yo efyo. — Lesha Genesis 3:1-6, 17-19.

Satana okwa tukulila ounamapangelo waKalunga oshibofa ile ondodo yaKalunga yokukala Omukombadambada eshi a heka Eva aha dulike kuKalunga. Lwanima, ovanhu vahapu navo ova li va hovela okuyambidida ounashibofa waSatana, va ekelashi Kalunga e li Omupangeli wavo. Kungaho, Satana okwa ninga “omupangeli wounyuni.” — Lesha Johannes 14:30; 1 Johannes 5:19.

2. Mbela eshito laKalunga kala li la wanenena?

Oilonga yaKalunga aishe oya li ya wanenena. Ovanhu nosho yo ovaengeli ovo Kalunga a shita ova li tava dulu okudulika koiteelelwa yaye monghedi ya wanenena. (Deuteronomion 32:4, 5) Kalunga okwe tu shita tu na emanguluko lokuhoolola okulonga ouwa ile owii. Emanguluko la tya ngaho ole tu pa omhito yokuulika kutya otu hole Kalunga ile hasho. — Lesha Jakob 1:13-15; 1 Johannes 5:3.

3. Omolwashike Kalunga a efa okumona oixuna ku kale po?

Jehova okwa kala te lididimikile ovanhu ovo va tukululila ounamapangelo waye oshibofa. Omolwashike mbela? Okwe shi ninga opo a kwafele ovanhu va mone kutya itava dulu okulipangela vo vene nopehe na ekwafo laye. (Omuudifi 7:29; 8:9) Oushili oo kutya ovanhu itava dulu okulipangela kuvo vene ou liwetikile mokutala komido 6 000 odo ovanhu va kala tava pangele. Ovapangeli  vopanhu ova nyengwa okuxulifa po oinima ngaashi oita, ominyonena, okuhenouyuki ile omikifi. — Lesha Jeremia 10:23; Ovaroma 9:17.

Ndele mepingafano naasho, ovo tava yambidida ounamapangelo waKalunga ohava mono ouwa. (Jesaja 48:17, 18) Mafiku Jehova ota ka xulifa po omapangelo aeshe opanhu, nokombada yedu otaku ka kala ashike ovo tava yambidida ounamapangelo waye. — Jesaja 11:9. — Lesha Daniel 2:44.

Omatokolo oo hatu ningi oo taa ka ufa kutya otwa hala Kalunga oye a kale Omupangeli wetu ile hasho

4. Elididimiko laKalunga ole tu pa omhito yokuninga shike?

Satana okwa ti kutya kape na omunhu ta ka longela Jehova nomalinyengotomheno a yuka. Mbela ito dulu okunyaneka pomutenya oipupulu ya tya ngaho? Nopehe na omalimbililo, oto dulu. Elididimiko laKalunga ola pa keshe umwe omhito a ulike kutya ota yambidida ounamapangelo waYe ile ovapangeli vopanhu. Onghedi yetu yokukalamwenyo oyo tai ufa kutya otwa ama kombinga yalyelye. — Lesha Job 1:8-12; Omayeletumbulo 27:11.

5. Ongahelipi hatu dulu okuulika kutya otwa hala Kalunga oye a kale omupangeli wetu?

Ohatu dulu okuulika kutya otwa hala Jehova oye a kale Omupangeli wetu mokukala tu li melongelokalunga lashili nokuninga oinima metwokumwe naasho sha popiwa mEendjovo daye, Ombibeli. (Johannes 4:23) Ngaashi Jesus, nafye otu na okuhenuka okukufa ombinga moinima yopapolitika nosho yo moita. — Lesha Johannes 17:14.

Satana oha longifa eenghono daye opo a xumife komesho oluhaelo nosho yo eenghedi dikwao da nyata. Ookaume ketu nosho yo ovapambele vetu vamwe otashi dulika va kale tave tu kembaula ile tave tu pataneke ngeenge otwa kala ihatu kufa vali ombinga moinima ya tya ngaho. (1 Petrus 4:3, 4) Onghee hano, otu na okukala twa tokola kutya oshike hatu ka ninga po. Mbela ohatu ka endafana ngoo novanhu ovo ve hole Kalunga? Ohatu ka dulika ngoo keemhango daye dopahole nodi li pandjele? Ngeenge osho twa ningi ngaho, ohatu ka ulika kutya Satana okwa li a popya oipupulu eshi a ti kutya kape na omunhu ta ka kala omudiinini kuKalunga ngeenge e li meenghalo didjuu. — Lesha 1 Ovakorinto 6:9, 10; 15:33.

Otu na oushili kutya Kalunga ota ka xulifa po oukolokoshi nosho yo okumona oixuna molwaashi omunahole. Ovo ve na eitavelo mwaasho, otava ka kala nomwenyo kombada yedu fiyo alushe. — Lesha Johannes 3:16.

 

Lihonga shihapu

Omolwashike Kalunga a efa okumona oixuna ku kale po?

Ovanhu vahapu ohava ti Kalunga oye a etifa okumona oixuna akushe oko ku li mounyuni. Ove oto diladila ngahelipi? Lihonga kutya Kalunga okwa ti shike shi na sha naasho sha etifa okumona oixuna.