Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Onghundana iwa ya dja kuKalunga!

 Oshileshwa 12

Ongahelipi to dulu okweehena popepi naKalunga?

Ongahelipi to dulu okweehena popepi naKalunga?

1. Kalunga oha pwilikine ngoo komailikano aeshe?

Kalunga okwa pa ovanhu vomoiwana aishe oufembanghenda wokweehena popepi naye okupitila meilikano. (Epsalme 65:3) Ndele nande ongaho, iha pwilikine komailikano aeshe. Pashihopaenenwa, Kalunga ita ka pwilikina komailikano omushamane oo iha ungaunga nawa nomukulukadi waye. (1 Petrus 3:7) Kalunga ka li ha pwilikine komailikano Ovaisrael ngeenge va li tava twikile okulonga owii. Osha yela kutya eilikano oli li shili oufembanghenda. Ashike Kalunga oha pwilikine komailikano nokuli naa ovanhu ovo va li va nyona sha kwata moiti, ndele tave livele ombedi. — Lesha Jesaja 1:15; 55:7.

2. Otu na okwiilikana ngahelipi?

Molwaashi eilikano oli li oshitukulwa shelongelokalunga letu, otu na okwiilikana ashike kOmushiti wetu, Jehova. (Mateus 4:10; 6:9) Tu li ovanhu inava wanenena, otu na yo okwiilikana okupitila medina laJesus molwaashi oye e tu fila omolwomatimba etu. (Johannes 14:6) Jehova ina hala tu kale twa kopela momutwe ile twa shanga omailikano etu. Okwa hala tu kale hatu mu ilikana tashi di komutima. — Lesha Mateus 6:7; Ovafilippi 4:6, 7.

Omushiti wetu oha udu nokuli nomailikano oo taa ilikanwa momutima. (1 Samuel 1:12, 13) Okwe tu shiva tu kale hatu mu ilikana pomhito keshe, kutya nee ongula, okonguloshi, ongeenge hatu li ile twa taalela omaupyakadi. — Lesha Epsalme 55:23; Mateus 15:36.

3. Omolwashike Ovakriste hava ongala pamwe?

Kashipu okweehena popepi naKalunga molwaashi otwa dingililwa kovanhu ovo vehe na eitavelo muye nohava kembaula eudaneko laye olo kutya ota ka eta ombili kombada yedu. (2 Timoteus 3:1, 4; 2 Petrus 3:3, 13) Onghee hano, otwa pumbwa okukala hatu endafana novaitaveli vakwetu opo tu tungafane. — Lesha Ovaheberi 10:24, 25.

 Okukala hatu endafana novanhu ovo ve hole Kalunga otaku ke tu kwafela tu ehene popepi naye. Okwoongala kwEendombwedi daJehova ohaku tu pe omhito iwa yokutungafana. — Lesha Ovaroma 1:11, 12.

4. Ongahelipi to dulu okweehena popepi naKalunga?

Oto dulu okweehena popepi naJehova mokukala ho dilonga kwaasho we lihonga mEendjovo daye. Kala yo ho dilonga koilonga yaye, komayele oo he tu pe nosho yo komaudaneko aye. Okudilonga pamwe neilikano kwa tya ngaho otaku ke tu kwafela tu kulike olupandu lokupandula Kalunga momitima detu omolwohole nounongo waye. — Lesha Josua 1:8; Epsalme 1:1-3.

Oto ka ehena ashike popepi naKalunga ngeenge owe mu lineekela nowa itavela muye. Ndele eitavelo ola fa oshinamwenyo osho sha pumbwa okupalulwa. Ou na okukala ho tungu alushe eitavelo loye mokukala ho dilonga kwaasho wa itavela. — Lesha Mateus 4:4; Ovaheberi 11:1, 6.

5. Ongahelipi okweehena popepi naKalunga taku dulu oku ku etela ouwa?

Jehova oha file oshisho ovo ve mu hole. Ohe va amene kukeshe osho tashi dulu okunyona po eitavelo lavo ile tashi va imbi va kale ve na eteelelo lomwenyo waalushe. (Epsalme 91:1, 2, 7-10) Ohe tu londwele tu henuke okukala neenghedi dokukalamwenyo odo tadi nyono po oukolele nehafo letu. Jehova ohe tu kwafele yo tu kale nonghedi yokukalamwenyo ei ya denga mbada. — Lesha Epsalme 73:27, 28; Jakob 4:4, 8.

 

Lihonga shihapu

Omolwashike u na okukonakona Ombibeli?

Ombibeli otai kwafele ovanhu omamiliyona mounyuni aushe va mone omanyamukulo omapulo oo a fimanenena monghalamwenyo. mbela ino hala okukala umwe womuvo?

Ehena popepi naKalunga okupitila meilikano

Mbela Kalunga oha pwilikine ngoo komailikano oye? Opo u nyamukule epulo olo, tete ou na okushiiva kutya Ombibeli otai hongo shike kombinga yeilikano.