Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Honga ounona voye

 ETUKULWA 2

Rebekka okwa li a hala okuhafifa Jehova

Rebekka okwa li a hala okuhafifa Jehova

Rebekka okwa li omukainhu oo e hole Jehova. Okwa li a hombolwa kuIsak. Isak naye okwa li e hole Jehova. Ndele mbela ou shii kutya osha enda ngahelipi opo Isak naRebekka va hombole? Rebekka okwa li e shi ulika ngahelipi kutya okwa li ha kala a hala okuhafifa Jehova? Onawa ngeenge otwe lihongo shihapu kombinga yaye.

Isak okwa li omona waAbraham naSara. Abraham noukwaneumbo waye ova li hava kala muKanaan. Ashike ovanhu vomuKanaan kava li hava longele Jehova. Abraham okwa li a hala omona waye, Isak, a hombole omukainhu oo ha longele Jehova. Onghee hano, Abraham okwa li a tuma omupiya waye umwe opo a ka kongele Isak omukulukadi kuHaran, oko kwa li ku na ovapambele vaye vamwe. Omupiya oo otashi dulika a li Eliaser.

Rebekka okwa li ta longo noudiinini nehalo liwa eshi a kala ta xwiile eengamelo

Eliaser okwa li a ya pamwe novapiya vakwao vaAbraham molweendo olo lile. Ova li va ya neengamelo omulongo da humbata oikulya nosho yo eeshali. Mbela Eliaser okwa li ta ka dula okumona ngahelipi omukainhu oo ta wapalele Isak? Eshi Eliaser novapiya vakwao va fika muHaran, ova li va tula pomufima wonhumba, molwaashi Eliaser okwa li e shii kutya ovanhu ove li pokuuya okuteka omeva. Nokwa li a ilikana kuJehova a ti: ‘Omukainhu omunyasha oo handi ka indila a pe nge omeva okunwa, ndele te a pe nge nokuxwiila yo eengamelo dange, osha yela kutya omukainhu oo oye wa hoolola.’

 Opo nee okwa dja omukainhu omunyasha wedina Rebekka. Ombibeli oya ti kutya Rebekka okwa li omukainhu muwa. Eshi Eliaser a ehela Rebekka omeva okunwa, Rebekka okwa nyamukula a ti: ‘Handi ya ndi ku pe u nwe mo, nohandi ka xwiila yo eengamelo doye.’ Dimbuluka kutya eengamelo ohadi nu omeva mahapu lela ngeenge da fya enota. Ndele nande ongaho, Rebekka okwa kala ta ka teka momufima lwoikando ihapu nokuxwiila eengamelo odo fiyo da kumwa. Mbela ou wete Rebekka mefano olo eshi ta longo noudiinini?— Eliaser okwa li a kumwa lela eshi a mona nghee Jehova a nyamukula eilikano laye.

Opo nee Eliaser okwa pa Rebekka eeshali dihapu. Rebekka okwa li a shiva Eliaser novapiya vakwao keumbo lavo. Eshi va fika meumbo, Eliaser okwa popya osho a tumwa kuAbraham nosho yo nghee Jehova a li a nyamukula eilikano laye. Oukwaneumbo wooRebekka owa li we mu efa nombili a ka hombolwe kuIsak.

Rebekka okwa li a ya pamwe naEliaser kuKanaan ndele ta hombolwa kuIsak

Oto ti ngahelipi, mbela Rebekka okwa li ngoo a hala oku ka hombolwa kuIsak?— Rebekka okwa li e shii kutya Eliaser okwa tumwa kuJehova. Onghee hano, eshi ovakulunhu vaye ve mu pula ngeenge okwa hala okuya kuKanaan a ka hombolwe kuIsak, okwa nyamukula a ti: ‘Heeno, onda hala okuya.’ Opo nee ova ya pamwe naEliaser. Eshi va fika muKanaan, Rebekka okwa hombolwa kuIsak.

Molwaashi Rebekka okwa li ha dulika kuJehova, Jehova okwa li e mu nangeka noupuna. Konima yomido dihapu, Jesus okwa ka dalwa mepata looRebekka. Ngeenge naave owa kala ho hafifa omutima waJehova ngaashi Rebekka, naave oto ka nangekwa yo noupuna.

LESHA MOMBIBELI YOYE

  • Genesis 12:4, 5; 24:1-58, 67