Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Honga ounona voye

 ETUKULWA 12

Omutekulu waPaulus ka li ha tila

Omutekulu waPaulus ka li ha tila

Otwa hala oku ke lihonga kombinga yomunyasha oo a li a xupifa xekulu. Xekulu yomunyasha oo omuyapostoli Paulus. Katu shii edina lomutekulu waPaulus, ashike otu shii oshinima shimwe osho tashi ulike kutya ka li ha tila nandenande. Mbela owa hala okuuda kombinga yoshinima osho a li a ninga?—

Pefimbo opo, Paulus okwa li e li modolongo muJerusalem. Okwa li a kwatwa po molwaashi okwa li ha udifile ovanhu kombinga yaJesus. Ashike opa li ovalumenhu vamwe ovakolokoshi ovo va li ve tonde Paulus nova li va ninga omhangela yoku mu dipaa. Ova ti: ‘Natu puleni omukulunhu wovakwaita a lombwele ovakwaita vaye va ete Paulus komhangu. Fye ohatu ka hondama momunghulo wondjila opo eshi Paulus ta ende po ohatu mu dipaa.’

Omutekulu waPaulus okwa li a lombwela Paulus nomukulunhu wetanga lovakwaita kombinga yaavo va li va hala okudipaa Paulus

Omutekulu waPaulus okwa li a uda kombinga yomhangela oyo. Mbela omutekulu okwa li a ninga po shike? Okwa li a ya kodolongo ndele te shi lombwele Paulus. Paulus okwe mu lombwela e ke shi lopote meendelelo komukulunhu wetanga lovakwaita. Eshi to diladila osha li ngoo shipu komutekulu waPaulus oku ka popya nomukulunhu wetanga lovakwaita?— Kasha li shipu molwaashi omulumenhu oo okwa li omunhu a fimana. Ndele molwaashi omutekulu waPaulus ka li ha tila, okwa ya a ka popye nomukulunhu wetanga lovakwaita.

Omukulunhu wetanga lovakwaita okwa li e shii filufilu kutya oshike e na okuninga po. Okwa ifana ovakwaita 500 lwaapo va amene Paulus, ndele ta ti nave mu twale kuKesarea onguloshi yefiku olo. Mbela Paulus okwa li ngoo a xupa?— Osho naanaa, molwaashi ovalumenhu venya ovakolokoshi inava mona omhito yoku mu ponokela. Inava dula okuninga ngaashi va li va diladila.

Oshike we lihonga mehokololo eli?— Owa pumbwa okukala iho tila ngaashi omutekulu waPaulus. Nafye inatu pumbwa okukala twa tila okulombwela vamwe kombinga yaJehova. Mbela owe lilongekida ngoo okulombwela vamwe kombinga yaJehova?— Ngeenge osho, otashi dulika u ka xupife vamwe.

LESHA MOMBIBELI YOYE

  • Oilonga 23:12-24

  • Mateus 24:14; 28:18-20

  • 1 Timoteus 4:16