Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Honga ounona voye

 ETUKULWA 4

Okakadona oko ka li ka hafifa xe nosho yo Jehova

Okakadona oko ka li ka hafifa xe nosho yo Jehova

Jefta okwa li a udanekela Jehova shike?

Nonande kasha li shipu, okamonakadona kaJefta oka li ka wanifa po eudaneko laxe

Okakadona oko ke li mefano ou ka wete?— Okamonakadona kaJefta. Ombibeli inai tumbula edina lokakadona oko, ndele otu shii kutya oka li ka hafifa xe Jefta nosho yo Jehova. Onawa ngeenge hatu lihongo shihapu kombinga yokakadona oko nosho yo xe Jefta.

Jefta okwa li omushamane e li nawa nokwa li ha hongo luhapu okamonakadona kaye kombinga yaJehova. Okwa li yo e na eenghono nokwa li omuwiliki muwa. Nomolwaasho, Ovaisrael ova li ve mu pula e va wilike eshi tava ka lwifa ovatondi vavo.

Jefta okwa li a pula ekwafo kuJehova opo a findane. Okwa li a udanekela Jehova kutya ngeenge okwe mu kwafele a findane moita, ote ke mu pa omunhu oo te uya oku mu shakeneka tete okudja meumbo laye eshi ta di koita. Omunhu oo okwa li ta ka kala ha di nokulonga ketwalihangano laKalunga  onghalamwenyo yaye aishe. Etwalihangano ola li onhele oko ovanhu va li hava i va ka ilikane Kalunga pefimbo olo. Jefta okwa ka findana moita. Mbela ou shii kutya olyelye e uya oku mu shakeneka tete eshi a alukila keumbo?—

Okamonakadona kaye! Okamonakadona oka li ka dalwa oko akeke, ndele paife xe okwa li e na oku ka yandja po kuJehova. Jefta okwa li a nyemata neenghono. Ndele dimbuluka kutya okwa li a ninga eudaneko. Okamonakadona oka ti kuye: ‘Tate, molwaashi owa udanekela Jehova, ou na ashike okuwanifa po eudaneko loye.’

Omudo keshe, ookahewa vokamonakadona kaJefta ova li have ke ka talela po

Okamonakadona kaJefta nako oka li ka nyemata neenghono, molwaashi ngeenge oka i ketwalihangano, itaka dulu okuhombolwa nokudala ounona. Ndele oka li ka halelela xe a wanife po eudaneko laye noka li yo ka hala okuhafifa Jehova. Osho osha li sha fimana unene kuko shi dulife okuhombolwa nokudala ounona. Onghee hano, oka li ka ya ketwalihangano, oko ka kala taka longele Jehova onghalamwenyo yako aishe.

Mbela ito dimine kutya oka li ka hafifa xe nosho yo Jehova?— Osho naanaa! Ngeenge owa kala u hole Jehova nokudulika kuye oto ka kala wa fa okamonakadona kaJefta. Naave oto ka hafifa neenghono ovadali voye nosho yo Jehova.

LESHA MOMBIBELI YOYE

  • Deuteronomion 6:4-6

  • Ovatokolipangeli 11:30-40

  • 1 Ovakorinto 7:37, 38