Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Honga ounona voye

 ETUKULWA 10

Jesus okwa li ha dulika alushe

Jesus okwa li ha dulika alushe

Ohashi kala ngoo alushe shipu kwoove okudulika kovadali voye?— Omafimbo amwe ohashi kala shidjuu. Ndele owe shi shiiva ngoo kutya Jesus okwa li ha dulika kuJehova nosho yo kovadali vaye?— Oshihopaenenwa shaye shokudulika otashi ku kwafele u kale ho dulika kovadali voye, nonande haalushe hashi kala shipu. Natu ke lihonge shihapu shi na sha naasho.

Fimbo Jesus ine uya kombada yedu, okwa li pamwe naXe, Jehova, meulu. Ndele eshi e uya kombada yedu, okwa li e na ovadali vokombada yedu. Ovadali ovo ova li Josef naMaria. Mbela ou shii kutya osha enda ngahelipi opo va ninge ovadali vaye?—

Jehova okwa li a lundululila omwenyo waJesus womeulu medimo laMaria opo Jesus a dule okudalwa noku kale nomwenyo kombada yedu. Osho kasha li tuu oshikumwifilonga shinene! Jesus okwa li a kulila medimo laMaria, ngaashi ashike ounona hava kulile momadimo oomeme vavo. Konima eshi pwa pita eemwedi omuwoi, Jesus okwa ka dalwa. Molwaashi Josef okwa hangwa a hombola Maria, kungaho Josef naMaria ova ninga ovadali vaJesus.

Ofimbo Jesus a li e na eedula 12, okwa li a ninga oshinima osho tashi ulike kutya oku hole neenghono Xe, Jehova. Osho osha ningwa eshi Jesus noukwaneumbo wavo va li va ka dana Opaasa kuJerusalem, osho sha li kokule neenghono noshilando shambulavo. Ohaluka fimbo tava shuna, Josef naMaria ova ka kala vehe wete Jesus. Mbela ou shii kutya okwa li peni?—

Jesus okwa li ta ningi shike motembeli?

Josef naMaria ova li va shuna diva kuJerusalem nova li tava kongo Jesus keshe pamwe. Ova li tave lipula unene eshi vehe mu wete. Ndele konima yomafiku atatu, ove mu hanga motembeli. Mbela ou shii kutya Jesus okwa li ta ningi shike motembeli?— Okwa li e li motembeli molwaashi okwa li a hala okulihonga shihapu kombinga yaXe Jehova. Okwa li e hole Jehova nokwa li a hala okulihonga kombinga yanghee ta dulu oku mu hafifa. Nokuli naashi a ninga omukulunhu, okwa li ha dulika alushe kuJehova. Jesus okwa li ha dulika nokuli nonande omafimbo amwe kasha li shipu ile e shii kutya oku na okumona oixuna. Ndele mbela Jesus okwa li ngoo ha dulika kuJosef naMaria?— Ombibeli otai ti kutya okwa li ha dulika kuvo.

Oshike we lihonga moshihopaenenwa shaJesus?— Owa pumbwa okukala ho dulika kovadali voye, nonande omafimbo amwe ihashi kala shipu. Mbela osho ngoo to ka kala to ningi?—

LESHA MOMBIBELI YOYE

  • Lukas 1:30-35; 2:45-52

  • Ovaefeso 6:1

  • Ovaheberi 5:8