Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

ONGHALAMWENYO YOPAKRISTE NOILONGA YOKUUDIFA–OKAFO KOKULONGIFWA POKWOONGALA NOVEMBA 2016

 OKUKALA OMUKRISTE WASHILI

Nghee tu na okulongifa embo Oshike hatu lihongo mOmbiibeli?

Nghee tu na okulongifa embo Oshike hatu lihongo mOmbiibeli?

Embo Lihonga mOmbiibeli nosho yo Ombibeli otai hongo okwa faafana. Aeshe oku li oilongifo yokuhonga, notaa hongo oshili ya faafana momukalo umwe auke. Ashike, embo Lihonga mOmbiibeli oli na oitya i li paunafangwa noya yela nawa. Ola nuninwa unene ovanhu ovo shidjuu kuvo okuuda ko embo Ombibeli otai hongo. Ponhele yoshiwedelwako, embo Lihonga mOmbiibeli oli na omafatululo oitya nola ngonga pauxupi omautumbulilo oitya imwe noitwa oyo ya fimana. Omatukulwa kae na omapulo opehovelo ile okamhungu komanyamukulo. Ponhele yaasho, pexulilo letukulwa keshe, ope na oitwa oyo ya yelifa oitwa ya fimana ile enenediladilo. Ngaashi ashike embo Ombibeli otai hongo, embo Lihonga mOmbiibeli nalo oto dulu okuliyandja efimbo keshe nonande ita li yandjwa omwedi oo. Ongahelipi u na okulongifa oitwa oyo ngeenge tamu konakona Ombiibeli naumwe?

ENGONGO: Ovanhu vahapu, ova ikilila onghedi yokulesha tete okatendo opo nee tava pula nawa epulo ngeenge tava konakona Ombiibeli naumwe. Natu tye nee ngeno omukonakoni ke udite ko nawa elaka ile ke shii okulesha nawa. Monghalo ya tya ngaho, oto dulu ashike okukonakona tamu longifa engongo letukulwa ndele to ladipike omukonakoni a leshe oitwa oyo ya fimana. Oshitwa shimwe osha wana okukundafanwa poshikando shimwe moule ashike wominute 15. Molwaashi engongo inali kwatela mo oinima aishe oyo ya popiwa metukulwa, omuhongi oku na okulilongekida nawa nokukaleka momadiladilo eemhumbwe domukonakoni waye. Ngeenge omwa konakona etukulwa pamwe nomukonakoni, engongo otali dulu okulongifwa li li onga eendululo.

OMAFATULULO OITYA: Omafatululo oitya oyo okwa fatululwa naanaa ngaashi ashike e li metukulwa lovenevene. Ngaashi ashike oiwedelwako yembo Ombibeli otai hongo, omuhongi ota dulu okutokola ngeenge otava kundafana omafatululo oitya eshi tava konakona etukulwa pefimbo opo.