Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 OKUKALA OMUKRISTE WASHILI

Xwepopaleka ounghulungu woye moukalele — Nghee hatu dulu okushanga eenhumwafo tadi ti sha

Xwepopaleka ounghulungu woye moukalele — Nghee hatu dulu okushanga eenhumwafo tadi ti sha

OMOLWASHIKE SHA FIMANA: Embo lOvakorinto votete olo limwe lomeenhumwafo 14 detwomukumo odo omuyapostoli Paulus a shangela Ovakriste vakwao. Nakushanga onhumwafo oha hoolola noukeka oitya oyo ta longifa, nomunhu oo a shangelwa onhumwafo oha dulu oku i leshulula lwoikando. Eenhumwafo odi li onghedi iwa yokuyandja oundombwedi kovapambele nosho yo kookaume. Odi li yo onghedi iwa yokuyandja oundombwedi kovanhu ovo ihatu dulu okupopya navo odikilila. Pashihopaenenwa, otashi dulika tu mone omunhu e na ohokwe, ashike ihatu mu hange mo meumbo. Vamwe otashi dulika shidjuu okupopya navo molwaashi ove li meenhele da amenwa ile de likalela noihamu dulu okwiiwa. Oinima imwe ilipi tu na okukaleka momadiladilo ngeenge hatu shangele ovanhu ovo tuhe shii nale eenhumwafo?

NGHEE HATU DULU OKU SHI NINGA:

  • Shanga osho wa li u na oku mu lombwela ngeno owe mu shakenekele komudidi. Popya kutya oove lyelye pehovelo lonhumwafo nosho yo kutya omolwashike to mu shangelele. Oto dulu okushanga mo epulo olo tali mu kwafele a diladile, ndele to mu lombwele a ye kepandja letu lokointaneta. Mu lombwela kombinga yoileshomwa i na sha nokukonakona Ombiibeli oyo tai hangwa kointaneta, kombinga yokukonakona Ombiibeli peumbo oshali nokutumbula omatukulwa amwe oo taa hangwa moishangomwa yetu yokukonakona. Mekutu oto dulu okutula mo okakalata kepandja letu, okafo keshivo ile okafo keshe.

  • Nai kale pauxupi. Onhumwafo yoye inai kala ile opo iha lolokife omuleshi. — Tala oshihopaenenwa shonhumwafo

  • Leshulula mo u tale ngeenge kamu na omapuko, nai kale ya shangwa nawa noya yela. Shilipaleka kutya kekutu loye owa tula ko eestambe da wana.