Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 OSHIPALANYOLE SHOKOMBADA | OVALONDINGHAMBE VANE OVE KU KUMA NGAHELIPI?

Ovalondinghambe vane ove ku kuma ngahelipi?

Ovalondinghambe vane ove ku kuma ngahelipi?

Kala nee wa fa u udite taku ti pu-ku-tu-pu-ku-tu eshi eenghambe nhee di na eenghono tadi tondoka. Eenghambe odo novalondi vado ova hokololwa monghedi ya twa nomolwaasho otashi ningifa omunhu u kale wa fa u di udite tadi denge omakondo pedu ngeenge to lesha mOmbiibeli. Onghambe yotete oitoka, nomulondi wayo ohamba opo ya dikwa oshikoroni noya tumbala. Konima yaye oku na onghambe itilyana, i na omulondi ta kufa ko ombili kombada yedu alishe. Onghambe onhinhatu oilaula fokofoko, i na omulondi a humbata oshiyelekifo sha londekwa osho sha ningifa oikulya i kale i na ondilo neenghono. Onghambe onhine oi na oluvala lombashe olo la fa oshinima sha pemba, tai tetekele efyo nosho yo eenghalo dimwe dinyanyalifa, ya londwa kefyo lo vene. Oya landulwa koshovafi, ile tu tye kombila, omo hamu i ovanhu vahapu. — Ehololo 6:1-8.

Crystal okwa ti: “Potete onda li nda tila eshi nda li handi lesha kombinga yovalondinghambe vane. Onda li ndi wete Efiku lEtokolo li li pokuuya, nomolwaashi ngha li nde lilongekida, onda li ndi wete kutya itandi ka xupa.”

Ed okwa ti: “Onda li nda kuminwa ovalondinghambe vane va yoolokafana ve li keenghambe domaluvala a yoolokafana. Eshi nda uda ko kutya emoniko olo otali ti ngahelipi, onda li ndi li udite ko nawa.”

Mbela naave owa li u udite ngaashi Crystal kombinga yovalondinghambe vane vomEhololo? Ile owa li u udite ngaashi Ed? Kutya nee owa li u udite ngahelipi, emoniko lovalondinghambe olo la hokololwa mEhololo, embo laxuuninwa lOmbiibeli, ola shiivika nawa. Mbela ou shii ngoo kutya oto dulu okumona ouwa ngeenge owa udu ko emoniko olo? Ngahelipi mbela? Kalunga okwa udaneka kutya oto dulu okumona ehafo lashili ngeenge owa lesha, we lihongo nokukala metwokumwe noinima oyo ya shangwa membo olo lopaxunganeko. — Ehololo 1:1-3.

Nonande vamwe ohava tilifwa kemoniko olo lovalondinghambe vane, inali nuninwa oku ku tilifa. Paulelalela, eitavelo lovanhu omamiliyona ola pamekwa kemoniko olo nole va kwafela nokuli va kale ve na eteelelo la twa li na sha nonakwiiwa. Naave otali dulu oku ku kwafela. Alikana twikila okulesha.