Inda koshikalimo

Inda koshikalimo

Eendombwedi daJehova

Hoolola elaka Oshikwanyama

Ondi hole okukala pamwe novanyasha meongalo

 OMBIIBELI OHAI LUNDULULA ONGHALAMWENYO YOVANHU

Onda li ndi hole oudano woBaseball shi dulife oinima aishe

Onda li ndi hole oudano woBaseball shi dulife oinima aishe
  • ODULA OMO A DALWA: 1928

  • OSHILONGO OMO A DALELWA: COSTA RICA

  • ONAKUDIWA: OKWA LI E HOLE NEENGHONO OMAUDANO OVASHIIVINAWA NOKUNDOBOLA

ONGHALAMWENYO YANGE YONALE

Onda kulila muPuerto Limón, nomo nda kala, oshilando shi na etuliloshikepa koushilo womunghulofuta waCosta Rica. Ovadali vange ova li ve na ounona vahetatu, ame omutiheyali. Tate okwa fya fimbo nda li ndi na eedula hetatu. Konima yaasho, meme okwe tu tekula oye aeke.

Onda kala nde litula mokudana obaseball. Onda li handi hafele oudano oo eshi nda li okaana. Eshi nda wanifa eedula omulongo nasha, onda li nda djoina oshipaana ihe na ounghulungu mokudana. Fimbo nda li handi dana moshipaana oyo eshi nda li ndi na eedula 20 nasha, omushiivinawa umwe okwa li a pula nge ndi ka danene oshipaana imwe i na ounghulungu moNicaragua. Ashike molwaashi meme okwa li ta ehama pefimbo opo, nonda li handi mu file oshisho, kanda li nda hala okuya koNicaragua. Onghee onda li nda anya eindilo olo. Konima yefimbo, omushiivinawa umwe vali okwa li a pula nge ndi ka danene oshipaana yopashiwana yobaseball yaCosta Rica, i na ovadani va hoololwa moshipaana yaavo vehe na ounghulungu. Pomhito oyo, onda li nda tambula ko eshivo olo. Onda kala handi danene oshipaana yopashiwana okudja 1949 fiyo 1952, nonda kala handi dana omaudano manene moCuba, Mexico nomoNicaragua. Onda li handi dana poutivali nopoutitatu, handi dulu okudana lwoikando 17 inandi ninga epuko lasha. Onda li handi kala nda hafa ngeenge ovanhu tava ingida edina lange.

Mupya munene, onda li yo ndi na onghalamwenyo inai koshoka paenghedi. Nonande onda li ndi na okakadona kamwe, efimbo keshe onda li handi kala ndi na ovakainhu vamwe vali. Onda li handi nu neenghono. Efiku limwe onda li nda kolwa neenghono ndele eshi nda penduka ongula kanda li handi dimbuluka kutya onda alukila ngahelipi keumbo. Onda li yo nda ndobola.

Fimbo nda li nonghalamwenyo ya tya ngaho, meme okwa ninga Ondombwedi yaJehova. Okwa li a kendabala okuhokwifa nge eitavelo laye, ndele ka li a pondola potete molwaashi onda li nde litula neenghono moudano. Ngeenge nda li mokapale handi lideula pefimbo lokulya, kanda li nokuli handi udu ondjala. Omadiladilo ange okwa li ashike haa kala a yandja elitulemo koudano. Onda li ndi hole obaseball shi dulife oinima aishe.

 Ashike eshi nda li ndi na eedula 29, onda li nda mona oshiponga neenghono fimbo nda li handi kendabala okukwata etanga pefimbo loudano. Eshi nda veluka, onda efa po okudana omaudano. Ashike nande ongaho onda kala nde lipyakidila nokuunganeka obaseball mokudeula ovadani moshipaana yaavo vehe na ounghulungu poushiinda shetu.

NGHEE OMBIIBELI YA LUNDULULA ONGHALAMWENYO YANGE

Mo 1957, onda li nda tambula ko eshivo lokuya koshoongalele shoshitukulwa shEendombwedi daJehova osho sha li tashi ka ningilwa mokapale omo nda li handi dana obaseball. Eshi nda li poshoongalele, onda li nda mona kutya Eendombwedi odi na elihumbato liwa di dule edundakano olo nda mona mokati kovanhu pefimbo loudano wobaseball. Osho nda mona poshoongalele oshe linyengifa nge ndi hovele okukonakona Ombiibeli nEendombwedi nokuya kokwoongala kwado.

Onda li nde linyengifwa komahongo mahapu Ombiibeli oo nde lihonga. Pashihopaenenwa, Jesus okwa xunganeka kutya momafiku axuuninwa ovahongwa vaye otava ka udifa onghundana iwa yOuhamba waKalunga mounyuni aushe. (Mateus 24:14) Onde lihonga yo kutya Ovakriste vashili ihava wanifa po oukalele wavo opo ngeno va mone oimaliwa. Jesus okwa ti: “Onye mwa tambula oshali, yandjeni yo oshali.” — Mateus 10:8.

Eshi nda konakona Ombiibeli, onda yelekanifa osho tai ti naasho nda mona mokati kEendombwedi daJehova. Onda li nda lenga oilonga yado youdiinini yokutandavelifa onghundana iwa yOuhamba waKalunga mounyuni aushe. Onda mona kutya ove na omhepo yokuyandja oyo Jesus a lombwela Ovakriste va ulike. Nomolwaasho eshi nda lesha Markus 10:21 nokumona eshivo laJesus li na sha ‘nokuninga omushikuli waye,’ onda li nda hala okuninga Ondombwedi.

Ashike osha li sha pula nge efimbo opo ndi ninge omatokolo. Pashihopaenenwa, oule womido onda kala handi dana onomola yelao oshivike keshe mokundobola. Ndele onda li nde lihonga okudja mOmbiibeli kutya Kalunga okwa tokola ovalongeli ‘voshikalunga shelao’ nosho yo ovanalwisho. (Jesaja 65:11; Ovakolossi 3:5) Onghee onda li nda tokola okweefa po okundobola. Osoondaxa shotete okudja eshi nda efa po okundobola, onomola yange yelao oya findana. Ovanhu ova li tava sheke nge molwaashi inandi dana oshivike osho, nova li tava fininike nge neenghono ndi ndobole vali, ashike inandi shi ninga. Okudja opo inandi hetekela vali okundobola.

Onda li nda shakeneka eyeleko limwe vali li na sha ‘nounhu mupe’ mefiku olo nda ninginifwa poshoongalele shoshitukulwa shEendombwedi daJehova. (Ovaefeso 4:24) Konguloshi yefiku olo, onda li nda shuna kohotela oko nda li ndele handi hange okakadona kange konale ka teelela nge pondje poshivelo shonduda yange. Oka li ka ladipika nge ka ti: “Ino ninga nge ngaho mukwetu Sammy. Natu hafele pamwe.” Ashike onda li nda nyamukula diva nda ti: “Ahowe!” Onda li nde ka dimbulukifa kutya paife ohandi dulika komifikamhango dopaenghedi dOmbiibeli. (1 Ovakorinto 6:18) Okakadona oka pula mokule ka ti: “Oshike?” Opo nee oka sheka etaleko lOmbiibeli li na sha noluhaelo ndele taka kondjifa nge kutya natu lishunine. Ashike onde ka fiya po ndele handi i monduda yange nokupata omuvelo. Kunena, onda hafa molwaashi okudja eshi nda ninga Ondombwedi mo 1958, onda kala omudiinini komalunduluko oo nda ninga monghalamwenyo yange.

OUWA OO NDA MONA

Ondi udite nda pumbwa okushanga embo li na sha nomauwa oo nda mona mokulandula ewiliko lOmbiibeli. Omauwa amwe oyoo kutya paife ondi na ookaume vashili, ondi na elalakano monghalamwenyo nonda hafa shili.

Ohandi hafele obaseball, ashike onda lundulula etaleko lange. Onda li nda mona oimaliwa nonda kala nda fimanekwa omolwokudana obaseball, ashike oinima oyo inai kalelela. Ndele ekwatafano lange naKalunga nosho yo novamwatate otali kalelele. Ombiibeli oya ti: “Ounyuni otau xulu po pamwe nokahalu kao; ndelenee ou ta longo ehalo laKalunga, oye ta kala alushe.” (1 Johannes 2:17) Paife ondi hole Jehova Kalunga noshiwana shaye shi dulife oinima aishe.