Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NO. 1 2017

 OSHIPALANYOLE SHOKOMBADA | NGHEE TO DULU OKUMONA OUWA MUHAPU NGEENGE TO LESHA OMBIIBELI

Ongahelipi Ombiibeli tai dulu okuxwepopaleka onghalamwenyo yange?

Ongahelipi Ombiibeli tai dulu okuxwepopaleka onghalamwenyo yange?

Ombiibeli kai fi embo longaho, ndele oi na omayele a dja kOmushiti wetu. (2 Timoteus 3:16) Etumwalaka layo otali dulu oku tu nwefa mo neenghono. Ombiibeli oya ti: “Ondjovo yaKalunga oi nomwenyo neenghono.” (Ovaheberi 4:12) Oi na eenghono okuxwepopaleka onghalamwenyo yetu meenghedi mbali da fimana, oku tu pa ewiliko monghalamwenyo yetu yakeshe efiku paife noku tu kwafela tu shiive Kalunga nomaudaneko aye. — 1 Timoteus 4:8; Jakob 4:8.

Otai dulu okuxwepopaleka onghalamwenyo yoye paife. Ombiibeli otai dulu oku ku kwafela moinima yopaumwene. Otai yandje omayele taa kwafa kombinga yoinima tai landula.

  •   Ekwatafano navamwe. — Ovaefeso 4:31, 32; 5:22, 25, 28, 33.

  • Oukolele wopamaliudo nowopalutu. — Epsalme 37:8; Omayeletumbulo 17:22.

  • Elihumbato lopaenghedi. — 1 Ovakorinto 6:9, 10.

  • Ouxupilo. — Omayeletumbulo 10:4; 28:19; Ovaefeso 4:28. *

Ovalihomboli vamwe ovanyasha vomuAsia ova pandula neenghono efimano lomayele Ombiibeli. Ngaashi ovalihomboli vahapu vape, ova li tava kondjo nokuninga omalunduluko eshi tava shiivafana momaukwatya avo nosho yo okukundafana va manguluka. Ndele ova li va hovela okutula moilonga osho va lesha mOmbiibeli. Mbela osha li sha eta oidjemo ilipi? Vicent, omushamane, okwa ti: “Osho nda lesha mOmbiibeli osha kwafela nge ndi ungaunge nomashongo mohombo yetu monghedi yopahole. Okudulika kOmbiibeli okwe tu kwafela tu kale twa hafa monghalamwenyo yetu.” Omukulukadi waye, Annalou, okwa dimina a ti: “Okulesha oihopaenenwa mOmbiibeli oshe tu kwafela. Paife onda hafa nondi udite ombili mohombo yetu nosho yo shi na sha nomalalakano etu monghalamwenyo.”

Oto shiiva Kalunga. Kakele kwaasho Vicent a popya kombinga yohombo, okwa ti yo: “Eshi nda lesha Ombiibeli, paife ondi udite nda ehena popepi elela naJehova shi dulife nale.” Vicent okwa didilika oshinima sha fimanenena, osho kutya Ombiibeli otai dulu oku tu kwafela tu shiive Kalunga. Kungaho, ito ka mona ashike ouwa momayele aye, ndele oto ka mona kutya oto dulu oku mu shiiva e li kaume. Oto ka mona yo kutya okwa popya kombinga yonakwiiwa iwa, eshi to ka dula okuhafela “omwenyo waalushe.” (1 Timoteus 6:19) Kape na vali embo limwe la udaneka oshinima sha tya ngaho.

Ngeenge owa tokola okulesha Ombiibeli nokutwikila oku shi ninga, naave oto dulu okumona omauwa oo, okuxwepopaleka onghalamwenyo yoye paife nokushiiva Kalunga. Ndele eshi to lesha Ombiibeli, otashi dulika u ka kale u na omapulo mahapu. Ngeenge osho, dimbuluka oshihopaenenwa shiwa shelenga lokuEtiopia, olo la li ko omido 2 000 da pita. Ola li li na omapulo mahapu kombinga yOmbiibeli. Eshi la pulwa ngeenge oli udite ko osho tali lesha, ola ti: “Ohandi udu ko ngahelipi ngeenge kape na ou ta tula nge mondjila?” * Opo nee ola li la tambula ko nehalo liwa ekwafo laFilippus, oo a li nale omuhongi wOmbiibeli a pyokoka, omuhongwa waJesus wonale. (Oilonga 8:30, 31, 34) Sha faafana, ngeenge owa hala okushiiva shihapu kombinga yOmbiibeli, ohatu ku shivi u tume eindilo loye paintaneta ko-www.jw.org ile u shangele kuimwe yomeendjukifi oyo i li popepi naave odo di li moshifo eshi. Oto dulu yo okukwatafana nEendombwedi daJehova odo di li popepi naave ile u ye kOlupale lOuhamba lado olo li li moshitukulwa sheni. Omolwashike ito hovele okulesha Ombiibeli nena, ndele to efa i ku wilike u kale u na onghalamwenyo i li xwepo?

Ngeenge oto lipula kutya Ombiibeli oi shii ngoo okulineekelwa filufilu, alikana tala okavidio kaxupi ke na oshipalanyole, Ongahelipi hatu dulu okukala noushili kutya Ombibeli oi li paushili? Oto dulu oku ka mona mokusikana okode ile mokuya ko-jw.org, to findi opo pa shangwa Konga, ndele to tula mo oshipalanyole

^ okat. 8 Opo u mone oihopaenenwa ihapu yomayele Ombiibeli taa kwafa, inda konhele yetu yokointaneta, jw.org. Konga koshi yaapo pa shangwa OISHANGOMWA.

^ okat. 11 Tala yo oshitukulwa moshifo eshi shi na oshipalanyole: “Okuuda ko oinima pambabo osha nyika oshiponga

Lihonga shihapu

Ongahelipi omafinamhango Ombibeli hae tu etele ouwa?

Jesus okwa yelifa kutya omolwashike twa pumbwa ewiliko nomafinamhango Ombibeli avali elipi a fimanenena.

Mbela ou wete wa ehena popepi naKalunga?

Ovanhu omamiliyona ova tomhwa kutya Kalunga ohe va tale ko ve li ookaume kaye.

Mbela Kalunga oku na ngoo edina?

Kalunga oku na omadinafimaneko mahapu, ngaashi Omunaenghono adishe, Omushiti nosho yo Omwene. Ashike edina laKalunga ola holoka mOmbiibeli lwoikando i dulife po 7 000.