Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NOVEMBA 2015

 ONDJOKONONA YONGHALAMWENYO

Onda mona oshinima osho sha denga mbada

Onda mona oshinima osho sha denga mbada

Mo 1984 onguloshi imwe, onda li nda dikwa oshishani ndi li okakadona dingi ka-Hong Kong. Efano lange okwa li tali monika kombada yoileshomwa nokoifokundaneki. Onda li omwiimbi, handi ndanisha, handi yandje oipopiwa, handi ulikwa keeTV, handi djala oikutu yondilo nokukala novanenenhu ngaashi omupangeli waHong Kong.

Omudo wa ka landula ko, onda ka hovela okukufa ombinga meemuvi, nonda kala handi dana onghandangala luhapu. Ovatoolinghundana ova kala ve hole ondjokonona yange, ovafaneki omafano ange novanhu vahapu ova li hava shivi nge ngeenge tava pitifa eefilima, tava patulula eenhele dipe, tava li omusha nouvalelo. Onda li nda fimanekwa keshe pamwe.

Metifa lofiilima

Mokweendela ko kwefimbo, onda ka didilika kutya oinima aishe oyo kaya li ihokwifa ngaashi nda li handi diladila. Onda li handi kufa ombinga meemuvi da nyika oshiponga. Ngaashi ovakufimbinga meefilima doHollywood hava kongo ovanhu opo va dane peemhito odo da nyika oshiponga, naame onda li handi ningi sha faafana, ngaashi ngeenge tashi uya pokulonda kombada yohauto nomota. Eefilima dihapu odo nda li handi kufa ombinga oda li hadi ulike oluhaelo, elongifo leenghono noumhulile.

Mo 1995, onda li nda hombolwa komukwati weemuvi. Nonande onda li handi monika ndi na keshe osho tashi eta ehafo ngaashi okufimanekwa kovanhu, eliko nomushamane omunahole, onda li nda polimana nokunyika oluhodi. Onghee hano, onda li nda efa po okudana eemuvi.

ONDA DIMBULUKA EITAVELO LANGE LOKOUNONA

Onda li nda hovela okudimbuluka eitavelo lange lokounona. Olomakaya keshe ame nomumwamemekadona otwa li hatu ka talela po ovapambele vetu ovo ve li Eendombwedi daJehova. Tate Joe McGrath okwa li ha konakona Ombibeli nafye pamwe novanakadona vatatu. Oukwaneumbo wavo okwa li u nahole, na Tate Joe okwa li ha ungaunga nefimaneko nomukulukadi nounona vaye. Onda li yo handi hafele okuya pamwe navo kokwoongala kwopaKriste nokoyoongalele yavo. Onda li handi hafele omafimbo oo, nonda li ndi udite ombili.

Kakele kaasho, moukwaneumbo wetu omwa ka holoka omaupyakadi a kwata moiti. Onghedi yokukalamwenyo yatate okwa li hai etele meme oluhodi linene, noya li ye mu polimaneka. Eshi nda li lwopomido  omulongo, meme okwa li a efa po okweendafana nEendombwedi daJehova. Okudja opo onda kala inandi litula mo nonda ka ninginifwa pomido 17. Diva eshi nda ninginifwa, onda li nda kufa ombinga melihumbato lihe fi lopaKriste ndele handi kala ndihe fi vali oshilyo sheongalo.

ONDA LI NDA TOKOLA OKWAALUKA

Diva konima yohango yetu, ovakulunhuongalo vavali vomeongalo lEendombwedi daJehova lomoshitukulwa shetu ova li ve uya okutalela nge po. Ova li va yelifila nge nghee handi dulu okwaalukila kuJehova Kalunga, nova tula po elongekido opo Cindy oo e li omutumwa a kwafele nge. Pomhito oyo, kanda li vali ndi na eitavelo, onghee onda li nde mu pula a penge oumbangi oo tau ulike kutya Ombibeli eendjovo daKalunga shili. Okwa ulikila nge omaxunganeko Ombibeli oo a wanifwa nale. Kanini nakanini, otwa ninga omahewa opofingo, nokwa li a pula nge ndi konakone omahovelohongo Ombibeli naye. Onda li nde shi dimina. Oshikando ashike shotete, onda li nda mona kutya Jehova oKalunga omunahole nokwa hala ndi kale nda hafa.

Eshi nda hovela vali okuya kokwoongala kwopaKriste, onda li nda hafela unene okweendafana nEendombwedi shi dulife eshi nda li novanhu ovo hava kufa ombinga meemuvi. Kakele kaasho, oimoniwa yange yokounona oya li ya ningifa nge ndihe lineekele ovanhu, nokukala ndihe lihole. Ondombwedi imwe oya ulikila nge mOmbibeli nghee handi dulu okuungaunga nomaupyakadi oo opamaliudo, nonde lihonga yo okupanga oukaume nookaume kashili.

OSHINIMA OSHO SHA DENGA MBADA

Mo 1997, ame nomushamane wange otwa li twa tembukila koAmerika, Hollywood, moCalifornia. Onda li nda hovela okukwafela ovanhu va mone ouwa okudja mEendjovo daKalunga. Okuhonga ovanhu Ombibeli osha etela nge ehafo linene li dule olo nda li handi mono meemuvi. Pashihopaenenwa, mo 2002, onda shakeneka Cheri, oo nde mu shiivila koHong Kong. Otwa li tu na omaifano a faafana. Oye a li okakadona dingi kaHong Kong mo 1983. Eshi nda li nda findana oshishani oye a li e shi dika nge. Okwa li yo a ninga omudani weemuvi nolwanima okwa ka ninga omukwati wado, ha longo novawiliki veemuvi ovo va shiivika apeshe. Ngaashi ame, naye okwa li a tembukila koHollywood.

Onda li nda etela Cheri onghenda eshi nda uda kutya omuvaleki waye okwa fya ombadilila koudu womutima. Ka li a mona ehekeleko melongelokalunga lavo lOshibudda. Nonande okwa e na oinima oyo tai monika ya denga mbada oyo vahapu ve i hala, naye okwa li a nyika oluhodi nokukala i nelineekela ovanhu. Onda kundafana naye osho nde lihonga mOmbibeli, ashike osha li shidjuu kuye oku shi tambula ko omolweitavelo laye lOshibudda.

Kahewa kange Cheri ta ulikwa momuvi

Efiku limwe mo 2003, okwa li a ifana nge ndi uye kuye koVancouver, koCanada oko a li ta ningi ofeelema. Okwa lombwela nge kutya okwa li a kuminwa eshito ndele ta hovele okwiilikana mokule ta ti: “Olyelye Kalunga kashili? Edina loye olyelye?” Okudja opo, okwa shinga a pita pOlupale lOuhamba nokwa mona edina Jehova. Okwa li a mona kutya Kalunga okwa nyamukula eilikano laye, nokwa li a halelela okumona Eendombwedi daJehova diva. Onda ninga omalongikido, moule ashike womafiku manini okwa a li a ya keongalo oko haku popiwa elaka lOshichina moVancouver.

 Lwanima Cheri okwa lombwela nge ta ti: “Ovanhu ava ova ulikila nge kutya ove na ko nasha naame. Ohandi dulu oku va lombwela nghee ndi udite.” Onda li nda hafa neenghono okuuda ngaho, molwaashi Cheri eshi a li meemuvi ina kala a panga oukaume novanhu. Cheri okwa kala hai kokwoongala. Ashike mo 2005, okwa li a ninga eano opo a pitife eefilima mbali moChina, noshe shi ningifa shipu opo a shune koHong Kong. Mo 2006, Cheri okwe liyapulila Jehova nokuninginifwa poshoongalele shEendombwedi daJehova moHong Kong. Nonande okwa li a hala okulongela Jehova pauyadi, oilonga yaye mehangano leemuvi oye shi ningifa shidjuu neenghono, nosha li she mu udifa nai unene.

EHAFO OLO HALI DI MOKUKWAFELA VAMWE

Onghalo yaCheri okwa li ya lunduluka mo 2009. Okwa li a tokola okufiya po ehangano leemuvi opo a longele Jehova pauyadi. Okwa mona ookaume vahapu vape meongalo lopaKriste. Okwa ninga omuudifi wefimbo li yadi wonghundana iwa yOuhamba noha kala a hafa eshi ta kwafele ovanhu va kale nonghedi yokukalamwenyo ya denga mbada. — Mateus 24:14.

Cheri okwa li a tokola okulihonga elaka lOshinepali opo a yambidide ongudu oyo ya li tai kulu yovapopi velaka olo vEendombwedi moHong Kong. Ovanepali vahapu ovo ve li moHong Kong ove hole okulidimbika ovanhu ile okulihandukifa molwaashi kave shii naanaa Oshiingilisha ile Oshichina nomolweputuko lavo li lili. Cheri okwa yelifila nge nghee a hafele oku va kwafela opo va ude ko Ombibeli. Pashihopaenenwa, efiku limwe ofimbo a li ta longo eumbo neumbo, okwa shakeneka omukainhu Omunepali oo a li ashike e shii kanini kombinga yaJesus ndele ke shii Kalunga kashili, Jehova. Cheri okwe mu ulikila mOmbibeli kutya Jesus okwa li a ilikana kuXe womeulu. Eshi omukainhu oo a didilika kutya oku na okwiilikana kuJehova, okwa li a tambula ko onghundana iwa. Diva omushamane waye nokamonakadona kavo navo ova li va hovela okukonakona Ombibeli. — Epsalme 83:18, NW; Lukas 22:41, 42.

Cheri kunena

Eshi nda mona nghee Cheri ta hafele oilonga yokuudifa yefimbo li yadi, onde lipula kutya, ‘Oshike mbela tashi imbi nge ndiha ninge ngaashi ye?’ Pefimbo opo, naame onda li moHong Kong. Onda tokola okuliunganekulula opo ndi ye moilonga yefimbo li yadi ndi honge ovanhu oshili yOmbibeli. Onda mona kutya okukala handi pwilikine kovanhu noku va kwafela va ude ko Eendjovo daKalunga okwa etela nge ehafo lashili.

Onda mona kutya okukwafela ovanhu va ude ko Eendjovo daKalunga okwa etela nge ehafo lashili

Pashihopaenenwa, onda li nda konakona nomukainhu Omuvietnam, oo a kala a nyika oluhodi, noikando ihapu okwa li ha kala ta lili. Paife okwa mona ehafo lashili monghalamwenyo nota hafele eendafano liwa neongalo.

Ame naCheri otwa mona osho sha denga mbada. Nonande mehangano leemuvi omo twa li omuhokwifa notwa li ovanamadina, okuhonga ovanhu kombinga yaJehova Kalunga okuhafifa neenghono molwaashi ohaku mu tumbalekifa. Otwa mona oushili weendjovo daJesus odo tadi ti: “Okuyandja oku nelao komesho yokutambula.” — Oilonga 20:35.