Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO NOVEMBA 2015

 OSHIPALANYOLE SHOKOMBADA

Eendombwedi daJehova odo oolyelye?

Eendombwedi daJehova odo oolyelye?

Becky, wokoCalifornia, U.S.A okwa ti: “Onda kala ndi shii Mike oule womido. Oku li umwe womEendombwedi daJehova. Ashike onda kala handi lipula shi na sha nelongelokalunga lavo. Olyelye Jehova? Omolwashike Eendombwedi ihadi dana omafiku omafudo? Mbela Mike ove li ashike okangudu kanini?

Zenon, Ontario, wokoKanada okwa ti: “Eshi ovashiinda shange va hovela okukonakona Ombibeli nEendombwedi daJehova, onda li handi lipula kutya: ‘Outumbulilo Eendombwedi daJehova owa hala okutya ngahelipi? Kanda li nda uda nale edina lelongelokalunga olo!’”

Kent, Washington, woko-U.S.A okwa ti: “Ame nomukulukadi wange otwa li hatu diladila kutya Eendombwedi daJehova ohadi tu talele po opo tuha kale tu udite ondjo molwaashi katwa li hatu i kongeleka. Otwa li hatu diladila kutya odi li omalongelokalunga onale oo twa li inatu pumbwa nodi li okangudu kehe shiivike.”

Cecilie, Esbjerg, wokoDenmark okwa ti: “Kanda li ndi shii kutya odo oolyelye noshike da itavela.”

Otashi dulika naave ho di mono tadi udifa eumbo neumbo ile meenhele daaveshe, tadi yandje oileshomwa ya kanghamena kOmbibeli ile tadi konakona novanhu Ombibeli. Otashi dulika umwe womudo e ku pa oshileshomwa. Ashike natango otashi dulika u lipule kutya Eendombwedi daJehova odo naanaa oolyelye? Ngeenge naave oho lipula ngaho, omadiladilo oye okwa faafana nalimwe lomwaao a tumbulwa metetekelo.

Ngeenge ou na omapulo e na sha nado noho kala wa limbililwa, mbela openi to dulu okuhanga omanyamukulo? Ongahelipi to dulu okulihonga osho Eendombwedi daJehova da itavela, nghee oilonga yado neenhele omo hadi ongalele hadi futwa? Omolwashike hadi udifa eumbo neumbo nomeenhele daaveshe?

Cecilie oo a popiwa pehovelo okwa ti: “Ohandi lesha ouyelele muhapu kointaneta u na sha nado. Ohandi udu omitotolombo nomapopyo mahapu tadi popilwa mowii. Naasho osha ningifa nge ndi kale netaleko lii li na sha nado.” Lwanima okwa ka popya nEendombwedi daJehova odikilila nokwa mona omanyamukulo taa mbilipaleke komapulo aye.

Mbela ino hala okumona omanyamukulo ashili omapulo oye e na sha nEendombwedi daJehova? Ohatu ku ladipike u mone odjo youyelele washili, u kwatafane nEendombwedi daJehova dovene, odo da nyanyangida oshifo eshi. (Omayeletumbulo 14:15) Otwe lineekela oitukulwa tai landula otai ke ku kwafela u mone kutya Eendombwedi daJehova odo oolyelye, osho da itavela nokushiiva oilonga yado.