Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

OSHUNGONANGELO SEPTEMBA 2015

 OSHIPALANYOLE SHOKOMBADA | OKU NA NGOO SHILI ENYUMUKO?

Oonakufya ove na ngoo eteelelo lasha?

Oonakufya ove na ngoo eteelelo lasha?

Otava dulu ngoo okunyumuka?

ENYAMUKULO LOPAMBIBELI: ‘Osheshi efimbo tali uya, opo aveshe ava va kala meembila otava udu ondaka yaye [Jesus] ndee tava hololoka mo.’ — Johannes 5:28, 29.

Jesus okwa xunganeka efimbo lokomesho, koshi yepangelo laye lOuhamba, opo eembila itadi ka kala vali ovanhu. Fernando oo a popiwa moshitukulwa sha tetekela okwa ti, “Osha li sha kumwifa nge unene eshi nda lesha Johannes 5:28, 29 oshikando shotete. Osha kwafela nge ndi kale ndi na eteelelo lashili, nokuhovela okudiladila nda mana mo kombinga yonakwiiwa.”

Pefimbo lOmbibeli, omulumenhu omudiinini Job okwa li eshi kutya ngeenge okwa fi Kalunga ote ke mu nyumuna. Job okwa pula a ti: “Omunhu ngeenge ta fi, ota ka nyumuka tuu vali?” Okwa nyamukula nelineekelo a ti: “Ngeno ndi kale nokunangela omafiku aeshe oukwaita wange fiyo olufo lange lokumanguluka la fika. Ove ngeno u ifane, ame nohandi ku nyamukula.” — Job 14:14, 15.

Enyumuko laLasarus ole tu pa eteelelo lomonakwiiwa

Enyumuko kala li oshinima shipe komumwaina waLasarus, Marta. Konima yefyo laLasarus, Jesus okwa ti kuMarta: “Omumwanyoko ota nyumuka.” Marta okwa nyamukula a ti: “Ondi shi shii nokutya, ota nyumuka menyumuko mefiku laxuuninwa.” Jesus okwa ti kuye: “Aame enyumuko nomwenyo; ou ta itavele nge ota kala nomwenyo, nande na hangike a fya.” (Johannes 11:23-25) Opo nee Jesus okwa li a nyumuna diva Lasarus. Ehokololo olo litunhula otali tu pe efano loiningwanima oyo tai ka ningwa monakwiiwa. Diladila ashike enyumuko olo tali ka ningwa mounyuni aushe!

Mbela ope na vamwe tava ka nyumukila omwenyo womeulu?

ENYAMUKULO LOPAMBIBELI: Eendjovo daKalunga otadi ulike kutya enyumuko laJesus ola yooloka ko komanyumuko akwao ahetatu oo a tumbulwa mOmbibeli. Aveshe vahetatu ova li va nyumukila kombada yedu. Ndele ongahelipi shi na sha nenyumuko laJesus? Ombibeli oya ti: ‘Oye ou [Jesus Kristus] okwa ya meulu nokwa kala kolulyo laKalunga.’ (1 Petrus 3:21, 22) Mbela Jesus oye aeke a nyumukila omwenyo womeulu? Jesus okwa hangwa opo a lombwele ovahongwa vaye a ti: “Nande ohandi i ndi ke mu [longele] onhele, ohandi aluka, ndele handi mu ile, nanye yo mu kale apa Ame ndi li.” — Johannes 14:3.

Kristus okwa ya meulu a ka longekidile ovahongwa vaye vamwe eenhele. Ovo tava nyumukile omwenyo womeulu ove li 144 000. (Ehololo 14:1, 3) Ndele mbela ovalanduli vaJesus ovo vopopepi elela otava ka ninga shike meulu?

 Otava ka kala ve lipyakidila neenghono! Omishangwa otadi ti: “Omunelao nomuyapuki oye ou ta mono onhele yomenyumuko eli lotete. Efyo etivali kali neenghono oku va pangela, ndelenee ovo otava ka ninga ovapristeri vaKalunga novaKristus, ndele tava ka pangela pamwe naye ngaashi eehamba omido eyovi limwe.” (Ehololo 20:6) Ovo tava nyumukile omwenyo womeulu otava ka pangela kombada yedu pamwe naKristus ve li eehamba novapristeri.

Oolyelye tava ka nyumukila kombada yedu?

ENYAMUKULO LOPAMBIBELI: Omuyapostoli Paulus okwa popya mOmishangwa da nwefwa mo a ti: ‘Nondi neteelelo olo lomuKalunga, navo vene ngaashi ve li kwete yo, nokutya, otaku ka kala enyumuko lovayuki nolovalunde.’ Oilonga 24:15.

Eendjovo daKalunga ode tu shilipaleka kutya ovanhu omabiliyona ovo va fya otava ka nyumunwa

Oolyelye va kwatelwa mongudu oyo Paulus a popya kutya ‘oyovayuki’? Tala koshihopaenenwa: Omulumenhu omudiinini Daniel okwa li a lombwelwa pexulilo lokukalamwenyo kwaye taku ti: “Ove u tulumukwe, ndele u nyumukile oshipewa shoye pexulilo lomafiku.” (Daniel 12:13) Openi Daniel ta ka pendukila okudja meemhofi defyo? “Ovayuki, vo otava ka fyuulula oshilongo, ndee tava kala mo alushe.” (Epsalme 37:29) Jesus okwa ti: “Ovanelao ovananheni, osheshi ovo tava ka fyuulula edu.” (Mateus 5:5) Daniel nosho yo ovalumenhu novakainhu ovadiinini otava ka nyumuka va ka kale nomwenyo kombada yedu fiyo alushe.

Oolyelye va kwatelwa mongudu oyo Paulus a popya kutya ‘oyovalunde’? Ovanhu omabiliyona ovo va fya inava mona omhito yokuuda nokulihonga oshili yOmbibeli. Konima yenyumuko lavo otava ka mona eshiivo lashili lokupandula Jehova * naJesus. (Johannes 17:3) Aveshe ovo va hoolola okulongela Kalunga, otava ka kala nomwenyo fiyo alushe.

Aveshe ovo va hoolola okulongela Kalunga otava ka kala nomwenyo fiyo alushe ve na oukolele welixwa po nova hafa

Edu otali ka kala monghalo ya tya ngahelipi?

ENYAMUKULO LOPAMBIBELI: Kalunga ‘ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.’ (Ehololo 21:4) “Otava ka dika omaumbo ndee tava kala mo, ndele tava twike oikokola yomiviinyu, ndee tava li oiimati yayo.” — Jesaja 65:21.

Diladila nee ngeno u li monghalo oyo novaholike voye ovo va nyumunwa! Ashike epulo oli li apa kutya, ongahelipi to dulu okukala noushili kutya enyumuko otali ka ningwa shili?

^ okat. 15 Jehova olo edina laKalunga ngaashi sha popiwa mOmbibeli.

Lihonga shihapu

Elalakano laKalunga olashike li na sha nedu?

Ombibeli oya yelifa kutya omolwashike Kalunga a shita edu, onaini okumona oixuna taku ka xula po noshike tashi ka ningilwa edu nosho ovo tava ka kala ko.